سیدنا ابوایوب رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”ظہر سے پہلے کی چار رکعات کہ ان میں سلام نہ ہو، ان کے لیے آسمان کے دروازے کھول دیے جاتے ہیں۔“ امام ابوداؤد رحمہ اللہ کہتے ہیں: ”یحییٰ بن سعید قطان سے مجھے یہ بات پہنچی ہے، انہوں نے کہا کہ اگر میں عبیدہ سے کچھ بیان کرتا تو یہ حدیث روایت کرتا۔“ امام ابوداؤد رحمہ اللہ کہتے ہیں: ”عبیدہ ضعیف ہے اور ابن منجاب کا نام سہم ہے۔“ [سنن ابي داود/كتاب التطوع /حدیث: 1270]

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”اللہ تعالیٰ اس شخص پر رحم فرمائے جو عصر سے پہلے چار رکعتیں پڑھے۔“ [سنن ابي داود/كتاب التطوع /حدیث: 1271]

سیدنا علی رضی اللہ عنہ سے روایت ہے کہ ”نبی کریم صلی اللہ علیہ وسلم عصر سے پہلے دو رکعتیں پڑھا کرتے تھے۔“ [سنن ابي داود/كتاب التطوع /حدیث: 1272]

جناب کریب مولیٰ ابن عباس سے مروی ہے کہ سیدنا عبداللہ بن عباس رضی اللہ عنہما، عبدالرحمٰن بن ازہر رضی اللہ عنہما اور مسور بن مخرمہ رضی اللہ عنہما نے مجھے نبی کریم صلی اللہ علیہ وسلم کی زوجہ محترمہ سیدہ عائشہ رضی اللہ عنہا کی خدمت میں بھیجا اور کہا: ”انہیں ہم سب کی طرف سے سلام کہنا اور ان سے عصر کے بعد دو رکعتوں کا مسئلہ پوچھنا اور کہنا کہ ہمیں معلوم ہوا ہے کہ آپ یہ رکعتیں پڑھتی ہیں جب کہ ہمیں یہ بات پہنچی ہے کہ رسول اللہ صلی اللہ علیہ وسلم نے ان سے منع فرمایا ہے“۔ چنانچہ میں (یعنی کریب) ان کی خدمت میں حاضر ہوا اور وہ سب بات پہنچائی جو انہوں نے مجھ سے کہی تھی تو سیدہ عائشہ رضی اللہ عنہا نے کہا: ”جاؤ ام سلمہ رضی اللہ عنہا سے معلوم کرو“۔ میں ان حضرات کے پاس واپس آیا اور ان کا جواب بتایا تو انہوں نے مجھے سیدہ ام سلمہ رضی اللہ عنہا کی خدمت میں بھیج دیا، اسی بات کے ساتھ جو انہوں نے مجھے سیدہ عائشہ رضی اللہ عنہا کے متعلق کہی تھی۔ سیدہ ام سلمہ رضی اللہ عنہا نے جواب دیا: ”میں نے اللہ کے رسول صلی اللہ علیہ وسلم کو سنا تھا کہ آپ ان سے (عصر کے بعد نماز سے) منع فرماتے تھے لیکن میں نے آپ صلی اللہ علیہ وسلم کو پڑھتے ہوئے پایا۔ (ایک دن) آپ صلی اللہ علیہ وسلم عصر کی نماز پڑھا کر تشریف لائے اور میرے ہاں انصار کے قبیلہ بنی حرام کی کچھ عورتیں بیٹھی تھیں، آپ صلی اللہ علیہ وسلم نے یہ رکعتیں پڑھیں تو میں نے خادمہ کو آپ صلی اللہ علیہ وسلم کے پاس بھیجا، میں نے اس سے کہا: ”جا کر آپ صلی اللہ علیہ وسلم کے پاس کھڑی ہو جانا اور کہنا کہ ام سلمہ پوچھتی ہیں کہ اے اللہ کے رسول! میں نے آپ کو سنا ہے کہ آپ ان سے منع فرماتے ہیں اور میں آپ صلی اللہ علیہ وسلم کو دیکھتی ہوں کہ آپ صلی اللہ علیہ وسلم انہیں پڑھ رہے ہیں؟ اگر آپ صلی اللہ علیہ وسلم اپنے ہاتھ سے اشارہ فرما دیں تو ان سے ذرا دور ہو جانا“۔ چنانچہ خادمہ نے ایسے ہی کیا تو آپ صلی اللہ علیہ وسلم نے اپنے ہاتھ سے اشارہ کیا تو وہ پیچھے ہٹ گئی۔ جب آپ صلی اللہ علیہ وسلم فارغ ہوئے تو فرمایا: ”اے دختر ابی امیہ! تو نے عصر کے بعد کی ان دو رکعتوں کے متعلق پوچھا ہے تو بات یہ ہے کہ میرے پاس قبیلہ عبدالقیس کے کچھ لوگ اپنی قوم کا اسلام لے کر آئے اور انہوں نے مجھے ظہر کے بعد کی رکعتوں سے مشغول کر دیا، تو یہ وہی دو رکعتیں ہیں“۔“ [سنن ابي داود/كتاب التطوع /حدیث: 1273]

