سیدنا عبداللہ بن عمرو رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ نے آسمانوں اور زمین کو تخلیق کرنے سے پچاس ہزار سال پہلے تقدیر مقرر کر دی تھی۔“ [صحیح ابن حبان/كتاب التاريخ/حدیث: 6138]

سیدنا ابوہریرہ رضی اللہ عنہ بیان کرتے ہیں کہ قریش کے مشرکین نبی اکرم صلی اللہ علیہ وسلم کے سامنے تقدیر کے معاملے میں آپ صلی اللہ علیہ وسلم سے اختلاف کرتے تھے، تو اس بارے میں یہ آیت نازل ہوئی: ﴿بے شک مجرم لوگ گمراہی اور جہنم میں ہوں گے، جس دن انہیں منہ کے بل جہنم میں گھسیٹا جائے گا (اور یہ کہا جائے گا) جہنم کا مزہ چکھ لو، بے شک ہم نے ہر چیز کو تقدیر کے مطابق بنایا ہے﴾ [سورة القمر: 47-49] ۔ [صحیح ابن حبان/كتاب التاريخ/حدیث: 6139]

سیدنا عمران بن حصین رضی اللہ عنہ بیان کرتے ہیں: میں نبی اکرم صلی اللہ علیہ وسلم کے پاس بیٹھا ہوا تھا، میری اونٹنی (مسجد کے دروازے پر) بندھی ہوئی تھی، اسی دوران بنو تمیم سے تعلق رکھنے والے کچھ لوگ آپ صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! ہم آپ صلی اللہ علیہ وسلم کی خدمت میں اس لیے حاضر ہوئے ہیں تاکہ دین کی تعلیم حاصل کریں، ہم اس معاملے کے آغاز کے بارے میں آپ صلی اللہ علیہ وسلم سے دریافت کرنا چاہتے ہیں کہ یہ کیسے ہوا۔ نبی اکرم صلی اللہ علیہ وسلم نے ارشاد فرمایا: ”پہلے صرف اللہ تعالیٰ تھا، اس کے علاوہ کوئی چیز نہیں تھی، عرش پانی پر تھا، پھر اس نے «الذِّكْرِ» ”ذکر“ (یعنی قرآن مجید یا لوح محفوظ میں) ہر چیز تحریر کر دی، پھر اس نے آسمان و زمین کو پیدا کیا۔“ راوی بیان کرتے ہیں: اسی دوران ایک شخص آیا اور بولا: اے عمران! اپنی اونٹنی کو پکڑ لیں وہ رسی کھول کر چلی گئی ہے۔ سراب اس سے پہلے ہی منقطع ہو جاتا ہے۔ (سیدنا عمران رضی اللہ عنہ بیان کرتے ہیں) اللہ کی قسم! میری یہ خواہش ہے کہ میں نے اونٹنی کو چھوڑ دیا ہوتا (اور نبی اکرم صلی اللہ علیہ وسلم کی گفتگو سنتا رہتا)۔ [صحیح ابن حبان/كتاب التاريخ/حدیث: 6140]

