حضرت ابن عباس رضی اللہ عنہما بیان کرتے ہیں کہ مجھے حضرت اسامہ بن زید رضی اللہ عنہ نے بتایا کہ نبی صلی اللہ علیہ وسلم بیت اللہ کے اندر داخل ہوئے تو اس کے تمام اطراف (چاروں کونوں) میں دعائیں کیں، مگر نماز نہیں پڑھی حتیٰ کہ باہر تشریف لے آئے اور کعبے کے عین سامنے دو رکعتیں پڑھیں۔ [سنن نسائي/كتاب مناسك الحج/حدیث: 2920]

حضرت عبداللہ بن سائب رضی اللہ عنہ، حضرت عبداللہ بن عباس رضی اللہ عنہما کو پکڑ کر لے جاتے (کیونکہ وہ نابینا ہو گئے تھے) اور انہیں تیسرے حصے کے پاس کھڑا کر دیتے تھے جو اس رکن کے پاس ہے جو حجرِ اسود، جو کہ دروازے کے قریب ہے، سے متصل ہے (یعنی رکنِ یمانی کے پاس)۔ حضرت عبداللہ بن عباس رضی اللہ عنہما فرماتے ہیں: کیا تمہیں یہ نہیں بتایا گیا کہ رسول اللہ صلی اللہ علیہ وسلم یہاں نماز پڑھا کرتے تھے؟ وہ کہتے تھے: ہاں، پھر آپ (حضرت عبداللہ بن عباس رضی اللہ عنہما) آگے بڑھتے اور نماز پڑھتے۔ [سنن نسائي/كتاب مناسك الحج/حدیث: 2921]

حضرت عبداللہ بن عبید بن عمیر سے منقول ہے کہ ایک شخص نے (حضرت ابن عمر رضی اللہ عنہ سے) کہا: اے ابوعبدالرحمن! میں دیکھتا ہوں کہ آپ صرف ان دو کونوں (حجر اسود اور رکن یمانی) ہی کو چھوتے ہیں (کیا وجہ ہے؟) انہوں نے فرمایا: میں نے رسول اللہ صلی اللہ علیہ وسلم کو فرماتے سنا ہے: ”ان دو کونوں کو چھونے سے یقیناً گناہ معاف ہو جاتے ہیں۔“ نیز میں نے آپ صلی اللہ علیہ وسلم کو فرماتے سنا: ”جو شخص سات چکر لگائے، اسے غلام آزاد کرنے کے برابر ثواب ملے گا۔“ [سنن نسائي/كتاب مناسك الحج/حدیث: 2922]

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم کعبہ کے طواف کے دوران میں ایک شخص کے پاس سے گزرے جس کی ناک میں نکیل ڈال کر ایک اور شخص اسے لے جا رہا تھا۔ آپ صلی اللہ علیہ وسلم نے اپنے دست مبارک سے وہ نکیل (رسی) کاٹ دی اور فرمایا: ”اسے ہاتھ سے پکڑ کر چلاؤ۔“ [سنن نسائي/كتاب مناسك الحج/حدیث: 2923]

حضرت ابن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم ایک آدمی کے پاس سے گزرے جسے ایک دوسرا آدمی کسی چیز سے چلا رہا تھا جس کی اس نے نذر مان رکھی تھی، نبی صلی اللہ علیہ وسلم نے اسے پکڑا اور توڑ دیا اور فرمایا: ”یہ (عجب) نذر ہے!“ [سنن نسائي/كتاب مناسك الحج/حدیث: 2924]

حضرت طاؤس رحمہ اللہ ایک ایسے شخص سے بیان کرتے ہیں جنہوں نے نبی صلی اللہ علیہ وسلم سے فیضِ صحبت پایا کہ آپ صلی اللہ علیہ وسلم نے فرمایا: ”بیت اللہ کا طواف نماز (کی طرح عبادت) ہے، لہٰذا اس میں کم ہی کوئی بات کرو۔“ یہ الفاظ یوسف (بن سعید) کے ہیں۔ حنظلہ بن ابوسفیان نے حسن بن مسلم کی مخالفت کی ہے۔ [سنن نسائي/كتاب مناسك الحج/حدیث: 2925]

حضرت عبداللہ بن عمر رضی اللہ عنہما بیان کرتے ہیں کہ: ”طواف کے درمیان کلام کم کرو، (یوں سمجھو) تم نماز میں ہو۔“ [سنن نسائي/كتاب مناسك الحج/حدیث: 2926]

حضرت جبیر بن مطعم رضی اللہ عنہ سے منقول ہے، نبی صلی اللہ علیہ وسلم نے فرمایا: ”اے عبدِ مناف کی اولاد! تم کسی کو بیت اللہ کے طواف اور نماز سے نہ روکو جس وقت بھی کوئی کرنا چاہے، دن ہو یا رات۔“ [سنن نسائي/كتاب مناسك الحج/حدیث: 2927]

حضرت ام سلمہ رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم سے عرض کیا کہ میں بیمار ہوں۔ آپ صلی اللہ علیہ وسلم نے فرمایا: ”تم لوگوں کے اوپر اوپر سے (دور سے) سوار ہو کر طواف کر لو۔“ میں نے اسی طرح طواف کیا تو رسول اللہ صلی اللہ علیہ وسلم اس وقت بیت اللہ کے قریب نماز پڑھا رہے تھے اور سورہ الطور کی تلاوت فرما رہے تھے۔ [سنن نسائي/كتاب مناسك الحج/حدیث: 2928]

حضرت ام سلمہ رضی اللہ عنہا فرماتی ہیں: اے اللہ کے رسول! اللہ کی قسم! میں نے طوافِ وداع نہیں کیا۔ تو نبی صلی اللہ علیہ وسلم نے فرمایا: ”جب جماعت شروع ہو جائے تو تم اپنے اونٹ پر سوار ہو کر لوگوں کے اوپر اوپر سے طواف کر لینا۔“ عروہ نے یہ حضرت ام سلمہ رضی اللہ عنہا سے نہیں سنا۔ [سنن نسائي/كتاب مناسك الحج/حدیث: 2929]