سیدہ عائشہ صدیقہ رضی اللہ عنہا بیان کرتی ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا تو اس نے کہا: کیا آپ لوگ بچوں کو بوسہ دیتے ہیں؟ ہم تو انہیں بوسہ نہیں دیتے۔ نبی اکرم صلی اللہ علیہ وسلم نے ارشاد فرمایا: ”اگر اللہ تعالیٰ نے تمہارے دل سے رحمت کو الگ کر لیا ہے تو پھر میں تمہارے لیے کیا کر سکتا ہوں؟“ [صحیح ابن حبان/كتاب الحظر والإباحة/حدیث: 5595]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم سیدنا امام حسین رضی اللہ عنہما کو اپنی زبان باہر نکال کر دکھاتے تھے، وہ بچہ جب آپ کی زبان کی سرخی دیکھتا تو خوش ہوتا، عیینہ بن حصن نے آپ کی خدمت میں عرض کی: مجھے یہ اندازہ نہیں تھا کہ آپ اس کے ساتھ یہ طرز عمل کر رہے ہوں گے، اللہ کی قسم! میرا بھی بیٹا ہے لیکن میں نے اسے کبھی بوسہ نہیں دیا، نبی اکرم صلی اللہ علیہ وسلم نے فرمایا: ”جو رحم نہیں کرتا اس پر رحم نہیں کیا جاتا۔“ [صحیح ابن حبان/كتاب الحظر والإباحة/حدیث: 5596]

سیدنا ابو ایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ تعالیٰ اور آخرت کے دن پر ایمان رکھتا ہو اسے اپنے پڑوسی کی عزت افزائی کرنی چاہیے، جو شخص اللہ تعالیٰ اور آخرت کے دن پر ایمان رکھتا ہو وہ تہبند پہن کر حمام میں داخل ہو، جو شخص اللہ تعالیٰ اور آخرت کے دن پر ایمان رکھتا ہو اسے بھلائی کی بات کہنی چاہیے یا خاموش رہنا چاہیے، اور تمہاری خواتین میں سے جو اللہ تعالیٰ اور آخرت کے دن پر ایمان رکھتی ہو وہ حمام میں داخل نہ ہو۔“ راوی بیان کرتے ہیں: میں نے عمر بن عبدالعزیز رحمہ اللہ کے عہد خلافت میں یہ بات لکھ کر انہیں بھجوائی تو انہوں نے ابو بکر بن محمد کو خط لکھا کہ محمد بن ثابت سے ان کی نقل کردہ احادیث کے بارے میں دریافت کرو کیونکہ وہ پسندیدہ راوی ہے۔ ابو بکر بن محمد نے ان سے اس بارے میں دریافت کیا، پھر انہوں نے عمر بن عبدالعزیز رحمہ اللہ کو خط میں لکھا، تو عمر بن عبدالعزیز رحمہ اللہ نے خواتین کے حمام میں جانے پر پابندی عائد کر دی۔ [صحیح ابن حبان/كتاب الحظر والإباحة/حدیث: 5597]

سیدنا عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”عورت چھپانے کی چیز ہے، جب وہ نکلتی ہے، تو شیطان اسے جھانک کر دیکھتا ہے اور اللہ تعالیٰ کے نزدیک وہ سب سے زیادہ مقرب اس وقت ہوتی ہے، جب وہ اپنے گھر کے اندرونی حصے میں ہو۔“ [صحیح ابن حبان/كتاب الحظر والإباحة/حدیث: 5598]

