جناب سالم بن عبداللہ اپنے والد سیدنا عبداللہ بن عمر رضی اللہ عنہ کے متعلق بیان کرتے ہیں کہ وہ احرام والی عورت کو کہا کرتے تھے کہ ”اپنے موزے کاٹ لے۔“ پھر (ان کی زوجہ) صفیہ بنت ابی عبید نے انہیں بیان کیا کہ سیدہ عائشہ رضی اللہ عنہا نے اس کو بیان کیا کہ ”رسول اللہ صلی اللہ علیہ وسلم نے عورتوں کو موزے پہننے کی رخصت دی ہے۔“ تو وہ اپنی بات سے رک گئے۔ [سنن ابي داود/كتاب المناسك /حدیث: 1831]

سیدنا براء رضی اللہ عنہ بیان کرتے ہیں کہ جب رسول اللہ صلی اللہ علیہ وسلم نے حدیبیہ والوں سے صلح کی تھی تو اس بات پر صلح کی تھی کہ ”یہ لوگ (مسلمان) مکہ میں اس حالت میں داخل ہوں گے کہ ان کے ہتھیار ان کے میانوں میں ہوں گے۔“ (غالباً) شعبہ نے ابواسحٰق سے پوچھا کہ «جِلْبَانُ السِّلَاحِ» کیا ہوتا ہے؟ انہوں نے کہا: ”چمڑے کا وہ تھیلا جس میں ہتھیار رکھا جاتا ہے۔“ [سنن ابي داود/كتاب المناسك /حدیث: 1832]

ام المؤمنین سیدہ عائشہ رضی اللہ عنہا بیان کرتی ہیں کہ: ”ہم رسول اللہ صلی اللہ علیہ وسلم کے ساتھ احرام سے ہوتی تھیں اور قافلے والے ہمارے سامنے سے گزرتے تو ہم اپنے پردے کی چادر کو سر سے چہرے پر لٹکا لیتیں، جب وہ گزر جاتے تو چہرہ کھول لیتی تھیں۔“ [سنن ابي داود/كتاب المناسك /حدیث: 1833]

سیدہ ام الحصین رضی اللہ عنہا بیان کرتی ہیں کہ ”ہم نے نبی کریم صلی اللہ علیہ وسلم کی معیت میں حجۃ الوداع کیا۔ چنانچہ میں نے سیدنا اسامہ اور سیدنا بلال رضی اللہ عنہما کو دیکھا کہ ان میں سے ایک رسول اللہ صلی اللہ علیہ وسلم کی اونٹنی کی مہار پکڑے ہوئے تھا اور دوسرا آپ صلی اللہ علیہ وسلم کو گرمی سے بچانے کے لیے آپ صلی اللہ علیہ وسلم پر کپڑا بلند کیے ہوئے تھا (اور ان کی یہ خدمت اسی طرح رہی) حتیٰ کہ آپ صلی اللہ علیہ وسلم نے جمرہ عقبہ کو کنکریاں مار لیں۔“ [سنن ابي داود/كتاب المناسك /حدیث: 1834]

سیدنا ابن عباس رضی اللہ عنہما سے مروی ہے کہ ”نبی کریم صلی اللہ علیہ وسلم نے احرام کی حالت میں سینگی لگوائی تھی۔“ [سنن ابي داود/كتاب المناسك /حدیث: 1835]

سیدنا ابن عباس رضی اللہ عنہما سے منقول ہے کہ ”رسول اللہ صلی اللہ علیہ وسلم نے احرام کی حالت میں اپنے سر میں ایک بیماری کی بنا پر سینگی لگوائی۔“ [سنن ابي داود/كتاب المناسك /حدیث: 1836]

