سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص قیامت کے دن ایسی حالت میں آئے گا کہ وہ تین چیزوں سے بری ہوگا، تو وہ جنت میں داخل ہوگا۔ (وہ تین چیزیں یہ ہیں) تکبر، خیانت اور قرض۔“ [صحیح ابن حبان/كتاب الإيمان/حدیث: 198]

سیدنا سہل بن بیضاء رضی اللہ عنہ، جن کا تعلق بنو عبد الدار سے ہے، وہ بیان کرتے ہیں: ایک مرتبہ ہم نبی اکرم صلی اللہ علیہ وسلم کے ساتھ سفر کر رہے تھے، تو آپ صلی اللہ علیہ وسلم نے اپنے سے آگے والے لوگوں کو بٹھا دیا اور آپ صلی اللہ علیہ وسلم سے پیچھے آنے والے لوگ آپ صلی اللہ علیہ وسلم تک پہنچ گئے۔ جب لوگ اکٹھے ہو گئے، تو نبی اکرم صلی اللہ علیہ وسلم نے ارشاد فرمایا: ”بے شک جو شخص اس بات کی گواہی دے کہ اللہ تعالیٰ کے علاوہ اور کوئی معبود نہیں ہے، تو اللہ تعالیٰ اسے جہنم پر حرام کر دے گا اور اس کے لیے جنت کو واجب کر دے گا۔“ (امام ابن حبان رحمہ اللہ فرماتے ہیں:) اس روایت میں نبی اکرم صلی اللہ علیہ وسلم کا خطاب حالت کے مخصوص پس منظر کے حوالے سے ہے، اور یہ اس قسم سے تعلق رکھتا ہے، جس کو میں نے کتاب «مغول السنن» میں ذکر کیا ہے کہ جب کسی روایت میں خطاب کا مخصوص پس منظر ہو، تو اب یہ بات جائز نہیں ہے کہ تمام حالتوں میں اس کے مطابق فیصلہ دیا جائے، اور ہر وہ خطاب، جو نبی اکرم صلی اللہ علیہ وسلم سے مخصوص پس منظر کے ساتھ صادر ہوا ہو اس کی دو قسمیں ہوں گی ان میں سے ایک قسم یہ ہے: وہ کسی حالت کی موجودگی میں ہوگا، اور اسی کی وجہ سے اس چیز کو ذکر کیا گیا ہوگا، اس حالت کو اس خبر کے ہمراہ ذکر نہیں کیا گیا ہوگا۔ دوسری صورت یہ ہے: کچھ سوالات نبی اکرم صلی اللہ علیہ وسلم سے کیے گئے ہوں گے آپ صلی اللہ علیہ وسلم نے ان کے جوابات عنایت کیے ہوں گے، تو ان جوابات کو روایت کر لیا گیا اور سوالات روایت نہیں ہو سکے، تو اب یہ بات جائز نہیں ہے کہ کوئی شخص اس روایت کی بنا پر فیصلہ دے، جو ہر حالت میں ہو، اس میں «مجمل» اور «مفسر» یا مختصر اور تفصیلی کا خیال نہ رکھا گیا ہو۔ [صحیح ابن حبان/كتاب الإيمان/حدیث: 199]

سیدنا جابر رضی اللہ عنہ بیان کرتے ہیں: جب سیدنا معاذ رضی اللہ عنہ کا آخری وقت قریب آیا، تو انہوں نے فرمایا: خیمے کا پردہ ہٹا دو، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص خلوصِ دل کے ساتھ اس بات کی گواہی دے کہ اللہ تعالیٰ کے علاوہ اور کوئی معبود نہیں ہے، وہ شخص جنت میں داخل ہو گا۔“ امام ابن حبان رحمہ اللہ فرماتے ہیں: نبی اکرم صلی اللہ علیہ وسلم کا یہ فرمان: ”وہ جنت میں داخل ہو گا۔“ اس سے مراد یہ ہے: ایک جنت دوسرے سے مختلف ہوتی ہے، کیونکہ جنت کی مختلف قسمیں ہیں، تو جو شخص وہ اقرار کرتا ہے، ایمان کا سب سے بلند تر شعبہ ہے، اور وہ عمل تک نہیں پہنچا اور پھر انتقال کر جاتا ہے، تو وہ جنت میں داخل ہو گا۔ جو شخص اقرار کے بعد اعمال بھی بجا لاتا ہے خواہ وہ کم ہوں، یا زیادہ ہوں، وہ بھی جنت میں جائے گا۔ لیکن یہ وہ پہلے والی جنت سے اوپر ہو گی؛ کیونکہ اس کے عمل زیادہ ہیں، تو اس کے درجات بلند ہوں گے اور اس کی جنت بلند ہو گی، ایسا نہیں ہے کہ تمام مسلمان ایک ہی جنت میں داخل ہوں گے، اگرچہ ان کے اعمال کے درمیان تفاوت اور تباین پایا جاتا ہو، کیونکہ جنت کی مختلف قسمیں ہیں۔ ایسا نہیں ہے کہ ایک ہی جنت ہو۔ [صحیح ابن حبان/كتاب الإيمان/حدیث: 200]

