حنظلہ بن ابوسفیان بیان کرتے ہیں: میں نے عکرمہ بن خالد کو طاؤس کو یہ حدیث بیان کرتے ہوئے سنا۔ ایک شخص نے سیدنا عبداللہ بن عمر رضی اللہ عنہما سے دریافت کیا: آپ جہاد میں حصہ کیوں نہیں لیتے؟ سیدنا عبداللہ بن عمر رضی اللہ عنہما نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اسلام کی بنیاد پانچ باتوں پر ہے: اس بات کی گواہی دینا کہ اللہ تعالیٰ کے علاوہ اور کوئی معبود نہیں ہے، نماز قائم کرنا، زکوۃ ادا کرنا، رمضان کے روزے رکھنا اور بیت اللہ کا حج کرنا۔“ (امام ابن حبان رحمہ اللہ فرماتے ہیں:) یہ دو روایات ہیں جن میں الفاظ کا مخصوص پس منظر ہے کیونکہ نبی اکرم صلی اللہ علیہ وسلم نے ایمان کا ذکر کیا ہے اور پھر آپ صلی اللہ علیہ وسلم نے اس کے لیے چار خصلتوں کا تذکرہ کیا ہے، پھر آپ صلی اللہ علیہ وسلم نے اسلام کا تذکرہ کیا اور اس کے لیے پانچ خصلتوں کا تذکرہ کیا۔ یہ وہ صورت ہے، جس کے بارے میں ہم اپنی کتابوں میں یہ بیان کر چکے ہیں کہ عرب اپنے محاورے میں کسی متعین تعداد کے ہمراہ کسی چیز کا ذکر کرتے ہیں اور اس متعین تعداد کے تذکرے سے مراد یہ نہیں ہوتا کہ اس کے علاوہ تعداد کی نفی کر دی جائے۔ اسی طرح نبی اکرم صلی اللہ علیہ وسلم نے یہ مراد نہیں لیا کہ ایمان سے مراد صرف وہی امور ہوں گے جن کا ذکر سیدنا عبداللہ بن عباس رضی اللہ عنہما سے منقول روایت میں ہے۔ کیونکہ نبی اکرم صلی اللہ علیہ وسلم نے دیگر روایات میں دیگر بہت سی اشیاء کا ایمان کا حصہ ہونے کا ذکر کیا ہے، جن کا تذکرہ سیدنا عبداللہ بن عمر رضی اللہ عنہما اور سیدنا عبداللہ بن عباس رضی اللہ عنہما سے منقول ان دو روایات میں نہیں ہے، جنہیں ہم نے ابھی ذکر کیا ہے۔ [صحیح ابن حبان/كتاب الإيمان/حدیث: 158]

سیدنا ابوہریرہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم لوگوں کے پاس تشریف فرما تھے، اس دوران ایک شخص چلتا ہوا آپ کے پاس حاضر ہوا، اس نے عرض کی: اے سیدنا محمد صلی اللہ علیہ وسلم ! ایمان سے مراد کیا ہے؟ نبی اکرم صلی اللہ علیہ وسلم نے فرمایا: ”یہ کہ تم اللہ تعالیٰ، اس کے فرشتوں، اس کے رسولوں، اس کی بارگاہ میں حاضری پر ایمان رکھو اور تم دوبارہ زندہ ہونے پر ایمان رکھو۔“ اس نے عرض کی: یا رسول اللہ! اسلام سے مراد کیا ہے؟ نبی اکرم صلی اللہ علیہ وسلم نے فرمایا: ”یہ کہ تم کسی کو اللہ کا شریک نہ ٹھہراؤ، فرض نماز ادا کرو، تم فرض زکوٰۃ ادا کرو اور رمضان کے روزے رکھو۔“ اس نے دریافت کیا: اے سیدنا محمد صلی اللہ علیہ وسلم ! احسان سے مراد کیا ہے؟ نبی اکرم صلی اللہ علیہ وسلم نے فرمایا: ”یہ کہ تم اللہ تعالیٰ کی اس طرح عبادت کرو کہ تم اسے دیکھ رہے ہو، اور اگر تم اسے نہیں دیکھ رہے، تو وہ تمہیں دیکھ رہا ہے۔“ اس نے عرض کی: اے سیدنا محمد صلی اللہ علیہ وسلم ! قیامت کب آئے گی؟ نبی اکرم صلی اللہ علیہ وسلم نے فرمایا: ”اس بارے میں جس شخص سے دریافت کیا گیا ہے، وہ دریافت کرنے والے سے زیادہ علم نہیں رکھتا، تاہم میں تمہیں اس کی نشانیوں کے بارے میں بتا دیتا ہوں۔ جب کنیز اپنے آقا کو جنم دے اور جب تم برہنہ جسم، برہنہ پاؤں (لوگوں) کو حکمران دیکھو (تو یہ قیامت کی نشانیاں ہوں گی)؛ پانچ چیزیں ایسی ہیں، جن کا علم صرف اللہ تعالیٰ کو ہے۔“ (ارشاد باری تعالیٰ ہے): ﴿بے شک قیامت کا علم اللہ تعالیٰ کو ہی ہے﴾ [سورة لقمان: 34] (اس کے بعد پوری آیت ہے) پھر وہ شخص چلا گیا، لوگوں نے اسے تلاش کیا، وہ انہیں نہیں ملا، تو نبی اکرم صلی اللہ علیہ وسلم نے ارشاد فرمایا: ”یہ جبرائیل تھے، جو اس لیے آئے تھے تاکہ لوگوں کو ان کے دین کی تعلیم دیں۔“ [صحیح ابن حبان/كتاب الإيمان/حدیث: 159]

حکیم بن معاویہ اپنے والد (معاویہ بن حیدہ رضی اللہ عنہ) کا یہ بیان نقل کرتے ہیں کہ انہوں نے عرض کی: یا رسول اللہ! اس ذات کی قسم! جس نے آپ کو حق کے ہمراہ مبعوث کیا ہے، میں اس وقت آپ کی خدمت میں حاضر ہوا ہوں، جب میں اپنی انگلیوں کی تعداد میں یہ قسم اٹھا چکا تھا کہ میں آپ کے پاس کبھی نہیں آؤں گا۔ آپ کو کس چیز کے ہمراہ مبعوث کیا گیا ہے؟ نبی اکرم صلی اللہ علیہ وسلم نے فرمایا: ”اسلام کے۔“ انہوں نے دریافت کیا: اسلام کیا ہے؟ نبی اکرم صلی اللہ علیہ وسلم نے فرمایا: ”یہ کہ تم اپنے دل کو اللہ تعالیٰ کے لیے جھکا دو اور تم اپنا رخ اللہ تعالیٰ کی طرف کر لو، اور تم فرض نماز ادا کرو اور تم فرض زکوٰۃ ادا کرو؛ یہ دو بھائی ہیں جو ایک دوسرے کے مددگار ہیں، اللہ تعالیٰ کسی بھی ایسے بندے کی توبہ قبول نہیں کرے گا جو اسلام قبول کرنے کے بعد شرک کا ارتکاب کرے گا۔“ [صحیح ابن حبان/كتاب الإيمان/حدیث: 160]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مسلمان ایک آنت میں کھاتا ہے اور کافر سات آنتوں میں کھاتا ہے۔“ [صحیح ابن حبان/كتاب الإيمان/حدیث: 161]

