سیدنا عبداللہ بن عمرو بن العاص رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے دس آیتوں سے قیام کیا وہ غافلوں میں شمار نہیں ہوتا، اور جو سو آیتوں سے قیام کرے وہ «قَانِتِينَ» (عابدین) میں لکھا جاتا ہے، اور جو ہزار آیتوں سے قیام کرے وہ «الْمُقَنْطِرِينَ» (بےانتہا ثواب جمع کرنے والوں) میں لکھا جاتا ہے۔“ امام ابوداؤد رحمہ اللہ کہتے ہیں کہ ابن حجیرہ الاصغر سے مراد عبداللہ بن عبدالرحمٰن بن حجیرہ ہے۔ [سنن ابي داود/أبواب قراءة القرآن وتحزيبه وترتيله /حدیث: 1398]

سیدنا عبداللہ بن عمرو بن العاص رضی اللہ عنہما بیان کرتے ہیں کہ ایک شخص رسول اللہ صلی اللہ علیہ وسلم کی خدمت میں حاضر ہوا اور کہنے لگا: ”اے اللہ کے رسول! مجھے کچھ قرآن پڑھائیے۔“ آپ صلی اللہ علیہ وسلم نے فرمایا: ”تین سورتیں پڑھو جن کی ابتداء میں «الراء» ہے“ (یونس، ہود اور یوسف)۔ اس نے کہا: ”میری عمر بڑی ہو گئی ہے، دل سخت ہو گیا ہے (نسیان غالب ہے) اور زبان موٹی ہو گئی ہے (اس وجہ سے یہ بڑی بڑی سورتیں یاد نہیں کر سکتا)۔“ آپ صلی اللہ علیہ وسلم نے فرمایا: ”تو «حم» والی تین سورتیں پڑھ لو۔“ اس پر بھی اس نے اپنی پہلی بات ہی کہی۔ آپ صلی اللہ علیہ وسلم نے فرمایا: ”تو «المسبحات» والی تین سورتیں یاد کر لو“ (جن کے شروع میں «سبح» یا «يسبح» آتا ہے)۔ اس پر بھی اس نے اپنی وہی بات دہرائی اور کہنے لگا: ”اے اللہ کے رسول! مجھے کوئی جامع سورت پڑھا دیجئیے۔“ تو نبی کریم صلی اللہ علیہ وسلم نے اس کو سورۃ ﴿إِذَا زُلْزِلَتِ الْأَرْضُ زِلْزَالَهَا﴾ [سورة الزلزلة: 1] پڑھائی، آخر تک۔ تب وہ شخص کہنے لگا: ”قسم اس ذات کی جس نے آپ کو حق کے ساتھ بھیجا ہے! میں اس سے کبھی زیادہ نہ کروں گا۔“ پھر وہ پیٹھ پھیر کر چلا گیا تو نبی کریم صلی اللہ علیہ وسلم نے دو مرتبہ فرمایا: ”اس چھوٹے سے مرد نے نجات پائی۔“ [سنن ابي داود/أبواب قراءة القرآن وتحزيبه وترتيله /حدیث: 1399]

سیدنا ابوہریرہ رضی اللہ عنہ، نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”قرآن کریم کی ایک سورت تیس آیتوں والی، اپنے پڑھنے والے کے لیے سفارش کرے گی، حتیٰ کہ اسے بخش دیا جائے گا۔“ (مراد ہے) ﴿تَبَارَكَ الَّذِي بِيَدِهِ الْمُلْكُ﴾ [سورة الملك: 1] [سنن ابي داود/أبواب قراءة القرآن وتحزيبه وترتيله /حدیث: 1400]