سیدنا اسامہ بن شریک رضی اللہ عنہ بیان کرتے ہیں: میں اس وقت نبی اکرم صلی اللہ علیہ وسلم کے پاس موجود تھا، جب دیہاتی آپ صلی اللہ علیہ وسلم سے سوالات کر رہے تھے کہ کیا ہمیں اس کام کو کرنے میں کوئی گناہ ہو گا؟ ایسا انہوں نے دو مرتبہ پوچھا تھا۔ نبی اکرم صلی اللہ علیہ وسلم نے فرمایا: ”اے اللہ کے بندو! اللہ تعالیٰ نے گناہ کو اٹھا لیا ہے ماسوائے اس شخص کے جو اپنے کسی بھائی کی عزت پر حملہ کرے، تو ایسا شخص گناہ کا مرتکب ہو گا۔“ لوگوں نے عرض کی: یا رسول اللہ ( صلی اللہ علیہ وسلم )! اگر ہم دوا استعمال کریں، تو کیا ہمیں کوئی گناہ ہو گا؟ نبی اکرم صلی اللہ علیہ وسلم نے فرمایا: ”اے اللہ کے بندو! تم لوگ دوا استعمال کرو کیونکہ اللہ تعالیٰ نے جو بھی بیماری پیدا کی ہے، اس کے لیے دوا بھی پیدا کی ہے۔“ ان لوگوں نے عرض کی: یا رسول اللہ ( صلی اللہ علیہ وسلم )! بندے کو جو کچھ دیا گیا اس میں سے بہتر چیز کیا ہے؟ نبی اکرم صلی اللہ علیہ وسلم نے فرمایا: ”اچھے اخلاق۔“ سفیان کہتے ہیں: آج روئے زمین پر اس سے عمدہ سند اور کوئی نہیں ہے۔ [صحیح ابن حبان/كتاب الطب/حدیث: 6061]

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے جو بھی بیماری نازل کی ہے اس کے ہمراہ اس کی دوا بھی نازل کی ہے، جو شخص اس سے ناواقف رہے وہ ناواقف رہتا ہے اور جو اس کا علم حاصل کر لے اسے اس کا علم ہو جاتا ہے۔“ [صحیح ابن حبان/كتاب الطب/حدیث: 6062]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک ہر بیماری کی دوا ہے، جب بیماری کی صحیح دوا مل جائے، تو (بیمار) اللہ کے حکم کے تحت تندرست ہو جاتا ہے۔“ [صحیح ابن حبان/كتاب الطب/حدیث: 6063]

سیدنا اسامہ بن شریک رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم لوگ دوا استعمال کرو کیونکہ اللہ تعالیٰ نے جو بھی بیماری نازل کی ہے اس کی شفاء بھی نازل کی ہے، البتہ موت اور بڑھاپے کا معاملہ مختلف ہے۔“ [صحیح ابن حبان/كتاب الطب/حدیث: 6064]

علقمہ بن وائل اپنے والد (رضی اللہ عنہ) کا یہ بیان نقل کرتے ہیں کہ وہ لوگ نبی اکرم صلی اللہ علیہ وسلم کی خدمت میں حاضر ہوئے، خثعم قبیلے سے تعلق رکھنے والا سوید بن طارق (رضی اللہ عنہ) نامی ایک شخص آپ صلی اللہ علیہ وسلم کے سامنے کھڑا ہوا، اس نے عرض کی کہ ہم لوگ شراب بناتے ہیں، نبی اکرم صلی اللہ علیہ وسلم نے اسے ایسا کرنے سے منع کر دیا، اس نے عرض کی کہ ہم دوا کے طور پر اسے استعمال کرتے ہیں، تو نبی اکرم صلی اللہ علیہ وسلم نے فرمایا: ”یہ دوا نہیں ہے بلکہ یہ بیماری ہے۔“ [صحیح ابن حبان/كتاب الطب/حدیث: 6065]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”بخار کی شدت جہنم کی تپش کا حصہ ہے، تو تم پانی کے ذریعے اسے ٹھنڈا کرو۔“ [صحیح ابن حبان/كتاب الطب/حدیث: 6066]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”بخار جہنم کی تپش کا حصہ ہے، تو تم پانی کے ذریعے اسے بجھا دو۔“ [صحیح ابن حبان/كتاب الطب/حدیث: 6067]