سیدنا عثمان غنی رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص ایسی حالت میں مرے کہ وہ اس بات کا علم رکھتا ہو کہ اللہ تعالیٰ کے علاوہ اور کوئی معبود نہیں ہے، وہ شخص جنت میں داخل ہو گا۔“ [صحیح ابن حبان/كتاب الإيمان/حدیث: 201]

صنابحی بیان کرتے ہیں: میں سیدنا عبادہ بن صامت رضی اللہ عنہ کی خدمت میں حاضر ہوا، اس وقت وہ قریب الموت تھے۔ میں رونے لگا تو انہوں نے مجھ سے فرمایا: رک جاؤ، تم کیوں رو رہے ہو؟ اللہ کی قسم! اگر مجھ سے گواہی طلب کی گئی تو میں تمہارے بارے میں ضرور گواہی دوں گا اور اگر مجھے شفاعت کا موقع دیا گیا تو میں تمہارے لیے شفاعت کروں گا اور اگر مجھ سے ہو سکا تو میں تمہیں فائدہ پہنچاؤں گا۔ پھر انہوں نے یہ بات بیان کی: اللہ کی قسم! میں نے نبی اکرم صلی اللہ علیہ وسلم کی زبانی جو بھی حدیث سنی جس میں تمہارے لیے بہتری تھی، وہ حدیث میں نے تمہارے سامنے بیان کر دی، صرف ایک حدیث بیان نہیں کی اور وہ میں آج تمہارے سامنے بیان کروں گا کیونکہ اب میرا آخری وقت قریب آ گیا ہے۔ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص اس بات کی گواہی دے کہ اللہ تعالیٰ کے علاوہ اور کوئی معبود نہیں ہے اور بے شک سیدنا محمد صلی اللہ علیہ وسلم اللہ کے رسول ہیں، اللہ تعالیٰ اسے جہنم پر حرام قرار دے دے گا۔“ [صحیح ابن حبان/كتاب الإيمان/حدیث: 202]

سیدنا معاذ بن جبل رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”زمین پر بسنے والا جو بھی شخص ایسی حالت میں مرے کہ وہ کسی کو اللہ کا شریک نہ ٹھہراتا ہو، اور وہ اس بات کی گواہی دے کہ میں اللہ کا رسول ہوں، اور یہ بات یقین رکھنے والے دل کی طرف لوٹتی ہو، تو اس شخص کی مغفرت ہو جاتی ہے۔“ (راوی کہتے ہیں) میں نے دریافت کیا: کیا آپ نے سیدنا معاذ رضی اللہ عنہ کی زبانی یہ بات سنی ہے؟ راوی کہتے ہیں: تو حاضرین نے مجھے گھور کر دیکھا لیکن انہوں نے کہا: تم لوگ اسے چھوڑ دو، اس نے غلط بات نہیں کی ہے۔ جی ہاں! میں نے سیدنا معاذ رضی اللہ عنہ کی زبانی یہ بات سنی ہے۔ سیدنا معاذ رضی اللہ عنہ نے یہ بات بتائی تھی، انہوں نے نبی اکرم صلی اللہ علیہ وسلم کی زبانی یہ بات سنی ہے۔ [صحیح ابن حبان/كتاب الإيمان/حدیث: 203]

