ابو الاحوص اپنے والد رضی اللہ عنہ سے روایت کرتے ہیں کہ میں نبی اکرم صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے دریافت کیا: ”کیا ایسا ہے کہ تمہاری قوم کے اونٹ صحیح و سالم کانوں والے بچے کو جنم دیتے ہیں، پھر کوئی شخص استرا لے کر اس کا کان کاٹ دیتا ہے اور کہتا ہے: یہ بحر (یعنی فلاں بت کے لیے مخصوص) ہے، یا وہ اس کی کھال کو چیر دیتا ہے اور کہتا ہے: یہ صرم (یعنی فلاں بت کے لیے مخصوص ہے)، اور پھر وہ شخص اس اونٹ کو اپنے لیے اور اپنے گھر والوں کے لیے حرام قرار دے دیتا ہے؟“ راوی کہتے ہیں: میں نے جواب دیا: جی ہاں! تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ تمہیں جو بھی چیز عطا کرتا ہے وہ حلال ہوتی ہے، اللہ تعالیٰ کی کلائی تمہاری کلائی سے زیادہ مضبوط ہے اور اللہ تعالیٰ کا استرا تمہارے استرے سے زیادہ تیز ہے۔“ (امام ابن حبان رحمہ اللہ فرماتے ہیں:) روایت کے یہ الفاظ: ”اللہ تعالیٰ کی کلائی تمہاری کلائی سے زیادہ مضبوط ہے“، یہ لوگوں کے محاورے کے مطابق ہے کیونکہ سننے والے تک یہ مفہوم ان کے محاورے کے مطابق ہی منتقل کیا جا سکتا ہے۔ نبی اکرم صلی اللہ علیہ وسلم کا یہ فرمان: ”ہر وہ چیز جو اللہ تعالیٰ نے تمہیں عطا کی ہے وہ تمہارے لیے حلال ہے“، یہاں پر لفظی طور پر امر کا صیغہ ہے لیکن اس کے ذریعے مراد اس چیز کے سبب سے منع کرنا ہے اور وہ لوگوں کا اونٹوں کے بارے میں یہ طرز عمل اختیار کرنا ہے کہ وہ ان کے کان کاٹ دیتے ہیں اور ان کی کھال چیر دیتے ہیں، پھر اسے اپنے لیے حرام قرار دے دیتے ہیں۔ [صحیح ابن حبان/كتاب الحظر والإباحة/حدیث: 5615]

حسن بصری رحمہ اللہ بیان کرتے ہیں: ایک شخص نے سیدنا عمران بن حصین رضی اللہ عنہ سے کہا: میرا ایک غلام مفرور ہو گیا ہے، میں نے یہ نذر مانی ہے کہ اگر وہ مجھے مل گیا تو اس کے ہاتھ ضرور کاٹوں گا۔ سیدنا عمران بن حصین رضی اللہ عنہ نے فرمایا: تم اس کا ہاتھ نہ کاٹنا، ایک مرتبہ نبی اکرم صلی اللہ علیہ وسلم ہمارے درمیان (خطبہ دینے کے لیے) کھڑے ہوئے تو آپ صلی اللہ علیہ وسلم نے ہمیں ”صدقہ کرنے کا حکم دیا اور مثلہ کرنے سے منع کیا۔“ [صحیح ابن حبان/كتاب الحظر والإباحة/حدیث: 5616]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے اس شخص پر لعنت کی ہے، جو جانور کا مثلہ کرے۔“ [صحیح ابن حبان/كتاب الحظر والإباحة/حدیث: 5617]

ایاس بن سلمہ اپنے والد (سیدنا سلمہ بن اکوع رضی اللہ عنہ کے حوالے سے یہ بیان نقل کرتے ہیں) ایک دن میں نبی اکرم صلی اللہ علیہ وسلم ، سیدنا حسن اور سیدنا حسین رضی اللہ عنہما کو ایک خچر پر سوار کروا کے لے جا رہا تھا، یہاں تک کہ میں انہیں لے کر نبی اکرم صلی اللہ علیہ وسلم کے حجرے کے اندر آیا۔ (سیدنا امام حسن اور سیدنا امام حسین رضی اللہ عنہما میں سے) ایک نبی اکرم صلی اللہ علیہ وسلم کے آگے بیٹھے ہوئے تھے، دوسرے پیچھے بیٹھے ہوئے تھے۔ [صحیح ابن حبان/كتاب الحظر والإباحة/حدیث: 5618]

سہل بن معاذ اپنے والد رضی اللہ عنہ جو نبی اکرم صلی اللہ علیہ وسلم کے صحابی ہیں، ان کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”ان جانوروں پر سلامتی کے ساتھ سواری کرو، انہیں کرسی نہ بناؤ۔“ (امام ابن حبان رحمہ اللہ فرماتے ہیں:) اس کا مطلب یہ ہے انہیں اس طرح سے لے کر نہ چلو کہ تم ان سے نیچے اترو ہی نہیں۔ [صحیح ابن حبان/كتاب الحظر والإباحة/حدیث: 5619]

