سمرہ بن جندب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس نے اپنے غلام کو قتل کیا، ہم اسے قتل کر دیں گے، اور جس نے غلام کے ناک کان کاٹے، ہم بھی اس کے ناک کان کاٹ دیں گے۔“ [سنن ابن ماجه/كتاب الديات/حدیث: 2663]

حضرت علی رضی اللہ عنہ اور حضرت عبداللہ بن عمرو رضی اللہ عنہما سے روایت ہے، انہوں نے فرمایا: ”ایک آدمی نے جان بوجھ کر اپنے غلام کو عمداً قتل کر دیا۔ رسول اللہ صلی اللہ علیہ وسلم نے اسے سو کوڑے لگوائے، اسے ایک سال کے لیے جلا وطن کر دیا اور مسلمانوں (کے مال غنیمت) میں سے اس کا حصہ ختم کر دیا۔“ [سنن ابن ماجه/كتاب الديات/حدیث: 2664]

حضرت انس بن مالک رضی اللہ عنہ سے روایت ہے کہ ”ایک یہودی نے ایک عورت کا سر دو پتھروں کے درمیان کچل کر اسے قتل کر دیا، تو رسول اللہ صلی اللہ علیہ وسلم نے بھی اس (قاتل) کا سر دو پتھروں کے درمیان کچل دیا۔“ [سنن ابن ماجه/كتاب الديات/حدیث: 2665]

حضرت انس بن مالک رضی اللہ عنہ سے روایت ہے کہ ایک یہودی نے ایک لڑکی کو اس کے چاندی کے زیوروں کے لیے قتل کر دیا۔ (ابھی فوت نہیں ہوئی تھی کہ رسول اللہ صلی اللہ علیہ وسلم کی خدمت میں حاضر کر دی گئی۔) رسول اللہ صلی اللہ علیہ وسلم نے اس سے فرمایا: ”کیا تجھے فلاں آدمی نے قتل کیا ہے؟“ اس نے سر سے اشارہ کیا کہ نہیں، پھر دوبارہ (کسی اور کا نام لے کر) پوچھا تو اس نے اشارہ کیا کہ نہیں۔ تیسری بار (اس یہودی کا نام لے کر) پوچھا تو اس نے اشارہ کیا کہ ہاں۔ رسول اللہ صلی اللہ علیہ وسلم نے اس (مجرم) کو دو پتھروں کے درمیان (سر کچل کر) قتل کروا دیا۔ [سنن ابن ماجه/كتاب الديات/حدیث: 2666]

حضرت نعمان بن بشیر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قصاص صرف تلوار سے ہوتا ہے۔“ [سنن ابن ماجه/كتاب الديات/حدیث: 2667]

حضرت ابوبکرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”قصاص صرف تلوار سے ہوتا ہے۔“ [سنن ابن ماجه/كتاب الديات/حدیث: 2668]

حضرت عمرو بن احوص رضی اللہ عنہ سے روایت ہے، انہوں نے کہا: میں نے حجۃ الوداع میں رسول اللہ صلی اللہ علیہ وسلم کو یہ فرماتے سنا: ”سنو! کوئی جرم کرنے والا اپنے سوا کسی پر جرم نہیں کرتا۔ نہ باپ کے جرم کی ذمہ داری اس کے بیٹے پر ہے، نہ بیٹے کے جرم کی ذمہ داری اس کے باپ پر ہے۔“ [سنن ابن ماجه/كتاب الديات/حدیث: 2669]

طارق محاربی رضی اللہ عنہ سے روایت ہے، انہوں نے کہا: ”میں نے دیکھا کہ رسول اللہ صلی اللہ علیہ وسلم نے اپنے ہاتھ بلند فرمائے حتیٰ کہ مجھے رسول اللہ صلی اللہ علیہ وسلم کی بغلوں کی سفیدی نظر آئی۔ آپ صلی اللہ علیہ وسلم نے فرمایا: ”سنو! کسی ماں کے جرم کی ذمہ داری اس کے بیٹے پر نہیں۔ سنو! کسی ماں کے جرم کی ذمہ داری اس کے بیٹے پر نہیں۔““ [سنن ابن ماجه/كتاب الديات/حدیث: 2670]

حضرت خشخاش عنبری رضی اللہ عنہ سے روایت ہے، وہ بیان کرتے ہیں کہ میں نبی صلی اللہ علیہ وسلم کی خدمت میں حاضر ہوا اور میرے ساتھ میرا بیٹا تھا، رسول اللہ صلی اللہ علیہ وسلم نے فرمایا: ”تیرے جرم کی پرسش اس سے نہیں ہوگی اور اس کے جرم کی پرسش تجھ سے نہیں ہوگی۔“ [سنن ابن ماجه/كتاب الديات/حدیث: 2671]

حضرت اسامہ بن شریک رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کسی جان کے جرم کی ذمے داری دوسری جان پر نہیں۔“ [سنن ابن ماجه/كتاب الديات/حدیث: 2672]