سیدنا عثمان غنی اور سیدنا عمر بن خطاب رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”میں ایک ایسے کلمے کے بارے میں جانتا ہوں، جو بھی بندہ سچے دل کے ساتھ اس کلمے کو پڑھ لے گا اور وہ اس پر مرے گا، تو اللہ تعالیٰ اسے جہنم پر حرام قرار دے گا۔“ (وہ کلمہ یہ ہے) «لَا إِلٰهَ إِلَّا اللّٰهُ» ”اللہ کے سوا کوئی معبودِ برحق نہیں“۔ [صحیح ابن حبان/كتاب الإيمان/حدیث: 204]

سعدی بنت مری بیان کرتی ہیں کہ ایک مرتبہ سیدنا عمر بن خطاب رضی اللہ عنہ نبی اکرم صلی اللہ علیہ وسلم کے وصال کے بعد سیدنا طلحہ رضی اللہ عنہ کے پاس سے گزرے، تو دریافت کیا: کیا وجہ ہے کہ آپ پریشان ہیں؟ کیا آپ کو اپنے چچازاد کی حکومت پسند نہیں ہے؟ تو سیدنا طلحہ رضی اللہ عنہ نے جواب دیا: جی نہیں! لیکن میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”میں ایک ایسے کلمے کے بارے میں جانتا ہوں کہ جو بھی بندہ مرتے وقت اس کلمے کو پڑھے گا، تو یہ کلمہ اس کے صحیفے میں اس کے لیے نور کی حیثیت رکھے گا، اور اس شخص کا جسم اور اس شخص کی روح مرنے کے وقت اس کلمے کی وجہ سے راحت محسوس کریں گے۔“ (سیدنا طلحہ رضی اللہ عنہ نے بیان کیا) پھر نبی اکرم صلی اللہ علیہ وسلم کا وصال ہو گیا، لیکن میں آپ سے اس کلمے کے بارے میں دریافت نہیں کر سکا، تو سیدنا عمر رضی اللہ عنہ نے فرمایا: میرے خیال میں یہ وہی کلمہ ہو گا جو نبی اکرم صلی اللہ علیہ وسلم اپنے چچا (جناب ابوطالب) کو پڑھانا چاہتے تھے، اور اگر نبی اکرم صلی اللہ علیہ وسلم کو اس بات کا علم ہوتا کہ کوئی اور کلمہ اس کلمے سے زیادہ بہتر طور پر آپ کے چچا کے لیے نجات کا باعث بن سکتا ہے، تو آپ صلی اللہ علیہ وسلم انہیں وہی کلمہ پڑھنے کا حکم دیتے۔ [صحیح ابن حبان/كتاب الإيمان/حدیث: 205]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”مومن اپنی قبر میں جب اس بات کی گواہی دے دیتا ہے کہ اللہ تعالیٰ کے علاوہ اور کوئی معبود نہیں ہے، اور اللہ کے رسول سیدنا محمد صلی اللہ علیہ وسلم کو پہچان لیتا ہے، تو اللہ تعالیٰ کے اس فرمان ﴿يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ﴾ [سورة إبراهيم: 27] ”اللہ تعالیٰ، ایمان والوں کو ثابت قول پر ثابت قدم رکھے گا، دنیاوی زندگی میں بھی اور آخرت میں بھی“ سے یہی مراد ہے۔“ [صحیح ابن حبان/كتاب الإيمان/حدیث: 206]

سیدنا عبادہ بن صامت رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اس بات کی گواہی دے کہ اللہ تعالیٰ کے علاوہ اور کوئی معبود نہیں ہے، وہی ایک معبود ہے، اس کا کوئی شریک نہیں ہے، اور سیدنا محمد صلی اللہ علیہ وسلم اس کے بندے اور رسول ہیں، اور سیدنا عیسیٰ علیہ السلام اللہ کے بندے، اس کے رسول اور اس کا کلمہ ہیں، جو اس نے سیدہ مریم رضی اللہ عنہا کی طرف القاء کیا تھا، اور اس کی طرف سے آنے والی روح ہیں، جنت اور جہنم حق ہیں، تو اللہ تعالیٰ اسے جنت میں داخل کر دے گا کہ وہ جنت کے آٹھ دروازوں میں سے جس سے چاہے، جنت میں داخل ہو جائے۔“ [صحیح ابن حبان/كتاب الإيمان/حدیث: 207]