یحییٰ بن یعمر بیان کرتے ہیں: میں اور حمید بن عبدالرحمن حمیری حج کرنے کے لیے یا شاید عمرہ کرنے کے لیے روانہ ہوئے۔ ہم نے یہ سوچا: ہو سکتا ہے، ہماری ملاقات نبی اکرم صلی اللہ علیہ وسلم کے اصحاب میں سے کسی شخص سے ہو جائے، تو ہم ان سے تقدیر کے بارے میں دریافت کر لیں گے۔ پھر ہماری ملاقات سیدنا عبداللہ بن عمر رضی اللہ عنہما سے ہوئی۔ مجھے اندازہ ہو گیا کہ میرا ساتھی یہ چاہے گا کہ اس بات کا آغاز میں کروں۔ ہم نے عرض کی: اے ابوعبدالرحمن! ہمارے ہاں کچھ لوگ پیدا ہوتے ہیں، جو قرآن پڑھتے ہیں اور علم حاصل کرتے ہیں، لیکن وہ یہ گمان رکھتے ہیں کہ تقدیر کی کوئی حیثیت نہیں ہے اور معاملہ (کسی گزشتہ تقدیر کے بغیر) نئے سرے سے شروع ہوتا ہے۔ تو سیدنا عبداللہ بن عمر رضی اللہ عنہما نے فرمایا: اگر تمہاری ان لوگوں سے ملاقات ہو، تو انہیں بتا دینا کہ میرا ان سے کوئی تعلق نہیں ہے، اور ان کا میرے ساتھ کوئی تعلق نہیں ہے۔ اس ذات کی قسم! جس کا نام لے کر عبداللہ بن عمر قسم اٹھاتا ہے، اگر ان لوگوں میں سے کوئی ایک شخص اُحد پہاڑ جتنا سونا خرچ کرے اور وہ تقدیر پر ایمان نہ رکھتا ہو، تو اس کا یہ عمل قبول نہیں کیا جائے گا۔ پھر سیدنا عبداللہ بن عمر رضی اللہ عنہما نے بتایا: سیدنا عمر بن خطاب رضی اللہ عنہ نے مجھے یہ بات بتائی ہے، وہ بیان کرتے ہیں: ایک دن نبی اکرم صلی اللہ علیہ وسلم تشریف فرما تھے۔ اسی دوران ایک شخص وہاں آیا جس کی داڑھی انتہائی سیاہ تھی اور اس کے کپڑے انتہائی سفید تھے۔ اس نے اپنا گھٹنا نبی اکرم صلی اللہ علیہ وسلم کے گھٹنے کے ساتھ ملایا اور عرض کی: اے سیدنا محمد صلی اللہ علیہ وسلم ! اسلام سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”اس بات کی گواہی دینا کہ اللہ تعالیٰ کے علاوہ اور کوئی معبود نہیں ہے، نماز قائم کرنا، زکاۃ ادا کرنا، رمضان کے روزے رکھنا اور بیت اللہ کا حج کرنا۔“ اس شخص نے کہا: آپ نے سچ کہا ہے۔ سیدنا عمر رضی اللہ عنہ کہتے ہیں: ہمیں اس شخص کے نبی اکرم صلی اللہ علیہ وسلم سے سوال کرنے پر اور آپ کی بات کی تصدیق کرنے پر حیرت ہوئی۔ اس شخص نے کہا: آپ مجھے بتائیے کہ ایمان سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”یہ کہ تم اللہ تعالیٰ، اس کے فرشتوں، اس کی کتابوں، اس کے رسولوں، مرنے کے بعد دوبارہ زندہ ہونے اور تقدیر پر ایمان رکھو، خواہ وہ اچھی یا بری ہو، میٹھی ہو، یا کڑوی ہو۔“ اس شخص نے کہا: آپ نے ٹھیک کہا ہے۔ سیدنا عمر رضی اللہ عنہ کہتے ہیں: ہمیں اس شخص کے نبی اکرم صلی اللہ علیہ وسلم سے سوال کرنے پر اور آپ کے جواب کی تصدیق کرنے پر حیرت ہوئی۔ اس شخص نے کہا: آپ مجھے بتائیے احسان سے مراد کیا ہے؟ نبی اکرم صلی اللہ علیہ وسلم نے فرمایا: ”یہ کہ تم اللہ تعالیٰ کی یوں عبادت کرو جیسے تم اسے دیکھ رہے ہو، اور اگر تم اسے نہیں دیکھ رہے، تو وہ تمہیں دیکھ رہا ہے۔“ اس شخص نے کہا: آپ مجھے بتائیے قیامت کب آئے گی؟ نبی اکرم صلی اللہ علیہ وسلم نے فرمایا: ”اس بارے میں جس شخص سے سوال کیا گیا ہے، وہ سوال کرنے والے سے زیادہ علم نہیں رکھتا۔“ اس شخص نے دریافت کیا: اس کی نشانیاں کیا ہیں؟ نبی اکرم صلی اللہ علیہ وسلم نے فرمایا: ”یہ کہ کنیز اپنے آقا کو جنم دے گی۔ یہ کہ تم برہنہ پاؤں، برہنہ جسم یعنی ناکافی لباس والے بکریوں کے چرواہوں کو دیکھو گے، وہ ایک دوسرے کے مقابلے میں بلند عمارات تعمیر کریں گے۔“ راوی کہتے ہیں: پھر وہ شخص مڑ کر چلا گیا۔ سیدنا عمر رضی اللہ عنہ کہتے ہیں: تین دن بعد میری ملاقات نبی اکرم صلی اللہ علیہ وسلم سے ہوئی، تو نبی اکرم صلی اللہ علیہ وسلم نے دریافت کیا: ”اے عمر! تم جانتے ہو وہ شخص کون تھا؟“ میں نے عرض کی: جی نہیں۔ نبی اکرم صلی اللہ علیہ وسلم نے فرمایا: ”وہ سیدنا جبرائیل علیہ السلام تھے۔ وہ تمہارے پاس اس لیے آئے تھے تاکہ تمہیں تمہارے دین کی تعلیم دیں۔“ [صحیح ابن حبان/كتاب الإيمان/حدیث: 168]

سیدنا ابوذر غفاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص «لَا إِلٰهَ إِلَّا اللّٰهُ» پڑھ لے وہ جنت میں داخل ہو گا۔“ میں نے عرض کی: اگرچہ اس نے زنا کا ارتکاب کیا ہو، اگرچہ اس نے چوری کی ہو؟ نبی اکرم صلی اللہ علیہ وسلم نے فرمایا: ”اگرچہ اس نے زنا کیا ہو، اگرچہ اس نے چوری کی ہو۔“ [صحیح ابن حبان/كتاب الإيمان/حدیث: 169]

زید بن وہیب بیان کرتے ہیں: میں اس بات کی گواہی دیتا ہوں کہ میں نے ربذہ کے مقام پر سیدنا ابوذر غفاری رضی اللہ عنہ کو یہ بیان کرتے ہوئے سنا: ایک مرتبہ میں مدینہ منورہ کی پتھریلی زمین پر نبی اکرم صلی اللہ علیہ وسلم کے ہمراہ چلتا ہوا جا رہا تھا۔ ہمارے سامنے ”اُحد“ پہاڑ آ گیا، نبی اکرم صلی اللہ علیہ وسلم نے فرمایا: ”اے ابوذر! مجھے یہ بات پسند نہیں ہے، میرے پاس اُحد پہاڑ جتنا سونا ہو، اور پھر شام کے وقت ان میں سے ایک بھی دینار میرے پاس باقی رہے، ماسوائے اس کے، جسے میں نے قرض کی ادائیگی کے لیے رکھا ہو۔“ پھر نبی اکرم صلی اللہ علیہ وسلم چلتے رہے، آپ کے ہمراہ میں بھی چلتا رہا۔ نبی اکرم صلی اللہ علیہ وسلم نے فرمایا: ”اے ابوذر!“ میں نے عرض کی: یا رسول اللہ! میں حاضر ہوں۔ نبی اکرم صلی اللہ علیہ وسلم نے فرمایا: ”(دنیا میں مال و دولت کے اعتبار سے) کثرت رکھنے والے لوگ قیامت کے دن (اجر و ثواب کے اعتبار سے) قلت والے ہوں گے۔“ پھر نبی اکرم صلی اللہ علیہ وسلم نے ارشاد فرمایا: ”اے ابوذر! تم یہیں رہنا جب تک میں تمہارے پاس نہیں آ جاتا۔