حضرت ابوہریرہ رضی اللہ عنہ سے روایت ہے کہ قبیلہ ہذیل کی دو عورتوں میں سے ایک نے دوسری کو پتھر مارا تو اس کا بچہ گرا دیا۔ رسول اللہ صلی اللہ علیہ وسلم نے اسے ”ایک غلام یا کنیز دینے کا فیصلہ کیا۔“ [صحيح البخاري/كتاب الديات/حدیث: 6904]

حضرت عمر رضی اللہ عنہ سے روایت ہے، انہوں نے لوگوں سے عورت کا حمل گرا دینے کی دیت کے متعلق مشورہ کیا تو حضرت مغیرہ بن شعبہ رضی اللہ عنہ نے کہا: ”نبی صلی اللہ علیہ وسلم نے «غُرَّةً» یعنی غلام یا لونڈی دینے کا فیصلہ کیا تھا۔“ [صحيح البخاري/كتاب الديات/حدیث: 6905]

حضرت عمر رضی اللہ عنہ نے کہا: ”کوئی آدمی لاؤ جو یہ گواہی دے کہ آپ صلی اللہ علیہ وسلم نے واقعی یہ فیصلہ کیا ہے“ تو حضرت محمد بن مسلمہ رضی اللہ عنہ نے بھی گواہی دی کہ جب نبی صلی اللہ علیہ وسلم نے اس کے متعلق فیصلہ فرمایا تھا تو وہ اس وقت وہاں حاضر تھے۔ [صحيح البخاري/كتاب الديات/حدیث: 6906]

حضرت عروہ رحمہ اللہ سے روایت ہے کہ حضرت عمر رضی اللہ عنہ نے لوگوں سے قسم دے کر پوچھا: ”کس نے نبی کریم صلی اللہ علیہ وسلم سے حمل گرنے کے بارے میں کوئی فیصلہ سنا ہے؟“ حضرت مغیرہ رضی اللہ عنہ نے کہا: ”میں نے سنا ہے کہ آپ صلی اللہ علیہ وسلم نے اس میں ایک غلام یا کنیز دینے کا فیصلہ کیا تھا۔“ [صحيح البخاري/كتاب الديات/حدیث: 6907]

حضرت عمر رضی اللہ عنہ نے فرمایا: ”اس بات پر اپنا کوئی گواہ پیش کرو۔“ تو حضرت محمد بن مسلمہ رضی اللہ عنہ نے کہا: ”میں گواہی دیتا ہوں کہ نبی صلی اللہ علیہ وسلم نے یہ فیصلہ کیا تھا۔“ [صحيح البخاري/كتاب الديات/حدیث: 6908]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے بنو لحیان کی ایک عورت کے بچے کے متعلق ”ایک غلام یا کنیز“ دینے کا فیصلہ کیا تھا۔ پھر وہ عورت جس کے خلاف آپ صلی اللہ علیہ وسلم نے دیت دینے کا فیصلہ کیا تھا مر گئی، تو رسول اللہ صلی اللہ علیہ وسلم نے فیصلہ فرمایا کہ ”اس کی وراثت اس کے بیٹوں اور اس کے شوہر کو ملے گی اور دیت کی ادائیگی ددھیال والوں کو کرنی ہوگی۔“ [صحيح البخاري/كتاب الديات/حدیث: 6909]

حضرت ابو ہریرہ رضی اللہ عنہ سے روایت ہے، انہوں نے کہا: بنو ہذیل کی دو عورتیں آپس میں لڑ پڑیں، ان میں سے ایک نے دوسری عورت پر پتھر پھینک مارا جس سے وہ عورت اپنے پیٹ کے بچے سمیت مر گئی، مقتولہ کے رشتے دار، نبی صلی اللہ علیہ وسلم کے پاس مقدمہ لے کر گئے تو آپ نے فیصلہ فرمایا کہ ”پیٹ کے بچے کی دیت ایک غلام یا کنیز ہے اور عورت کی دیت قاتلہ عورت کے ددھیال والوں پر واجب ہے۔“ [صحيح البخاري/كتاب الديات/حدیث: 6910]

حضرت انس رضی اللہ عنہ سے روایت ہے، انہوں نے فرمایا: جب رسول اللہ صلی اللہ علیہ وسلم مدینہ طیبہ تشریف لائے تو حضرت ابو طلحہ رضی اللہ عنہ نے میرا ہاتھ پکڑا اور مجھے رسول اللہ صلی اللہ علیہ وسلم کے پاس لے آئے اور کہا: ”اے اللہ کے رسول! انس ایک سمجھدار لڑکا ہے، لہٰذا یہ آپ کی خدمت کرے۔“ حضرت انس رضی اللہ عنہ بیان کرتے ہیں کہ ”میں نے سفر و حضر میں آپ صلی اللہ علیہ وسلم کی خدمت گزاری کا فریضہ ادا کیا۔ اللہ کی قسم! رسول اللہ صلی اللہ علیہ وسلم نے کسی کام کے متعلق جو میں نے کیا، یہ نہیں فرمایا: ”تو نے یہ کام اس طرح کیوں کیا؟“ اور نہ ہی کسی کام کے متعلق جو میں نے نہیں کیا، یہ فرمایا: ”تو نے وہ کام اس طرح کیوں نہیں کیا؟““ [صحيح البخاري/كتاب الديات/حدیث: 6911]