حضرت عائشہ رضی اللہ عنہا سے روایت ہے، نبی صلی اللہ علیہ وسلم نے فرمایا: ”ناپسندیدہ مفید چیز «التَّلْبِينَةُ» (حریرہ) کو اپناؤ۔“ ام المؤمنین رضی اللہ عنہا نے فرمایا: ”رسول اللہ صلی اللہ علیہ وسلم کے گھر میں جب کوئی بیمار ہو جاتا تو (حریرہ) کی ہنڈیا آگ پر چڑھی رہتی، حتی کہ (اس کا معاملہ) کسی ایک طرف لگ جاتا، یعنی وہ فوت ہو جاتا یا شفا یاب۔“ [سنن ابن ماجه/كتاب الطب/حدیث: 3446]

حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کالے دانے «الْحَبَّةِ السَّوْدَاءِ» میں سام «السَّامِ» کے سوا ہر مرض کی شفا ہے۔“ سام کا مطلب موت ہے، اور کالا دانہ کلونجی ہے۔ [سنن ابن ماجه/كتاب الطب/حدیث: 3447]

حضرت عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس کالے دانے (کلونجی) کو اختیار کرو، اس میں موت کے سوا ہر مرض کی شفا ہے۔“ [سنن ابن ماجه/كتاب الطب/حدیث: 3448]

حضرت خالد بن سعد رحمہ اللہ سے روایت ہے، انہوں نے کہا: ہم لوگ سفر میں تھے، ہمارے ساتھ حضرت غالب بن ابحر بھی تھے، وہ راستے میں بیمار ہو گئے۔ ہم لوگ مدینہ پہنچے تو وہ (اس وقت بھی) بیمار تھے۔ حضرت ابن ابی عتیق رحمہ اللہ (عبداللہ بن محمد بن عبدالرحمن بن ابی بکر) ان کی بیمار پرسی کے لیے آئے تو ہم سے فرمایا: ”تم یہ کالا دانہ (کلونجی) استعمال کرو، اس کے پانچ سات دانے لے کر پیس لو، پھر زیتون کے تیل میں ملا کر ان کی ناک میں چند قطرے اس طرف اور چند اس طرف (نتھنوں میں) ڈالو، کیونکہ حضرت عائشہ رضی اللہ عنہا بیان کرتی ہیں کہ انہوں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”یہ کالا دانہ ہر بیماری کی شفا ہے، سوائے اس کے کہ «السَّامُ» (ہی مقدر) ہو،“ میں نے کہا: «السَّامُ» کیا ہے؟ انہوں نے فرمایا: ”موت۔““ [سنن ابن ماجه/كتاب الطب/حدیث: 3449]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جو شخص مہینے میں تین دن صبح کے وقت شہد چاٹ لے، اسے کوئی بڑی آفت (بیماری) نہیں آئے گی۔“ [سنن ابن ماجه/كتاب الطب/حدیث: 3450]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کی خدمت میں شہد کا ہدیہ پیش کیا گیا۔ آپ صلی اللہ علیہ وسلم نے ہمارے درمیان ایک ایک چمچ تقسیم فرمایا۔ میں نے اپنا حصہ لے لیا، پھر عرض کیا: اللہ کے رسول صلی اللہ علیہ وسلم ! مزید ایک چمچ لے لوں؟ فرمایا: ”ہاں (لے لو)““ [سنن ابن ماجه/كتاب الطب/حدیث: 3451]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”دو شفا والی چیزیں اختیار کرو: شہد اور قرآن۔“ [سنن ابن ماجه/كتاب الطب/حدیث: 3452]

حضرت ابو سعید خدری اور حضرت جابر بن عبداللہ رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”کھمبی مَن کی قسم سے ہے۔ اس کا پانی آنکھ کے لیے شفا ہے۔ عجوہ کھجور جنت سے ہے اور یہ جن کے اثر (یا جنون) سے شفا دیتی ہے۔“ [سنن ابن ماجه/كتاب الطب/حدیث: 3453]

حضرت سعید بن زید بن عمرو بن نفیل رضی اللہ عنہ سے روایت ہے، نبی صلی اللہ علیہ وسلم نے فرمایا: ”کھمبی اس من سے ہے جو اللہ تعالیٰ نے بنی اسرائیل پر نازل کیا تھا، اور اس کا پانی آنکھ کے لیے شفا ہے۔“ [سنن ابن ماجه/كتاب الطب/حدیث: 3454]