مسدد نے ابوعوانہ سے روایت کیا کہ ”(اللہ اسے قیامت کے روز) ذلت کا لباس پہنائے گا۔“ [سنن ابي داود/كتاب اللباس /حدیث: 4030]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے کسی قوم سے مشابہت اختیار کی تو وہ انہی میں سے ہوا۔“ [سنن ابي داود/كتاب اللباس /حدیث: 4031]

ام المؤمنین سیدہ عائشہ رضی اللہ عنہا سے مروی ہے کہ ”رسول اللہ صلی اللہ علیہ وسلم باہر تشریف لائے جبکہ آپ صلی اللہ علیہ وسلم بالوں کی بنی ہوئی کجاووں جیسے نقش والی سیاہ رنگ کی چادر اوڑھے ہوئے تھے۔“ اور حسین نے سند یوں بیان کی «حَدَّثَنَا يَحْيَى بْنُ زَكَرِيَّا» یعنی ابن ابی زائدہ کی بجائے اصل نام و نسب ذکر کیا۔ [سنن ابي داود/كتاب اللباس /حدیث: 4032]

جناب ابوبردہ رحمہ اللہ سے روایت ہے کہ میرے والد رضی اللہ عنہ نے مجھ سے کہا: ”اے بیٹے! اگر تم ہمیں دیکھتے جب کہ ہم رسول اللہ صلی اللہ علیہ وسلم کے ساتھ ہوتے تھے اور ہم پر بارش ہو جاتی تو تم سمجھتے کہ ہم سے بھیڑوں کی سی بو آتی ہے۔“ امام ابوداؤد رحمہ اللہ نے کہا: ”مقصد ہے کہ اون کے لباس کی وجہ سے۔“ [سنن ابي داود/كتاب اللباس /حدیث: 4033]

سیدنا انس بن مالک رضی اللہ عنہ سے روایت ہے کہ ”شاہ ذی یزن (بنو حمیر) نے رسول اللہ صلی اللہ علیہ وسلم کی خدمت میں ایک حلہ (کپڑوں کا جوڑا) ہدیہ بھیجا جو اس نے تینتیس اونٹوں یا اونٹنیوں کے بدلے میں خریدا تھا۔ پس آپ صلی اللہ علیہ وسلم نے اسے قبول فرما لیا۔“ [سنن ابي داود/كتاب اللباس /حدیث: 4034]

اسحاق بن عبداللہ بن حارث رحمہ اللہ نے روایت کیا کہ ”رسول اللہ صلی اللہ علیہ وسلم نے بیس سے کچھ اوپر اونٹنیاں دے کر ایک جوڑا خریدا اور پھر ذی یزن کی طرف ہدیہ بھیج دیا۔“ [سنن ابي داود/كتاب اللباس /حدیث: 4035]

سیدنا ابوبردہ رضی اللہ عنہ کہتے ہیں کہ ”میں ام المؤمنین سیدہ عائشہ رضی اللہ عنہا کے ہاں حاضر ہوا تو انہوں نے ہمیں ایک موٹا تہبند دکھایا، جیسے کہ یمن میں بنتے ہیں اور ایک اونی چادر جسے «مُلَبَّدَةٌ» کہتے ہیں (بوجہ پیوند لگے ہونے کے یا موٹا ہونے کے اسے ملبدہ کہا گیا ہے)، انہوں نے اللہ کی قسم اٹھائی اور کہا: ”بلاشبہ رسول اللہ صلی اللہ علیہ وسلم کی وفات ان دو کپڑوں میں ہوئی تھی۔“” [سنن ابي داود/كتاب اللباس /حدیث: 4036]

سیدنا عبداللہ بن عباس رضی اللہ عنہ بیان کرتے ہیں کہ جب حروریہ (خارجیوں) کا ظہور ہوا اور میں سیدنا علی رضی اللہ عنہ کی خدمت میں آیا، تو انہوں نے (مجھ سے) کہا کہ میں ان لوگوں کے پاس جاؤں۔ تو میں نے ایک خوبصورت یمنی حلہ زیب تن کیا۔ ابوزمیل رحمہ اللہ نے کہا: ”سیدنا ابن عباس رضی اللہ عنہ بڑے خوبرو اور وجیہ جوان تھے۔“ سیدنا ابن عباس رضی اللہ عنہ نے بتایا کہ میں ان لوگوں کے پاس پہنچا تو انہوں نے مجھے «مَرْحَبًا» ”مرحبا“ کہا اور بولے: ”اے ابن عباس! یہ حلہ کیسا ہے؟“ (یعنی آپ نے اسے کیونکر زیب تن کیا ہے؟) تو انہوں نے جواب دیا: ”تم مجھ پر کیا اعتراض کرتے ہو، حالانکہ میں نے رسول اللہ صلی اللہ علیہ وسلم کو انتہائی خوبصورت حلہ زیب تن کیے دیکھا ہے۔“ امام ابوداؤد رحمہ اللہ کہتے ہیں کہ ”ابوزمیل کا نام سماک بن ولید حنفی ہے۔“ [سنن ابي داود/كتاب اللباس /حدیث: 4037]

جناب عبداللہ بن سعد اپنے والد سعد (سعد رازی اشتکی) رضی اللہ عنہ سے روایت کرتے ہیں، انہوں نے کہا: ”میں نے بخارا میں ایک شخص کو دیکھا جو اپنے سفید خچر پر سوار تھا اور اس کے سر پر سیاہ خز کی پگڑی تھی۔“ اس نے کہا: ”یہ مجھے رسول اللہ صلی اللہ علیہ وسلم نے پہنائی تھی۔“ یہ لفظ عثمان (عثمان بن محمد انماطی) کے ہیں اور اس کی روایت میں «أَخْبَرَنَا» ”ہمیں خبر دی“ کے لفظ ہیں۔ [سنن ابي داود/كتاب اللباس /حدیث: 4038]

عبدالرحمن بن غنم اشعری رضی اللہ عنہ نے کہا کہ انہوں نے رسول اللہ صلی اللہ علیہ وسلم کو فرماتے سنا: ”یقیناً میری امت میں ایسے لوگ آئیں گے جو خز اور ریشم کو حلال سمجھیں گے۔“ پھر کچھ بیان کیا۔ اس کے بعد فرمایا: ”کئی ان میں سے قیامت تک کے لیے بندر بنا دیے جائیں گے اور کئی خنزیر۔“ امام ابوداؤد رحمہ اللہ فرماتے ہیں کہ اصحابِ رسول صلی اللہ علیہ وسلم میں سے بیس یا زیادہ کے متعلق مروی ہے کہ وہ خز پہنتے تھے۔ ان میں سیدنا انس بن مالک اور براء بن عازب رضی اللہ عنہما کا نام بھی ہے۔ [سنن ابي داود/كتاب اللباس /حدیث: 4039]