سیدنا علی رضی اللہ عنہ سے روایت ہے کہ نبی کریم صلی اللہ علیہ وسلم نے ”عصر کے بعد نماز سے منع فرمایا ہے الا یہ کہ سورج اونچا ہو۔“ [سنن ابي داود/كتاب التطوع /حدیث: 1274]

سیدنا علی رضی اللہ عنہ سے مروی ہے کہ انہوں نے کہا: ”رسول اللہ صلی اللہ علیہ وسلم فجر اور عصر کے علاوہ ہر فرض نماز کے بعد دو رکعت پڑھا کرتے تھے۔“ [سنن ابي داود/كتاب التطوع /حدیث: 1275]

سیدنا ابن عباس رضی اللہ عنہ کہتے ہیں، مجھے کئی پسندیدہ لوگوں نے بتایا، ان میں سیدنا عمر بن خطاب رضی اللہ عنہ بھی ہیں بلکہ ان سب میں سیدنا عمر رضی اللہ عنہ سب سے بڑھ کر پسندیدہ ہیں، انہوں نے بتایا کہ نبی کریم صلی اللہ علیہ وسلم نے فرمایا: ”صبح کی نماز کے بعد کوئی نماز نہیں حتیٰ کہ سورج طلوع ہو جائے اور نماز عصر کے بعد کوئی نماز نہیں حتیٰ کہ سورج غروب ہو جائے۔“ [سنن ابي داود/كتاب التطوع /حدیث: 1276]

سیدنا عمرو بن عبسہ سلمی رضی اللہ عنہ بیان کرتے ہیں کہ میں نے کہا: ”اے اللہ کے رسول! رات کا کون سا حصہ زیادہ مقبول ہوتا ہے؟“ آپ صلی اللہ علیہ وسلم نے فرمایا: ”آخرِ رات کا درمیانی حصہ، سو جس قدر جی چاہے نماز پڑھو۔ بیشک نماز میں فرشتے حاضر ہوتے ہیں اور اس کا اجر لکھا جاتا ہے حتیٰ کہ فجر پڑھ لو۔ پھر رک جاؤ حتیٰ کہ سورج نکل آئے اور ایک یا دو نیزوں کے برابر اونچا آ جائے۔ بیشک یہ شیطان کے دو سینگوں کے درمیان طلوع ہوتا ہے اور اس وقت کفار اس کی عبادت کرتے ہیں۔ پھر نماز پڑھتے رہو، بیشک نماز میں فرشتے حاضر ہوتے اور اس کا اجر لکھا جاتا ہے حتیٰ کہ نیزے کا سایہ اس (نیزے) کے برابر ہو جائے (یعنی دوپہر ہو جائے اور کوئی زائد سایہ باقی نہ رہے) تو رک جاؤ۔ بیشک (اس وقت) جہنم بھڑکائی جاتی ہے اور اس کے دروازے کھول دیے جاتے ہیں۔ جب سورج ڈھل جائے تو جس قدر جی چاہے نماز پڑھو، بیشک نماز میں فرشتے حاضر ہوتے ہیں، حتیٰ کہ عصر پڑھ لو، پھر رک جاؤ حتیٰ کہ سورج غروب ہو جائے۔ بیشک یہ شیطان کے دو سینگوں کے مابین غروب ہوتا ہے اور (اس وقت) کفار اس کی عبادت کرتے ہیں۔“ اور لمبی حدیث بیان کی۔ عباس بن سالم نے کہا کہ ابو سلام رحمہ اللہ نے مجھے ابوامامہ رضی اللہ عنہ سے ایسے ہی بیان کیا ہے: ”الا یہ کہ مجھ سے کوئی نادانستہ بھول ہو گئی ہو تو اللہ سے استغفار اور توبہ کرتا ہوں۔“ [سنن ابي داود/كتاب التطوع /حدیث: 1277]

جناب یسار مولیٰ ابن عمر رحمہ اللہ کہتے ہیں کہ سیدنا ابن عمر رضی اللہ عنہما نے مجھے دیکھا کہ میں طلوع فجر کے بعد نماز پڑھ رہا تھا تو انہوں نے فرمایا: ”اے یسار! رسول اللہ صلی اللہ علیہ وسلم ہمارے پاس تشریف لائے اور ہم یہ نماز پڑھا کرتے تھے تو آپ صلی اللہ علیہ وسلم نے فرمایا: ”تمہارا حاضر (موجود) شخص اپنے غائب کو بتا دے کہ سوائے دو رکعتوں کے طلوع فجر کے بعد نماز نہ پڑھا کرو۔“” [سنن ابي داود/كتاب التطوع /حدیث: 1278]

اسود اور مسروق (دونوں) نے کہا کہ ”ہم سیدہ عائشہ رضی اللہ عنہا کی بابت گواہی دیتے ہیں کہ انہوں نے بیان کیا کہ کوئی دن ایسا نہ گزرتا تھا کہ نبی کریم صلی اللہ علیہ وسلم عصر کے بعد دو رکعتیں نہ پڑھتے ہوں۔“ یعنی (ہر روز بلا ناغہ پڑھا کرتے تھے۔) [سنن ابي داود/كتاب التطوع /حدیث: 1279]