سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے ایک گدھا دیکھا جس کے چہرے پر داغ لگایا گیا تھا، تو آپ صلی اللہ علیہ وسلم نے اس بات کا انکار کیا، آپ صلی اللہ علیہ وسلم نے ارشاد فرمایا: ”اللہ کی قسم! میں تو اس کے جسم کے اس حصے پر داغ لگاؤں گا جو چہرے سے سب سے زیادہ دور ہو۔“ پھر نبی اکرم صلی اللہ علیہ وسلم نے اس گدھے کے بارے میں حکم دیا تو اس کے رانوں کے حصے پر داغ لگایا گیا، یہ وہ پہلا جانور تھا جس کے رانوں کے حصے پر داغ لگایا گیا۔ [صحیح ابن حبان/كتاب الحظر والإباحة/حدیث: 5625]

سیدنا جابر بن عبداللہ رضی اللہ عنہما بیان کرتے ہیں کہ ایک گدھا نبی اکرم صلی اللہ علیہ وسلم کے پاس سے گزرا جس کے چہرے پر داغ لگایا گیا تھا اور اس کے نتھنوں سے خون بہہ رہا تھا، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ اس شخص پر لعنت کرے جس نے ایسا کیا“، پھر نبی اکرم صلی اللہ علیہ وسلم نے چہرے پر داغ لگانے اور چہرے پر مارنے سے منع فرمایا۔ [صحیح ابن حبان/كتاب الحظر والإباحة/حدیث: 5626]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک گدھا دیکھا جس کے چہرے پر داغ لگایا گیا تھا، تو آپ صلی اللہ علیہ وسلم نے فرمایا: ”کیا میں نے اس سے منع نہیں کیا؟ اللہ تعالیٰ اس شخص پر لعنت کرے جس نے ایسا کیا ہے۔“ [صحیح ابن حبان/كتاب الحظر والإباحة/حدیث: 5627]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم کا گزر ایک گدھے کے پاس سے ہوا جسے چہرے پر داغ لگایا گیا تھا، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ اس شخص پر لعنت کرے جس نے یہ داغ لگایا ہے۔“ [صحیح ابن حبان/كتاب الحظر والإباحة/حدیث: 5628]

سیدنا انس بن مالک رضی اللہ عنہ بیان کرتے ہیں: میں اپنے چھوٹے بھائی کو لے کر نبی اکرم صلی اللہ علیہ وسلم کی خدمت میں حاضر ہوا تاکہ آپ اسے گھٹی دیں، میں نے نبی اکرم صلی اللہ علیہ وسلم کو باغ میں پایا، آپ بکریوں کو داغ لگا رہے تھے۔ شعبہ نامی راوی کہتے ہیں: میرا غالب گمان یہ ہے کہ روایت میں یہ الفاظ بھی ہیں: آپ ان کے کانوں پر داغ لگا رہے تھے۔ [صحیح ابن حبان/كتاب الحظر والإباحة/حدیث: 5629]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص سانپ کو مار دیتا ہے اسے سات نیکیاں ملیں گی اور جو شخص چھپکلی کو مار دیتا ہے اسے ایک نیکی ملے گی۔“ [صحیح ابن حبان/كتاب الحظر والإباحة/حدیث: 5630]

سائبہ نامی خاتون بیان کرتی ہیں کہ وہ سیدہ عائشہ رضی اللہ عنہا کی خدمت میں حاضر ہوئیں، تو انہوں نے سیدہ عائشہ رضی اللہ عنہا کے گھر میں ایک نیزہ رکھا ہوا دیکھا، انہوں نے دریافت کیا: اے ام المؤمنین! آپ اس کے ذریعے کیا کرتی ہیں؟ سیدہ عائشہ رضی اللہ عنہا نے جواب دیا: ہم اس کے ذریعے چھپکلیاں مارتے ہیں کیونکہ نبی اکرم صلی اللہ علیہ وسلم نے ہمیں یہ بات بتائی ہے: ”جب سیدنا ابراہیم علیہ السلام کو آگ میں ڈالا گیا، تو روئے زمین پر موجود ہر جانور نے اس آگ کو بجھانے کی کوشش کی صرف چھپکلی نے ایسا نہیں کیا، یہ اس پر پھونک مار رہی تھی (تاکہ وہ آگ زیادہ بھڑکے)، تو نبی اکرم صلی اللہ علیہ وسلم نے اسے قتل کرنے کا حکم دیا ہے۔“ [صحیح ابن حبان/كتاب الحظر والإباحة/حدیث: 5631]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ”پانچ فاسق جانوروں کو حل اور حرم (ہر جگہ) مار دینے کا حکم دیا ہے: چیل، کوا، چوہا، بچھو اور پاگل کتا۔“ [صحیح ابن حبان/كتاب الحظر والإباحة/حدیث: 5632]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”پانچ (قسم کے جانور) فاسق ہیں، انہیں حل اور حرم (ہر جگہ) قتل کیا جا سکتا ہے: بچھو، چیل، کوا، چوہا اور پاگل کتا۔“ (امام ابن حبان رحمہ اللہ فرماتے ہیں:) روایت میں سے مختصر وہ روایت ہوتی ہے جو صحابی نبی اکرم صلی اللہ علیہ وسلم کے حوالے سے نقل کر دیتا ہے جو کسی عادل شخص نے نبی اکرم صلی اللہ علیہ وسلم کے حوالے سے ان الفاظ میں نقل کی ہوتی ہے تو اس پر عمل ہر وقت میں کیا جائے گا اور مُتقصی وہ روایت ہوتی ہے جو اس نے بعینہ صحابی کے حوالے سے اس کی ذات کے حوالے سے نقل کی ہو، جو دوسرے حوالے سے الفاظ کے اضافے کے ہمراہ منقول ہو، اس اضافے پر عمل کرنا اس وقت لازم ہوتا ہے جب اسے نقل کرنے میں کوئی ثقہ راوی منفرد ہو۔ یہ اس طریقے کے مطابق ہو گا جس کا ذکر ہم نے کتاب کے آخر میں کیا ہے۔ [صحیح ابن حبان/كتاب الحظر والإباحة/حدیث: 5633]

سیدہ ام شریک رضی اللہ عنہا جو بنو عامر سے تعلق رکھتی ہیں وہ بیان کرتی ہیں کہ انہوں نے نبی اکرم صلی اللہ علیہ وسلم سے چھپکلی کو مارنے کے بارے میں دریافت کیا تو نبی اکرم صلی اللہ علیہ وسلم نے ”اسے مارنے کا حکم دیا“۔ [صحیح ابن حبان/كتاب الحظر والإباحة/حدیث: 5634]