ام المؤمنین سیدہ عائشہ رضی اللہ عنہا بیان کرتی ہیں کہ ”میں جب رسول اللہ صلی اللہ علیہ وسلم کے بالوں میں مانگ نکالنے لگتی تو آپ صلی اللہ علیہ وسلم کے سر کے بیچوں بیچ سے نکالتی اور آپ صلی اللہ علیہ وسلم کی پیشانی کے بالوں کو آپ کی آنکھوں کے سامنے لٹکاتی (یعنی پھر انہیں آدھو آدھ کر دیتی)۔“ [سنن ابي داود/كتاب الترجل /حدیث: 4189]

سیدنا وائل بن حجر رضی اللہ عنہ بیان کرتے ہیں کہ میں نبی کریم صلی اللہ علیہ وسلم کی خدمت میں حاضر ہوا تو میرے بال بہت لمبے تھے، چنانچہ جب رسول اللہ صلی اللہ علیہ وسلم نے مجھے دیکھا تو فرمانے لگے: «ذُبَابٌ ذُبَابٌ» ”نحوست ہے، نحوست ہے۔“ چنانچہ میں واپس گیا اور انہیں کاٹ ڈالا اور پھر اگلے دن حاضرِ خدمت ہوا تو آپ صلی اللہ علیہ وسلم نے فرمایا: ”میں نے تجھے کوئی بری بات نہیں کہی تھی اور اب یہ بہتر ہے۔“ [سنن ابي داود/كتاب الترجل /حدیث: 4190]

سیدہ ام ہانی رضی اللہ عنہا نے بیان کیا کہ ”نبی کریم صلی اللہ علیہ وسلم مکہ تشریف لائے تو آپ صلی اللہ علیہ وسلم کے بالوں کی چار لٹیں تھیں جو گوندھی ہوئی تھیں۔“ [سنن ابي داود/كتاب الترجل /حدیث: 4191]

سیدنا عبداللہ بن جعفر رضی اللہ عنہ سے روایت ہے کہ (سیدنا جعفر بن ابی طالب رضی اللہ عنہ کی شہادت کے موقع پر) نبی کریم صلی اللہ علیہ وسلم نے آلِ جعفر کو تین دن تک کچھ نہ کہا، پھر ان کے پاس آئے اور فرمایا: ”آج کے بعد میرے بھائی پر مت رونا۔“ پھر فرمایا: ”میرے بھتیجوں کو میرے پاس بلاؤ۔“ پس ہمیں لایا گیا، گویا ہم چڑیا کے بچے تھے۔ (یعنی ہمارے سروں کے بال بکھرے ہوئے تھے) تو آپ صلی اللہ علیہ وسلم نے فرمایا: ”میرے پاس حجام کو بلاؤ۔“ تو آپ صلی اللہ علیہ وسلم نے اس سے کہا اور اس نے ہمارے سر مونڈ ڈالے۔ [سنن ابي داود/كتاب الترجل /حدیث: 4192]

سیدنا ابن عمر رضی اللہ عنہما نے بیان کیا کہ رسول اللہ صلی اللہ علیہ وسلم نے ” «قَزَع» “ سے منع فرمایا ہے اور «قَزَع» سے مراد یہ ہے کہ ”بچے کے سر سے کچھ بال مونڈ دیے جائیں اور کچھ چھوڑ دیے جائیں۔“ [سنن ابي داود/كتاب الترجل /حدیث: 4193]

سیدنا ابن عمر رضی اللہ عنہما سے مروی ہے کہ نبی کریم صلی اللہ علیہ وسلم نے «الْقَزَعِ» ”قزع“ سے منع فرمایا ہے اور وہ یہ ہے کہ ”بچے کا سارا سر مونڈ دیا جائے اور کوئی ایک لٹ باقی رکھی جائے۔“ [سنن ابي داود/كتاب الترجل /حدیث: 4194]

سیدنا ابن عمر رضی اللہ عنہ سے منقول ہے کہ نبی کریم صلی اللہ علیہ وسلم نے ایک بچے کو دیکھا کہ اس کے کچھ بال مونڈ دیے گئے تھے اور کچھ چھوڑے ہوئے تھے، تو آپ صلی اللہ علیہ وسلم نے انہیں اس سے منع فرمایا اور کہا: ”اس کے سارے بال مونڈ دو یا سارے رکھو۔“ [سنن ابي داود/كتاب الترجل /حدیث: 4195]

سیدنا انس بن مالک رضی اللہ عنہ بیان کرتے ہیں کہ میری لمبی لمبی زلفیں تھیں۔ میری والدہ نے مجھ سے کہا: ”انہیں مت کاٹو، رسول اللہ صلی اللہ علیہ وسلم انہیں (پیار سے) کھینچتے تھے اور پکڑ لیا کرتے تھے۔“ [سنن ابي داود/كتاب الترجل /حدیث: 4196]

حجاج بن حسان نے بیان کیا کہ ہم سیدنا انس بن مالک رضی اللہ عنہ کے ہاں گئے۔ میری بہن مغیرہ نے بیان کیا کہ تم ان دنوں نوعمر بچے تھے اور تمہارے بالوں کی دو لٹیں تھیں۔ تو انہوں نے تمہارے سر پر ہاتھ پھیرا اور تمہارے لیے برکت کی دعا کی اور فرمایا: ”انہیں مونڈ ڈالو یا کتروا لو، بلاشبہ یہ یہودیوں کی علامت ہے۔“ [سنن ابي داود/كتاب الترجل /حدیث: 4197]

سیدنا ابوہریرہ رضی اللہ عنہ نبی کریم صلی اللہ علیہ وسلم سے بیان کرتے ہیں کہ ”فطری امور پانچ ہیں“ یا فرمایا کہ ”پانچ باتیں فطرت سے ہیں: ختنہ کرانا، زیر ناف کی صفائی، بغلوں کے بال اکھیڑنا، ناخن تراشنا اور مونچھیں کتروانا۔“ [سنن ابي داود/كتاب الترجل /حدیث: 4198]