سیدنا ابورزین عقیلی رضی اللہ عنہ بیان کرتے ہیں، میں نے عرض کی: یا رسول اللہ صلی اللہ علیہ وسلم ! کیا ہم قیامت کے دن اپنے پروردگار کا دیدار کریں گے؟ نبی اکرم صلی اللہ علیہ وسلم نے فرمایا: ”کیا جب بادل نہ ہو تو تم چودھویں رات کے چاند کو یا سورج کو دیکھ سکتے ہو؟“ لوگوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تو اللہ تعالیٰ اس سے زیادہ عظیم ہے۔“ میں نے عرض کی: یا رسول اللہ صلی اللہ علیہ وسلم ! ہمارا پروردگار آسمان و زمین کو تخلیق کرنے سے پہلے کہاں تھا؟ نبی اکرم صلی اللہ علیہ وسلم نے فرمایا: ”وہ «عَمَاء» (یعنی اس کا ادراک حاصل نہیں کیا جا سکتا) میں تھا، اس کے اوپر اور اس کے نیچے خلا تھی۔“ (امام ابن حبان رحمہ اللہ فرماتے ہیں:) ان الفاظ کو نقل کرنے میں حماد بن سلمہ نامی کو وہم ہوا، انہوں نے لفظ «غَمَام» نقل کر دیا ہے، حالانکہ لفظ «عَمَاء» ہے اور اس کے ذریعے نبی اکرم صلی اللہ علیہ وسلم کی مراد یہ ہے کہ مخلوق میں یہ صلاحیت نہیں ہے کہ اپنے خالق کا حقیقی فہم حاصل کر سکے کیونکہ ان کا پروردگار اس وقت بھی موجود تھا جب زمانہ اور مکان موجود نہیں تھے اور نہ ہی زمانے یا مکان یا کسی اور چیز کے ساتھ شناخت حاصل ہو سکتی ہے کیونکہ وہ تو ان سب چیزوں کا پروردگار ہے، تو اس کی ذات کے بارے میں مخلوق کی معرفت یوں ہو گی جیسے اس کی ذات مخلوق کے علم کے حوالے سے پردہ «عَمَاء» میں ہے، اس سے یہ مراد نہیں ہے کہ اللہ تعالیٰ «عَمَاء» کی کیفیت میں تھا کیونکہ یہ وہ صفت ہے جو مخلوق کے اوصاف سے مشابہت رکھتی ہے۔ [صحیح ابن حبان/كتاب التاريخ/حدیث: 6141]

سیدنا عمران بن حصین رضی اللہ عنہ بیان کرتے ہیں: میں نبی اکرم صلی اللہ علیہ وسلم کے پاس بیٹھا ہوا تھا، اسی دوران بنو تمیم سے تعلق رکھنے والے کچھ لوگ آپ صلی اللہ علیہ وسلم کی خدمت میں حاضر ہوئے۔ نبی اکرم صلی اللہ علیہ وسلم نے فرمایا: ”اے بنو تمیم! تم لوگ خوشخبری قبول کرو۔“ انہوں نے عرض کی: یا رسول اللہ صلی اللہ علیہ وسلم ! آپ ہمیں پہلے بھی خوشخبری دے چکے ہیں، (اب) آپ ہمیں (مال و دولت) عطا کیجیے۔ پھر یمن سے تعلق رکھنے والے کچھ لوگ نبی اکرم صلی اللہ علیہ وسلم کی خدمت میں حاضر ہوئے۔ آپ صلی اللہ علیہ وسلم نے فرمایا: ”اے اہل یمن! تم لوگ خوشخبری حاصل کر لو کیونکہ بنو تمیم نے اسے قبول نہیں کیا۔“ ان لوگوں نے عرض کی: یا رسول اللہ صلی اللہ علیہ وسلم ! ہم اسے قبول کرتے ہیں، ہم اس لیے حاضرِ خدمت ہوئے ہیں تاکہ دین کی سمجھ بوجھ حاصل کریں اور آپ صلی اللہ علیہ وسلم سے اس معاملے کے آغاز کے بارے میں دریافت کریں کہ یہ کیسے تھا (یعنی کائنات کا آغاز کیسے ہوا)؟ تو نبی اکرم صلی اللہ علیہ وسلم نے ارشاد فرمایا: ”پہلے اللہ تعالیٰ تھا اور اس سے پہلے کوئی چیز نہیں تھی، اس کا عرش پانی پر تھا، پھر اس نے آسمانوں اور زمین کو پیدا کیا اور اس نے ذکر (یعنی لوح محفوظ) میں ہر چیز تحریر کر دی۔“ راوی بیان کرتے ہیں: پھر ایک شخص ان کے پاس آیا اور بولا: اے عمران! اپنی سواری کو پکڑیں کیونکہ وہ چلی گئی ہے، تو میں اس کی تلاش میں نکل کھڑا ہوا، سراب اس سے پہلے ہی منقطع ہو جاتا تھا۔ اللہ کی قسم! میری یہ خواہش ہے کہ وہ چلی گئی ہوتی لیکن میں وہاں سے نہ اٹھتا۔ [صحیح ابن حبان/كتاب التاريخ/حدیث: 6142]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ نے مخلوق کو پیدا کیا تو اس نے اپنی کتاب میں تحریر کیا، جو چیز اس نے اپنی ذات پر لازم کی ہے اور وہ تحریر عرش کے اوپر رکھی ہوئی ہے (اس میں یہ تحریر ہے) «إِنَّ رَحْمَتِي تَغْلِبُ غَضَبِي» ”بے شک میری رحمت میرے غضب پر غالب ہے“۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”وہ عرش کے اوپر رکھی ہوئی ہے“ یہ ان الفاظ سے تعلق رکھتی ہے، جو عرب اپنے محاورے میں استعمال کرتے ہیں، حالانکہ اس سے مراد عرش کے نیچے ہے، عرش کے اوپر مراد نہیں ہے، جس طرح اللہ تعالیٰ کا یہ فرمان ہے ﴿وَكَانَ وَرَاءَهُمْ مَلِكٌ﴾ [سورة الكهف: 79] ”ان کے پیچھے ایک بادشاہ ہے“ اس سے مراد یہ ہے کہ ان کے آگے ایک بادشاہ ہے، اگر وہ پیچھے ہوتا تو وہ لوگ وہاں سے گزر آئے تھے۔ اس کی مثال اللہ تعالیٰ کا یہ فرمان ہے ﴿إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا﴾ [سورة البقرة: 26] ”بے شک اللہ تعالیٰ اس بات سے حیا نہیں کرتا کہ وہ مچھر کی مثال بیان کرے یا جو اس سے اوپر ہے (اس کی مثال بیان کرے)“ اس سے مراد یہ ہے کہ جو چیز مچھر سے بھی نیچے ہو۔ [صحیح ابن حبان/كتاب التاريخ/حدیث: 6143]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ نے مخلوق (کو پیدا کرنے کا فیصلہ کیا، تو اس نے اپنے پاس موجود کتاب میں یہ تحریر کیا کہ میری رحمت میرے غضب پر غالب آ گئی ہے (راوی کو شک ہے شاید یہ الفاظ ہیں) میری رحمت میرے غضب سے سبقت لے گئی ہے۔“ نبی اکرم صلی اللہ علیہ وسلم فرماتے ہیں: ”تو یہ تحریر اللہ تعالیٰ کے پاس عرش کے اوپر ہے۔“ (راوی کہتے ہیں:) یا شاید جیسے بھی آپ صلی اللہ علیہ وسلم نے ارشاد فرمایا۔ [صحیح ابن حبان/كتاب التاريخ/حدیث: 6144]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ نے مخلوق کو پیدا کر دیا تو اس نے اپنے دستِ رحمت کے ذریعے اپنی ذات پر رحمت کو لازم قرار دیا (اور یہ تحریر کیا): «إِنَّ رَحْمَتِي غَلَبَتْ غَضَبِي» ”بے شک میری رحمت میرے غضب پر غالب آ گئی۔““ [صحیح ابن حبان/كتاب التاريخ/حدیث: 6145]