“ پھر نبی اکرم صلی اللہ علیہ وسلم تشریف لے گئے، یہاں تک کہ نگاہوں سے اوجھل ہو گئے، پھر میں نے ایک آواز سنی، میں نے سوچا میں آگے جاتا ہوں، لیکن پھر مجھے نبی اکرم صلی اللہ علیہ وسلم کا فرمان یاد آ گیا جو آپ نے مجھ سے فرمایا تھا، تو میں وہاں ٹھہرا رہا، یہاں تک کہ نبی اکرم صلی اللہ علیہ وسلم تشریف لے آئے۔ میں نے عرض کی: یا رسول اللہ! میں نے آواز سنی تھی، پہلے میں نے ارادہ کیا کہ میں آپ کے پاس آتا ہوں، پھر مجھے آپ کا فرمان یاد آ گیا جو آپ نے مجھ سے فرمایا تھا۔ تو نبی اکرم صلی اللہ علیہ وسلم نے فرمایا: ”وہ جبرائیل علیہ السلام تھے، جو میرے پاس آئے اور انہوں نے مجھے بتایا کہ میری امت کا جو بھی شخص اس حالت میں مرے کہ وہ کسی کو اللہ کا شریک نہ ٹھہراتا ہو، تو وہ شخص جنت میں داخل ہو گا۔“ (سیدنا ابوذر رضی اللہ عنہ کہتے ہیں) میں نے عرض کی: یا رسول اللہ! اگرچہ اس نے زنا کا ارتکاب کیا ہو، اور اگرچہ اس نے چوری کی ہو؟ نبی اکرم صلی اللہ علیہ وسلم نے فرمایا: ”اگرچہ اس نے زنا کا ارتکاب کیا ہو، اگرچہ اس نے چوری کی ہو۔“ یہی روایت ایک اور سند کے ہمراہ سیدنا ابودرداء رضی اللہ عنہ کے حوالے سے منقول ہے۔ [صحیح ابن حبان/كتاب الإيمان/حدیث: 170]

ابومالک اشجعی بیان کرتے ہیں: میں نے اپنے والد رضی اللہ عنہ کو یہ بیان کرتے ہوئے سنا ہے، وہ کہتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”جو شخص اللہ تعالیٰ کی وحدانیت کا اعتراف کرے اور اس کے علاوہ جتنی چیزوں کی عبادت کی جاتی ہے، ان کا انکار کرے، تو اس شخص کا مال اور اس کی جان قابلِ احترام ہوں گے اور اس شخص کا حساب اللہ کے ذمے ہو گا۔“ [صحیح ابن حبان/كتاب الإيمان/حدیث: 171]

ابوجمرہ بیان کرتے ہیں: میں سیدنا عبداللہ بن عباس رضی اللہ عنہما اور لوگوں کے درمیان ترجمانی کے فرائض سر انجام دیتا تھا۔ (یعنی جب سیدنا عبداللہ بن عباس رضی اللہ عنہما گورنر تھے، تو میں ان کا سیکرٹری تھا) ایک مرتبہ ایک خاتون ان کے پاس آئی وہ ان سے مٹکے کی نبیذ کے بارے میں دریافت کرنا چاہتی تھی، تو سیدنا عبداللہ بن عباس رضی اللہ عنہما نے بتایا: عبدالقیس قبیلے کا وفد نبی اکرم صلی اللہ علیہ وسلم کی خدمت میں حاضر ہوا، نبی اکرم صلی اللہ علیہ وسلم نے دریافت کیا: ”یہ کہاں کا وفد ہے، اور کون سی قوم ہے؟“ انہوں نے جواب دیا: ربیعہ (قبیلے سے ہمارا تعلق ہے)۔ نبی اکرم صلی اللہ علیہ وسلم نے فرمایا: ”اس قوم (راوی کو شک ہے شاید یہ الفاظ ہیں) اس وفد کو خوش آمدید جو کسی رسوائی اور ندامت کے بغیر ہو۔“ ان لوگوں نے عرض کی: یا رسول اللہ! ہم دور دراز کے علاقے سے آپ کی خدمت میں حاضر ہوئے ہیں۔ ہمارے اور آپ کے درمیان مضر قبیلے کے کفار کا قبیلہ حائل ہے۔ اس لیے ہم صرف حرمت والے مہینوں میں آپ کی خدمت میں حاضر ہو سکتے ہیں۔ آپ ہمیں کسی ایسی چیز کا حکم دیجیے، جسے ہم اپنے پیچھے والوں کو بتا دیں اور اس کی وجہ سے ہم لوگ جنت میں داخل ہو سکیں۔ سیدنا ابن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے انہیں چار باتوں کا حکم دیا اور انہیں چار چیزوں سے منع کیا۔ آپ صلی اللہ علیہ وسلم نے انہیں ”صرف اللہ تعالیٰ پر“ ایمان رکھنے کا حکم دیا۔ آپ صلی اللہ علیہ وسلم نے ارشاد فرمایا: ”کیا تم لوگ یہ بات جانتے ہو؟ صرف اللہ تعالیٰ پر ایمان رکھنے سے مراد کیا ہے؟“ تو ان لوگوں نے عرض کی: اللہ اور اس کا رسول زیادہ بہتر جانتے ہیں۔ نبی اکرم صلی اللہ علیہ وسلم نے فرمایا: ”اس بات کی گواہی دینا کہ اللہ تعالیٰ کے علاوہ اور کوئی معبود نہیں ہے، اور بے شک محمد ( صلی اللہ علیہ وسلم ) اللہ کے رسول ہیں، (مزید احکام یہ ہیں) نماز قائم کرنا، زکوٰۃ ادا کرنا، رمضان کے روزے رکھنا اور یہ کہ تم مالِ غنیمت میں سے خمس ادا کرو۔“ (سیدنا ابن عباس رضی اللہ عنہما کہتے ہیں) نبی اکرم صلی اللہ علیہ وسلم نے انہیں دباء، حنتم، مزفت اور نقیر (استعمال کرنے سے منع کیا) یہاں شعبہ نامی راوی بعض اوقات لفظ نقیر نقل کرتے ہیں اور بعض اوقات لفظ مقیر نقل کرتے ہیں: نبی اکرم صلی اللہ علیہ وسلم نے ارشاد فرمایا: ”تم ان باتوں کو یاد کر لو اور اپنے پیچھے موجود لوگوں کو ان کے بارے میں بتا دینا۔“ [صحیح ابن حبان/كتاب الإيمان/حدیث: 172]

یحییٰ بن یعمر کہتے ہیں: میں نے کہا: اے ابوعبدالرحمن! (یعنی انہوں نے سیدنا عبداللہ بن عمر رضی اللہ عنہما سے یہ کہا:) کچھ لوگ ہیں جو اس بات کا اعتقاد رکھتے ہیں کہ تقدیر کی کوئی حقیقت نہیں ہے، تو سیدنا عبداللہ بن عمر رضی اللہ عنہما نے دریافت کیا: ”کیا ہمارے ہاں ان لوگوں میں سے کوئی شخص ہے؟“ انہوں نے جواب دیا: جی نہیں۔ سیدنا عبداللہ بن عمر رضی اللہ عنہما نے فرمایا: ”جب تمہاری ان لوگوں کے ساتھ ملاقات ہو تو تم میری طرف سے انہیں یہ پیغام پہنچا دینا کہ عبداللہ بن عمر اللہ تعالیٰ کی بارگاہ میں تم سے بری الذمہ ہونے کا اعتراف کرتا ہے اور تمہارا اس سے کوئی واسطہ نہیں ہے۔“ سیدنا عمر بن خطاب رضی اللہ عنہ نے ہمیں یہ بات بیان کی تھی کہ ایک مرتبہ ہم نبی اکرم صلی اللہ علیہ وسلم کے پاس کچھ لوگوں کے ساتھ بیٹھے ہوئے تھے۔ اس دوران ایک شخص آیا جس پر سفر کی کوئی علامت نہیں تھی اور وہ شہر کا رہنے والا بھی نہیں تھا۔ وہ لوگوں کی گردنیں پھلانگتا ہوا آگے آ کر نبی اکرم صلی اللہ علیہ وسلم کے سامنے بیٹھ گیا۔ اس نے عرض کی: اے سیدنا محمد صلی اللہ علیہ وسلم ! اسلام سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”اسلام یہ ہے کہ تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے، اور بے شک سیدنا محمد صلی اللہ علیہ وسلم اللہ کے رسول ہیں، تم نماز قائم کرو، زکاۃ ادا کرو، حج و عمرہ کرو، غسلِ جنابت کرو، وضو مکمل کرو اور رمضان کے روزے رکھو۔“ اس نے دریافت کیا: ”جب میں ایسا کر لوں گا تو کیا میں مسلمان ہوں گا؟“ نبی اکرم صلی اللہ علیہ وسلم نے فرمایا: ”جی ہاں۔“ اس نے کہا: ”آپ نے سچ فرمایا ہے۔“ اس نے کہا: اے سیدنا محمد صلی اللہ علیہ وسلم ! ایمان سے مراد کیا ہے؟ نبی اکرم صلی اللہ علیہ وسلم نے فرمایا: ”یہ کہ تم اللہ تعالیٰ، اس کے فرشتوں، کتابوں اور اس کے رسولوں پر ایمان رکھو، تم جنت، جہنم اور میزان پر ایمان رکھو، تم مرنے کے بعد دوبارہ زندہ ہونے پر ایمان رکھو اور تم تقدیر پر ایمان رکھو، خواہ وہ اچھی ہو یا بری۔“ اس شخص نے دریافت کیا: ”جب میں یہ کر لوں گا تو کیا میں مومن ہوں گا؟“ تو نبی اکرم صلی اللہ علیہ وسلم نے فرمایا: ”جی ہاں!۔“ اس نے کہا: ”آپ نے سچ فرمایا ہے۔“ اس نے دریافت کیا: اے سیدنا محمد صلی اللہ علیہ وسلم ! احسان سے مراد کیا ہے؟ نبی اکرم صلی اللہ علیہ وسلم نے فرمایا: ”احسان یہ ہے کہ تم عمل کو اللہ تعالیٰ کے لیے اس طرح کرو کہ تم اسے دیکھ رہے ہو، اور اگر تم اسے نہیں دیکھ رہے تو وہ تمہیں دیکھ رہا ہے۔“ اس نے دریافت کیا: ”اگر میں ایسا کر لوں گا تو کیا میں احسان کرنے والا شمار ہوں گا؟“ نبی اکرم صلی اللہ علیہ وسلم نے فرمایا: ”جی ہاں!۔“ اس نے کہا: ”آپ نے سچ فرمایا ہے۔“ اس نے دریافت کیا: ”قیامت کب آئے گی؟“ نبی اکرم صلی اللہ علیہ وسلم نے فرمایا: ”سبحان اللہ! اس بارے میں جس سے سوال کیا گیا ہے وہ سوال کرنے والے سے زیادہ نہیں جانتا، اگر تم چاہو تو میں تمہیں اس کی نشانیوں کے بارے میں بتا دیتا ہوں۔“ اس نے کہا: ٹھیک ہے، تو نبی اکرم صلی اللہ علیہ وسلم نے ارشاد فرمایا: ”جب تم غریب، ننگے پاؤں اور نامناسب لباس والے لوگوں کو دیکھو کہ وہ ایک دوسرے کے مقابلے میں بلند عمارتیں تعمیر کریں اور وہ بادشاہ بن جائیں۔“ تو اس نے دریافت کیا: ”ننگے پاؤں اور نامناسب لباس والے لوگوں سے مراد کیا ہے؟“ نبی اکرم صلی اللہ علیہ وسلم نے ارشاد فرمایا: ”عریب (یعنی نچلے طبقے کے عرب)۔“ نبی اکرم صلی اللہ علیہ وسلم نے فرمایا: ”جب تم کنیز کو دیکھو کہ وہ اپنے آقا کو جنم دے تو یہ قیامت کی نشانیوں میں سے ایک ہوگی۔“ تو اس نے کہا: ”آپ نے سچ فرمایا ہے۔“ پھر وہ واپس چلا گیا تو نبی اکرم صلی اللہ علیہ وسلم نے فرمایا: ”اس شخص کو میرے پاس لے کر آؤ۔“ (راوی کہتے ہیں) ہم نے اسے ہر جگہ تلاش کیا لیکن وہ ہمیں نہیں ملا۔ نبی اکرم صلی اللہ علیہ وسلم نے فرمایا: ”کیا تم جانتے ہو یہ کون تھا؟ یہ جبرائیل علیہ السلام تھے جو تمہارے پاس اس لیے آئے تھے تاکہ تمہیں تمہارے دین کی تعلیم دیں، تو تم اس سے حاصل کر لو۔ اس ذات کی قسم جس کے دستِ قدرت میں میری جان ہے! اس ایک مرتبہ سے پہلے کبھی مجھے اسے پہچاننے میں دقت نہیں ہوئی، لیکن اس مرتبہ میں نے اسے اس وقت پہچانا جب وہ واپس چلا گیا۔“ امام ابن حبان رحمہ اللہ فرماتے ہیں: سلیمان تیمی نامی راوی روایت کے یہ الفاظ نقل کرنے میں منفرد ہیں: ”تم اس سے حاصل کر لو۔“ اور یہ الفاظ بھی: ”اور یہ کہ تم عمرہ کرو اور تم غسل کرو اور تم وضو مکمل کرو۔“ [صحیح ابن حبان/كتاب الإيمان/حدیث: 173]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مجھے اس بات کا حکم دیا گیا ہے کہ میں اس وقت تک ان کے ساتھ جنگ کرتا رہوں جب تک وہ یہ اعتراف نہ کر لیں کہ اللہ تعالیٰ کے سوا اور کوئی معبود نہیں ہے، جب وہ اس بات کی گواہی دے دیں کہ اللہ تعالیٰ کے علاوہ اور کوئی معبود نہیں ہے، اور جو کچھ میں لے کر آیا ہوں اس پر ایمان لے آئیں، تو وہ اپنی جان و مال کو مجھ سے محفوظ کر لیں گے، البتہ اسلام کے حق کا معاملہ مختلف ہے اور ان لوگوں کا حساب اللہ تعالیٰ کے ذمے ہوگا۔“ اس روایت کو نقل کرنے میں دراوردی نامی راوی منفرد ہے، یہ بات شیخ نے بیان کی ہے۔ [صحیح ابن حبان/كتاب الإيمان/حدیث: 174]

سیدنا عبداللہ بن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”مجھے حکم دیا گیا ہے کہ میں لوگوں کے ساتھ اس وقت تک جنگ کرتا رہوں جب تک وہ اس بات کی گواہی نہ دیں کہ اللہ تعالیٰ کے علاوہ اور کوئی معبود نہیں ہے، اور میں اللہ کا رسول ہوں، اور وہ نماز قائم کریں اور زکاۃ ادا کریں، جب وہ ایسا کر لیں گے تو وہ اپنی جانوں اور اپنے اموال کو مجھ سے محفوظ کر لیں گے، البتہ اسلام کے حق کا معاملہ مختلف ہے اور ان لوگوں کا حساب اللہ تعالیٰ کے ذمہ ہو گا۔“ (امام ابن حبان رحمہ اللہ فرماتے ہیں:) اس روایت کو نقل کرنے میں شعبہ نامی راوی منفرد ہے، اور اس روایت میں اس بات کا واضح بیان موجود ہے کہ ایمان کے اجزاء اور شعبے ہوتے ہیں، جو اس بارے میں مخاطب لوگوں کے احوال کے حوالے سے مختلف ہوتے ہیں، کیونکہ نبی اکرم صلی اللہ علیہ وسلم نے اس روایت میں اس بات کا تذکرہ کیا ہے: ”یہاں تک کہ وہ لوگ اس بات کی گواہی دیں کہ اللہ تعالیٰ کے علاوہ اور کوئی معبود نہیں ہے، اور بے شک میں اللہ کا رسول ہوں۔“ تو اس میں اس بات کی طرف اشارہ موجود ہے کہ یہ وہ شعبہ ہے جو تمام مخاطب لوگوں پر تمام حالتوں میں فرض ہے۔ پھر آپ صلی اللہ علیہ وسلم نے فرمایا: ”اور وہ نماز قائم کریں“، تو نبی اکرم صلی اللہ علیہ وسلم نے اس چیز کا تذکرہ کیا ہے جو مخاطب لوگوں پر بعض حالتوں میں فرض ہوتی ہے۔ پھر آپ صلی اللہ علیہ وسلم نے فرمایا: ”اور وہ زکاۃ ادا کریں“، تو نبی اکرم صلی اللہ علیہ وسلم نے اس چیز کا تذکرہ کیا ہے جو مخاطب لوگوں پر بعض حالتوں میں فرض ہوتی ہے۔ تو یہ بات اس بات پر دلالت کرتی ہے کہ تمام نیکیاں، جو ان تین چیزوں کے ساتھ مشابہت رکھتی ہیں جن کا آپ صلی اللہ علیہ وسلم نے اس روایت میں ذکر کیا ہے، یہ سب ایمان کا حصہ ہیں۔ [صحیح ابن حبان/كتاب الإيمان/حدیث: 175]

سیدنا ابوامامہ رضی اللہ عنہ بیان کرتے ہیں کہ ایک شخص نے عرض کی: یا رسول اللہ! ایمان سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”جب تمہاری نیکیاں تمہیں اچھی لگیں اور تمہاری برائیاں تمہیں بری لگیں، تو تم مومن ہو۔“ اس نے عرض کی: یا رسول اللہ! گناہ کیا ہے؟ نبی اکرم صلی اللہ علیہ وسلم نے فرمایا: ”جب کوئی چیز تمہارے دل میں کھٹکے، تو تم اسے چھوڑ دو۔“ [صحیح ابن حبان/كتاب الإيمان/حدیث: 176]

عطاء بن یسار، جو مدینہ منورہ کے قاضی ہیں، وہ بیان کرتے ہیں: میں نے سیدنا عبداللہ بن مسعود رضی اللہ عنہ کو یہ بیان کرتے ہوئے سنا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”عنقریب میرے بعد ایسے حکمران آئیں گے جو وہ بات کہیں گے جو وہ کرتے نہیں ہوں گے، اور وہ لوگ ایسے کام کریں گے جن کا انہیں حکم نہیں دیا گیا ہو گا۔ تو جو شخص اپنے ہاتھ کے ذریعے ان کے ساتھ جہاد کرے گا وہ مومن ہو گا، اور جو اپنی زبان کے ذریعے ان کے ساتھ جہاد کرے گا وہ مومن ہو گا، اور جو شخص اپنے دل کے ذریعے ان کے ساتھ جہاد کرے گا وہ مومن ہو گا، اس کے بعد ایمان نہیں ہو گا۔“ عطاء نامی راوی کہتے ہیں: جب میں نے سیدنا عبداللہ بن مسعود رضی اللہ عنہ کی زبانی یہ حدیث سنی، تو میں یہ روایت لے کر سیدنا عبداللہ بن عمر رضی اللہ عنہما کے پاس گیا اور میں نے انہیں اس بارے میں بتایا تو انہوں نے دریافت کیا: کیا تم نے سیدنا عبداللہ بن مسعود رضی اللہ عنہ کو یہ بات بیان کرتے ہوئے خود سنا ہے؟ عطاء کہتے ہیں: میں نے کہا: وہ بیمار ہیں، کیا وجہ ہے کہ آپ ان کی عیادت کے لیے نہیں جاتے؟ تو سیدنا عبداللہ بن عمر رضی اللہ عنہما نے فرمایا: تم ہمیں ان کے پاس لے جاؤ۔ جب سیدنا عبداللہ بن عمر رضی اللہ عنہما وہاں تشریف لے گئے، تو ان کے ساتھ میں بھی گیا، سیدنا عبداللہ بن عمر رضی اللہ عنہما نے ان سے ان کی بیماری کے بارے میں دریافت کیا، پھر ان سے اس حدیث کے بارے میں دریافت کیا۔ راوی کہتے ہیں: جب سیدنا عبداللہ بن عمر رضی اللہ عنہما وہاں سے نکلے، تو وہ اپنی ہتھیلی پلٹ رہے تھے اور یہ کہہ رہے تھے: ابن ام عبد (یعنی سیدنا عبداللہ بن مسعود رضی اللہ عنہ) نبی اکرم صلی اللہ علیہ وسلم کی طرف جھوٹی بات منسوب نہیں کر سکتے۔ [صحیح ابن حبان/كتاب الإيمان/حدیث: 177]