سیدنا عبادہ بن صامت رضی اللہ عنہ بیان کرتے ہیں: نبی کریم صلی اللہ علیہ وسلم نے اس بات سے منع کیا ہے کہ (غلاموں یا کنیزوں کو فروخت کرتے ہوئے) ماں اور اس کی اولاد کے درمیان علیحدگی ڈال دی جائے، عرض کی گئی: ”یا رسول اللہ! یہ حکم کب تک ہے؟“ نبی کریم صلی اللہ علیہ وسلم نے فرمایا: ”جب تک لڑکا بالغ نہیں ہو جاتا اور لڑکی کو حیض نہیں آتا۔“ عبداللہ نامی راوی، واقعی، ہیں اور یہ ضعیف ہیں، علی بن مدینی نے ان پر جھوٹا ہونے کا الزام عائد کیا ہے، سعید بن عبدالعزیز کے حوالے سے ان کے علاوہ کسی دوسرے نے روایات نقل نہیں کی ہیں۔ [سنن الدارقطني/ كتاب البيوع/حدیث: 3049]

ابان بیان کرتے ہیں: عامر شعبی نے انہیں یہ حدیث سنائی، نبی کریم صلی اللہ علیہ وسلم نے یہ بات ارشاد فرمائی ہے: ”جو شخص کسی ایسے جانور کو پائے، جس کے مالکان اسے چارا نہ کھلا سکتے ہوں اور وہ اس جانور کو چرنے کے لیے کھلا چھوڑ دیں، پھر وہ شخص اس جانور کو لے اور اسے زندگی دے (یعنی خوراک فراہم کرے)، تو وہ اسی کی ملکیت ہو گا۔“ ابان کی روایت میں یہ الفاظ بھی ہیں: عبیداللہ فرماتے ہیں: میں نے دریافت کیا: انہوں نے کس کے حوالے سے یہ حدیث سنائی ہے؟ تو انہوں نے جواب دیا: کئی صحابہ کے حوالے سے (یہ حدیث سنائی ہے)، حماد کی نقل کردہ یہ روایت زیادہ واضح اور مکمل ہے۔ [سنن الدارقطني/ كتاب البيوع/حدیث: 3050]

سیدنا عبداللہ بن عباس رضی اللہ عنہما بیان کرتے ہیں: فتح خیبر کے موقع پر نبی کریم صلی اللہ علیہ وسلم نے اس بات سے منع کیا تھا کہ مال غنیمت کی تقسیم سے پہلے اسے فروخت کیا جائے، (یا قید ہونے والی) حاملہ عورتوں کے بچوں کو جنم دینے سے پہلے اس کے ساتھ صحبت نہ کی جائے، آپ نے فرمایا: ”کیا تم دوسرے کے کھیت کو سیراب کرو گے؟“ (اس موقع پر نبی کریم صلی اللہ علیہ وسلم نے) پالتو گدھوں کا گوشت اور درندوں کا گوشت بھی کھانے سے منع کیا۔ [سنن الدارقطني/ كتاب البيوع/حدیث: 3051]

سیدنا عبداللہ بن عمرو بن عاص رضی اللہ عنہما بیان کرتے ہیں: نبی کریم صلی اللہ علیہ وسلم نے انہیں یہ ہدایت کی کہ وہ لشکر کو سامان فراہم کریں، سیدنا عبداللہ بیان کرتے ہیں: اس وقت ہمارے پاس کوئی سواری نہیں تھی، راوی بیان کرتے ہیں: نبی کریم صلی اللہ علیہ وسلم نے انہیں یہ ہدایت کی کہ وہ کوئی سواری خرید لیں، اس شرط پر کہ جب صدقہ وصول کرنے والا شخص (صدقات وصول کر کے آئے)، تو اس سواری کی قیمت ادا کر دی جائے گی، تو سیدنا عبداللہ نے دو اونٹوں اور چند بکریوں کے عوض میں ایک اونٹ خریدا، اس شرط پر کہ جب صدقہ وصول کرنے والا شخص آئے گا، تو اس سواری کی قیمت ادا کر دی جائے گی، یہ نبی کریم صلی اللہ علیہ وسلم کے حکم کے تحت کیا گیا۔ [سنن الدارقطني/ كتاب البيوع/حدیث: 3052]

