سیدنا عبداللہ بن عمر رضی اللہ عنہما سے روایت ہے کہ بلاشبہ رسول اللہ صلی اللہ علیہ وسلم نے ”مونچھیں مونڈوانے اور ڈاڑھیاں بڑھانے کا حکم دیا ہے۔“ [سنن ابي داود/كتاب الترجل /حدیث: 4199]

سیدنا انس بن مالک رضی اللہ عنہ نے روایت کیا، انہوں نے کہا کہ رسول اللہ صلی اللہ علیہ وسلم نے ہمارے لیے حد مقرر کر دی تھی کہ ”زیرِ ناف کی صفائی، ناخن تراشنے، مونچھیں کاٹنے اور بغلوں کے بال اکھیڑنے کا عمل چالیس دن میں ایک بار (ضرور) کر لیا جائے۔“ امام ابوداؤد رحمہ اللہ نے کہا: ”اس روایت کو جعفر بن سلیمان نے بواسطہ ابو عمران، سیدنا انس رضی اللہ عنہ سے روایت کیا، مگر نبی کریم صلی اللہ علیہ وسلم کا ذکر نہیں کیا۔ اور کہا: ”ہمارے لیے یہ حد مقرر کی گئی تھی۔“ اور یہ زیادہ صحیح ہے۔ اور صدقہ دقیقی قوی راوی نہیں ہے۔“ [سنن ابي داود/كتاب الترجل /حدیث: 4200]

سیدنا جابر رضی اللہ عنہ بیان کرتے ہیں کہ ”ہم لوگ حج اور عمرے کے علاوہ داڑھیوں کو چھوڑا رکھتے تھے۔“ امام ابوداؤد رحمہ اللہ کہتے ہیں کہ «الِاسْتِحْدَادُ» کا مفہوم ”زیر ناف بالوں کی صفائی ہے۔“ [سنن ابي داود/كتاب الترجل /حدیث: 4201]

جناب عمرو بن شعیب اپنے والد سے، وہ اپنے دادا رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”سفید بال مت نوچا کرو، جس کسی مسلمان کے بال حالت اسلام میں سفید ہو جائیں، قیامت کے دن یہ اس کے لیے نور کا باعث ہوں گے۔“ اور یحییٰ کی روایت میں ہے: ”اللہ تعالیٰ ایک ایک بال کے عوض اس کی نیکی لکھتا ہے اور ایک گناہ دور کرتا ہے۔“ [سنن ابي داود/كتاب الترجل /حدیث: 4202]

سیدنا ابوہریرہ رضی اللہ عنہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”یہودی اور عیسائی اپنے بالوں کو نہیں رنگتے، پس تم ان کی مخالفت کیا کرو (یعنی رنگا کرو)۔“ [سنن ابي داود/كتاب الترجل /حدیث: 4203]

سیدنا جابر بن عبداللہ رضی اللہ عنہ سے روایت ہے کہ فتح مکہ کے روز (سیدنا ابوبکر رضی اللہ عنہ کے والد) ابوقحافہ کو لایا گیا تو ان کے سر اور داڑھی کے بال ثغامہ بوٹی کی مانند سفید تھے، تو رسول اللہ صلی اللہ علیہ وسلم نے فرمایا: ”انہیں کسی رنگ سے بدل دو اور سیاہی سے بچو۔“ [سنن ابي داود/كتاب الترجل /حدیث: 4204]

سیدنا ابوذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تحقیق سب سے بہتر چیز جس سے یہ سفید بال رنگے جاتے ہیں مہندی اور کتم ہے۔“ [سنن ابي داود/كتاب الترجل /حدیث: 4205]

سیدنا ابورمثہ رضی اللہ عنہ کا بیان ہے کہ: ”میں اپنے والد کے ساتھ نبی کریم صلی اللہ علیہ وسلم کی خدمت میں حاضر ہوا، میں نے دیکھا کہ آپ صلی اللہ علیہ وسلم کے بال کانوں تک تھے، ان میں مہندی کے رنگ کی جھلک تھی اور آپ صلی اللہ علیہ وسلم دو سبز چادریں اوڑھے ہوئے تھے۔“ [سنن ابي داود/كتاب الترجل /حدیث: 4206]

ایاد بن لقیط نے سیدنا ابورمثہ رضی اللہ عنہ سے یہ حدیث بیان کی، انہوں نے کہا کہ میرے والد نے نبی کریم صلی اللہ علیہ وسلم سے عرض کیا: ”یہ جو آپ کی کمر پر ہے مجھے دکھائیں، میں طبیب (معالج) ہوں۔“ آپ صلی اللہ علیہ وسلم نے فرمایا: «اللَّهُ الطَّبِيبُ» ”طبیب تو اللہ ہے،“ «أَنْتَ رَفِيقٌ» ”تم رفیق (تسلی دینے والے اور نرمی کرنے والے) ہو۔“ «طَبِيبُهَا الَّذِي خَلَقَهَا» ”طبیب وہ ہے جس نے اسے پیدا کیا ہے۔“ [سنن ابي داود/كتاب الترجل /حدیث: 4207]

سیدنا ابو رمثہ رضی اللہ عنہ سے روایت ہے کہ میں اور میرے والد نبی کریم صلی اللہ علیہ وسلم کے پاس آئے۔ آپ صلی اللہ علیہ وسلم نے ایک شخص سے یا میرے والد سے (میرے متعلق پوچھا) کہ ”یہ کون ہے؟“ انہوں نے کہا: ”یہ میرا بیٹا ہے۔“ آپ صلی اللہ علیہ وسلم نے فرمایا: ”یہ تیرا قصور نہیں اٹھائے گا۔“ (یعنی ہر شخص اپنے اعمال کا خود ذمہ دار اور جوابدہ ہے) اور آپ صلی اللہ علیہ وسلم کی داڑھی مہندی سے رنگی ہوئی تھی۔ [سنن ابي داود/كتاب الترجل /حدیث: 4208]