حضرت عمر رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے مجھے کھڑے ہو کر پیشاب کرتے دیکھا تو فرمایا: ”عمر! کھڑے ہو کر پیشاب نہ کرو۔“ (حضرت عمر رضی اللہ عنہ نے فرمایا:) اس کے بعد میں نے کبھی کھڑے ہو کر پیشاب نہیں کیا۔ [سنن ابن ماجه/كتاب الطهارة وسننها/حدیث: 308]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے کھڑے ہو کر پیشاب کرنے سے منع فرمایا ہے“۔ امام ابن ماجہ رحمہ اللہ نے اپنے استاد احمد بن عبدالرحمن مخزومی رحمہ اللہ کے واسطے سے حدیثِ عائشہ رضی اللہ عنہا کے بارے میں امام سفیان ثوری رحمہ اللہ سے روایت کیا ہے کہ انہوں نے فرمایا: ”اس مسئلہ میں مردوں کو زیادہ معلومات ہو سکتی ہیں“۔ یعنی امام سفیان ثوری رحمہ اللہ نے حضرت عائشہ رضی اللہ عنہا کے فرمان: ”میں نے آپ صلی اللہ علیہ وسلم کو (ہمیشہ) بیٹھ کر پیشاب کرتے دیکھا ہے“ پر حضرت حذیفہ رضی اللہ عنہ کی حدیث (حدیث: 305) کو ترجیح دی ہے۔ احمد بن عبدالرحمن مخزومی رحمہ اللہ نے فرمایا: ”عربوں میں کھڑے ہو کر پیشاب کرنے کا رواج تھا، اس لیے عبدالرحمن بن حسنہ رضی اللہ عنہ کی حدیث میں یہ الفاظ ہیں: (یہودیوں نے کہا) یہ تو بیٹھ کر پیشاب کرتے ہیں جس طرح عورتیں پیشاب کیا کرتی ہیں“۔ [سنن ابن ماجه/كتاب الطهارة وسننها/حدیث: 309]

حضرت ابو قتادہ رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو یہ فرماتے سنا: ”جب کوئی شخص پیشاب کرے تو اسے چاہیے کہ عضو خاص کو دائیں ہاتھ سے نہ چھوئے اور نہ دائیں ہاتھ سے استنجا کرے۔“ [سنن ابن ماجه/كتاب الطهارة وسننها/حدیث: 310]

حضرت عثمان بن عفان رضی اللہ عنہ سے روایت ہے کہ انہوں نے فرمایا: ”میں نے نہ کبھی گانا گایا، نہ جھوٹ بولا، اور نہ عضوِ خاص کو دائیں ہاتھ سے چھوا، جب سے میں نے اس (ہاتھ) سے رسول اللہ صلی اللہ علیہ وسلم کی بیعت کی۔“ [سنن ابن ماجه/كتاب الطهارة وسننها/حدیث: 311]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے کوئی شخص جب استنجا کرے تو دائیں ہاتھ سے استنجا نہ کرے، اسے اپنے بائیں ہاتھ سے استنجا کرنا چاہیے۔“ [سنن ابن ماجه/كتاب الطهارة وسننها/حدیث: 312]

حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”میں تمہارے لیے اس طرح ہوں جس طرح اولاد کے لیے باپ ہوتا ہے۔ (اس لیے) میں تمہیں (بظاہر معمولی سمجھے جانے والے امور کی بھی) تعلیم دیتا ہوں۔ جب تم قضائے حاجت کے لیے جاؤ تو قبلہ کی طرف منہ نہ کرو اور اس کی طرف پیٹھ بھی نہ کرو۔“ اور رسول اللہ صلی اللہ علیہ وسلم نے تین ڈھیلے استعمال کرنے کا حکم دیا، لید اور ہڈی استعمال کرنے سے منع فرمایا، اور دائیں ہاتھ سے استنجا کرنے سے منع فرمایا۔ [سنن ابن ماجه/كتاب الطهارة وسننها/حدیث: 313]

حضرت عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم قضائے حاجت کے لیے تشریف لے گئے اور فرمایا: ”مجھے تین پتھر لا دو۔“ میں دو پتھر اور ایک لید لے آیا، آپ صلی اللہ علیہ وسلم نے دونوں پتھر لے لیے اور لید پھینک دی اور فرمایا: ” «هٰذَا رِكْسٌ» یہ ناپاک ہے۔“ [سنن ابن ماجه/كتاب الطهارة وسننها/حدیث: 314]

حضرت خزیمہ بن ثابت رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”استنجا میں تین پتھر (استعمال) ہوتے ہیں، ان میں گوبر، لید نہ ہو۔“ [سنن ابن ماجه/كتاب الطهارة وسننها/حدیث: 315]

حضرت سلمان فارسی رضی اللہ عنہ سے روایت ہے کہ بعض مشرکین ان کا مذاق اڑانے لگے، ایک مشرک نے کہا: ”میں دیکھتا ہوں کہ تمہارا ساتھی (محمد صلی اللہ علیہ وسلم ) تمہیں سب کچھ سکھاتا ہے حتی کہ پاخانہ کرنا بھی (سکھاتا ہے)۔“ حضرت سلمان فارسی رضی اللہ عنہ نے فرمایا: ”ہاں، آپ نے ہمیں حکم دیا ہے کہ ہم (قضائے حاجت کے لیے) قبلہ کی طرف منہ نہ کریں، اور دائیں ہاتھ سے استنجا نہ کریں، اور تین پتھروں سے کم استعمال نہ کریں، ان میں لید یا ہڈی شامل نہ ہو۔“ [سنن ابن ماجه/كتاب الطهارة وسننها/حدیث: 316]