حضرت جریر بن عبداللہ بجلی رضی اللہ عنہ سے روایت ہے کہ: ”اللہ کے نبی صلی اللہ علیہ وسلم درختوں کے ایک جھنڈ میں داخل ہوئے اور قضائے حاجت کی، حضرت جریر رضی اللہ عنہ نے پانی کا برتن حاضر کیا، چنانچہ آپ صلی اللہ علیہ وسلم نے اس سے استنجا فرمایا اور ہاتھ کو مٹی سے رگڑا۔“ [سنن ابن ماجه/كتاب الطهارة وسننها/حدیث: 359]

حضرت جابر رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم نے ہمیں حکم دیا ہے کہ ہم اپنے مشکیزوں کا منہ باندھ دیا کریں اور برتنوں کو ڈھانک دیا کریں۔“ [سنن ابن ماجه/كتاب الطهارة وسننها/حدیث: 360]

حضرت عائشہ رضی اللہ عنہا سے روایت ہے، وہ بیان کرتی ہیں کہ ”میں رات کے وقت رسول اللہ صلی اللہ علیہ وسلم کے لیے تین ڈھانکے ہوئے برتن تیار رکھتی تھی؛ ایک برتن آپ کے وضو کے لیے، ایک آپ کے مسواک کے لیے اور ایک آپ کے پینے کے لیے۔“ [سنن ابن ماجه/كتاب الطهارة وسننها/حدیث: 361]

حضرت عبداللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم اپنی پاکیزگی (وضو وغیرہ) اور اپنا صدقہ جو کسی کو دینا ہوتا تھا، کسی کے سپرد نہیں کرتے تھے بلکہ یہ کام خود کرتے تھے۔“ [سنن ابن ماجه/كتاب الطهارة وسننها/حدیث: 362]

حضرت ابو رزین رضی اللہ عنہ سے روایت ہے، انہوں نے کہا: میں نے حضرت ابو ہریرہ رضی اللہ عنہ کو دیکھا کہ انہوں نے پیشانی پر ہاتھ مارا اور کہا: ”اے عراق والو! تمہارا یہ خیال ہے کہ میں رسول اللہ صلی اللہ علیہ وسلم پر جھوٹ بول رہا ہوں؟ (اس کا نتیجہ یہ ہوگا) کہ تمہیں فائدہ حاصل ہو جائے اور مجھے گناہ ہو۔ میں گواہی دیتا ہوں کہ میں نے رسول اللہ صلی اللہ علیہ وسلم کو یہ فرماتے سنا ہے: ”جب تم میں سے کسی کے برتن میں کتا منہ ڈال دے تو اسے چاہیے کہ اس (برتن) کو سات بار دھوئے۔“” [سنن ابن ماجه/كتاب الطهارة وسننها/حدیث: 363]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب تم میں سے کسی کے برتن میں کتا پی لے تو اسے چاہیے کہ اس (برتن) کو سات بار دھوئے۔“ [سنن ابن ماجه/كتاب الطهارة وسننها/حدیث: 364]

حضرت عبداللہ بن مغفل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب برتن میں کتا پی لے تو اسے سات بار دھوؤ اور آٹھویں مرتبہ مٹی کے ساتھ صاف کرو۔“ [سنن ابن ماجه/كتاب الطهارة وسننها/حدیث: 365]

حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جب تم میں سے کسی کے برتن میں کتا پی لے تو اسے چاہیے کہ اس (برتن) کو سات بار دھوئے۔“ [سنن ابن ماجه/كتاب الطهارة وسننها/حدیث: 366]

حضرت کبشہ بنت کعب رضی اللہ عنہا جو حضرت ابو قتادہ رضی اللہ عنہ کے ایک بیٹے کی بیوی تھیں، ان سے روایت ہے کہ انہوں نے حضرت ابو قتادہ رضی اللہ عنہ کے لیے برتن میں پانی ڈال کر رکھا تاکہ وہ وضو کر لیں۔ (اتنے میں) ایک بلی آ کر (اس سے پانی) پینے لگی۔ حضرت ابو قتادہ رضی اللہ عنہ نے برتن جھکا دیا (تاکہ وہ آسانی سے پانی پی لے)۔ (حضرت کبشہ رضی اللہ عنہا نے فرمایا) میں ان کی طرف (تعجب سے) دیکھنے لگی تو انہوں نے فرمایا: ”میری بھتیجی! کیا تمہیں تعجب ہو رہا ہے؟“ رسول اللہ صلی اللہ علیہ وسلم نے فرمایا: ”یہ ناپاک نہیں، یہ تو (ہر وقت گھروں میں) آتی جاتی رہتی ہے۔“ [سنن ابن ماجه/كتاب الطهارة وسننها/حدیث: 367]