سیدنا سلمان فارسی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے جس دن آسمانوں اور زمین کو پیدا کیا، اس دن اس نے ایک سو رحمتیں پیدا کیں جو آسمانوں اور زمین کے درمیان ایک دوسرے کے اوپر نیچے ہیں، تو ان میں سے ایک رحمت اس نے زمین میں رکھی ہے، اس رحمت کی وجہ سے ماں اپنی اولاد پر مہربانی کرتی ہے اور وحشی جانور ایک دوسرے کا خیال رکھتے ہیں، جب کہ ننانوے رحمتیں اس نے قیامت کے دن تک کے لیے مخصوص کی ہیں، جب قیامت کا دن آئے گا، تو وہ اس رحمت کے ذریعے ایک سو کو مکمل کرے گا۔“ [صحیح ابن حبان/كتاب التاريخ/حدیث: 6146]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ کی ایک سو رحمتیں ہیں جن میں سے ایک رحمت اس نے جنوں، انسانوں اور جانوروں کے درمیان نازل کی ہے، اس رحمت کی وجہ سے وہ ایک دوسرے سے مہربانی کا برتاؤ کرتے ہیں اور اسی کی وجہ سے وہ ایک دوسرے پر رحم کرتے ہیں، اسی کی وجہ سے وحشی جانور اپنی اولاد پر مہربان ہوتے ہیں، اللہ تعالیٰ نے 99 رحمتیں مؤخر کی ہیں جن کے ذریعے وہ قیامت کے دن اپنے بندوں پر رحم کرے گا۔“ [صحیح ابن حبان/كتاب التاريخ/حدیث: 6147]