سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ کسی جان کو پیدا کرنا چاہتا ہے تو رحم سے متعلق فرشتہ عرض کرتا ہے: اے پروردگار! یہ لڑکا ہوگا یا لڑکی؟ تو اللہ تعالیٰ اپنے فیصلے کو سنا دیتا ہے، پھر وہ عرض کرتا ہے: پروردگار! یہ بدبخت ہوگا یا نیک بخت ہوگا؟ تو اللہ تعالیٰ اس بارے میں اپنا فیصلہ سنا دیتا ہے، پھر وہ اس کی دونوں آنکھوں کے درمیان وہ سب چیزیں تحریر کر دیتا ہے جن کا وہ شخص (بڑا ہو کر) سامنا کرے گا، یہاں تک کہ اسے جو ٹھوکر لگے گی (وہ بھی تحریر کر دی جاتی ہے)۔“ [صحیح ابن حبان/كتاب التاريخ/حدیث: 6178]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں کہ: ”سیدنا آدم علیہ السلام اور سیدنا موسیٰ علیہ السلام کے درمیان بحث ہو گئی، سیدنا موسیٰ علیہ السلام نے کہا: آپ وہ سیدنا آدم علیہ السلام ہیں جنہیں اللہ تعالیٰ نے اپنے دستِ قدرت کے ذریعے پیدا کیا اور آپ میں اپنی روح پھونکی، لیکن آپ نے لوگوں کو گمراہ کر دیا اور انہیں جنت سے نکلنے پر مجبور کر دیا، سیدنا آدم علیہ السلام نے فرمایا: آپ وہ موسیٰ ہیں جنہیں اللہ تعالیٰ نے اپنے کلام کے ذریعے منتخب کیا، آپ مجھے ایک ایسے عمل کے بارے میں ملامت کر رہے ہیں جو اللہ تعالیٰ نے آسمان و زمین کی تخلیق سے پہلے ہی میرے حوالے سے لکھ دیا تھا۔“ نبی اکرم صلی اللہ علیہ وسلم فرماتے ہیں: ”تو سیدنا آدم علیہ السلام، سیدنا موسیٰ علیہ السلام پر غالب آ گئے۔“ [صحیح ابن حبان/كتاب التاريخ/حدیث: 6179]

سیدنا ابوہریرہ رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کے اس فرمان کا پتا چلا ہے: ”ایک مرتبہ سیدنا آدم علیہ السلام اور سیدنا موسیٰ علیہ السلام کے درمیان بحث ہو گئی، سیدنا موسیٰ علیہ السلام نے کہا: اے (سیدنا) آدم (علیہ السلام)! آپ ہمارے جدِ امجد ہیں، آپ نے ہمیں رسوائی کا شکار کیا اور ہمیں جنت سے نکلوا دیا۔ سیدنا آدم علیہ السلام نے ان سے فرمایا: اے موسیٰ! اللہ تعالیٰ نے اپنے کلام کے لیے تمہیں منتخب کیا اور اپنے دستِ قدرت کے ذریعے تمہارے لیے (تورات کو) تحریر کیا، تم ایک ایسے مسئلے کے بارے میں مجھے ملامت کر رہے ہو جو میری تخلیق سے چالیس سال پہلے میرے نصیب میں لکھ دیا گیا تھا۔“ نبی اکرم صلی اللہ علیہ وسلم فرماتے ہیں: ”تو سیدنا آدم علیہ السلام، سیدنا موسیٰ علیہ السلام پر غالب آ گئے، سیدنا آدم علیہ السلام، سیدنا موسیٰ علیہ السلام پر غالب آ گئے، سیدنا آدم علیہ السلام، سیدنا موسیٰ علیہ السلام پر غالب آ گئے۔“ [صحیح ابن حبان/كتاب التاريخ/حدیث: 6180]

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے سیدنا آدم علیہ السلام کو تمام روئے زمین سے پیدا کیا ہے، تو ان کی ذریت اسی حساب سے ہو گی؛ ان میں سے کچھ لوگ سیاہ ہیں، کچھ سفید ہیں، کچھ سرخ ہیں، کچھ زرد ہیں اور کچھ ان کے درمیان ہیں، کوئی آسان ہے، کوئی غمگین ہے، کوئی خراب ہے اور کوئی عمدہ ہے۔“ [صحیح ابن حبان/كتاب التاريخ/حدیث: 6181]

