عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: سیدنا محیصہ بن مسعود رضی اللہ عنہ، سیدنا حویصہ بن مسعود رضی اللہ عنہ، سیدنا عبدالرحمن بن سہل رضی اللہ عنہ اور سیدنا عبداللہ بن سہل رضی اللہ عنہ خیبر گئے، وہاں یہ حضرات اپنے کام کے سلسلے میں ایک دوسرے سے جدا ہو گئے، پھر انہیں سیدنا عبداللہ بن سہل رضی اللہ عنہ مقتول ملے، یہ حضرات واپس نبی کریم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کو اس بارے میں بتایا، تو نبی کریم صلی اللہ علیہ وسلم نے ان سے فرمایا: ”تم پچاس افراد قسامت کے طور پر قسم اٹھا کر اپنے قاتل (کو سزا) دے سکتے ہو۔“ تو ان حضرات کو یہ گوارا نہیں ہوا، انہوں نے عرض کی: ”یا رسول اللہ! ہم غیب کے بارے میں کیسے قسم اٹھا سکتے ہیں، ہم ایک ایسے معاملے کے بارے میں قسم اٹھائیں، جس میں ہم موجود نہیں تھے؟“ تو نبی کریم صلی اللہ علیہ وسلم نے فرمایا: ”پھر یہودیوں کے پچاس افراد قسم اٹھا کر بری الذمہ ہو جائیں گے۔“ انہوں نے عرض کی: ”یا رسول اللہ! کیا ہم کفار کی قسموں کو قبول کر لیں؟“ (راوی بیان کرتے ہیں:) پھر نبی کریم صلی اللہ علیہ وسلم کی خدمت میں زکوٰة کا مال آیا، تو نبی کریم صلی اللہ علیہ وسلم نے خود (اس مقتول) کی دیت ادا کی۔ [سنن الدارقطني/ كتاب الحدود والديات وغيره/حدیث: 3186]

بشیر بن یسار بیان کرتے ہیں: انصار سے تعلق رکھنے والے ایک صحابی، جن کا نام سیدنا سہل بن ابوحثمہ رضی اللہ عنہ تھا، انہوں نے یہ بات بتائی، وہ اپنے قبیلے کے کچھ افراد کے ہمراہ خیبر گئے، وہاں وہ لوگ ایک دوسرے سے جدا ہو گئے، پھر انہوں نے اپنے ایک فرد کو مقتول پایا، تو جن لوگوں کے پاس انہوں نے مقتول کو پایا تھا، ان لوگوں سے انہوں نے کہا: ”تم نے ہمارے ساتھی کو قتل کیوں کیا ہے؟“ تو وہ لوگ بولے: ”ہم نے قتل نہیں کیا اور نہ ہی ہمیں قاتل کے بارے میں علم ہے۔“ پھر یہ حضرات نبی کریم صلی اللہ علیہ وسلم کی خدمت میں حاضر ہوئے، انہوں نے عرض کی: ”اے اللہ کے نبی! ہم خیبر گئے، وہاں ہم نے اپنے ایک فرد کو مقتول پایا۔“ تو نبی کریم صلی اللہ علیہ وسلم نے ارشاد فرمایا: ”پہلے بڑے کو موقع دو۔“ نبی کریم صلی اللہ علیہ وسلم نے ان سے فرمایا: ”تم اس بارے میں ثبوت پیش کرو کہ کس نے اسے قتل کیا ہے؟“ انہوں نے عرض کی: ”ہمارے پاس کوئی ثبوت نہیں ہے۔“ نبی کریم صلی اللہ علیہ وسلم نے فرمایا: ”پھر (وہ یہودی) قسم اٹھا لیں (اور بری الذمہ ہو جائیں گے)۔“ انہوں نے عرض کی: ”ہم یہودیوں کے قسم اٹھانے پر راضی نہیں ہوں گے۔“ راوی بیان کرتے ہیں: نبی کریم صلی اللہ علیہ وسلم کو یہ بھی اچھا نہیں لگا کہ مقتول کا خون رائیگاں جائے، اس لیے آپ نے خود زکوٰة کے اونٹوں میں سے ایک سو اونٹ دیت کے طور پر ادا کیے۔ [سنن الدارقطني/ كتاب الحدود والديات وغيره/حدیث: 3187]