سیدنا انس رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے بحالت احرام اپنے پاؤں کی پشت پر، ایک تکلیف کی وجہ سے سینگی لگوائی۔“ امام ابوداؤد رحمہ اللہ فرماتے ہیں کہ ”میں نے امام احمد رحمہ اللہ سے سنا، وہ کہتے تھے کہ ابن ابی عروبہ نے اس روایت کو قتادہ سے مرسل بیان کیا۔ (یعنی جناب انس کا واسطہ ذکر نہیں کیا۔)“ [سنن ابي داود/كتاب المناسك /حدیث: 1837]

جناب نبیہ بن وہب رحمہ اللہ سے مروی ہے کہ عمر بن عبیداللہ بن معمر رحمہ اللہ کی آنکھیں خراب ہو گئیں تو انہوں نے جناب ابان بن عثمان رحمہ اللہ سے پوچھا کہ ”کیا کیا جائے؟“ سفیان رحمہ اللہ نے بتایا کہ ”یہ ان دنوں امیرِ حج تھے۔“ انہوں نے جواب دیا کہ ”ایلوا کا لیپ کر لے۔ بیشک میں نے سیدنا عثمان رضی اللہ عنہ سے سنا تھا، وہ یہ بات رسول اللہ صلی اللہ علیہ وسلم سے بیان کرتے تھے۔“ [سنن ابي داود/كتاب المناسك /حدیث: 1838]

عثمان بن ابی شیبہ نے اسے ہمیں اسماعیل بن ابراہیم سے، انہوں نے نافع سے، انہوں نے نبیہ بن وہب سے مذکورہ بالا روایت بیان کی۔ [سنن ابي داود/كتاب المناسك /حدیث: 1839]

عبداللہ بن حنین سے مروی ہے کہ سیدنا عبداللہ بن عباس رضی اللہ عنہ اور مسور بن مخرمہ رضی اللہ عنہ مقامِ ابواء میں تھے کہ ان میں ایک مسئلے میں اختلاف ہو گیا۔ ابن عباس رضی اللہ عنہ نے کہا: ”محرم اپنا سر دھو سکتا ہے۔“ مسور رضی اللہ عنہ نے کہا: ”محرم اپنا سر نہیں دھو سکتا۔“ چنانچہ ابن عباس رضی اللہ عنہ نے اس کو (عبداللہ بن حنین کو) سیدنا ابو ایوب انصاری رضی اللہ عنہ کے ہاں بھیج دیا، تو انہوں نے ان کو پایا کہ وہ کنویں کی چرخی کی دو لکڑیوں کے پاس بیٹھے غسل کر رہے تھے اور ایک کپڑے سے پردہ کیے ہوئے تھے۔ کہتے ہیں کہ میں نے ان کو سلام کیا تو انہوں نے پوچھا: ”کون ہو؟“ میں نے کہا: ”میں عبداللہ بن حنین ہوں۔ مجھے عبداللہ بن عباس رضی اللہ عنہ نے بھیجا ہے کہ آپ سے دریافت کروں کہ رسول اللہ صلی اللہ علیہ وسلم حالتِ احرام میں اپنا سر کیسے دھویا کرتے تھے؟“ تو انہوں نے (سیدنا ابو ایوب رضی اللہ عنہ نے) اپنا ہاتھ (پردے والے) کپڑے پر رکھ کر اسے کچھ نیچا کیا حتیٰ کہ مجھے ان کا سر نظر آنے لگا۔ پھر انہوں نے ایک شخص سے جو ان پر پانی ڈال رہا تھا، کہا: ”پانی ڈالو۔“ چنانچہ اس نے ان کے سر پر پانی ڈالا تو سیدنا ابو ایوب رضی اللہ عنہ نے اپنے سر کو دونوں ہاتھوں سے حرکت دی اور اپنے ہاتھوں کو آگے پیچھے کیا، پھر کہا: ”میں نے آپ صلی اللہ علیہ وسلم کو دیکھا تھا کہ آپ اسی طرح کرتے تھے۔“ [سنن ابي داود/كتاب المناسك /حدیث: 1840]