سیدنا عبدالرحمن بن سمرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے عبدالرحمن! تم حکومتی عہدے کا سوال نہ کرنا کیونکہ اگر یہ تمہیں مانگنے سے ملے گا تو تمہیں اس کے حوالے کر دیا جائے گا اور اگر یہ تمہیں مانگے بغیر مل جائے گا تو اس بارے میں تمہاری مدد کی جائے گی اور جب تم کسی قسم کے بارے میں حلف اٹھا لو اور تم اس کے علاوہ دوسری صورت کو اس سے زیادہ بہتر پاؤ تو وہ کام کرو جو زیادہ بہتر ہے اور اپنی قسم کا کفارہ دے دو۔“ [صحیح ابن حبان/كتاب الأيمان/حدیث: 4348]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی قسم اٹھائے اور پھر اس کے علاوہ کام کو اس سے زیادہ بہتر محسوس کرے تو اسے اپنی قسم کا کفارہ دے دینا چاہیے اور وہ کام کرنا چاہیے جو زیادہ بہتر ہے۔“ [صحیح ابن حبان/كتاب الأيمان/حدیث: 4349]

سیدنا عبدالرحمن بن ابوبکر رضی اللہ عنہما بیان کرتے ہیں: ایک مرتبہ ہمارے ہاں کچھ مہمان آ گئے، میرے والد نماز کے وقت (عشاء کے بعد دیر تک) نبی اکرم صلی اللہ علیہ وسلم کے ساتھ بات چیت کیا کرتے تھے، جب وہ (نبی اکرم صلی اللہ علیہ وسلم کی خدمت میں) جانے لگے تو انہوں نے فرمایا: اے عبدالرحمٰن! مہمانوں کو کھانا کھلا دینا۔ جب شام ہوئی تو میں کھانا لے کر ان کے پاس آیا تو انہوں نے کھانا کھانے سے انکار کر دیا اور یہ کہا: جب تک تمہارے والد گھر واپس نہیں آتے اور ہمارے ساتھ کھانا نہیں کھاتے (ہم اس وقت تک کھانا نہیں کھائیں گے)۔ میں نے کہا: وہ غصے والے آدمی ہیں، اگر آپ لوگوں نے کھانا نہ کھایا تو مجھے یہ اندیشہ ہے وہ میری پٹائی کریں گے، لیکن مہمانوں نے یہ بات نہیں مانی۔ جب سیدنا ابوبکر رضی اللہ عنہ واپس تشریف لائے تو انہوں نے دریافت کیا: آپ لوگوں نے کھانا کھا لیا ہے؟ مہمانوں نے جواب دیا: جی نہیں، اللہ کی قسم! (ہم نے کھانا نہیں کھایا)۔ سیدنا ابوبکر رضی اللہ عنہ نے فرمایا: کیا میں نے عبدالرحمن کو یہ ہدایت نہیں کی تھی (کہ وہ آپ کو کھانا کھلا دے)؟ سیدنا عبدالرحمٰن رضی اللہ عنہما بیان کرتے ہیں: میں ایک طرف ہٹ چکا تھا، انہوں نے (بلند آواز میں) کہا: میں تمہیں قسم دیتا ہوں کہ اگر تم میری آواز سن رہے ہو تو آ جاؤ، تو میں آگیا۔ میں نے کہا: اللہ کی قسم! میرا کوئی قصور نہیں ہے، یہ آپ کے مہمان موجود ہیں، آپ ان سے دریافت کر لیں، میں ان کے پاس کھانا لے کر آیا تھا، لیکن انہوں نے اس وقت تک کھانے سے انکار کر دیا جب تک آپ نہیں آ جاتے۔ تو سیدنا ابوبکر رضی اللہ عنہ نے دریافت کیا: کیا وجہ ہے آپ لوگوں نے کھانا کیوں قبول نہیں کیا۔ سیدنا ابوبکر رضی اللہ عنہ نے یہ کہہ دیا: اللہ کی قسم! آج رات میں کھانا نہیں کھاؤں گا۔ مہمانوں نے کہا: اللہ کی قسم! ہم بھی اس وقت تک کھانا نہیں کھائیں گے جب تک آپ نہیں کھائیں گے۔ تو سیدنا ابوبکر رضی اللہ عنہ نے فرمایا: میں نے آج رات جیسی مشکل صورت کبھی نہیں دیکھی، پھر سیدنا ابوبکر رضی اللہ عنہ نے فرمایا: جہاں تک پہلی قسم کا تعلق ہے تو وہ شیطان کی طرف سے ہو گئی۔ آپ لوگ کھانے کی طرف آئیں، پھر کھانا لایا گیا، سیدنا ابوبکر رضی اللہ عنہ نے «بِسْمِ اللّٰهِ» ”اللہ کے نام سے“ پڑھی اور کھانا کھا لیا، مہمانوں نے بھی کھانا کھا لیا۔ اگلے دن سیدنا ابوبکر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! ان لوگوں نے تو نیکی کر لی اور میں حانث ہو گیا، تو نبی اکرم صلی اللہ علیہ وسلم نے ارشاد فرمایا: ”تم ان سب سے زیادہ نیک اور ان سب سے بہتر ہو۔“ [صحیح ابن حبان/كتاب الأيمان/حدیث: 4350]

سیدنا عمران بن حصین رضی اللہ عنہ بیان کرتے ہیں کہ سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے تاکہ اپنی قوم سے تعلق رکھنے والے کچھ لوگوں کے لیے سواری کے جانور حاصل کریں، نبی اکرم صلی اللہ علیہ وسلم نے ارشاد فرمایا: ”اللہ کی قسم! میں ان لوگوں کو سواری فراہم نہیں کروں گا“، پھر نبی اکرم صلی اللہ علیہ وسلم کی خدمت میں کچھ اونٹ لائے گئے، آپ صلی اللہ علیہ وسلم نے انہیں الگ الگ کروایا، ان میں سے پندرہ اونٹ باقی رہ گئے، آپ صلی اللہ علیہ وسلم نے دریافت فرمایا: ”عبداللہ بن قیس کہاں ہے؟“ انہوں نے جواب دیا: وہ یہاں ہے، نبی اکرم صلی اللہ علیہ وسلم نے فرمایا: ”تم انہیں حاصل کر لو اور ان پر اپنی قوم کے افراد کو سوار کرواؤ“، انہوں نے عرض کی: یا رسول اللہ صلی اللہ علیہ وسلم ! آپ نے تو قسم اٹھائی تھی (کہ آپ صلی اللہ علیہ وسلم ہمیں سواری کے لیے جانور نہیں دیں گے)، نبی اکرم صلی اللہ علیہ وسلم نے فرمایا: ”اگرچہ میں نے قسم اٹھائی تھی (لیکن تم پھر بھی اسے حاصل کر لو)“۔ [صحیح ابن حبان/كتاب الأيمان/حدیث: 4351]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کوئی قسم اٹھائے اور پھر اس کے علاوہ کام کو اس سے زیادہ بہتر سمجھے تو اسے وہ کام کرنا چاہیے جو بہتر ہو اور اپنی قسم کا کفارہ دے دینا چاہیے۔“ [صحیح ابن حبان/كتاب الأيمان/حدیث: 4352]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب کوئی قسم اٹھاتے تھے تو آپ صلی اللہ علیہ وسلم اس کے برخلاف نہیں کیا کرتے تھے، یہاں تک کہ قسم کے کفارے سے متعلق آیت نازل ہو گئی، تو نبی اکرم صلی اللہ علیہ وسلم نے ارشاد فرمایا: ”اب میں جو بھی قسم اٹھاؤں گا اور اس کے علاوہ صورت کو زیادہ بہتر سمجھوں گا، تو میں وہ کام کروں گا جو زیادہ بہتر ہے اور اپنی قسم کا کفارہ دے دوں گا۔“ [صحیح ابن حبان/كتاب الأيمان/حدیث: 4353]

