سیدنا زید بن خالد جہنی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں حدیبیہ میں صبح کی نماز پڑھائی، اس سے پہلے رات کے وقت بارش ہو چکی تھی، جب آپ صلی اللہ علیہ وسلم نے نماز مکمل کی تو آپ لوگوں کی طرف متوجہ ہوئے اور ارشاد فرمایا: ”کیا تم لوگ یہ بات جانتے ہو کہ تمہارے پروردگار نے کیا بات ارشاد فرمائی ہے؟“ لوگوں نے عرض کی: اللہ اور اس کا رسول زیادہ بہتر جانتے ہیں۔ آپ صلی اللہ علیہ وسلم نے فرمایا: ”میرے کچھ بندے مجھ پر ایمان رکھتے ہیں اور کچھ بندے کافر ہیں؛ جو شخص یہ کہے کہ اللہ تعالیٰ کے فضل اور اس کی رحمت کی وجہ سے ہم پر بارش نازل ہوئی ہے، تو وہ مجھ پر ایمان رکھتا ہے اور ستاروں کا انکار کرتا ہے، اور جو شخص یہ کہے کہ فلاں اور فلاں ستارے کی وجہ سے ہم پر بارش نازل ہوئی ہے، تو وہ شخص میرا انکار کرتا ہے اور ستاروں پر ایمان رکھتا ہے“۔ [صحیح ابن حبان/كتاب الإيمان/حدیث: 188]

سیدنا شرید بن سوید ثقفی رضی اللہ عنہ بیان کرتے ہیں: میں نے عرض کی: یا رسول اللہ! میری والدہ نے یہ وصیت کی تھی کہ ہم ان کی طرف سے ایک گردن آزاد کر دیں میرے پاس ایک سیاہ فام کنیز ہے۔ کیا میں اسے آزاد کر دوں؟ نبی اکرم صلی اللہ علیہ وسلم نے فرمایا: ”تم اسے بلاؤ!“ وہ کنیز آئی تو نبی اکرم صلی اللہ علیہ وسلم نے دریافت کیا: ”تمہارا پروردگار کون ہے؟“ اس نے جواب دیا: اللہ تعالیٰ۔ نبی اکرم صلی اللہ علیہ وسلم نے دریافت کیا: ”میں کون ہوں؟“ اس نے جواب دیا: اللہ تعالیٰ کے رسول۔ نبی اکرم صلی اللہ علیہ وسلم نے فرمایا: ”تم اسے آزاد کر دو۔“ [صحیح ابن حبان/كتاب الإيمان/حدیث: 189]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ایمان کے ستر سے زائد شعبے ہیں اور حیا ایمان کا ایک حصہ ہے۔“ [صحیح ابن حبان/كتاب الإيمان/حدیث: 190]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ایمان کے ستر سے زیادہ شعبے ہیں۔ ان میں سب سے بلند (شعبہ) اس بات کی گواہی دینا ہے کہ اللہ تعالیٰ کے سوا اور کوئی معبود نہیں ہے، اور کمتر (شعبہ) راستے سے تکلیف دہ چیز کو ہٹانا ہے۔“ [صحیح ابن حبان/كتاب الإيمان/حدیث: 191]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مومن شخص طعنہ دینے والا، لعنت کرنے والا، بدزبانی کرنے والا، اور فحش گفتگو کرنے والا نہیں ہوتا۔“ [صحیح ابن حبان/كتاب الإيمان/حدیث: 192]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”لغزش کے بغیر (کوئی) بردبار نہیں ہوتا اور تجربے کے بغیر (کوئی) دانش مند نہیں ہوتا۔“ موہب کہتے ہیں: امام احمد بن حنبل رحمہ اللہ نے مجھ سے کہا: کیا تم نے شام میں احادیث نوٹ کی ہیں؟ میں نے ان کے سامنے یہ روایت ذکر کی تو وہ بولے: اگر تم نے صرف یہی روایت وہاں سے سنی ہوئی ہو، تو تمہارا سفر بیکار نہیں گیا۔ [صحیح ابن حبان/كتاب الإيمان/حدیث: 193]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں خطبہ دیا۔ آپ صلی اللہ علیہ وسلم نے ارشاد فرمایا: ”اس شخص کا ایمان نہیں ہوتا جس شخص میں امانت نہیں ہوتی اور اس شخص کا دین نہیں ہوتا، جس شخص کا عہد نہیں ہوتا (یعنی جو عہد کو پورا نہیں کرتا)۔“ [صحیح ابن حبان/كتاب الإيمان/حدیث: 194]

