حضرت سمرہ بن جندب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”حسب مال ہے اور شرف تقویٰ ہے۔“ [سنن ابن ماجه/كتاب الزهد/حدیث: 4219]

حضرت ابوذر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مجھے ایک فرمان (اور عثمان راوی نے کہا: مجھے ایک آیت) معلوم ہے، اگر سب لوگ اس پر عمل کر لیں تو ان کے لیے کافی ہو جائے۔“ صحابہ نے عرض کیا: ”اللہ کے رسول صلی اللہ علیہ وسلم ! کون سی آیت؟“ آپ صلی اللہ علیہ وسلم نے فرمایا: ﴿وَمَن يَتَّقِ اللَّـهَ يَجْعَل لَّهُ مَخْرَجًا﴾ [سورة الطلاق: 2] ”جو کوئی اللہ سے ڈرے، اللہ اس کے لیے (ہر مشکل سے) نکلنے کی راہ بنا دیتا ہے۔“ [سنن ابن ماجه/كتاب الزهد/حدیث: 4220]

حضرت ابوزہیر (معاذ بن رباح) ثقفی رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے نباوہ یا بناوہ کے مقام پر خطاب فرمایا، یہ مقام طائف کے قریب ہے۔ آپ صلی اللہ علیہ وسلم نے فرمایا: ”ہو سکتا ہے تم جنتیوں اور جہنمیوں کو الگ الگ پہچان لو۔“ ہم نے عرض کیا: اے اللہ کے رسول صلی اللہ علیہ وسلم ! کس علامت سے؟ آپ صلی اللہ علیہ وسلم نے فرمایا: ”اچھی رائے کے اظہار سے اور بری رائے کے اظہار سے، تم ایک دوسرے پر اللہ کے گواہ ہو۔“ [سنن ابن ماجه/كتاب الزهد/حدیث: 4221]

حضرت کلثوم (بن علقمہ) خزاعی رضی اللہ عنہ سے روایت ہے، انہوں نے فرمایا کہ نبی صلی اللہ علیہ وسلم کی خدمت میں ایک آدمی نے حاضر ہو کر عرض کیا: ”اے اللہ کے رسول صلی اللہ علیہ وسلم ! جب میں نیکی کروں تو مجھے کیسے معلوم ہو سکتا ہے کہ میں نے اچھا کام کیا ہے؟ اور جب میں گناہ کر بیٹھوں (تب کیسے معلوم ہوگا)؟“ تو رسول اللہ صلی اللہ علیہ وسلم نے فرمایا: ”جب تیرے ہمسائے کہیں کہ تو نے اچھا کام کیا ہے تو (یقین کر لے کہ) تو نے اچھا کام کیا ہے، اور جب وہ کہیں کہ تو نے برا کام کیا ہے، تو پھر تو نے برا ہی کام کیا ہے۔“ [سنن ابن ماجه/كتاب الزهد/حدیث: 4222]

حضرت عبداللہ بن مسعود رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم سے پوچھا: ”مجھے کیسے معلوم ہوگا جب میں نیکی یا برائی کروں (کہ میں نے نیکی کی ہے یا برائی کی ہے۔)؟“ نبی صلی اللہ علیہ وسلم نے فرمایا: ”جب تو سنے کہ تیرے ہمسائے کہیں تو نے اچھا کام کیا ہے، تو تو نے اچھا کام ہی کیا ہے، اور جب تو انہیں سنے وہ کہیں تو نے برا کام کیا ہے، تو تو نے برا کام ہی کیا ہے۔“ [سنن ابن ماجه/كتاب الزهد/حدیث: 4223]

حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جنتی آدمی وہ ہے جس کے کانوں کو اللہ تعالیٰ لوگوں کی اچھی رائے سے بھر دیتا ہے اور وہ سن رہا ہوتا ہے (کہ لوگ میری تعریف کر رہے ہیں) اور جہنمی وہ ہے جس کے کانوں کو اللہ تعالیٰ لوگوں کی بری رائے سے بھر دیتا ہے اور وہ سن رہا ہوتا ہے (کہ لوگ مجھے اچھا نہیں سمجھتے)۔“ [سنن ابن ماجه/كتاب الزهد/حدیث: 4224]