سیدنا ابوہریرہ رضی اللہ عنہ بیان کرتے ہیں: ایک کافر شخص نبی اکرم صلی اللہ علیہ وسلم کا مہمان بنا، نبی اکرم صلی اللہ علیہ وسلم کے حکم کے تحت اس کے لیے بکری کا دودھ دوہ لیا گیا، اس نے اس کا دودھ پی لیا، تو دوسری بکری کا دودھ دوہ لیا گیا۔ اس نے اس کا دودھ بھی پی لیا یہاں تک کہ اس نے سات بکریوں کا دودھ پی لیا۔ پھر صبح کے وقت اس نے اسلام قبول کر لیا۔ نبی اکرم صلی اللہ علیہ وسلم کے حکم کے تحت اس کے لیے ایک بکری کا دودھ دوہ لیا گیا۔ اس نے اس کا دودھ پی لیا۔ پھر نبی اکرم صلی اللہ علیہ وسلم کے حکم کے تحت اس کے لیے دوسری بکری کا دودھ دوہ لیا گیا، تو وہ اسے ختم نہیں کر سکا۔ (تو اس موقع پر) نبی اکرم صلی اللہ علیہ وسلم نے فرمایا: ”بے شک مومن ایک آنت میں پیتا ہے، اور کافر سات آنتوں میں پیتا ہے۔“ [صحیح ابن حبان/كتاب الإيمان/حدیث: 162]

عامر بن سعد بن وقاص اپنے والد (سیدنا سعد بن ابی وقاص رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے کچھ لوگوں کو کچھ عطیات دیے، آپ صلی اللہ علیہ وسلم نے ان میں سے ایک شخص کو کچھ نہیں دیا، میں نے عرض کی: یا رسول اللہ! آپ نے فلاں اور فلاں کو دے دیا ہے، لیکن فلاں شخص کو کچھ نہیں دیا، حالانکہ وہ مومن ہے، تو نبی اکرم صلی اللہ علیہ وسلم نے ارشاد فرمایا: ”وہ مومن ہے یا مسلمان ہے؟“ یہ بات آپ صلی اللہ علیہ وسلم نے تین مرتبہ ارشاد فرمائی۔ زہری رحمہ اللہ کہتے ہیں: ہم یہ سمجھتے ہیں کہ اسلام سے مراد زبانی طور پر کلمہ پڑھنا ہے، اور ایمان سے مراد عمل کرنا ہے۔ [صحیح ابن حبان/كتاب الإيمان/حدیث: 163]

سیدنا مقداد بن اسود رضی اللہ عنہ بیان کرتے ہیں، انہوں نے عرض کی: یا رسول اللہ! ایسی صورت حال کے بارے میں آپ کی کیا رائے ہے، اگر میں کسی کافر کے مد مقابل آتا ہوں اور وہ میرے ساتھ لڑائی کرتا ہے، اور میرے ایک ہاتھ پر تلوار مار کر اسے کاٹ دیتا ہے، پھر (میں اس پر غالب آتا ہوں) تو وہ مجھ سے بچنے کے لیے درخت کے پیچھے جاتا ہے اور کہتا ہے: میں اللہ تعالیٰ کے لیے اسلام قبول کرتا ہوں، تو اس شخص کے یہ کہنے کے بعد میں اسے قتل کر دوں؟ نبی اکرم صلی اللہ علیہ وسلم نے ارشاد فرمایا: ”تم اسے قتل نہ کرو۔“ میں نے عرض کی: یا رسول اللہ! اس نے میرا ہاتھ کاٹ دیا تھا، اور اس نے اس ہاتھ کو کاٹنے کے بعد یہ بات کہی ہے۔ کیا میں اس کو قتل کر دوں؟ نبی اکرم صلی اللہ علیہ وسلم نے ارشاد فرمایا: ”تم اسے قتل نہ کرو، کیونکہ اگر تم اسے قتل کر دیتے ہو، تو وہ تمہاری اس جگہ پر آ جائے گا، جس جگہ تم اسے قتل کرنے سے پہلے تھے، اور تم اس کی اس جگہ پر چلے جاؤ گے، جو اس کے کہے ہوئے کلمے سے پہلے اس کا مقام تھا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم اسے قتل نہ کرو، کیونکہ اگر تم اسے قتل کر دیتے ہو، تو وہ تمہاری اس جگہ پر آ جائے گا، جس جگہ تم اسے قتل کرنے سے پہلے تھے۔