سیدنا ابومسعود رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”لوگوں نے پہلی نبوت (یعنی سابقہ انبیاءِ کرام) کے کلام میں سے جو چیز پائی ہے اس میں سے ایک بات یہ ہے: ”جب تمہیں شرم نہ آئے، تو پھر جو چاہے کرو۔“”قعنبی نامی راوی نے شعبہ سے صرف یہی حدیث سنی ہے، یہ بات شیخ نے بیان کی ہے۔ [صحیح ابن حبان/كتاب الرقائق/حدیث: 607]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”حیا ایمان کا حصہ ہے اور ایمان جنت میں ہو گا، اور فحش گوئی جفا کا حصہ ہے اور جفا جہنم میں ہو گی۔“ [صحیح ابن حبان/كتاب الرقائق/حدیث: 608]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”حیا ایمان کا حصہ ہے اور ایمان جنت میں ہو گا اور فحش گوئی، جفاء کا حصہ ہے اور جفاء جہنم میں ہو گی۔“ [صحیح ابن حبان/كتاب الرقائق/حدیث: 609]

سیدنا عبد اللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم کا گزر ایک شخص کے پاس سے ہوا، جو اپنے بھائی کو حیا کے بارے میں تلقین کر رہا تھا۔ نبی اکرم صلی اللہ علیہ وسلم نے ارشاد فرمایا: ”تم اسے رہنے دو، کیونکہ حیا ایمان کا حصہ ہے۔“ (امام ابن حبان رحمہ اللہ فرماتے ہیں): روایت کے یہ الفاظ: ”تم اسے چھوڑ دو۔“ اس سے مراد ایسی ممانعت ہے، جو معاملے کے آغاز میں نئے سرے سے ہو۔ [صحیح ابن حبان/كتاب الرقائق/حدیث: 610]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”تم سے پہلے زمانے میں ایک شخص تھا جس نے ننانوے لوگوں کو قتل کیا تھا۔ اس نے اس علاقے کے سب سے بڑے عالم کے بارے میں دریافت کیا، تو اس کی رہنمائی ایک راہب کی طرف کی گئی۔ وہ اس کے پاس آیا اور کہا کہ اس نے ننانوے لوگوں کو قتل کیا ہے، کیا اس کے لیے توبہ کی گنجائش ہے؟ راہب نے جواب دیا: جی نہیں، تو اس شخص نے اس راہب کو بھی قتل کر دیا اور سو کی تعداد کو مکمل کر لیا۔ پھر اس نے اس علاقے کے سب سے بڑے عالم کے بارے میں دریافت کیا، تو اس کی رہنمائی ایک شخص کی طرف کی گئی۔ اس نے بتایا کہ اس نے ایک سو لوگوں کو قتل کیا ہے، کیا اس کے لیے توبہ کی گنجائش ہے؟ اس شخص نے جواب دیا: جی ہاں! تمہارے اور توبہ کے درمیان کون سی چیز رکاوٹ بن سکتی ہے؟ تم فلاں سرزمین میں چلے جاؤ، وہاں کچھ لوگ ہیں جو اللہ تعالیٰ کی عبادت کرتے ہیں، تم بھی اللہ تعالیٰ کی (وہاں رہ کر) عبادت کرنا اور واپس اپنی سرزمین کی طرف نہ آنا، کیونکہ یہ برائی کی جگہ ہے۔ وہ شخص روانہ ہوا، یہاں تک کہ جب وہ نصف راستے میں پہنچا، تو اسے موت نے آ لیا۔ اس کے بارے میں رحمت کے فرشتوں اور عذاب کے فرشتوں کے درمیان اختلاف ہو گیا۔ رحمت کے فرشتوں نے کہا: یہ شخص توبہ کرتے ہوئے خلوصِ دل کے ساتھ اللہ تعالیٰ کی طرف آتے ہوئے، ہمارے پاس آیا ہے۔ عذاب کے فرشتوں نے کہا: اس نے کبھی کوئی بھلائی نہیں کی۔ پھر ایک فرشتہ ایک انسان کی شکل میں ان کے پاس آیا، ان لوگوں نے اسے اپنے درمیان ثالث تسلیم کیا، تو فرشتے نے کہا: دونوں طرف کی زمین کو ناپ لو، ان میں سے جس کے زیادہ قریب ہو گا یہ اس کا حصہ شمار ہو گا۔ ان فرشتوں نے اس زمین کو ناپا، تو انہوں نے اس شخص کو اس زمین کے زیادہ قریب پایا جہاں وہ جا رہا تھا، تو رحمت کے فرشتوں نے اسے قبضے میں لے لیا۔“ [صحیح ابن حبان/كتاب الرقائق/حدیث: 611]

سیدنا عبداللہ بن مسعود رضی اللہ عنہ کے بارے میں یہ بات منقول ہے: ان سے دریافت کیا گیا: کیا آپ نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: «النَّدَمُ تَوْبَةٌ» ”ندامت توبہ ہوتی ہے“؟ انہوں نے جواب دیا: جی ہاں۔ [صحیح ابن حبان/كتاب الرقائق/حدیث: 612]

حمید طویل بیان کرتے ہیں: میں نے سیدنا انس بن مالک رضی اللہ عنہ سے دریافت کیا: کیا نبی اکرم صلی اللہ علیہ وسلم نے یہ بات ارشاد فرمائی ہے: ”ندامت، توبہ ہوتی ہے“؟ انہوں نے جواب دیا: جی ہاں۔ [صحیح ابن حبان/كتاب الرقائق/حدیث: 613]

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں کہ: «النَّدَمُ تَوْبَةٌ» ”ندامت توبہ ہوتی ہے۔“ [صحیح ابن حبان/كتاب الرقائق/حدیث: 614]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بنی اسرائیل میں ایک شخص تھا جس نے ننانوے انسانوں کو قتل کیا تھا، پھر وہ شخص روانہ ہوا تاکہ اس بارے میں دریافت کرے، وہ ایک راہب کے پاس آیا۔ راہب سے دریافت کیا: کیا اس کے لیے توبہ کی گنجائش ہے؟ تو اس نے جواب دیا: جی نہیں، تو اس شخص نے اس راہب کو بھی قتل کر دیا، پھر وہ دریافت کرتا رہا، تو ایک شخص نے اس سے کہا: تم فلاں بستی میں چلے جاؤ، پھر اس شخص کو موت آ گئی اور وہ فوت ہو گیا۔ اس کے بارے میں رحمت کے فرشتوں اور عذاب کے فرشتوں کے درمیان اختلاف ہو گیا، تو اللہ تعالیٰ نے زمین کے اس (حصے) کی طرف وحی کی کہ تم قریب ہو جاؤ اور دوسرے حصے کی طرف وحی کی کہ تم دور ہو جاؤ، تو اس شخص کو ایک بالشت اس حصے (یعنی جہاں وہ جا رہا تھا) کے قریب پایا گیا، تو اس شخص کی مغفرت ہو گئی۔“ [صحیح ابن حبان/كتاب الرقائق/حدیث: 615]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”مومن اور ایمان کی مثال ایک ایسے گھوڑے کی مانند ہے، جو اپنی کھونٹی میں ہوتا ہے، وہ گھوم پھر کر پھر اسی جگہ آ جاتا ہے۔ مومن بھول جاتا ہے، تو پھر وہ واپس ایمان کی طرف آ جاتا ہے۔ لوگو! اپنا کھانا پرہیزگار لوگوں کو کھلاؤ اور اپنی اچھائیوں کا رخ اہل ایمان کی طرف کرو۔“ [صحیح ابن حبان/كتاب الرقائق/حدیث: 616]