سیدنا جابر رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ایک گدھے کے پاس سے گزرے جس کے چہرے پر داغ لگایا گیا تھا، تو نبی اکرم صلی اللہ علیہ وسلم نے اس شخص پر لعنت کی جس نے ایسا کیا تھا، پھر آپ صلی اللہ علیہ وسلم نے ارشاد فرمایا: ” «سُبْحَانَ اللّٰهِ» ! تم لوگ ان کے چہروں پر نہ مارو۔“ [صحیح ابن حبان/كتاب الحظر والإباحة/حدیث: 5620]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”ایک عورت ایک بلی کی وجہ سے جہنم میں داخل ہوئی۔ اس نے اس بلی کو باندھ دیا تھا، وہ اسے کھانے کے لیے نہیں دیتی تھی اور اسے کھولتی بھی نہیں تھی کہ وہ خود ہی کچھ کھا لیتی، یہاں تک کہ وہ بلی مر گئی۔“ [صحیح ابن حبان/كتاب الحظر والإباحة/حدیث: 5621]

سیدنا عبداللہ بن عمرو رضی اللہ عنہما بیان کرتے ہیں کہ نبی اکرم صلی اللہ علیہ وسلم کے زمانہ اقدس میں سورج گرہن ہو گیا۔ آپ صلی اللہ علیہ وسلم کھڑے ہوئے ہم بھی کھڑے ہوئے۔ نبی اکرم صلی اللہ علیہ وسلم نے نماز ادا کی۔ اس کے بعد بات چیت کرنے کے لیے آپ صلی اللہ علیہ وسلم ہماری طرف متوجہ ہوئے۔ آپ صلی اللہ علیہ وسلم نے ارشاد فرمایا: ”میرے سامنے جنت کو پیش کیا گیا۔ یہاں تک کہ اگر میں چاہتا، تو اس کے خوشے کو حاصل کر لیتا۔ میرے سامنے جہنم کو پیش کیا گیا اگر میں اسے پرے نہ کرتا تو وہ تمہیں اپنی لپیٹ میں لے لیتی۔ میں نے اس میں تین لوگوں کو دیکھا، جنہیں عذاب دیا جا رہا تھا۔ ایک یمن کی رہنے والی سیاہ فام لمبی عورت تھی جسے ایک بلی کی وجہ سے عذاب دیا جا رہا تھا۔ اس نے اس بلی کو باندھ دیا تھا۔ اسے چھوڑا نہیں تھا کہ وہ خود ہی کچھ کھا لیتی۔ اس نے اس بلی کو کچھ کھانے کے لیے نہیں دیا یہاں تک کہ وہ بلی مر گئی تو وہ بلی اس کی طرف آتی تھی، پھر وہ اس کے پیچھے کی طرف سے آتی تھی اور اسے نوچتی تھی۔ (میں نے جہنم میں) بنو دعدع سے تعلق رکھنے والے اس شخص کو دیکھا جس کا دو اونٹنیوں کا معاملہ تھا جسے جہنم میں دو ستونوں کے درمیان باندھا ہوا تھا (راوی بیان کرتے ہیں) وہ دو اونٹنیاں نبی اکرم صلی اللہ علیہ وسلم کے قربانی کے جانوروں میں سے تھیں، جنہیں اس شخص نے چوری کر لیا تھا (نبی اکرم صلی اللہ علیہ وسلم نے فرمایا) میں نے لاٹھی والے شخص کو دیکھا جو لاٹھی کے ذریعے ٹیک لگائے ہوئے تھا۔ یہ شخص اپنی لاٹھی کے ذریعے حاجیوں کا ساز و سامان چوری کیا کرتا تھا، جب اس کی چوری پوشیدہ رہتی تھی تو وہ سامان لے جایا کرتا تھا جب پکڑی جاتی تھی تو یہ کہتا تھا: ”میں نے چوری نہیں کی۔ یہ چیز تو میری لاٹھی کے ساتھ لٹک گئی تھی۔““ [صحیح ابن حبان/كتاب الحظر والإباحة/حدیث: 5622]

سیدنا عبداللہ بن عباس رضی اللہ عنہما بیان کرتے ہیں: ایک مرتبہ سیدنا عباس رضی اللہ عنہ نے اپنے اونٹ یا کسی جانور کے چہرے پر داغ لگایا، جب نبی اکرم صلی اللہ علیہ وسلم نے اسے دیکھا تو آپ غصے میں آ گئے۔ سیدنا عباس رضی اللہ عنہ نے عرض کی: اب میں ہمیشہ اس کے جسم کے پچھلے حصے پر داغ لگایا کروں گا، تو پھر سیدنا عباس رضی اللہ عنہ نے اس کے «الْجَاعِرَةِ» (ران کا وہ حصہ جہاں تک جانور کی دم ہلانے تک پہنچتی ہے) پر داغ لگایا۔ [صحیح ابن حبان/كتاب الحظر والإباحة/حدیث: 5623]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک گدھے کو دیکھا جس کے چہرے پر داغ لگایا گیا تھا تو آپ صلی اللہ علیہ وسلم نے اس کی سختی سے مذمت کی۔ ان صاحب نے عرض کی: اللہ کی قسم! اب میں اس کے جسم کے اس حصے پر داغ لگاؤں گا جو چہرے سے سب سے زیادہ دور ہو، تو ان صاحب کے حکم کے تحت ان کے گدھے کی رانوں کے اس حصے پر داغ لگایا گیا (جہاں تک دم ہل کر پہنچتی ہے) تو وہ پہلا جانور تھا جس کی رانوں کے حصے پر داغ لگایا گیا۔ [صحیح ابن حبان/كتاب الحظر والإباحة/حدیث: 5624]