سیدنا طلحہ بن عبیداللہ رضی اللہ عنہ سے منقول ہے کہ رسول اللہ صلی اللہ علیہ وسلم نے فرمایا: ”جب تم اپنے سامنے پالان کی پچھلی لکڑی کے برابر کوئی چیز رکھ لو تو تمہیں کوئی نقصان نہیں کہ کون تمہارے آگے سے گزرتا ہے۔“ [سنن ابي داود/تفرح أبواب السترة /حدیث: 685]

جناب ابن جریج، عطاء سے بیان کرتے ہیں، انہوں نے کہا: ”پالان کی پچھلی لکڑی ایک ذراع (ہاتھ) یا اس سے کچھ زائد ہوتی ہے۔“ [سنن ابي داود/تفرح أبواب السترة /حدیث: 686]

سیدنا ابن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم جب عید پڑھنے کے لیے نکلتے تو حکم دیتے کہ نیزہ ساتھ لے لیا جائے۔ اسے آپ صلی اللہ علیہ وسلم کے آگے گاڑ دیا جاتا، پھر آپ صلی اللہ علیہ وسلم اس کی طرف نماز پڑھتے اور لوگ آپ صلی اللہ علیہ وسلم کے پیچھے ہوتے۔ سفر میں بھی آپ صلی اللہ علیہ وسلم کا یہ معمول ہوتا تھا۔ چنانچہ امراء نے یہیں سے یہ عمل اخذ کیا ہے۔“ [سنن ابي داود/تفرح أبواب السترة /حدیث: 687]

جناب عون بن ابی جحیفہ رحمہ اللہ اپنے والد رضی اللہ عنہ سے بیان کرتے ہیں کہ ”نبی کریم صلی اللہ علیہ وسلم نے انہیں (مکہ کے قریب) وادی بطحاء میں نماز پڑھائی اور آپ صلی اللہ علیہ وسلم کے سامنے چھوٹا نیزہ تھا۔ (آپ صلی اللہ علیہ وسلم نے ہمیں) ظہر اور عصر کی دو دو رکعتیں پڑھائیں۔ اس نیزے کے آگے سے عورت بھی گزرتی تھی اور گدھا بھی۔“ [سنن ابي داود/تفرح أبواب السترة /حدیث: 688]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب تم میں سے کوئی نماز پڑھنے لگے تو اپنے سامنے کوئی چیز رکھ لے۔ اگر کچھ نہ ملے تو کوئی لاٹھی کھڑی کر لے۔ اگر اس کے پاس عصا (لاٹھی) نہ ہو تو خط ہی کھینچ لے۔ پھر اس کے آگے سے جو بھی گزرے اسے نقصان نہ ہو گا۔“ [سنن ابي داود/تفرح أبواب السترة /حدیث: 689]

جناب ابومحمد بن عمرو بن حریث اپنے دادا حریث سے جو بنی عذرہ کے آدمی تھے، وہ سیدنا ابوہریرہ رضی اللہ عنہ سے، وہ سیدنا ابوالقاسم صلی اللہ علیہ وسلم سے روایت کرتے ہیں اور لکیر کھینچنے والی حدیث بیان کی۔ سفیان بن عیینہ رحمہ اللہ کہتے ہیں کہ ”ہمیں ایسی کوئی دلیل نہیں ملی جس سے ہم اس حدیث کو تقویت دے سکیں اور یہ صرف اسی سند سے مروی ہے۔“ (ابن مدینی رحمہ اللہ نے کہا) ”میں نے سفیان بن عیینہ سے کہا کہ محدثین اس کے راوی میں اختلاف کرتے ہیں (آیا یہ ابومحمد بن عمرو بن حریث ہے یا کوئی اور) تو انہوں نے کچھ سوچا اور پھر کہا: مجھے ابومحمد بن عمرو ہی یاد ہے۔“ سفیان رحمہ اللہ نے کہا کہ ”اسمٰعیل بن امیہ کی وفات کے بعد ایک آدمی آیا اور اس (آنے والے) شیخ نے ابومحمد کو طلب کیا، وہ مل گیا اور اس حدیث کے متعلق پوچھا مگر اسے اشتباہ ہو گیا (یعنی وہ اسے صحیح طریقے سے بیان نہیں کر سکا)۔“ امام ابوداؤد رحمہ اللہ نے کہا: ”میں نے امام احمد بن حنبل رحمہ اللہ سے سنا، انہوں نے کئی بار خط کھینچنے کا وصف بیان کیا تو کہا کہ اس طرح عرض میں کھینچا جائے جیسے کہ ہلال ہوتا ہے۔“ امام ابوداؤد رحمہ اللہ نے کہا: ”میں نے مسدد سے سنا انہوں نے کہا کہ ابن داود (ابن داود خریبی) نے کہا کہ یہ خط طول میں کھینچا جائے۔“ امام ابوداؤد رحمہ اللہ نے کہا: ”میں نے امام احمد بن حنبل رحمہ اللہ سے سنا انہوں نے کئی بار اس خط کی صفت یہ بتائی کہ یہ عرض میں ہو اور ہلال کی مانند گولائی میں ہو۔“ [سنن ابي داود/تفرح أبواب السترة /حدیث: 690]

جناب سفیان بن عیینہ رحمہ اللہ کہتے ہیں کہ ”میں نے شریک (شریک بن عبداللہ بن ابی نمر، یا شریک بن عبداللہ نخعی کوفی) کو دیکھا کہ انہوں نے ہمیں ایک جنازہ کے اجتماع میں عصر کی نماز پڑھائی تو اپنے سامنے اپنی ٹوپی رکھ لی، یعنی ایک فریضہ میں جس کا وقت ہو چکا تھا۔“ [سنن ابي داود/تفرح أبواب السترة /حدیث: 691]

سیدنا عبداللہ بن عمر رضی اللہ عنہما سے مروی ہے کہ ”نبی کریم صلی اللہ علیہ وسلم اپنے اونٹ کو سترہ بنا کر اس کی طرف نماز پڑھ لیا کرتے تھے۔“ [سنن ابي داود/تفرح أبواب السترة /حدیث: 692]

سیدہ ضباعہ بنت مقداد بن اسود رضی اللہ عنہا اپنے والد (سیدنا مقداد رضی اللہ عنہ) سے روایت کرتی ہیں، انہوں نے کہا: ”میں نے دیکھا کہ رسول اللہ صلی اللہ علیہ وسلم جب بھی کسی لکڑی، ستون یا درخت کی طرف (منہ کر کے) نماز پڑھتے تو اسے ہمیشہ اپنے دائیں یا بائیں ابرو کی طرف رکھتے، بالکل عین سامنے نہ رکھتے تھے۔“ [سنن ابي داود/تفرح أبواب السترة /حدیث: 693]

جناب محمد بن کعب قرظی رحمہ اللہ نے بیان کیا کہ میں نے ان سے یعنی عمر بن عبدالعزیز رحمہ اللہ سے کہا کہ مجھ سے سیدنا عبداللہ بن عباس رضی اللہ عنہما نے بیان کیا کہ نبی کریم صلی اللہ علیہ وسلم نے فرمایا: ”نہ سونے والے کے پیچھے (کھڑے ہو کر) نماز پڑھو اور نہ باتوں میں مشغول شخص کے پیچھے۔“ [سنن ابي داود/تفرح أبواب السترة /حدیث: 694]