حضرت ابوذر رضی اللہ عنہ سے روایت ہے انہوں نے فرمایا: ”میں نے نبی صلی اللہ علیہ وسلم سے عرض کیا: اللہ کے رسول صلی اللہ علیہ وسلم ! ایک آدمی اللہ کی رضا کے لیے (خلوص کے ساتھ) نیک عمل کرتا ہے، اس کی وجہ سے لوگ اس سے محبت کرتے ہیں۔“ نبی صلی اللہ علیہ وسلم نے فرمایا: ”یہ مومن کو جلدی مل جانے والی خوشخبری ہے۔“ [سنن ابن ماجه/كتاب الزهد/حدیث: 4225]

حضرت ابو ہریرہ رضی اللہ عنہ سے روایت ہے کہ ایک آدمی نے کہا: ”اے اللہ کے رسول صلی اللہ علیہ وسلم ! میں ایک عمل کرتا ہوں (میرا ارادہ اسے ظاہر کرنے کا نہیں ہوتا لیکن) لوگوں کو اس کا پتہ چل جاتا ہے تو مجھے اچھا لگتا ہے۔“ رسول اللہ صلی اللہ علیہ وسلم نے فرمایا: ”تجھے دو ثواب ملیں گے: خفیہ نیکی کا ثواب اور علانیہ نیکی کا ثواب۔“ [سنن ابن ماجه/كتاب الزهد/حدیث: 4226]

حضرت عمر بن خطاب رضی اللہ عنہ سے روایت ہے، انہوں نے لوگوں کو خطبہ دیتے ہوئے فرمایا: ”میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرما رہے تھے: ”عمل تو نیتوں ہی سے ہیں، ہر شخص کو وہی ملے گا جس کی اس نے نیت کی، چنانچہ جس کی ہجرت اللہ اور اس کے رسول کی طرف ہے، اس کی ہجرت (اجر و ثواب کے لحاظ سے بھی) اللہ اور اس کے رسول کی طرف ہے، اور جس کی ہجرت دنیا حاصل کرنے کے لیے یا کسی عورت سے نکاح کرنے کے لیے ہے، جس کے پاس وہ ہجرت کر کے آیا ہے۔““ [سنن ابن ماجه/كتاب الزهد/حدیث: 4227]

حضرت ابو کبشہ (سعید بن عمرو) انماری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس امت کی مثال چار افراد کی سی ہے: ایک آدمی وہ ہے جسے اللہ نے مال اور علم سے نوازا، وہ اپنے مال میں علم کے مطابق عمل کرتا ہے اور اسے جائز مقام پر خرچ کرتا ہے؛ ایک (دوسرا) آدمی وہ ہے جسے اللہ نے علم دیا اور مال نہیں دیا، وہ کہتا ہے کہ اگر میرے پاس بھی اس شخص کی طرح (مال) ہوتا تو میں بھی اس (مال) سے ویسے ہی عمل سر انجام دیتا جیسے یہ (نیک مال دار) انجام دیتا ہے۔“ رسول اللہ صلی اللہ علیہ وسلم نے فرمایا: ”ثواب میں یہ دونوں برابر ہیں۔ اور ایک (تیسرا) آدمی وہ ہے جسے اللہ نے مال دیا اور علم نہیں دیا، چنانچہ وہ اپنے مال کو اندھا دھند صرف کرتا ہے (یعنی) ناجائز مقام پر خرچ کرتا ہے؛ اور ایک (چوتھا) آدمی وہ ہے جسے اللہ نے نہ علم دیا اور نہ مال دیا، وہ کہتا ہے کہ اگر میرے پاس اس (برے مال دار) شخص کی طرح مال ہوتا تو میں بھی اس (مال) سے ویسے ہی کام کرتا جیسے یہ (برا مال دار) کرتا ہے۔“ رسول اللہ صلی اللہ علیہ وسلم نے فرمایا: ”یہ دونوں (تیسرا اور چوتھا) گناہ میں برابر ہیں۔“ [سنن ابن ماجه/كتاب الزهد/حدیث: 4228]