سیدنا ابوموسیٰ اشعری رضی اللہ عنہ بیان کرتے ہیں کہ ہم لوگ پیدل تھے، ہم نبی اکرم صلی اللہ علیہ وسلم کی خدمت میں سواری کے لیے جانور مانگنے کے لیے حاضر ہوئے تو نبی اکرم صلی اللہ علیہ وسلم نے ارشاد فرمایا: ”اللہ کی قسم! آج میں تمہیں سواری کے لیے جانور نہیں دوں گا“ (راوی کو شک ہے شاید یہ الفاظ ہیں) ”اللہ کی قسم! میں تمہیں سواری کے لیے جانور نہیں دوں گا۔“ راوی بیان کرتے ہیں کہ جب ہم اپنی رہائشی جگہ پر واپس آ گئے (راوی کو شک ہے شاید یہ الفاظ ہیں) جب ہم اپنی رہائشی جگہ کی طرف واپس آنے لگے تو اس وقت نبی اکرم صلی اللہ علیہ وسلم کی خدمت میں کچھ اونٹ لائے گئے۔ نبی اکرم صلی اللہ علیہ وسلم نے ان میں سے سفید کوہان والے تین اونٹ ہماری طرف بھجوا دیئے، ہم میں سے کسی ایک نے دوسرے سے کہا: کیا ہم اس پر سوار ہوں جب کہ نبی اکرم صلی اللہ علیہ وسلم یہ قسم اٹھا چکے ہیں (کہ آپ صلی اللہ علیہ وسلم ہمیں سواری کے لیے اونٹ نہیں دیں گے)؟ تو ہم نبی اکرم صلی اللہ علیہ وسلم کی خدمت میں حاضر ہوئے، ہم نے عرض کی: اے اللہ کے نبی! آپ صلی اللہ علیہ وسلم نے تو قسم اٹھائی ہوئی ہے، نبی اکرم صلی اللہ علیہ وسلم نے فرمایا: ”اللہ کی قسم! میں نے تمہیں سواری کے لیے اونٹ نہیں دیئے بلکہ اللہ تعالیٰ نے تمہیں سواری کے لیے جانور دیئے ہیں، روئے زمین پر میں جو بھی قسم اٹھاؤں اور پھر اس کے علاوہ صورت حال کو اس سے بہتر سمجھوں گا تو میں وہ کام کروں گا (جو زیادہ بہتر ہو)“ یہاں ایک لفظ کے بارے میں راوی کو شک ہے۔ [صحیح ابن حبان/كتاب الأيمان/حدیث: 4354]

سعید بن مسیّب رحمہ اللہ بیان کرتے ہیں کہ انصار سے تعلق رکھنے والے دو بھائی تھے جن کے درمیان وراثت سے متعلق کوئی مسئلہ تھا، ان میں سے ایک نے دوسرے سے تقسیم کا مطالبہ کیا تو اس نے کہا: اگر تم نے دوبارہ مجھ سے تقسیم کا مطالبہ کیا، تو میں تمہارے ساتھ کبھی بات چیت نہیں کروں گا اور یہ سارا مال خانہ کعبہ کے خزانے کے لیے مخصوص ہو جائے گا، تو سیدنا عمر بن خطاب رضی اللہ عنہ نے فرمایا: بے شک خانہ کعبہ تمہارے مال سے بے نیاز ہے، تم اپنی قسم کا کفارہ دو اور اپنے بھائی کے ساتھ بات چیت کرو کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”کسی گناہ کے کام میں، رشتے داری کے حقوق کی پامالی کے حوالے سے اور جو چیز تمہاری ملکیت میں نہ ہو اس کے بارے میں نہ تو تم پر کوئی قسم لازم ہو گی اور نہ ہی نذر لازم ہو گی۔“ [صحیح ابن حبان/كتاب الأيمان/حدیث: 4355]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قسم یا تو توڑنی پڑتی ہے یا پھر ندامت کا شکار کرتی ہے۔“ (امام ابن حبان رحمہ اللہ فرماتے ہیں:) بشار نامی راوی کے حوالے سے اس روایت کے علاوہ کوئی اور ”مرفوع“ حدیث منقول نہیں ہے، یہ صاحب مسعر بن کدام کے بھائی ہیں، ابوشعشاء نامی راوی کا نام علی بن حصین بن سلیمان واسطی ہے، یہ راوی ثقہ ہے۔ [صحیح ابن حبان/كتاب الأيمان/حدیث: 4356]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اپنے باپ دادا یا ماؤں کے نام کی یا اپنے بتوں کے نام کی قسم نہ اٹھاؤ، تم لوگ صرف اللہ کے نام کی قسم اٹھاؤ اور تم اسی وقت قسم اٹھاؤ جب تم سچے ہو۔“ [صحیح ابن حبان/كتاب الأيمان/حدیث: 4357]