سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: حقیقت سے آگاہی کے بغیر کوئی حلیم نہیں ہو سکتا اور تجربے کے بغیر کوئی حکیم نہیں ہو سکتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 7993]

عبداللہ بن ثعلبہ بیان کرتے ہین: وہ سیدنا عبدالرحمن بن کعب بن مالک کے پاس آئے، اس وقت وہ صرف تہبند باندھے ہوئے تھے، عبداللہ بن ثعلبہ نے گھر کی پچھلی جانب کا چکر لگایا، تو عبدالرحمن بن کعب بن مالک وہاں بیٹھے ہوئے تھے، آپ نابینا تھے، ان کو کوئی دوسرا شخص لے کر آتا تھا، میں نے ان کو سلام کیا۔ انہوں نے پوچھا: یہ کون ہے؟ میں نے کہا: عبداللہ بن ثعلبہ۔ انہوں نے کہا: بنی حارثہ کا بھائی؟ میں نے کہا: جی ہاں۔ انہوں نے کہا: اور جہینہ کا داماد؟ میں نے کہا: جی ہاں۔ انہوں نے کہا: تم نے اپنے والد کو رسول اللہ صلی اللہ علیہ وسلم کے حوالے سے کوئی حدیث بیان کرتے ہوئے سنا ہے؟ میں نے کہا: مجھے معلوم نہیں۔ انہوں نے کہا: میں نے تمہارے والد کو یہ بیان کرتے ہوئے سنا ہے کہ رسول اللہ صلی اللہ علیہ وسلم نے ارشاد فرمایا: جس نے جھوٹی قسم کھا کر کسی مسلمان کا مال ہتھیا لیا، اس کی وجہ سے اس کے دل پر ایک سیاہ نکتہ لگ جائے گا، جو کہ قیامت تک مٹ نہیں سکے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسنا د کے ہمراہ نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ نے اعمش اور منصور کی حدیث ابووائل کے واسطے سے عبداللہ سے انہی الفاظ کے ہمراہ نقل نہیں کی ہے۔ [المستدرك على الصحيحين/كتاب الأيمان والنذور/حدیث: 7994]

ابوخالد عیاض فرماتے ہیں: میں نے دو آدمیوں کو سیدنا معقل بن یسار کے پاس جھگڑتے ہوئے دیکھا۔ سیدنا معقل نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جس نے کسی کا مال ہتھیانے کے لیے جھوٹی قسم کھائی، وہ جب اللہ تعالیٰ کی بارگاہ میں پیش ہو گا تو اللہ تعالیٰ اس پر ناراض ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 7995]

سیدنا عمران بن حصین رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے جھوٹی قسم اٹھائی اس کو چاہیے کہ وہ اپنا ٹھکانہ جہنم بنا لے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا ہے۔ [المستدرك على الصحيحين/كتاب الأيمان والنذور/حدیث: 7996]

سیدنا حارث بن برصاء رضی اللہ عنہ فرماتے ہیں کہ رسول اللہ صلی اللہ علیہ وسلم اپنے حج کے موقع پر دو جمروں کے درمیان تھے، وہاں پر آپ صلی اللہ علیہ وسلم نے فرمایا: جس نے جھوٹی قسم کھا کر اپنے مسلمان بھائی کا مال ہتھیا لیا، وہ اپنا ٹھکانہ جہنم میں بنا لے۔ اور جو لوگ میری یہ بات سن رہے ہیں، ان کو چاہیے کہ وہ یہ بات ان لوگوں تک پہنچا دیں جو آج یہاں موجود نہیں ہیں۔ یہ بات حضور صلی اللہ علیہ وسلم نے دو یا تین مرتبہ کہی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 7997]

سیدنا جابر بن عتیک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے کسی مسلمان کا مال جھوٹی قسم کھا کر ہتھیا لیا، اللہ تعالیٰ اس پر جنت حرام کر دیتا ہے اور اس کو دوزخ میں داخل فرمائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 7998]

سیدنا اشعث بن قیس رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جو شخص جھوٹی قسم کھا کر کسی مسلمان کا مال ہتھیا لے گا، وہ اللہ تعالیٰ کی بارگاہ میں اس حال میں پیش کیا جائے گا کہ وہ کوہڑی ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس زیادتی کے ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 7999]

سیدنا اشعث بن قیس رضی اللہ عنہ فرماتے ہیں: ایک آدمی اپنا زمین کا ایک جھگڑا رسول اللہ صلی اللہ علیہ وسلم کی بارگاہ میں لے کر آیا، حضور صلی اللہ علیہ وسلم نے ان میں سے ایک فریق سے کہا کہ تم قسم کھاؤ، دوسرے نے کہا: یا رسول اللہ اگر یہ شخص قسم دے دے، تو میں اپنی زمین اس کو دے دوں گا۔ رسول اللہ صلی اللہ علیہ وسلم نے فرمایا: اس کو چھوڑ دو، (اور تم اس کو زمین ویسے ہی دے دو کیونکہ) جو شخص قسم کے ذریعے کسی مسلمان بھائی کا مال اس سے لیتا ہے۔ قیامت کے دن وہ اللہ تعالیٰ سے اس حال میں ملے گا کہ اللہ تعالیٰ اس پر بہت ناراض ہو گا۔ اللہ تعالیٰ اس کو معاف کر دے، یا اس کو سزا دے دے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 8000]

سیدنا ابوسلمہ رضی اللہ عنہ فرماتے ہیں: سعید بن زید اور اروی کی بیٹی کے درمیان کوئی جھگڑا تھا، مروان نے کہا: ان دونوں کے درمیان صلح کروا دو، ہم نے ان میں مذاکرات کرانے کی کوشش کی۔ اور ہم نے کہا: آدھا حق اس عورت کو دے دو، سعید بن زید نے کہا: تمہارا کیا خیال ہے کہ میں اس کے حق میں کچھ کمی کر دوں گا؟ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جس نے ایک بالشت زمین ناحق لی، اللہ تعالیٰ قیامت کے دن سات زمینیں طوق بنا کر اس کے گلے میں ڈال دے گا۔ اور جس نے قسم کھا کر کسی کا حق مارا، اس میں برکت نہیں ہو گی۔ اور جو شخص کسی قوم کی اجازت کے بغیر ان کا حکمران بن جائے، اس پر اللہ تعالیٰ کی، فرشتوں کی اور تمام لوگوں کی لعنت ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 8001]

سیدنا عبداللہ بن انیس جہنی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: سب سے بڑے کبیرہ گناہوں میں سے اللہ تعالیٰ کے ساتھ کسی کو شریک ٹھہرانا، ماں باپ کی نافرمانی کرنا، اور جھوٹی قسم اٹھانا ہے۔ جو شخص اللہ تعالیٰ کی سچی قسم اٹھائے اور اس میں مچھر کے پر کے برابر جھوٹ شامل کر دے، اللہ تعالیٰ اس کے دل پر ایک سیاہ نکتہ لگا دے گا، جو کہ قیامت تک ختم نہیں ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 8002]