سیدنا عقبہ بن عامر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”غلام کی بیع اور اس کی سلامتی کی ضمانت تین دن تک ہے۔“ [سنن ابي داود/كتاب الإجارة /حدیث: 3506]

جناب قتادہ رحمہ اللہ نے اپنی سند سے مذکورہ بالا حدیث کے ہم معنی بیان کیا اور مزید کہا: ”اگر تین (دن) رات تک اس میں کسی عیب سے مطلع ہوا تو گواہ پیش کیے بغیر ہی اسے واپس کر سکے گا، اور اگر تین دن کے بعد مطلع ہوا تو اسے گواہ پیش کرنا ہو گا کہ جب اسے خریدا تھا تو اس میں یہ عیب تھا۔“ امام ابوداؤد رحمہ اللہ فرماتے ہیں کہ یہ توضیح جناب قتادہ رحمہ اللہ کا قول ہے۔ [سنن ابي داود/كتاب الإجارة /حدیث: 3507]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”آمدنی کا حقدار وہی ہے جو ضامن ہو۔“ [سنن ابي داود/كتاب الإجارة /حدیث: 3508]

جناب مخلد بن خفاف غفاری بیان کرتے ہیں کہ لوگوں کے ساتھ میری ایک غلام میں شراکت تھی، میں نے اسے کام پر لگایا جبکہ میرا ساتھی غائب تھا، تو وہ غلام میرے لیے کچھ کما کر لایا، میرے شریک نے اپنے حصے کے بارے میں مجھ سے جھگڑا کیا اور مقدمہ قاضی کے سامنے پیش کر دیا، تو قاضی نے مجھ سے کہا کہ میں اس کا حصہ ادا کر دوں، چنانچہ میں سیدنا عروہ بن زبیر رضی اللہ عنہ کے پاس آیا اور واقعہ انہیں بتایا، تو وہ قاضی کے پاس گئے اور اسے سیدہ عائشہ رضی اللہ عنہا کی روایت سنائی کہ رسول اللہ صلی اللہ علیہ وسلم نے فرمایا: «الْخَرَاجُ بِالضَّمَانِ» ”آمدنی کا وہی حقدار ہوتا ہے جو ضامن ہو۔“ [سنن ابي داود/كتاب الإجارة /حدیث: 3509]

ام المؤمنین سیدہ عائشہ رضی اللہ عنہا روایت کرتی ہیں کہ ایک شخص نے غلام خریدا، پھر جب تک اللہ نے چاہا، وہ اس کے پاس رہا۔ بعد ازاں اسے غلام کے کسی عیب کی خبر ہوئی تو وہ اس کا معاملہ نبی کریم صلی اللہ علیہ وسلم کے پاس لے گیا۔ آپ صلی اللہ علیہ وسلم نے اسے بیچنے والے کو واپس کرا دیا، تو اس نے کہا: ”اے اللہ کے رسول! اس نے میرے غلام سے آمدنی بھی لی ہے۔“ رسول اللہ صلی اللہ علیہ وسلم نے فرمایا: ”آمدنی کا وہی حقدار ہوتا ہے جو ضامن ہو۔“ امام ابوداؤد رحمہ اللہ فرماتے ہیں: ”اس کی سند معیاری نہیں ہے۔“ [سنن ابي داود/كتاب الإجارة /حدیث: 3510]

جناب عبدالرحمٰن بن قیس بن محمد بن اشعث اپنے والد (قیس) سے اور وہ عبدالرحمٰن کے دادا (محمد) سے روایت کرتے ہیں کہ سیدنا اشعث رضی اللہ عنہ نے سیدنا عبداللہ بن مسعود رضی اللہ عنہ سے بیس ہزار میں کچھ غلام خریدے جو کہ خمس کے تھے۔ سیدنا عبداللہ رضی اللہ عنہ نے قیمت لینے کے لیے آدمی بھیجا، تو اس نے کہا: ”میں نے انہیں دس ہزار میں لیا ہے۔“ سیدنا عبداللہ رضی اللہ عنہ نے کہا: ”کسی آدمی کو منتخب کر لو جو ہم میں فیصلہ کر دے۔“ سیدنا اشعث رضی اللہ عنہ نے کہا: ”آپ خود ہی میرے اور اپنے درمیان فیصلہ کر دیں۔“ تو سیدنا عبداللہ رضی اللہ عنہ نے کہا: ”میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”جب خریدار اور فروخت کنندہ کے درمیان اختلاف ہو جائے اور ان میں کوئی گواہ نہ ہو، تو بات فروخت کرنے والے کی معتبر ہو گی، یا وہ دونوں ہی سودا چھوڑ دیں۔““ [سنن ابي داود/كتاب الإجارة /حدیث: 3511]

جناب قاسم بن عبدالرحمٰن نے اپنے والد سے روایت کیا کہ ”سیدنا عبداللہ بن مسعود رضی اللہ عنہ نے سیدنا اشعث بن قیس رضی اللہ عنہ کو غلام بیچے۔“ اور الفاظ میں کمی بیشی ہے، مذکورہ بالا روایت کے ہم معنی بیان کیا۔ [سنن ابي داود/كتاب الإجارة /حدیث: 3512]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”شفعہ ہر مشترک زمین یا باغ میں ہے، اسے اپنے شریک کو خبر دیے بغیر فروخت کرنا درست نہیں۔ اگر (بلا اطلاع) فروخت کر دیا ہو تو وہ شریک ہی زیادہ حقدار ہے حتیٰ کہ وہ دوسرے کے لیے اجازت دے دے۔“ [سنن ابي داود/كتاب الإجارة /حدیث: 3513]

سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے ”ہر مشترک غیر تقسیم شدہ چیز میں شفعہ رکھا ہے، لیکن جب حدود متعین ہو جائیں اور راستے الگ الگ ہو جائیں تو پھر کوئی شفعہ نہیں۔“ [سنن ابي داود/كتاب الإجارة /حدیث: 3514]

سیدنا ابوہریرہ رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”جب زمین تقسیم ہو جائے اور حدود متعین ہو جائیں، تو اس میں کوئی شفعہ نہیں۔“ [سنن ابي داود/كتاب الإجارة /حدیث: 3515]