حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”قیامت کے دن ہر دولت مند اور نادار کی خواہش یہی ہوگی کہ اسے دنیا میں صرف (زندہ رکھنے کے قابل) تھوڑی سی روزی ملی ہوتی۔“ [سنن ابن ماجه/كتاب الزهد/حدیث: 4140]

حضرت عبداللہ بن محصن انصاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس کی صبح اس حال میں ہوئی کہ اسے بدن میں عافیت، اپنے بارے میں امن اور دن بھر کی خوراک حاصل ہو، اسے گویا پوری دنیا جمع کرکے دے دی گئی۔“ [سنن ابن ماجه/كتاب الزهد/حدیث: 4141]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”(دنیامیں) اپنے سے نیچے والے (کم مال) کو دیکھو، اپنے سے اوپر والے کو نہ دیکھو، اس سے یہ ہوگا کہ تم اللہ کی نعمت کو حقیر نہ سمجھو گے۔“ (راویِ حدیث) ابو معاویہ نے «نِعْمَةَ اللّٰهِ» کے بعد «عَلَيْكُمْ» کے الفاظ بھی بیان کیے ہیں۔ [سنن ابن ماجه/كتاب الزهد/حدیث: 4142]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”اللہ تعالیٰ تمہاری صورتوں اور تمہارے مالوں کو نہیں دیکھتا بلکہ تمہارے عملوں اور دلوں کو دیکھتا ہے۔“ [سنن ابن ماجه/كتاب الزهد/حدیث: 4143]

حضرت عائشہ رضی اللہ عنہا سے روایت ہے، انہوں نے فرمایا: ”ہم، آلِ محمد صلی اللہ علیہ وسلم مہینہ مہینہ اس حال میں گزار دیتے تھے کہ آگ نہیں جلاتے تھے، (ہمارا کھانا) صرف کھجوریں اور پانی ہوتا تھا۔“ [سنن ابن ماجه/كتاب الزهد/حدیث: 4144]

ام المومنین عائشہ رضی اللہ عنہا سے روایت ہے، انہوں نے فرمایا: ”حضرت محمد صلی اللہ علیہ وسلم کے گھر والوں پر مہینہ بھر اس طرح گزر جاتا تھا کہ آپ کے کسی گھر میں بھی دھواں نظر نہیں آتا تھا۔“ (حضرت ابوسلمہ رضی اللہ عنہ نے بیان کیا:) ”میں نے کہا: پھر وہ لوگ کیا کھاتے تھے؟“ ام المومنین رضی اللہ عنہا نے فرمایا: ”دو سیاہ چیزیں: کھجوریں اور پانی، البتہ ہمارے کچھ انصاری ہمسائے تھے، وہ مخلص ہمسائے تھے، ان کے گھروں میں پلنے والی کچھ بکریاں تھیں (جنہیں چرنے کے لیے چراگاہ میں نہیں لے جایا جاتا تھا، گھر لا کر چارہ دیا جاتا تھا۔) وہ ان کا دودھ آپ صلی اللہ علیہ وسلم کی طرف (ہمارے ہاں) بھیج دیا کرتے تھے۔“ (راویِ حدیث) محمد بن عمرو رضی اللہ عنہ بیان کرتے ہیں: ”وہ نو گھر تھے۔“ [سنن ابن ماجه/كتاب الزهد/حدیث: 4145]

حضرت عمر بن خطاب رضی اللہ عنہ سے روایت ہے، انہوں نے فرمایا: ”میں نے ایک دن رسول اللہ صلی اللہ علیہ وسلم کو بھوک کی وجہ سے بے چین ہو کر کروٹیں بدلتے دیکھا کیونکہ آپ صلی اللہ علیہ وسلم کو معمولی درجہ کی کھجوریں بھی میسر نہ تھیں جن سے آپ صلی اللہ علیہ وسلم اپنا پیٹ بھر لیتے۔“ [سنن ابن ماجه/كتاب الزهد/حدیث: 4146]

حضرت انس بن مالک رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کو کئی بار یہ فرماتے سنا ہے: ”قسم ہے اس ذات کی جس کے ہاتھ میں محمد ( صلی اللہ علیہ وسلم ) کی جان ہے! آج محمد ( صلی اللہ علیہ وسلم ) کے گھر والوں کے پاس ایک صاع غلہ ہے نہ ایک صاع کھجوریں۔“”ان دنوں رسول اکرم صلی اللہ علیہ وسلم کی نو بیویاں تھیں۔ [سنن ابن ماجه/كتاب الزهد/حدیث: 4147]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”آج محمد ( صلی اللہ علیہ وسلم ) کے گھر والوں کے پاس صرف ایک مُد خوراک ہے۔“ یا فرمایا: ”ایک مُد خوراک بھی نہیں ہے۔“ [سنن ابن ماجه/كتاب الزهد/حدیث: 4148]

حضرت سلمان بن صرد رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ہمارے ہاں تشریف لائے تو (ہماری یہ حالت تھی کہ) ہمیں تین رات تک کھانا میسر نہ ہوسکا۔“ [سنن ابن ماجه/كتاب الزهد/حدیث: 4149]