سیدنا ابوذر غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم ”بقیعِ غرقد“ کی طرف تشریف لے گئے، میں بھی آپ کے پیچھے چل پڑا، نبی اکرم صلی اللہ علیہ وسلم نے فرمایا: ”اے ابوذر!“ میں نے عرض کی: میں حاضر ہوں، میں آپ پر قربان جاؤں، نبی اکرم صلی اللہ علیہ وسلم نے فرمایا: ”(دنیا میں مال و دولت کے اعتبار سے) کثرت رکھنے والے لوگ قیامت کے دن (اجر و ثواب کے اعتبار سے) قلت والے ہوں گے، ماسوائے اس شخص کے، جو اپنے مال کے بارے میں، اس طرح اور اس طرح کہتا ہے، اپنے دائیں طرف اور اپنے بائیں طرف (یعنی ہر طرف خرچ کرتا ہے)۔“ یہ بات نبی اکرم صلی اللہ علیہ وسلم نے تین مرتبہ ارشاد فرمائی، پھر ہمارے سامنے اُحد پہاڑ آ گیا، نبی اکرم صلی اللہ علیہ وسلم نے ارشاد فرمایا: ”اے ابوذر! مجھے یہ بات پسند نہیں ہے کہ محمد صلی اللہ علیہ وسلم کے گھر والوں کے پاس سونا ہو، اور پھر شام کے وقت ان کے پاس ایک دینار یا ایک مثقال سونا بھی باقی رہ جائے۔“ میں نے عرض کی: اللہ اور اس کا رسول زیادہ بہتر جانتے ہیں، پھر ہمارے سامنے ایک وادی آئی، نبی اکرم صلی اللہ علیہ وسلم اس کے نشیبی حصے میں تشریف لے گئے، آپ نیچے اتر گئے اور میں اس کے کنارے پر بیٹھ گیا، میں نے یہ گمان کیا کہ شاید آپ قضائے حاجت کے لیے تشریف لے گئے ہیں، آپ کو واپس آنے میں تاخیر ہو گئی، تو مجھے برے خیال آنے لگے، پھر میں نے مناجات کی آواز سنی، (بعد میں، میں نے اس بارے میں دریافت کیا) تو نبی اکرم صلی اللہ علیہ وسلم نے فرمایا: ”وہ جبرائیل تھے، جو مجھے میری امت کے بارے میں یہ بتا رہے تھے کہ ان میں سے جو شخص بھی اس بات کی گواہی دے کہ اللہ تعالیٰ کے علاوہ اور کوئی معبود نہیں ہے، اور سیدنا محمد صلی اللہ علیہ وسلم اللہ کے رسول ہیں، تو وہ شخص جنت میں داخل ہو گا۔“ (سیدنا ابوذر رضی اللہ عنہ کہتے ہیں) میں نے عرض کی: یا رسول اللہ! اگرچہ اس نے زنا کا ارتکاب کیا ہو، یا اگرچہ اس نے چوری کی ہو؟ نبی اکرم صلی اللہ علیہ وسلم نے فرمایا: ”اگرچہ اس نے زنا کا ارتکاب کیا ہو، یا اگرچہ اس نے چوری کی ہو۔“ [صحیح ابن حبان/كتاب الإيمان/حدیث: 195]

امام شعبی رحمہ اللہ بیان کرتے ہیں: میں نے سیدنا عبداللہ بن عمرو رضی اللہ عنہما کو یہ کہتے ہوئے سنا: اسی عمارت کے پروردگار کی قسم ہے۔ (انہوں نے خانہ کعبہ کے بارے میں یہ بات کہی) میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مہاجر وہ شخص ہوتا ہے، جو گناہوں سے الگ ہو جاتا ہے۔ مسلمان وہ ہے، جس کی زبان اور ہاتھ سے دوسرے مسلمان سلامت رہیں۔“ [صحیح ابن حبان/كتاب الإيمان/حدیث: 196]

سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اسلام کے اعتبار سے مسلمانوں میں سے سب سے بہتر اسلام اس شخص کا ہے، جس کی زبان اور ہاتھ سے دوسرے مسلمان سلامت رہیں۔“ [صحیح ابن حبان/كتاب الإيمان/حدیث: 197]