سیدنا عبداللہ بن عباس رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ کسی چیز کو حرام قرار دے دیتا ہے، تو اس کا مطلب یہ ہے کہ اس نے اس چیز کی قیمت کو بھی حرام قرار دے دیا۔“ [سنن الدارقطني/ كِتَابُ الْبُيُوعِ/حدیث: 2815]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم ارشاد فرماتے ہیں: ”بیشک اللہ نے شراب اور اس کی قیمت کو حرام قرار دیا ہے، مردار اور اس کی قیمت کو حرام قرار دیا ہے، خنزیر اور اس کی قیمت کو حرام قرار دیا ہے۔“ [سنن الدارقطني/ كِتَابُ الْبُيُوعِ/حدیث: 2816]

سیدنا تمیم داری رضی اللہ عنہ رسول اللہ صلی اللہ علیہ وسلم کا یہ فرمان نقل کرتے ہیں: ”کسی بھی ایسی چیز کی قیمت لینا جائز نہیں ہے، جس کو کھانا پینا جائز نہیں ہے۔“ [سنن الدارقطني/ كِتَابُ الْبُيُوعِ/حدیث: 2817]

سیدنا عثمان غنی رضی اللہ عنہ بیان کرتے ہیں: نبی کریم صلی اللہ علیہ وسلم نے سیدنا عثمان سے فرمایا: ”جب تم کوئی چیز خریدو، تو اسے ماپ لو اور جب فروخت کرو، تو اسے ماپ کر دو۔“ [سنن الدارقطني/ كِتَابُ الْبُيُوعِ/حدیث: 2818]

سیدنا جابر رضی اللہ عنہ بیان کرتے ہیں: رسول اللہ نے اناج کو اس وقت تک فروخت کرنے سے منع کیا ہے، جب تک اس کو دو طرف سے ماپ لیا جائے، فروخت کرنے والے کی طرف سے اور خریدنے والے کی طرف سے۔ [سنن الدارقطني/ كِتَابُ الْبُيُوعِ/حدیث: 2819]

سیدنا حکیم بن حزام رضی اللہ عنہ بیان کرتے ہیں: انہوں نے رسول اللہ سے عرض کیا: ”یا رسول اللہ! میں خرید و فروخت کرتا ہوں، تو کون سا کام میرے لیے حلال ہے اور کون سا کام میرے لیے حرام ہے؟“ تو نبی کریم صلی اللہ علیہ وسلم نے ارشاد فرمایا: ”میرے بھتیجے! تم کوئی چیز خریدو اور اسے اس وقت تک فروخت نہ کرو، جب تک اس پر تمہارا اپنا قبضہ نہ ہو جائے۔“ [سنن الدارقطني/ كِتَابُ الْبُيُوعِ/حدیث: 2820]

یہی روایت ایک اور صحابی سے منقول ہے: ”جب کوئی چیز تولو، اس کو اس وقت تک آگے فروخت نہ کرو، جب تک ماپ نہ لو۔“ [سنن الدارقطني/ كِتَابُ الْبُيُوعِ/حدیث: 2821]

سیدنا حکیم بن حزام رضی اللہ عنہ بیان کرتے ہیں: نبی کریم صلی اللہ علیہ وسلم نے فرمایا: ”تم کوئی چیز خریدو اور اسے تب تک آگے فروخت نہ کرو، جب تک تم اس کا ماپ نہ لے لو۔“ [سنن الدارقطني/ كِتَابُ الْبُيُوعِ/حدیث: 2822]

سیدنا حکیم بن حزام رضی اللہ عنہ بیان کرتے ہیں: رسول اللہ نے ایک دن ان کو ایک دینار عطا کیا اور فرمایا: ”اس سے قربانی کا جانور خرید لو۔“ تو انہوں نے ایک دینار کے عوض میں قربانی کا جانور خرید لیا، جب اسے دو دینار قیمت میں فروخت کر دیا، پھر ایک دینار کے عوض میں قربانی کا جانور خرید لیا، وہ پھر ایک دینار اور قربانی کا جانور لے کر نبی کی خدمت میں حاضر ہوئے، تو نبی نے اس ایک دینار کو صدقہ کر دیا اور ان کے لیے برکت کی دعا کی۔ [سنن الدارقطني/ كِتَابُ الْبُيُوعِ/حدیث: 2823]

عروہ بن ابوالجعد بیان کرتے ہیں: نبی کریم صلی اللہ علیہ وسلم کو سوداگروں کے قافلے کے بارے میں پتا چلا، تو انہوں نے ایک صحابی کو ایک دینار دیا اور حکم دیا: ”اس سے میرے لیے ایک بکری کو خرید کر لاؤ۔“ تو وہ چلے گئے اور ایک دینار کے عوض میں دو بکریاں خرید لائے، پھر ان کو ایک شخص ملا، تو انہوں نے ایک دینار کے بدلے میں ان سے ایک بکری خرید لی، راوی کہتے ہیں: وہ پھر نبی کریم صلی اللہ علیہ وسلم کی خدمت میں ایک دینار اور ایک بکری لے کر حاضر ہوئے، تو نبی نے فرمایا: ”اللہ تمہارے سودے میں برکت ڈالے۔“ راوی کہتے ہیں: (یہ صورت حال ہوتی کہ) میں کوفہ کے ایک بازار میں کھڑا ہوتا تھا اور چالیس ہزار تک کما لیا کرتا تھا۔ [سنن الدارقطني/ كِتَابُ الْبُيُوعِ/حدیث: 2824]