حضرت اسامہ بن زید رضی اللہ عنہ سے روایت ہے، نبی صلی اللہ علیہ وسلم نے فرمایا: ”مسلمان کافر کا وارث نہیں ہوتا اور کافر مسلمان کا وارث نہیں ہوتا۔“ [سنن ابن ماجه/كتاب الفرائض/حدیث: 2729]

حضرت اسامہ بن زید رضی اللہ عنہ سے روایت ہے، انہوں نے عرض کیا: ”اے اللہ کے رسول صلی اللہ علیہ وسلم ! کیا آپ مکہ میں اپنے گھر میں تشریف رکھیں گے؟“ رسول اللہ صلی اللہ علیہ وسلم نے فرمایا: ”کیا عقیل نے ہمارے لیے کوئی مکان گھر چھوڑا ہے؟“ ابو طالب کی وراثت عقیل اور طالب کو ملی تھی اور جعفر اور علی رضی اللہ عنہما کو وراثت میں سے کچھ نہیں ملا تھا کیونکہ یہ دونوں مسلمان تھے اور عقیل اور طالب کافر تھے۔ حضرت عمر رضی اللہ عنہ اسی وجہ سے کہا کرتے تھے: ”مومن کافر کا وارث نہیں ہوتا۔“ اور حضرت اسامہ رضی اللہ عنہ نے فرمایا: رسول اللہ صلی اللہ علیہ وسلم کا ارشاد ہے: ”مسلمان کافر کا وارث نہیں ہوتا اور کافر مسلمان کا وارث نہیں ہوتا۔“ [سنن ابن ماجه/كتاب الفرائض/حدیث: 2730]

حضرت عبداللہ بن عمرو بن عاص رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”دو مختلف ملتوں کے لوگ ایک دوسرے کے وارث نہیں ہوتے۔“ [سنن ابن ماجه/كتاب الفرائض/حدیث: 2731]

حضرت عبداللہ بن عمرو بن عاص رضی اللہ عنہ سے روایت ہے کہ رباب بن حذیفہ بن سعید بن سہم نے ام وائل بنت معمر جمحیہ سے شادی کی، ان سے ان کے ہاں تین بیٹے پیدا ہوئے، پھر ان کی والدہ (ام وائل) کی وفات ہو گئی، تو ام وائل کے بیٹوں کو وراثت میں کچھ زمین اور غلاموں کی ولاء ملی۔ حضرت عمرو بن عاص رضی اللہ عنہ ان (بیٹوں) کو لے کر شام گئے، (وہاں) عمواس کے طاعون میں وہ (سب بیٹے) فوت ہو گئے، چنانچہ حضرت عمرو بن عاص رضی اللہ عنہ ان کے عصبہ ہونے کی وجہ سے ان کے وارث ہوئے۔ جب حضرت عمرو بن عاص رضی اللہ عنہ شام سے واپس آئے تو معمر کے بیٹوں نے حضرت عمر رضی اللہ عنہ کی عدالت میں اپنی بہن (ام وائل) کی ولاء کے حصول کے لیے دعویٰ کر دیا۔ حضرت عمر رضی اللہ عنہ نے فرمایا: ”میں تمہارے درمیان اسی ارشاد کے مطابق فیصلہ کروں گا جو میں نے رسول اللہ صلی اللہ علیہ وسلم سے سنا ہے۔ میں نے رسول اللہ صلی اللہ علیہ وسلم سے یہ ارشاد سنا ہے: ”بیٹا یا باپ جو ولاء حاصل کرے، وہ اس کے عصبہ کو ملے گی، خواہ کوئی ہو۔“”(حضرت عبداللہ بن عمرو رضی اللہ عنہ نے) فرمایا: حضرت عمر رضی اللہ عنہ نے یہ فیصلہ ہمارے حق میں دے دیا اور اس مضمون کی ایک تحریر لکھ کر ہمیں دی جس پر حضرت عبدالرحمن بن عوف رضی اللہ عنہ، حضرت زید بن ثابت رضی اللہ عنہ اور ایک (دیگر) آدمی (رضی اللہ عنہ) کی گواہی ثبت تھی۔ اس کے بعد خلیفہ عبدالملک بن مروان کے زمانہ خلافت میں اس خاتون کا ایک آزاد کردہ غلام فوت ہو گیا، اس نے دو ہزار دینار ترکہ چھوڑا، مجھے خبر ملی کہ اس فیصلے میں (جو حضرت عمر رضی اللہ عنہ نے کیا تھا) تبدیلی کر دی گئی ہے (فیصلہ مذکورہ بالا قانون کے مطابق نہیں کیا گیا)۔ یہ معاملہ ہشام بن اسماعیل کے سامنے پیش کیا گیا تو اس نے ہمیں (خلیفہ) عبدالملک کے پاس بھیج دیا (تاکہ وہی اس مقدمے کا فیصلہ کریں)۔ چنانچہ ہم نے حضرت عمر رضی اللہ عنہ کی تحریر انہیں دکھائی، عبدالملک نے کہا: ”میں یہ سمجھتا تھا کہ یہ ایسا فیصلہ ہے جس میں شک نہیں کیا جا سکتا، میں نہیں سمجھتا تھا کہ مدینہ والوں کا یہ حال ہو گیا ہے کہ وہ اس میں شک کریں۔“ پھر عبدالملک نے اس کا فیصلہ ہمارے حق میں کر دیا اور ہم اب تک اس (میراث) پر قابض ہیں۔ [سنن ابن ماجه/كتاب الفرائض/حدیث: 2732]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم کا آزاد کردہ غلام کھجور کے درخت سے گر کر فوت ہو گیا، اس نے کچھ مال چھوڑا تھا لیکن اس کی کوئی اولاد یا رشتے دار نہیں تھا، نبی صلی اللہ علیہ وسلم نے فرمایا: ”اس کی میراث اس کی بستی کے کسی آدمی کو دے دو۔“ [سنن ابن ماجه/كتاب الفرائض/حدیث: 2733]