عمرو بن حریش بیان کرتے ہیں: میں نے سیدنا عبداللہ بن عمرو سے سوال کیا: ہم ایسی جگہ رہتے ہیں، جہاں دینار درہم کا رواج نہیں ہے، ہم لوگ مقررہ مدت کے بعد ادائیگی کی شرط پر اونٹ اور بکریاں خرید لیتے ہیں، آپ کی اس بارے میں کیا رائے ہے؟ تو انہوں نے فرمایا: تم نے ایسے شخص سے سوال کیا ہے، جو اس بارے میں جانتا ہے، ایک مرتبہ نبی کریم صلی اللہ علیہ وسلم نے جنگ کے لیے صدقوں کے اونٹوں میں سے اونٹ دیے، یہاں تک کہ اونٹ ختم ہو گئے، لیکن کچھ لوگ بچ گئے، جن کے پاس سواری کے لیے جانور نہیں تھے، تو نبی کریم صلی اللہ علیہ وسلم نے فرمایا: ”تم ہمارے لیے کچھ اونٹ خرید لو، جو جوان اونٹنیوں کے عوض میں ہوں گے، جو صدقے کے طور پر وصول ہوں گی، جب صدقات آئیں گے، تو ہم ان لوگوں کو وہ ادائیگی کر دیں گے۔“ راوی کہتے ہیں: تو میں نے دو یا تین جوان اونٹنیوں کے عوض میں ایک اونٹ خریدا، یہاں تک کہ میں فارغ ہو گیا، پھر نبی کریم صلی اللہ علیہ وسلم نے صدقہ کے اونٹوں میں سے اس کی ادائیگی کی۔ [سنن الدارقطني/ كتاب البيوع/حدیث: 3053]

عمرو بن حریش، سیدنا عبداللہ بن عمرو رضی اللہ عنہما کا یہ بیان نقل کرتے ہیں: نبی کریم صلی اللہ علیہ وسلم نے انہیں ایک لشکر کا ساز و سامان فراہم کرنے کی ہدایت کی، تو اونٹ ختم ہو گئے، راوی کہتے ہیں: نبی کریم صلی اللہ علیہ وسلم نے مجھے ہدایت کی کہ میں صدقہ کی اونٹنیوں کے عوض میں کچھ اونٹ حاصل کر لوں، تو میں نے صدقہ کے اونٹوں میں سے دو اونٹوں کے عوض میں ایک اونٹ خریدا۔ [سنن الدارقطني/ كتاب البيوع/حدیث: 3054]

یہی روایت ایک اور سند کے ہمراہ بھی منقول ہے، نبی کریم صلی اللہ علیہ وسلم نے انہیں یہ ہدایت کی کہ وہ لشکر کے لیے سامان فراہم کریں، اونٹ تھوڑے پڑ گئے، تو آپ نے ہمیں یہ ہدایت کی کہ ہم صدقہ کے اونٹوں میں سے دو اونٹوں کے عوض میں ایک اونٹ حاصل کریں۔ [سنن الدارقطني/ كتاب البيوع/حدیث: 3055]

سیدنا سہل بن سعد ساعدی رضی اللہ عنہ بیان کرتے ہیں: نبی کریم صلی اللہ علیہ وسلم نے جانور کے عوض میں گوشت فروخت کرنے سے منع کیا ہے۔ امام مالک سے، اس سند کے ہمراہ اس روایت کو نقل کرنے میں یزید بن مروان منفرد ہیں، اس بارے میں ان کی متابعت نہیں کی گئی، درست یہ ہے کہ یہ روایت، موطا امام مالک میں، سعید بن مسیب کے حوالے سے، مرسل روایت کے طور پر منقول ہے۔ [سنن الدارقطني/ كتاب البيوع/حدیث: 3056]

سعید بن مسیب بیان کرتے ہیں: نبی کریم صلی اللہ علیہ وسلم نے گوشت کے عوض میں جانور فروخت کرنے سے منع کیا ہے، ابن مسیب بیان کرتے ہیں: گوشت کے بدلے میں جانور فروخت کرنے سے منع کیا گیا ہے۔ [سنن الدارقطني/ كتاب البيوع/حدیث: 3057]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے جانور کے عوض میں جانور کو ادھار فروخت کرنے سے منع کیا ہے۔ [سنن الدارقطني/ كتاب البيوع/حدیث: 3058]