(امام ابوداؤد رحمہ اللہ نے بواسطہ محمد بن عیسیٰ اور عثمان بن ابی شیبہ روایت کیا) سیدنا عبداللہ بن مسعود رضی اللہ عنہ نے کہا: ”لعنت کی ہے اللہ نے ان عورتوں پر جو جسم گودیں اور گدوائیں۔“ محمد بن عیسیٰ نے کہا: ”اور جو بال جوڑ کر لمبے کریں۔“ عثمان نے کہا: ”اور جو چہرے کے بال اکھیڑیں، پھر دونوں شیخ روایت میں متفق ہیں۔ اور جو حسن کی خاطر دانتوں میں خلا کروائیں، اللہ کی خلقت کو تبدیل کریں۔“ یہ بات بنو اسد کی ایک عورت کو پہنچی جسے ام یعقوب کہا جاتا تھا۔ عثمان نے یہ اضافہ بیان کیا: ”اور اس نے پورا قرآن پڑھ رکھا تھا۔“ پھر دونوں شیخ روایت میں متفق ہیں، وہ خاتون سیدنا عبداللہ بن مسعود رضی اللہ عنہ کے پاس آئی اور کہا: ”مجھے آپ سے یہ بات پہنچی ہے کہ آپ نے ان عورتوں پر لعنت کی ہے جو جسم گودیں اور گدوائیں۔“ محمد نے کہا: ”اور جو بال جوڑ کر لمبے کریں۔“ اور عثمان نے کہا: ”اور جو چہرے کے بال اکھیڑیں۔“ پھر دونوں روایت میں متفق ہیں۔ ”اور جو دانتوں میں خلا کروائیں۔“ عثمان نے کہا: ”زینت کی خاطر، اللہ کی خلقت کو بدلنے والیاں ہیں۔“ تو سیدنا عبداللہ بن مسعود رضی اللہ عنہ نے کہا: ”مجھے کیا ہوا کہ میں ان پر لعنت نہ کروں جن پر رسول اللہ صلی اللہ علیہ وسلم نے لعنت کی ہے اور یہ اللہ کی کتاب میں بھی وارد ہے۔“ وہ بولی: ”تحقیق میں نے پورا قرآن جو دو گتوں کے درمیان میں ہے پڑھا ہے، مجھے تو اس میں یہ حکم نہیں ملا ہے۔“ انہوں نے کہا: ”اللہ کی قسم! اگر تو نے پڑھا ہوتا تو یقیناً پا لیتی۔“ پھر انہوں نے یہ آیت پڑھی: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا﴾ [سورة الحشر: 7] ”اور رسول جو کچھ تمہیں دے دیں وہ لے لو اور جس سے روک دیں اس سے رک جاؤ۔“ عورت نے کہا: ”میں ان میں سے کئی چیزیں تمہاری بیوی پر بھی دیکھتی ہوں۔“ انہوں نے کہا: ”اندر جاؤ اور دیکھ لو۔“ چنانچہ وہ اندر گئی اور پھر باہر آ گئی۔ انہوں نے پوچھا: ”کیا دیکھا ہے؟“ عثمان نے کہا، عورت نے کہا: ”میں نے کچھ نہیں دیکھا۔“ تو سیدنا عبداللہ رضی اللہ عنہ نے کہا: ”اگر یہ ہوتا تو وہ ہمارے ساتھ نہ ہوتی۔“ [سنن ابي داود/كتاب الترجل /حدیث: 4169]

سیدنا ابن عباس رضی اللہ عنہما نے بیان کیا کہ ”لعنت کی گئی ہے اس عورت پر جو بال جوڑے اور جڑوائے، جو چہرے کے بال اکھیڑے اور اکھڑوائے اور جو جسم گودے یا گدوائے بغیر کسی بیماری کے۔“ امام ابوداؤد رحمہ اللہ نے کہا کہ ” «الْوَاصِلَةُ» سے مراد وہ عورت ہے جو دوسری عورتوں کے بال جوڑتی ہو اور «الْمُسْتَوْصِلَةُ» وہ ہے جو یہ کام کروائے، «النَّامِصَةُ» وہ ہے جو ابروؤں کے بالوں کو نوچتی اور انہیں باریک بناتی ہو اور «الْمُتَنَمِّصَةُ» وہ ہے جو یہ کام کروائے، «الْوَاشِمَةُ» وہ ہے جو چہرے کی جلد پر سرمے یا سیاہی سے تل وغیرہ بناتی ہو اور «الْمُسْتَوْشِمَةُ» وہ ہے جو یہ کام کرواتی ہو۔“ [سنن ابي داود/كتاب الترجل /حدیث: 4170]

جناب سعید بن جبیر رحمہ اللہ نے کہا کہ ”دھاگوں سے بنی چوٹی (موباف) میں کوئی حرج نہیں۔“ امام ابوداؤد رحمہ اللہ نے کہا کہ ”گویا سعید رحمہ اللہ کی رائے یہ تھی کہ بالخصوص عورتوں کے بال (اور بال لگا کر) جوڑنا ہی منع ہے۔“ امام ابوداؤد رحمہ اللہ نے کہا: ”اور ایسے ہی امام احمد رحمہ اللہ کہتے تھے کہ دھاگوں کی چوٹی کا کوئی حرج نہیں ہے۔“ [سنن ابي داود/كتاب الترجل /حدیث: 4171]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جسے خوشبو پیش کی جائے تو وہ اسے واپس نہ کرے، بلاشبہ اس کی مہک عمدہ ہوتی ہے اور اس میں کوئی بوجھ بھی نہیں ہوتا۔“ [سنن ابي داود/كتاب الترجل /حدیث: 4172]

