سالم اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”سانپوں کو اور دو دھاری سانپ اور دم کٹے ہوئے سانپ کو مار دو، کیونکہ یہ دونوں بینائی کو رخصت کر دیتے ہیں اور حمل کو ضائع کر دیتے ہیں۔“ راوی کہتے ہیں: سیدنا عبداللہ بن عمر رضی اللہ عنہما ہر طرح کے سانپ مار دیتے تھے، یہاں تک کہ ایک دن سیدنا ابولبابہ رضی اللہ عنہ نے انہیں ایک سانپ کے پیچھے جاتے ہوئے دیکھا تو فرمایا: نبی اکرم صلی اللہ علیہ وسلم نے ”گھروں میں رہنے والے سانپوں (کو مارنے سے) منع کیا ہے۔“ [صحیح ابن حبان/كتاب الحظر والإباحة/حدیث: 5645]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”چار جانوروں کو مارنے سے منع کیا ہے: ہدہد، صرد، چیونٹی اور شہد کی مکھی۔“ [صحیح ابن حبان/كتاب الحظر والإباحة/حدیث: 5646]

حسن بصری رحمہ اللہ بیان کرتے ہیں: ایک نبی نے ایک درخت کے نیچے پڑاؤ کیا۔ اس درخت کے نیچے ایک چیونٹی نے انہیں کاٹ لیا تو ان کے حکم کے تحت چیونٹیوں کے بلوں کو آگ لگا دی گئی۔ اللہ تعالیٰ نے ان کی طرف وحی کی: ”کیا (تمہیں کاٹنے والی) صرف ایک چیونٹی نہیں تھی؟“ ایک اور سند کے ساتھ یہی روایت سیدنا ابوہریرہ رضی اللہ عنہ کے حوالے سے نبی اکرم صلی اللہ علیہ وسلم سے منقول ہے، تاہم اس میں یہ الفاظ ہیں: ”یہ چیونٹیاں تسبیح کیا کرتی تھیں۔“ [صحیح ابن حبان/كتاب الحظر والإباحة/حدیث: 5647]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں کہ: ”آپ نے کتوں کو مار دینے کا حکم دیا ہے۔“ [صحیح ابن حبان/كتاب الحظر والإباحة/حدیث: 5648]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا نے مجھے بتایا: ایک دن نبی اکرم صلی اللہ علیہ وسلم صبح اٹھے تو پریشان تھے۔ سیدہ میمونہ رضی اللہ عنہا نے عرض کی: یا رسول اللہ صلی اللہ علیہ وسلم ! آج آپ کے چہرے کی رنگت تبدیل محسوس ہو رہی ہے۔ نبی اکرم صلی اللہ علیہ وسلم نے ارشاد فرمایا: ”جبرائیل نے مجھ سے وعدہ کیا تھا وہ گزشتہ رات مجھ سے ملنے کے لیے آئیں گے لیکن وہ مجھ سے نہیں ملے، اللہ کی قسم وہ وعدے کی خلاف ورزی نہیں کرتے۔“ سیدہ میمونہ رضی اللہ عنہا بیان کرتی ہیں: نبی اکرم صلی اللہ علیہ وسلم نے وہ دن اسی عالم میں (یعنی پریشانی کے عالم میں) گزار دیا، پھر آپ کے ذہن میں کتے کے اس بچے کا خیال آیا جو ہمارے بستر کے نیچے تھا، آپ کے حکم کے تحت اسے باہر نکال دیا گیا، پھر نبی اکرم صلی اللہ علیہ وسلم نے اپنے دستِ اقدس کے ذریعے اس جگہ پر پانی چھڑکا، شام کے وقت سیدنا جبرائیل آئے وہ آپ صلی اللہ علیہ وسلم سے ملنے کے لیے آئے۔ نبی اکرم صلی اللہ علیہ وسلم نے ان سے دریافت کیا: ”تم نے تو مجھ سے وعدہ کیا تھا گزشتہ رات تم مجھ سے ملنے کے لیے آؤ گے۔“ انہوں نے عرض کی: جی ہاں، لیکن ہم کسی ایسے گھر میں داخل نہیں ہوتے جس میں کتا یا تصویر موجود ہو۔ اس کے بعد نبی اکرم صلی اللہ علیہ وسلم نے کتوں کو مار دینے کا حکم دیا یہاں تک کہ آپ صلی اللہ علیہ وسلم نے چھوٹے باغ (کے محافظ) کتے کو بھی مارنے کا حکم دیا، البتہ بڑے باغ (کے محافظ) کتے کو آپ صلی اللہ علیہ وسلم نے چھوڑ دیا۔ [صحیح ابن حبان/كتاب الحظر والإباحة/حدیث: 5649]

سیدنا عبداللہ بن مغفل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی ایسا کتا پالتا ہے جو شکار کرنے کے لیے یا دوسرے جانور کی حفاظت کے لیے ہو تو اس کے اجر میں سے روزانہ ایک قیراط کم ہوتا ہے۔“ [صحیح ابن حبان/كتاب الحظر والإباحة/حدیث: 5650]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ہمیں کتوں کو مار دینے کا حکم دیا، یہاں تک کہ اگر کوئی عورت دیہات سے کتا ساتھ لے آتی تو اسے بھی مار دیا جاتا، پھر نبی اکرم صلی اللہ علیہ وسلم نے ہمیں کتوں کو مارنے سے منع کر دیا اور آپ صلی اللہ علیہ وسلم نے ارشاد فرمایا: ”تم دو نقطوں والے سیاہ رنگ کے کتے کو ضرور مارنا کیونکہ وہ شیطان ہے۔“ [صحیح ابن حبان/كتاب الحظر والإباحة/حدیث: 5651]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کتا پالتا ہے اس کے عمل میں سے روزانہ ایک قیراط کم ہوتا ہے، البتہ کھیت یا جانوروں (کی حفاظت کے لیے پالے جانے والے کتے کی اجازت ہے)۔“ [صحیح ابن حبان/كتاب الحظر والإباحة/حدیث: 5652]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص کتا پالتا ہے جو کھیت یا جانوروں کی حفاظت کے لیے نہ ہو، وہ اس کے اجر میں سے روزانہ دو قیراط کم ہوتے ہیں۔“ [صحیح ابن حبان/كتاب الحظر والإباحة/حدیث: 5653]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی ایسا کتا پالتا ہے جو کھیت یا جانوروں کی حفاظت کے لیے نہ ہو تو اس کے عمل میں سے روزانہ ایک قیراط کم ہوتا ہے۔“ [صحیح ابن حبان/كتاب الحظر والإباحة/حدیث: 5654]