“ اس سے نبی اکرم صلی اللہ علیہ وسلم کی مراد یہ ہے: تمہیں قصاص میں قتل کر دیا جائے گا کیونکہ اسلام قبول کرنے سے پہلے اس کا خون بہانا جائز تھا، لیکن جب تم نے اس کے اسلام قبول کرنے کے بعد اسے قتل کیا تو تم ایسی حالت میں پہنچ جاؤ گے کہ تمہیں اس کے قصاص میں قتل کر دیا جائے گا۔ اس حدیث سے یہ مراد نہیں ہے: کسی مسلمان کو قتل کرنا ایسے کفر کو واجب کر دیتا ہے جو آدمی کو دین سے خارج کر دے، کیونکہ اللہ تعالیٰ نے ارشاد فرمایا ہے: ﴿يَا أَيُّهَا الَّذِينَ آمَنُوا كُتِبَ عَلَيْكُمُ الْقِصَاصُ فِي الْقَتْلَى﴾ [سورة البقرة: 178] ”اے ایمان والو! مقتولین کے بارے میں تم پر قصاص لازم قرار دیا گیا ہے۔“ [صحیح ابن حبان/كتاب الإيمان/حدیث: 164]

سیدنا معاویہ بن حکم سلمی رضی اللہ عنہ بیان کرتے ہیں: میری کچھ بکریاں تھیں جنہیں میری ایک کنیز ”احد“ اور ”جوانیہ“ کی طرف چرایا کرتی تھی۔ ایک دن میں وہاں پہنچا، تو پتا چلا کہ ان میں سے ایک بکری کو بھیڑیا لے گیا ہے۔ میں بھی انسان ہوں، مجھے بھی اسی طرح غصہ آگیا، جس طرح لوگوں کو غصہ آتا ہے، تو میں نے اسے مکا مارا۔ پھر میں نبی اکرم صلی اللہ علیہ وسلم کی خدمت میں حاضر ہوا اور میں نے عرض کی: کیا میں اسے آزاد نہ کردوں؟ نبی اکرم صلی اللہ علیہ وسلم نے فرمایا: ”تُم اسے میرے پاس لے کر آؤ۔“ میں اسے لے کر نبی اکرم صلی اللہ علیہ وسلم کی خدمت میں حاضر ہوا۔ نبی اکرم صلی اللہ علیہ وسلم نے دریافت فرمایا: «أَيْنَ اللهُ؟» ”اللہ تعالیٰ کہاں ہے؟“ اس نے عرض کی: «فِي السَّمَاءِ» ”آسمان میں۔“ نبی اکرم صلی اللہ علیہ وسلم نے دریافت فرمایا: «مَنْ أَنَا؟» ”میں کون ہوں؟“ اس نے عرض کی: «أَنْتَ رَسُولُ اللهِ» ”آپ اللہ کے رسول ہیں۔“ نبی اکرم صلی اللہ علیہ وسلم نے فرمایا: ”تُم اسے آزاد کر دو، وہ مومن ہے۔“ [صحیح ابن حبان/كتاب الإيمان/حدیث: 165]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایمان کے ساٹھ سے کچھ زیادہ شعبے ہیں، (راوی کو شک ہے شاید یہ الفاظ ہیں) ستر سے کچھ زیادہ شعبے ہیں، جن میں سب سے بلند ترین «لَا إِلٰهَ إِلَّا اللّٰهُ» ”اللہ کے سوا کوئی معبودِ برحق نہیں“ کہنا ہے، اور سب سے کم تر راستے سے تکلیف دہ چیز کو ہٹانا ہے، اور حیا بھی ایمان کا ایک شعبہ ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم نے اس روایت میں اس چیز کی طرف اشارہ کیا ہے جو تمام مخاطب لوگوں پر تمام حالتوں میں فرض ہے اور آپ صلی اللہ علیہ وسلم نے اسے ایمان کا بلند تر درجہ قرار دیا ہے۔ پھر نبی اکرم صلی اللہ علیہ وسلم نے اس چیز کی طرف اشارہ کیا ہے جو مخاطب لوگوں کے لیے تمام اوقات میں نفل ہے اور آپ صلی اللہ علیہ وسلم نے اسے ایمان کا سب سے نیچے کا درجہ قرار دیا ہے۔ یہ چیز اس بات پر دلالت کرتی ہے کہ ہر وہ چیز جو مخاطب لوگوں پر تمام حالتوں میں فرض کی گئی ہے، اور ہر وہ چیز جو بعض مخاطب لوگوں پر بعض حالتوں میں فرض کی گئی ہے، اور ہر وہ چیز جو مخاطب لوگوں کے لیے ہر حالت میں نفل ہے، یہ سب کی سب ایمان کا حصہ ہیں۔ جہاں تک دو عددوں میں سے ایک کے بارے میں شک کا تعلق ہے، تو یہ شک سہیل بن ابوصالح نامی راوی کو اس روایت میں ہوا ہے۔ یہ بات معمر نے سہیل کے حوالے سے اسی طرح بیان کی ہے، اور سلیمان بن بلال نے اسے عبداللہ بن دینار کے حوالے سے ابوصالح کے حوالے سے مرفوع حدیث کے طور پر نقل کیا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”ایمان کے ستر اور کچھ شعبے ہیں۔“ انہوں نے کسی شک کے بغیر یہ بات ذکر کی ہے۔ ہم نے اس جگہ پر سلیمان بن بلال کی نقل کردہ روایت کو ترک کر دیا ہے اور سہیل بن ابوصالح کی نقل کردہ روایت پر اکتفا کیا ہے، اس کی وجہ یہ ہے تاکہ ہم یہ بات بیان کر دیں کہ روایت کے الفاظ میں شک نبی اکرم صلی اللہ علیہ وسلم کے کلام کا حصہ نہیں ہے بلکہ یہ سہیل بن ابوصالح کا کلام ہے، جیسا کہ ہم نے یہ بات ذکر کی ہے۔ [صحیح ابن حبان/كتاب الإيمان/حدیث: 166]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایمان کے ساٹھ سے زیادہ شعبے ہیں اور حیا ایمان کا ایک شعبہ ہے۔“ (امام ابن حبان رحمہ اللہ فرماتے ہیں:) سلیمان بن بلال نے اس روایت کو مختصر کیا ہے، انہوں نے سب سے بلند اور سب سے نیچے والے شعبے کا ذکر نہیں کیا۔ انہوں نے ستر کی بجائے صرف ساٹھ کا ذکر کرنے پر اکتفا کیا ہے، جبکہ روایت میں ستر اور کچھ شعبے بھی منقول ہیں، اور یہ ایسی روایت ہے جو تفصیلی ہے اور صحیح ہے، اس کے ثبوت میں کوئی شک نہیں ہے۔ سلیمان بن بلال کی نقل کردہ روایت مختصر ہے اور تفصیلی نہیں ہے، جہاں تک لفظ «بِضْعٌ» (کچھ) کا تعلق ہے تو یہ ایک ایسا اسم ہے جو اعداد کے اجزاء میں سے کسی ایک پر واقع ہوتا ہے، کیونکہ حساب کی بنیاد تین چیزوں پر ہے: اعداد پر، فصول پر اور ترکیب پر۔ جہاں تک اعداد کا تعلق ہے تو وہ ایک سے لے کر نو تک ہوتے ہیں، جہاں تک فصول کا تعلق ہے تو وہ دہائیاں، سینکڑے اور ہزار ہوتے ہیں، جہاں تک ترکیب کا تعلق ہے تو وہ اس کے علاوہ جو کچھ بھی ہے جس کا ہم نے ذکر کیا ہے (وہ ترکیب ہے)۔ میں ایک طویل عرصے تک اس روایت کے مفہوم کی تحقیق کرتا رہا، اس کی وجہ یہ ہے کہ ہمارا موقف یہ ہے کہ نبی اکرم صلی اللہ علیہ وسلم نے جو بھی بات کی ہے وہ کسی فائدے ہی کی وجہ سے کی ہو گی اور آپ کے طریقے میں کوئی ایسی چیز نہیں ہے جس کا مفہوم معلوم نہ ہو، تو میں نے ایمان کی نیکیوں کو گننا شروع کیا تو وہ اس تعداد سے کہیں زیادہ تھیں، پھر میں نے سنت کی طرف رجوع کیا اور میں نے ان تمام نیکیوں کو گننا شروع کیا جنہیں نبی اکرم صلی اللہ علیہ وسلم نے ایمان کے حصے کے طور پر شمار کیا ہے تو یہ ستر اور اس کی تعداد سے کچھ کم تھیں۔ پھر میں نے دو جلدوں کے درمیان پروردگار کے کلام کی طرف رجوع کیا، میں نے ایک ایک آیت کو غور سے پڑھا اور ہر اس نیکی کو شمار کیا جس کا ذکر اللہ تعالیٰ نے ایمان کے حوالے سے کیا ہے تو وہ بھی ستر اور اس سے کچھ کم تھیں، پھر میں نے کتاب کو سنت کے ساتھ ملایا اور ان میں سے تکرار کے ساتھ آنے والی چیزوں کو ساقط کر دیا، تو ہر وہ چیز جس کو اللہ تعالیٰ نے ایمان کا حصہ اپنی کتاب میں شمار کیا ہے اور ہر وہ نیکی جسے نبی اکرم صلی اللہ علیہ وسلم نے ایمان کا حصہ اپنی سنت میں قرار دیا ہے وہ 79 شعبے تھے، نہ اس سے زیادہ تھے نہ اس سے کم تھے۔ تو مجھے پتا چل گیا کہ نبی اکرم صلی اللہ علیہ وسلم کی اس روایت میں مراد یہ ہے کہ ایمان کے ستر اور کچھ شعبے کتاب و سنت میں منقول ہیں، تو میں نے یہ مسئلہ مکمل طور پر ایمان کے شعبوں کے تذکرے کے ہمراہ کتاب (ایمان کی صفت اور اس کے شعبے) میں ذکر کر دیا ہے۔ مجھے یہ امید ہے کہ اس میں غور و فکر کرنے والے شخص کے لیے کفایت ہو جائے گی اور اب مجھے اس بحث کو یہاں دوبارہ ذکر کرنے کی ضرورت نہیں ہے۔ اس بات کی دلیل کہ ایمان کے شعبوں کے حوالے سے اجزاء ہوتے ہیں، نبی اکرم صلی اللہ علیہ وسلم کا یہ فرمان ہے جو عبداللہ بن دینار کے حوالے سے منقول روایت میں ہے: ”ایمان کے ستر اور کچھ شعبے ہوتے ہیں، جن میں سب سے بلند اس بات کی گواہی دینا ہے کہ اللہ تعالیٰ کے علاوہ اور کوئی معبود نہیں ہے۔“ تو نبی اکرم صلی اللہ علیہ وسلم نے ایمان کے شعبوں کے اجزاء میں سے ایک جز کا ذکر کیا ہے جو سارے کا سارا تمام مخاطب لوگوں پر تمام حالتوں میں فرض ہے، کیونکہ نبی اکرم صلی اللہ علیہ وسلم نے یہ بات ارشاد نہیں فرمائی کہ میں اللہ کا رسول ہوں، یا فرشتوں پر، اس کی کتابوں پر، اس کے رسولوں پر یا جنت پر یا جہنم پر اور اس جیسی دیگر چیزوں پر ایمان رکھنا اس شعبے کے اجزاء میں سے ایک ہے، بلکہ نبی اکرم صلی اللہ علیہ وسلم نے ان میں سے صرف ایک جز پر اکتفا کیا ہے۔ آپ نے ارشاد فرمایا ہے: اس کا سب سے بلند تر شعبہ ”اس بات کی گواہی دینا ہے کہ اللہ تعالیٰ کے علاوہ اور کوئی معبود نہیں ہے“، یہ چیز اس بات پر دلالت کرتی ہے کہ یہ تمام اجزاء اس شعبے سے تعلق رکھتے ہیں اور یہ تمام کے تمام ایمان کا حصہ ہیں، پھر آپ نے عطف کیا اور لفظ «وَاو» استعمال کیا اور فرمایا: ”اس میں سب سے کمتر راستے سے تکلیف دہ چیز کو ہٹانا ہے۔“ تو نبی اکرم صلی اللہ علیہ وسلم نے اس کے شعبوں میں سے ایک جز کا ذکر کیا ہے جو نفل ہے اور یہ تمام اوقات میں مخاطب لوگوں کے لیے نفل کی حیثیت رکھتا ہے، اور یہ چیز اس بات پر دلالت کرتی ہے کہ وہ تمام اجزاء جو اس شعبے سے تعلق رکھتے ہیں اور ان دو ذکر شدہ اجزاء کے درمیان موجود شعبوں کے تمام اجزاء میں سے ہر ایک جز، اس کا تذکرہ ان دو روایات میں ہے جو ایمان کا بلند تر مرتبہ اور کمترین مرتبہ ہیں، یہ سب کے سب ایمان کا حصہ ہیں۔ جہاں تک نبی اکرم صلی اللہ علیہ وسلم کے اس فرمان کا تعلق ہے: ”حیا ایمان کا ایک شعبہ ہے“، تو یہ ایسے الفاظ ہیں جن کا اطلاق کسی چیز پر اس کے سبب کے کنائے کے ساتھ کیا گیا ہے، اس کی صورت یوں ہے کہ حیا ایک جبلت ہے جو انسان میں موجود ہوتی ہے، کچھ لوگ ایسے ہیں جن میں یہ زیادہ ہوتی ہے اور کچھ میں یہ کم ہوتی ہے، تو یہ اس چیز کی صحیح دلیل ہے کہ ایمان زیادہ بھی ہوتا ہے اور اس میں کمی بھی ہوتی ہے۔ اس کی وجہ یہ ہے کہ تمام لوگ حیا کے اعتبار سے ایک ہی مرتبے کے نہیں ہوتے، تو جب ایمان کے ایک مرتبے کے بارے میں ان لوگوں کا برابر ہونا ناممکن ہے تو یہ بات درست ہو گی کہ جس میں یہ زیادہ پائی جائے گی اس کا ایمان زیادہ ہو گا اور جس میں یہ کم پائی جائے گی اس کا ایمان کم ہو گا، تو اس کا ایمان ناقص ہو گا، اور حیا اپنے وجود کے اعتبار سے ایک ایسی چیز ہے جو آدمی اور اس چیز کے درمیان رکاوٹ بن جاتی ہے جو چیز آدمی کو اس کے پروردگار سے دور کرتی ہے اور ممنوعہ چیزوں سے تعلق رکھتی ہے، تو گویا کہ اللہ کے نبی سیدنا محمد صلی اللہ علیہ وسلم نے ممنوعہ چیزوں کو ترک کرنے کو ایمان کا ایک شعبہ قرار دیا ہے اور اس کے لیے آپ نے لفظ «حَیَاء» استعمال کیا ہے، جیسا کہ ہم نے پہلے یہ بات ذکر کی ہے۔ [صحیح ابن حبان/كتاب الإيمان/حدیث: 167]