یہی روایت ایک اور سند کے ہمراہ منقول ہے۔ [سنن الدارقطني/ كتاب الحدود والديات وغيره/حدیث: 3188]

سیدنا سہل بن ابوحثمہ رضی اللہ عنہ بیان کرتے ہیں: انصار کے کچھ افراد خیبر گئے، وہاں ان میں سے ایک شخص قتل ہو گیا، یہ معاملہ نبی کریم صلی اللہ علیہ وسلم کے سامنے پیش آ گیا، تو آپ نے فرمایا: ”تمہارے ثبوت (کہاں ہیں)؟“ انہوں نے عرض کی: ”ہمارے پاس کوئی ثبوت نہیں ہے۔“ نبی کریم صلی اللہ علیہ وسلم نے فرمایا: ”تو ان (یہودیوں کا) قسم اٹھانا (معاملہ ختم کر دے گا)۔“ انہوں نے عرض کی: ”پھر تو یہودی (ایک ایک کر کے) ہمیں قتل کر دیں گے۔“ نبی کریم صلی اللہ علیہ وسلم نے فرمایا: ”پھر تم قسم اٹھا لو۔“ انہوں نے عرض کی: ”ہم وہاں موجود نہیں تھے۔“ راوی بیان کرتے ہیں: نبی کریم صلی اللہ علیہ وسلم کی خدمت میں جو مال آیا تھا، آپ نے اس میں سے اس (مقتول) کی دیت ادا کی۔ [سنن الدارقطني/ كتاب الحدود والديات وغيره/حدیث: 3189]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”مدعی پر ثبوت پیش کرنا لازم ہو گا اور انکار کرنے والے پر قسم اٹھانا لازم ہو گا، البتہ قسامت کا حکم مختلف ہے۔“ [سنن الدارقطني/ كتاب الحدود والديات وغيره/حدیث: 3190]

عمرو بن شعیب اپنے والد کے حوالے سے اپنے دادا کے حوالے سے، نبی کریم صلی اللہ علیہ وسلم کا یہ فرمان نقل کرتے ہیں: ”مدعی پر ثبوت پیش کرنا لازم ہو گا اور انکار کرنے والے پر قسم اٹھانا لازم ہو گا، البتہ قسامت کا حکم مختلف ہے۔“ [سنن الدارقطني/ كتاب الحدود والديات وغيره/حدیث: 3191]

یہی روایت ایک اور سند کے ہمراہ بھی منقول ہے، عبدالرزاق نے اس کے برعکس اسے مرسل روایت کے طور پر نقل کیا ہے۔ [سنن الدارقطني/ كتاب الحدود والديات وغيره/حدیث: 3192]

عبدالملک بن عمیر بیان کرتے ہیں: میں سیدنا علی رضی اللہ عنہ کے پاس موجود تھا، ان کے پاس بنو عجل کا ایک شخص مستورد بن قبیصہ لایا گیا، جو اسلام چھوڑ کر عیسائی ہو گیا تھا، سیدنا علی رضی اللہ عنہ نے اس سے دریافت کیا: ”تمہارے بارے میں مجھے کیا بتایا گیا ہے؟“ اس نے دریافت کیا: ”آپ کو میرے بارے میں کیا بتایا گیا ہے؟“ سیدنا علی رضی اللہ عنہ نے فرمایا: ”مجھے تمہارے بارے میں یہ بتایا گیا ہے کہ تم عیسائی ہو گئے ہو۔“ اس نے کہا: ”میں سیدنا مسیح علیہ الصلوٰة والسلام کے دین پر قائم ہوں۔“ سیدنا علی رضی اللہ عنہ نے اس سے فرمایا: ”میں بھی سیدنا مسیح علیہ الصلوٰة والسلام کے دین پر قائم ہوں۔“ سیدنا علی رضی اللہ عنہ نے اس سے دریافت کیا: ”تم ان (یعنی سیدنا مسیح علیہ الصلوٰة والسلام) کے بارے میں کیا کہتے ہو؟“ تو اس شخص نے جو جواب دیا، وہ مجھے سمجھ نہیں آیا، سیدنا علی رضی اللہ عنہ نے حکم دیا: ”اسے قتل کر دو۔“ اسے قتل کر دیا گیا (راوی کہتے ہیں:) میں نے اپنے ساتھ والے سے پوچھا: ”اس نے کیا کہا تھا؟“ تو اس نے جواب دیا: ”اس نے کہا تھا: سیدنا مسیح علیہ الصلوٰة والسلام اس کے پروردگار ہیں۔“ [سنن الدارقطني/ كتاب الحدود والديات وغيره/حدیث: 3193]