حضرت حمزہ رضی اللہ عنہ کی بیٹی (امامہ یا امة اللہ رضی اللہ عنہا) جو عبداللہ بن شداد رضی اللہ عنہ کی ماں شریک بہن ہیں، ان سے روایت ہے، انہوں نے فرمایا: ”میرا آزاد کردہ غلام ایک بیٹی چھوڑ کر فوت ہو گیا تو رسول اللہ صلی اللہ علیہ وسلم نے اس کا مال میرے اور اس کی بیٹی کے درمیان تقسیم کر دیا، یعنی آدھا مجھے دیا اور آدھا اس کو۔“ [سنن ابن ماجه/كتاب الفرائض/حدیث: 2734]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قاتل وارث نہیں ہوتا۔“ [سنن ابن ماجه/كتاب الفرائض/حدیث: 2735]

حضرت عبداللہ بن عمرو بن عاص رضی اللہ عنہ سے روایت ہے کہ رسول اللہ صلی اللہ علیہ وسلم فتح مکہ کے دن (خطبے کے لیے) کھڑے ہوئے اور (خطبے) میں فرمایا: ”عورت اپنے خاوند کی دیت اور اس کے مال میں سے وراثت (کا حصہ) حاصل کرتی ہے اور خاوند اس کی دیت اور مال میں سے وراثت حاصل کرتا ہے بشرطیکہ ان میں سے ایک نے دوسرے کو جان بوجھ کر قتل نہ کیا ہو۔ اگر ان میں سے ایک نے دوسرے کو عمداً قتل کیا تو وہ نہ اس کی دیت سے وراثت پائے گا، نہ اس کے مال سے۔ اور اگر ایک نے دوسرے کو غلطی سے قتل کیا ہو (قتلِ خطا کا ارتکاب کیا ہو) تو اس کے مال میں سے وراثت پائے گا اور اس کی دیت میں سے وراثت نہیں پائے گا۔“ [سنن ابن ماجه/كتاب الفرائض/حدیث: 2736]

حضرت ابوامامہ اسعد بن سہل بن حنیف رضی اللہ عنہ سے روایت ہے کہ ایک آدمی نے دوسرے آدمی کو تیر مار کر قتل کر دیا، مقتول کا ایک ماموں کے سوا کوئی وارث نہ تھا۔ حضرت ابو عبیدہ بن جراح رضی اللہ عنہ نے حضرت عمر رضی اللہ عنہ کو خط لکھ کر یہ مسئلہ دریافت فرمایا تو حضرت عمر رضی اللہ عنہ نے (جواب میں) خط لکھا کہ نبی صلی اللہ علیہ وسلم نے فرمایا ہے: ”جس کا کوئی مولیٰ نہ ہو، اللہ اور اس کا رسول اس کا مولیٰ ہے، اور جس کا کوئی وارث نہ ہو، ماموں اس کا وارث ہے۔“ [سنن ابن ماجه/كتاب الفرائض/حدیث: 2737]

رسول اللہ صلی اللہ علیہ وسلم کے ایک شامی صحابی حضرت مقدام ابوکریمہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جو شخص مال چھوڑ (کر فوت ہو) جائے تو وہ مال اس کے وارث کا ہے اور جو کوئی بوجھ (قرض یا نابالغ بچے) چھوڑ جائے تو اس کی ذمہ داری ہم پر ہے، یا فرمایا: اس کی ذمہ داری اللہ اور اس کے رسول پر ہے اور جس کا کوئی وارث نہیں، اس کا میں وارث ہوں، اس کے ذمے دیت بھی میں ہی دوں گا اور اس کی وراثت بھی میں لوں گا اور جس کا کوئی وارث نہ ہو، ماموں اس کا وارث ہے، اس کے ذمے دیت بھی وہی دے گا اور اس کی وراثت بھی وہی لے گا۔“ [سنن ابن ماجه/كتاب الفرائض/حدیث: 2738]