سیدنا عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”عورت پردے کی چیز ہے، جب وہ نکلتی ہے تو شیطان اسے جھانک کر دیکھتا ہے، عورت اپنے پروردگار کے سب سے زیادہ قریب اس وقت ہوتی ہے جب وہ اپنے گھر کے اندرونی حصے میں ہو۔“ [صحیح ابن حبان/كتاب الحظر والإباحة/حدیث: 5599]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم مدینہ منورہ تشریف لائے تو آپ بیمار ہو گئے اور آپ کے اصحاب بھی بیمار ہو گئے۔ سیدنا ابوبکر رضی اللہ عنہ کے غلام عامر بن فہیرہ رضی اللہ عنہ اور سیدنا بلال رضی اللہ عنہ بیمار ہو گئے۔ سیدہ عائشہ رضی اللہ عنہا نے ان کی عیادت کے لیے ان کے ہاں آنے کی اجازت مانگی، ان کو اجازت مل گئی تو انہوں نے سیدنا ابوبکر صدیق رضی اللہ عنہ سے پوچھا: آپ کا کیا حال ہے؟ انہوں نے جواب دیا: ہر شخص اپنے گھر میں موجود ہوتا ہے حالانکہ موت اس کے جوتے کے تسمے سے بھی قریب ہوتی ہے۔ سیدہ عائشہ رضی اللہ عنہا نے عامر بن فہیرہ رضی اللہ عنہ سے دریافت کیا تو انہوں نے جواب دیا: میں نے موت کا ذائقہ چکھنے سے پہلے ہی اس کو محسوس کر لیا ہے اور بزدل شخص طبعی موت مرتا ہے۔ سیدہ عائشہ رضی اللہ عنہا نے سیدنا بلال رضی اللہ عنہ سے مزاج دریافت کیا تو انہوں نے جواب دیا: ہائے افسوس! کیا میں کسی ایسے راستے میں رات بسر کروں گا جب میرے اردگرد اذخر اور جلیل (مکہ کی مخصوص گھاس) ہو گی؟ سیدہ عائشہ رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں اور ان حضرات کے جوابات کے بارے میں آپ کو بتایا تو نبی اکرم صلی اللہ علیہ وسلم نے آسمان کی طرف نگاہ اٹھائی اور یہ دعا فرمائی: ”اے اللہ! تو مدینہ منورہ ہمارے نزدیک اسی طرح محبوب کر دے جس طرح تو نے ہمیں مکہ محبوب کیا تھا بلکہ اس سے زیادہ شدید محبوب کر دے۔ اے اللہ! یہاں کے صاع اور مد میں ہمارے لیے برکت رکھ دے اور یہاں کی وبا کو مہیعہ کی طرف منتقل کر دے۔“ (راوی بیان کرتے ہیں) اس سے مراد جحفہ ہے۔ [صحیح ابن حبان/كتاب الحظر والإباحة/حدیث: 5600]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”خواتین کو راستے کے درمیان میں چلنے کا حق نہیں ہے۔“ شیخ بیان کرتے ہیں: نبی اکرم صلی اللہ علیہ وسلم کا یہ فرمان: ”خواتین کو راستے میں چلنے کا حق نہیں ہے۔“ اس سے مراد لفظی طور پر اطلاع دینا ہے لیکن اصل مراد اس چیز سے منع کرنا ہے جو اس میں پوشیدہ ہے اور وہ یہ کہ خواتین چلتے ہوئے مردوں کے ساتھ چلیں کیونکہ عام طور پر راستے کے درمیان میں مرد ہی چلتے ہیں تو خواتین کے لیے یہ بات لازم ہے کہ وہ راستے کے اطراف میں علیحدہ ہو کر چلیں تاکہ وہ مردوں کے ساتھ لگنے سے بچ سکیں۔ [صحیح ابن حبان/كتاب الحظر والإباحة/حدیث: 5601]

سیدنا جابر رضی اللہ عنہ بیان کرتے ہیں: سیدہ ام سلمہ رضی اللہ عنہا نے نبی اکرم صلی اللہ علیہ وسلم سے پچھنے لگوانے کی اجازت مانگی تو نبی اکرم صلی اللہ علیہ وسلم نے ابوطیبہ کو یہ ہدایت کی کہ ”وہ سیدہ ام سلمہ رضی اللہ عنہا کو پچھنے لگا دے۔“ راوی بیان کرتے ہیں: میرا خیال ہے انہوں نے یہ بات بھی بیان کی تھی کہ یہ صاحب سیدہ ام سلمہ رضی اللہ عنہا کے رضاعی بھائی تھے یا یہ کوئی ایسے لڑکے تھے جو ابھی بالغ نہیں ہوئے تھے۔ [صحیح ابن حبان/كتاب الحظر والإباحة/حدیث: 5602]

سیدنا عبداللہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”دعوت قبول کرو، تحفے کو واپس نہ کرو اور مسلمانوں کی پٹائی نہ کرو۔“ (امام ابن حبان رحمہ اللہ فرماتے ہیں:) عمر، یعلیٰ اور محمد نامی راوی یہ سب عبید طنافسی کے بیٹے ہیں، یہ کوفہ کے رہنے والے ہیں اور ثقہ ہیں۔ [صحیح ابن حبان/كتاب الحظر والإباحة/حدیث: 5603]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جب کوئی شخص کسی کی پٹائی کرے تو (دوسرے شخص) کے چہرے پر مارنے سے اجتناب کرے۔“ [صحیح ابن حبان/كتاب الحظر والإباحة/حدیث: 5604]