ابوجمرہ بیان کرتے ہیں: میں لوگوں کو سیدنا عبداللہ بن عباس رضی اللہ عنہما کے پاس آ کر (انہیں تنگ کرنے) سے روکتا تھا، ایک مرتبہ میں کچھ دن تک نہیں آیا، تو انہوں نے دریافت کیا: تم کیوں نہیں آئے؟ میں نے جواب دیا: بخار کی وجہ سے۔ انہوں نے بتایا: نبی اکرم صلی اللہ علیہ وسلم نے ارشاد فرمایا ہے: ”بے شک بخار جہنم کی تپش کا حصہ ہے، تو تم زم زم کے پانی کے ذریعے اسے ٹھنڈا کرو۔“ [صحیح ابن حبان/كتاب الطب/حدیث: 6068]

یوسف بن محمد اپنے والد کے حوالے سے اپنے دادا (ثابت بن قیس رضی اللہ عنہ) کے بارے میں یہ بات نقل کرتے ہیں: ایک مرتبہ نبی اکرم صلی اللہ علیہ وسلم ان کے ہاں تشریف لائے، آپ صلی اللہ علیہ وسلم نے فرمایا: (یعنی دعا کی) «أَذْهِبِ الْبَأْسَ رَبَّ النَّاسِ عَنْ ثَابِتِ بْنِ قَيْسِ بْنِ شَمَّاسٍ» ”اے لوگوں کے پروردگار! تو ثابت بن قیس بن شماس سے تکلیف کو دور کر دے۔“ پھر نبی اکرم صلی اللہ علیہ وسلم نے بطحان کی مٹی لی، اسے ایسے پیالے میں ڈالا جس میں پانی موجود تھا اور وہ پانی ان پر چھڑک دیا۔ [صحیح ابن حبان/كتاب الطب/حدیث: 6069]

سیدہ ام قیس بنت محصن رضی اللہ عنہا جو ہجرت کرنے والی ابتدائی خواتین میں شامل ہیں، جنہیں نبی اکرم صلی اللہ علیہ وسلم کے دستِ اقدس پر بیعت کرنے کا شرف حاصل ہے اور یہ سیدنا عکاشہ بن محصن رضی اللہ عنہ کی بہن ہیں، وہ بیان کرتی ہیں کہ وہ اپنے ایسے بیٹے کو لے کر نبی اکرم صلی اللہ علیہ وسلم کی خدمت میں حاضر ہوئیں جو کچھ کھاتا نہیں تھا، اس خاتون نے اس بچے کے گلے کی تکلیف کی وجہ سے اس کا گلا ملا ہوا تھا، تو نبی اکرم صلی اللہ علیہ وسلم نے فرمایا: ”تم لوگ اس طرح گلا مل کر اپنے بچوں کو تکلیف کیوں پہنچاتی ہو؟ تم «الْعُودُ الْهِنْدِيُّ» ”عودِ ہندی“ استعمال کرو (راوی کہتے ہیں: اس سے مراد کست ہے) کیونکہ اس میں سات قسم کی شفا پائی جاتی ہے (یعنی سات بیماریوں سے شفا پائی جاتی ہے) جن میں سے ایک «ذَاتُ الْجَنْبِ» ”ذات الجنب (نمونیا)“ ہے“۔ (امام ابن حبان رحمہ اللہ فرماتے ہیں:) کست سے مراد قسط ہے، یہ بات شیخ نے بیان کی ہے۔ [صحیح ابن حبان/كتاب الطب/حدیث: 6070]