سیدنا ابوموسیٰ رضی اللہ عنہ روایت کرتے ہیں کہ نبی کریم صلی اللہ علیہ وسلم نے فرمایا: ”جب کوئی عورت خوشبو لگا کر کسی قوم پر سے گزرتی ہے تاکہ وہ اس کی خوشبو پا لیں تو وہ ایسی اور ایسی ہے۔“ آپ صلی اللہ علیہ وسلم نے بڑی سخت بات فرمائی۔ [سنن ابي داود/كتاب الترجل /حدیث: 4173]

سیدنا ابوہریرہ رضی اللہ عنہ کو ایک عورت ملی، انہوں نے اس سے عطر کی خوشبو محسوس کی اور اس کی چادر کا پلو غبار بھی اڑاتا آ رہا تھا، انہوں نے اس سے کہا: ”اے جبار کی بندی! بھلا تو مسجد سے آئی ہے؟“ اس نے کہا: ”ہاں۔“ انہوں نے کہا: ”تو کیا اسی کے لیے تو نے خوشبو لگائی تھی؟“ کہنے لگی: ”ہاں۔“ انہوں نے کہا: ”میں نے اپنے محبوب ابوالقاسم صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”جو عورت اس مسجد کے لیے خوشبو لگا کر آئے اس کی نماز قبول نہیں حتیٰ کہ واپس جائے اور اس اہتمام سے غسل کرے جیسے کہ وہ جنابت سے کرتی ہے۔““ امام ابوداؤد رحمہ اللہ نے فرمایا: «إِعْصَار» کا مفہوم ہے: «غُبَار» ۔ [سنن ابي داود/كتاب الترجل /حدیث: 4174]

سیدنا ابوہریرہ رضی اللہ عنہ نے روایت کیا کہ رسول اللہ صلی اللہ علیہ وسلم نے فرمایا: ”جس عورت نے خوشبو کی دھونی لی ہو، وہ ہمارے ساتھ عشاء کی نماز میں شریک نہ ہو۔“ ابن نفیل نے «عِشَاءَ الْآخِرَةِ» کے لفظ روایت کیے۔ [سنن ابي داود/كتاب الترجل /حدیث: 4175]

سیدنا عمار بن یاسر رضی اللہ عنہ نے بیان کیا کہ میں (سفر سے واپس آیا اور) رات کو اپنے گھر والوں کے ہاں پہنچا جبکہ میرے ہاتھ پھٹ چکے تھے۔ تو انہوں نے مجھے زعفران لگا دی۔ میں صبح کے وقت نبی کریم صلی اللہ علیہ وسلم کی خدمت میں حاضر ہوا اور سلام عرض کیا تو آپ صلی اللہ علیہ وسلم نے نہ مجھے جواب دیا اور نہ خوش آمدید کہا، بلکہ فرمایا: ”جاؤ اور اسے اپنے آپ سے دھو کر آؤ۔“ چنانچہ میں گیا اور اسے دھو ڈالا اور آپ صلی اللہ علیہ وسلم کی خدمت میں حاضر ہوا جبکہ اس کا کچھ اثر اور داغ مجھ پر باقی رہ گیا تھا۔ میں نے سلام پیش کیا تو آپ صلی اللہ علیہ وسلم نے مجھے جواب نہ دیا، نہ خوش آمدید کہا اور فرمایا: ”جاؤ اور اسے اپنے آپ سے دھو کر آؤ۔“ چنانچہ میں گیا اور اسے (دوبارہ) دھو کر حاضر خدمت ہوا اور سلام کہا، تو آپ صلی اللہ علیہ وسلم نے مجھے جواب دیا اور خوش آمدید بھی کہا اور فرمایا: ”بلاشبہ فرشتے کافر کے جنازے پر خیر کے ساتھ حاضر نہیں ہوتے اور نہ ایسے آدمی کے پاس آتے ہیں جس نے زعفران لگائی ہو اور نہ جنبی کے پاس آتے ہیں۔“ البتہ جنبی کے لیے رخصت دی کہ ”جب وہ سونا یا کھانا پینا چاہے تو وضو کر لے۔“ [سنن ابي داود/كتاب الترجل /حدیث: 4176]

سیدنا عمار بن یاسر رضی اللہ عنہ نے بیان کیا کہ ”میں نے زعفران لگائی“، اور مذکورہ بالا قصہ بیان کیا۔ اور پہلی حدیث زیادہ کامل ہے۔ اس روایت میں دھونے کا ذکر ہے۔ ابن جریج کہتے ہیں کہ ”میں نے عمر بن عطاء سے پوچھا: ”کیا وہ اس وقت احرام میں تھے؟“ انہوں نے کہا: ”نہیں، مقیم تھے۔““ [سنن ابي داود/كتاب الترجل /حدیث: 4177]

سیدنا ابوموسیٰ رضی اللہ عنہ بیان کرتے تھے کہ رسول اللہ صلی اللہ علیہ وسلم نے فرمایا: ”اللہ تعالیٰ اس آدمی کی نماز قبول نہیں فرماتا جس کے جسم پر معمولی سی «خَلُوق» بھی لگی ہو۔“ امام ابوداؤد رحمہ اللہ فرماتے ہیں: ”سند میں وارد ربیع بن انس کے نانا دادا سے مراد زید اور زیاد ہیں۔“ [سنن ابي داود/كتاب الترجل /حدیث: 4178]