سیدنا عبداللہ بن عباس رضی اللہ عنہما بیان کرتے ہیں: ایک شخص کی ام ولد تھی، جس سے اس شخص کے دو بیٹے تھے، جو دونوں موتیوں کی طرح تھے، وہ نبی کریم صلی اللہ علیہ وسلم کی شان میں گستاخی کیا کرتی تھی، اس شخص نے اسے منع کیا، لیکن وہ باز نہیں آئی، اس شخص نے اسے جھڑکا، لیکن وہ پھر بھی باز نہ آئی، ایک رات اس عورت نے نبی کریم صلی اللہ علیہ وسلم کا ذکر (گستاخی کے الفاظ کے ساتھ) کیا، تو اس شخص سے صبر نہیں ہوا، اس نے پھاؤڑا لیا اور اس عورت کے پیٹ میں گھونپ دیا (جس سے وہ عورت مر گئی، جب یہ مقدمہ نبی کریم صلی اللہ علیہ وسلم کی خدمت میں پیش ہوا)، تو آپ صلی اللہ علیہ وسلم نے فرمایا: ”گواہ ہو جاؤ، اس عورت کا خون رائیگاں گیا۔“ یہ الفاظ ابن کرامت نامی راوی کے ہیں۔ [سنن الدارقطني/ كتاب الحدود والديات وغيره/حدیث: 3194]

سیدنا عبداللہ بن عباس رضی اللہ عنہما بیان کرتے ہیں: ایک نابینا شخص، جس کی ام ولد نبی کریم صلی اللہ علیہ وسلم کی شان میں گستاخی کیا کرتی تھی، اس شخص نے اس عورت کو منع کیا، لیکن وہ باز نہیں آئی، اس شخص نے اس عورت کو ڈانٹ ڈپٹ کی، لیکن وہ پھر بھی باز نہ آئی، ایک رات جب وہ نبی کریم صلی اللہ علیہ وسلم کی شان میں گستاخانہ گفتگو کرنے لگی، تو اس شخص نے اس عورت کو قتل کر دیا، صبح اس بات کا تذکرہ نبی کریم صلی اللہ علیہ وسلم کے سامنے کیا گیا، تو وہ نابینا شخص کھڑا ہوا، اس نے عرض کی: ”یا رسول اللہ! میں اس عورت کا مالک ہوں، وہ آپ کی شان میں گستاخی کیا کرتی تھی، میں نے اسے روکا، لیکن وہ باز نہیں آئی، میں نے اسے ڈانٹ ڈپٹ کی، لیکن وہ پھر بھی باز نہیں آئی، میرے اس عورت سے دو بچے ہیں، جو دونوں موتیوں کی طرح ہیں، وہ میری رفیقہ (محبوبہ) تھی، گزشتہ رات اس نے آپ صلی اللہ علیہ وسلم کی شان میں گستاخی کی، تو میں نے اسے قتل کر دیا۔“ نبی کریم صلی اللہ علیہ وسلم نے فرمایا: ”تم لوگ گواہ ہو جاؤ، اس عورت کا خون رائیگاں گیا۔“ [سنن الدارقطني/ كتاب الحدود والديات وغيره/حدیث: 3195]