حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ”ٹھہرے ہوئے پانی میں پیشاب کرنے سے منع فرمایا۔“ [سنن ابن ماجه/كتاب الطهارة وسننها/حدیث: 343]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کوئی شخص ٹھہرے ہوئے پانی میں ہرگز پیشاب نہ کرے۔“ [سنن ابن ماجه/كتاب الطهارة وسننها/حدیث: 344]

حضرت عبداللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کوئی شخص ٹھہرے ہوئے پانی میں ہرگز پیشاب نہ کرے۔“ [سنن ابن ماجه/كتاب الطهارة وسننها/حدیث: 345]

حضرت عبدالرحمن بن حسنہ رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم (گھر سے) باہر ہمارے پاس تشریف لائے اور آپ کے ہاتھ میں ایک ڈھال تھی۔ (آپ صلی اللہ علیہ وسلم کو پیشاب کی حاجت محسوس ہوئی تو) اسے (زمین پر) رکھا اور اس کی طرف رخ کر کے بیٹھ کر پیشاب کیا۔ کسی نے کہا: ”ان صاحب کو دیکھو، اس طرح پیشاب کرتے ہیں جس طرح عورت کیا کرتی ہے۔“ نبی صلی اللہ علیہ وسلم نے اس کی بات سن لی، چنانچہ فرمایا: ”تجھ پر افسوس! کیا تجھے معلوم نہیں کہ بنی اسرائیل کے اس آدمی کے ساتھ کیا ہوا؟ ان لوگوں کو جب (کپڑے وغیرہ کو) پیشاب لگ جاتا تو قینچیوں سے کاٹ دیا کرتے تھے (کیونکہ ان کی شریعت میں یہی حکم تھا)، اس نے انہیں اس سے منع کر دیا تو اسے قبر میں عذاب دیا گیا۔“ [سنن ابن ماجه/كتاب الطهارة وسننها/حدیث: 346]

حضرت عبداللہ بن عباس رضی اللہ عنہما سے روایت ہے، انہوں نے فرمایا: رسول اللہ صلی اللہ علیہ وسلم دو نئی قبروں کے پاس سے گزرے تو فرمایا: ”ان دونوں (آدمیوں) کو عذاب ہو رہا ہے اور کسی بڑی وجہ سے عذاب نہیں ہو رہا۔ ان میں سے ایک تو اپنے پیشاب سے نہیں بچتا تھا اور دوسرا چغل خوری کا عادی تھا۔“ [سنن ابن ماجه/كتاب الطهارة وسننها/حدیث: 347]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”عذابِ قبر زیادہ تر پیشاب (سے احتیاط نہ کرنے) کی وجہ سے ہوتا ہے۔“ [سنن ابن ماجه/كتاب الطهارة وسننها/حدیث: 348]

حضرت ابوبکرہ رضی اللہ عنہ سے روایت ہے کہ نبی صلی اللہ علیہ وسلم دو قبروں کے پاس سے گزرے تو فرمایا: ”ان دو شخصوں کو عذاب ہو رہا ہے اور عذاب بھی کسی بڑے کام کی وجہ سے نہیں ہو رہا، ایک کو تو پیشاب کی وجہ سے عذاب ہو رہا ہے اور دوسرے کو غیبت کی سزا مل رہی ہے۔“ [سنن ابن ماجه/كتاب الطهارة وسننها/حدیث: 349]

حضرت مہاجر بن قنفذ رضی اللہ عنہ سے روایت ہے، انہوں نے فرمایا: ”میں نبی صلی اللہ علیہ وسلم کی خدمت میں حاضر ہوا جبکہ آپ وضو کر رہے تھے۔ میں نے سلام کہا تو آپ نے جواب نہ دیا، جب آپ صلی اللہ علیہ وسلم وضو سے فارغ ہوئے تو فرمایا: ”میں نے سلام کا جواب صرف اس وجہ سے نہیں دیا تھا کہ میں بے وضو تھا۔“” [سنن ابن ماجه/كتاب الطهارة وسننها/حدیث: 350]