ابواسود دؤلی بیان کرتے ہیں: سیدنا عمران بن حصین رضی اللہ عنہ نے مجھ سے فرمایا: اے ابواسود! تمہاری کیا رائے ہے آج لوگ جو عمل کر رہے ہیں اور اس بارے میں جو کوشش کر رہے ہیں، کیا یہ کوئی ایسی چیز ہے جس کے بارے میں ان کے لیے فیصلہ ہو چکا ہے اور سب کچھ طے ہو چکا ہے، یا پھر وہ نئے سرے سے اس کے مطابق عمل کرتے ہیں جو نبی اکرم صلی اللہ علیہ وسلم ان کے پاس تعلیمات لے کے آئے تھے، کیا اس وجہ سے ان کے خلاف حجت پیش کی جا سکتی ہے؟ میں نے کہا: بلکہ یہ ایک ایسی چیز ہے جس کے بارے میں فیصلہ ہو چکا ہے جو پہلے گزر چکا ہے۔ سیدنا عمران رضی اللہ عنہ نے کہا: پھر تو یہ ظلم ہو گا۔ راوی کہتے ہیں: میں اس بات پر بہت گھبرا گیا میں نے کہا: ہر چیز اللہ تعالیٰ کی مخلوق ہے اور اس کی بادشاہی کے دستِ قدرت میں ہے، اس سے اس کے بارے میں سوال نہیں کیا جا سکتا جو وہ کرتا ہے البتہ لوگوں سے باز پرس ہو گی، تو سیدنا عمران رضی اللہ عنہ نے فرمایا: اللہ تعالیٰ نے تمہیں ٹھیک رکھا ہے (راوی کو شک ہے شاید یہ الفاظ ہیں) اللہ تعالیٰ نے تمہیں توفیق دی ہے۔ اللہ کی قسم! میں نے تم سے یہ سوال صرف اس لیے کیا تھا تاکہ تمہاری عقل کے بارے میں اندازہ لگا سکوں (پھر انہوں نے بتایا) ایک مرتبہ مزینہ قبیلے سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم کی کیا رائے ہے آج کل جو لوگ عمل کرتے ہیں اور جس بارے میں کوشش کرتے ہیں، کیا یہ کوئی ایسی چیز ہے جس کے لیے ان کے بارے میں فیصلہ پہلے ہو چکا ہے یا پھر یہ لوگ نئے سرے سے کام کرتے ہیں جو اس کے مطابق ہو جو ان کے پاس نبی تعلیمات لے کے آئے اور اس بارے میں ان کے خلاف حجت قائم کی جا سکے۔ نبی اکرم صلی اللہ علیہ وسلم نے ارشاد فرمایا: ”بلکہ یہ ایک ایسی چیز ہے جس کے بارے میں ان کے لیے فیصلہ ہو چکا ہے اور وہ پہلے گزر چکا ہے۔“ سائل نے دریافت کیا پھر ہم عمل کیوں کریں۔ نبی اکرم صلی اللہ علیہ وسلم نے ارشاد فرمایا: ”اللہ تعالیٰ نے جس شخص کو دو میں سے کسی ایک منزل کے لیے پیدا کیا ہے وہ اس سے وہی کام لے گا۔“ (راوی کہتے ہیں:) اس کی تصدیق اللہ کی کتاب میں (ان الفاظ میں) موجود ہے: ﴿وَنَفْسٍ وَمَا سَوَّاهَا * فَأَلْهَمَهَا فُجُورَهَا وَتَقْوَاهَا﴾ [سورة الشمس: 7-8] ”اور نفس کی قسم اور جس کا اس نے تسویہ کیا ہے اسے گناہ اور پرہیزگاری الہام کی ہے۔“ [صحیح ابن حبان/كتاب التاريخ/حدیث: 6182]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”نومولود بچہ اس وقت چیخ کر روتا ہے، جب شیطان اسے ٹھونگا مارتا ہے۔“ [صحیح ابن حبان/كتاب التاريخ/حدیث: 6183]

سیدنا انس رضی اللہ عنہ بیان کرتے ہیں: سیدہ ام سلیم رضی اللہ عنہا نے نبی اکرم صلی اللہ علیہ وسلم سے ایسی خاتون کے بارے میں دریافت کیا جو خواب میں وہی چیز دیکھتی ہے جو مرد دیکھتا ہے (یعنی اس خاتون کو احتلام ہو جاتا ہے)، نبی اکرم صلی اللہ علیہ وسلم نے ان سے فرمایا: ”اے ام سلیم! جب عورت یہ چیز دیکھے تو اسے غسل کرنا چاہیے۔“ سیدہ ام سلمہ رضی اللہ عنہا بیان کرتی ہیں: مجھے اس بات سے شرم آ گئی (میں نے عرض کی) ”یا رسول اللہ صلی اللہ علیہ وسلم ! کیا ایسا بھی ہوتا ہے؟“ نبی اکرم صلی اللہ علیہ وسلم نے فرمایا: ”جی ہاں! مرد کا مادہِ تولید گاڑھا اور سفید ہوتا ہے جب کہ عورت کا مادہ پتلا اور زرد ہوتا ہے، ان میں سے جو سبقت لے جائے (راوی کو شک ہے شاید یہ الفاظ ہیں) غالب آ جائے، بچے کی مشابہت اسی سے ہوتی ہے۔“ [صحیح ابن حبان/كتاب التاريخ/حدیث: 6184]

سیدنا انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مرد کا مادہ تولید گاڑھا اور سفید ہوتا ہے جبکہ عورت کا مادہ پتلا اور زرد ہوتا ہے، ان میں سے جو سبقت لے جائے (بچے کی) مشابہت (اسی کے ساتھ ہوتی ہے)۔“ [صحیح ابن حبان/كتاب التاريخ/حدیث: 6185]

سیدنا عبداللہ بن عمر رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب سیدنا آدم علیہ السلام کو زمین پر اتارا گیا تو فرشتوں نے کہا: اے پروردگار! ﴿أَتَجْعَلُ فِيهَا مَنْ يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ﴾ [سورة البقرة: 30] ”کیا تو اس میں اسے (اپنا خلیفہ) بنا رہا ہے جو اس میں فساد کرے گا اور خون بہائے گا جب کہ ہم تیری حمد کے ہمراہ تسبیح بیان کرتے ہیں اور تیری پاکی بیان کرتے ہیں۔“ تو پروردگار نے فرمایا: ﴿إِنِّي أَعْلَمُ مَا لَا تَعْلَمُونَ﴾ [سورة البقرة: 30] ”میں وہ علم رکھتا ہوں جو تم نہیں جانتے۔“ ان فرشتوں نے عرض کی: ہم اولاد آدم کے مقابلے میں تیرے زیادہ فرمانبردار ہیں، اللہ تعالیٰ نے فرشتوں سے فرمایا: ”تم فرشتوں میں سے کوئی سے دو فرشتے لے آؤ، تو ہم اس بات کو ظاہر کر دیں گے کہ وہ کیا عمل کرتے ہیں۔“ ان لوگوں نے عرض کی: اے میرے پروردگار! ہاروت اور ماروت (پیش خدمت ہیں)، تو پروردگار نے فرمایا: ”تم دونوں زمین پر اتر جاؤ۔“ نبی اکرم صلی اللہ علیہ وسلم فرماتے ہیں: ”ان کے سامنے زہرہ نام کی ایک خوبصورت ترین عورت آئی، وہ دونوں اس کے پاس آئے، انہوں نے اس سے زنا کی خواہش کا اظہار کیا، تو اس نے کہا: جی نہیں! اللہ کی قسم! جب تک تم لوگ یہ شرکیہ کلمہ نہیں کہو گے (میں تمہارے ساتھ زنا نہیں کروں گی)۔ ان دونوں نے کہا: اللہ کی قسم! ہم کبھی بھی کسی کو اللہ کا شریک نہیں قرار دیں گے۔ وہ ان دونوں کو چھوڑ کر چلی گئی، پھر وہ ایک بچے کو گود میں اٹھا کر واپس آئی، ان دونوں نے پھر اس کے سامنے زنا کی خواہش کا اظہار کیا، تو اس نے کہا: جی نہیں! اللہ کی قسم! جب تک تم اس بچے کو قتل نہیں کرتے (میں تمہاری بات نہیں مانوں گی)۔ ان دونوں نے کہا: جی نہیں! اللہ کی قسم! ہم اسے کبھی قتل نہیں کریں گے۔ وہ پھر چلی گئی، پھر وہ شراب کا پیالہ اٹھا کر آئی، پھر ان دونوں نے اس سے خواہش کا اظہار کیا، اس نے کہا: جی نہیں! اللہ کی قسم! جب تک تم یہ شراب نہیں پیتے (میں تمہاری خواہش پوری نہیں کروں گی)۔ ان دونوں نے شراب پی لی، وہ دونوں مدہوش ہو گئے، انہوں نے اس عورت کے ساتھ زنا بھی کر لیا اور اس بچے کو قتل بھی کر دیا، جب انہیں ہوش آیا، تو اس عورت نے کہا: اللہ کی قسم! تم نے ہر گناہ اس وقت کیا جب تم دونوں مدہوش ہو گئے تھے۔“ نبی اکرم صلی اللہ علیہ وسلم فرماتے ہیں: ”پھر ان دونوں کو اس وقت دنیاوی عذاب اور آخرت کے عذاب کے درمیان اختیار دیا گیا، تو انہوں نے دنیا کے عذاب کو اختیار کر لیا۔“ (امام ابن حبان رحمہ اللہ فرماتے ہیں:) ایک عورت تھی جو اس زمانے میں موجود تھی، اس سے مراد زہرہ نامی ستارہ نہیں ہے، جو آسمان میں ہوتا ہے، جو خنس (چھپنے والے ستاروں) میں سے ہے۔ [صحیح ابن حبان/كتاب التاريخ/حدیث: 6186]

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”ابلیس کا تخت پانی پر ہوتا ہے، پھر وہ اپنی مہم روانہ کرتا ہے، ان میں سے اس کے نزدیک زیادہ عظیم وہ ہوتا ہے جو زیادہ فتنہ پیدا کرے۔“ [صحیح ابن حبان/كتاب التاريخ/حدیث: 6187]