سیدنا سوید بن قیس رضی اللہ عنہ کا بیان ہے کہ میں اور مخرفہ عبدی رضی اللہ عنہ بحرین کے علاقہ ہجر سے کپڑا لائے اور ہم اسے مکہ لے آئے، تو رسول اللہ صلی اللہ علیہ وسلم چلتے ہوئے ہمارے پاس تشریف لائے، آپ صلی اللہ علیہ وسلم نے ہم سے ایک پاجامے کا سودا کیا جو ہم نے آپ صلی اللہ علیہ وسلم کو بیچا اور وہاں ایک آدمی تھا جو مزدوری لے کر مال تولتا تھا، تو رسول اللہ صلی اللہ علیہ وسلم نے اس سے فرمایا: «زِنْ وَأَرْجِحْ» ”تولو اور جھکتا ہوا تولو۔“ [سنن ابي داود/كتاب البيوع /حدیث: 3336]

سیدنا ابوصفوان بن عمیرہ رضی اللہ عنہ کہتے ہیں کہ رسول اللہ صلی اللہ علیہ وسلم کے ہجرت کرنے سے پہلے میں مکہ میں آپ صلی اللہ علیہ وسلم کی خدمت میں حاضر ہوا اور یہ مذکورہ بالا حدیث بیان کی، مگر اس میں ”مزدوری پر مال تولنے“ کا بیان نہیں ہے۔ امام ابوداؤد رحمہ اللہ فرماتے ہیں: ”اس کو قیس نے (بھی) اسی طرح بیان کیا ہے جیسے کہ سفیان نے اور سفیان کا قول راجح ہے۔“ [سنن ابي داود/كتاب البيوع /حدیث: 3337]

ابن ابی رزمہ کہتے ہیں کہ میں نے اپنے والد سے سنا کہ ایک شخص نے شعبہ رحمہ اللہ سے کہا کہ سفیان رحمہ اللہ نے آپ کی مخالفت کی ہے، تو انہوں نے کہا: ”تو نے مجھے بہت پریشان کیا ہے، حالانکہ مجھے یحییٰ بن معین رحمہ اللہ کی یہ بات پہنچی ہے کہ جو بھی سفیان کی مخالفت کرے، تو بات سفیان کی راجح ہو گی۔“ [سنن ابي داود/كتاب البيوع /حدیث: 3338]

شعبہ رحمہ اللہ سے روایت ہے کہ ”سفیان مجھ سے زیادہ حافظ تھے۔“ [سنن ابي داود/كتاب البيوع /حدیث: 3339]

سیدنا ابن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”وزن اہل مکہ کا معتبر ہے اور مکیال (ناپنے کا پیمانہ) اہل مدینہ کا۔“ امام ابوداؤد رحمہ اللہ فرماتے ہیں: ”فریابی اور ابواحمد نے بھی سفیان سے ایسے ہی روایت کیا ہے، ابن دکین نے ان دونوں کے متن میں موافقت کی ہے (نہ کہ سند میں)، ابواحمد نے سیدنا ابن عمر رضی اللہ عنہ کی بجائے سیدنا ابن عباس رضی اللہ عنہ کا نام لیا ہے۔“ ولید بن مسلم نے حنظلہ سے روایت کی تو کہا: ”وزن اہل مدینہ کا معتبر ہے اور مکیال اہل مکہ کا۔“ امام ابوداؤد رحمہ اللہ کہتے ہیں: ”مالک بن دینار کی اس بارے میں حدیث جو بواسطہ عطاء نبی کریم صلی اللہ علیہ وسلم سے مروی ہے، اس کے متن میں اختلاف کیا گیا ہے۔“ [سنن ابي داود/كتاب البيوع /حدیث: 3340]

سیدنا سمرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں خطبہ دیا اور پوچھا: ”کیا بنی فلاں میں سے کوئی یہاں ہے؟“ مگر کسی نے جواب نہ دیا۔ آپ صلی اللہ علیہ وسلم نے دوبارہ پوچھا: ”کیا بنی فلاں میں سے کوئی یہاں ہے؟“ لیکن کسی نے جواب نہ دیا۔ آپ صلی اللہ علیہ وسلم نے سہ بارہ پوچھا: ”کیا بنی فلاں میں سے کوئی یہاں ہے؟“ تو ایک آدمی کھڑا ہوا اور اس نے کہا: ”میں ہوں اے اللہ کے رسول!“ آپ صلی اللہ علیہ وسلم نے فرمایا: ”تجھے کیا مانع ہوا تھا کہ پہلی اور دوسری بار جواب نہیں دیا تھا؟ بلاشبہ میں نے تمہارے لیے خیر ہی کا ارادہ کیا ہے۔ تمہارا ساتھی اپنے قرضے میں پکڑا ہوا ہے۔“ (سیدنا سمرہ رضی اللہ عنہ کہتے ہیں کہ) پھر میں نے اس شخص کو دیکھا کہ اس نے اس (مقروض) کی طرف سے سب ادا کر دیا حتیٰ کہ کوئی مطالبہ کرنے والا باقی نہ رہا۔ امام ابوداؤد رحمہ اللہ فرماتے ہیں کہ (شعبی کے شیخ کا نام) سمعان بن مشنج ہے۔ [سنن ابي داود/كتاب البيوع /حدیث: 3341]

سیدنا ابوموسیٰ اشعری رضی اللہ عنہ سے روایت ہے وہ کہتے ہیں کہ رسول اللہ صلی اللہ علیہ وسلم نے فرمایا: ”اللہ کے نزدیک اس کے منع کردہ کبائر کے بعد سب سے بڑا گناہ یہ ہے کہ بندے پر جب موت آئے تو وہ مقروض ہو اور اس نے ادائیگی کے لیے کچھ نہ چھوڑا ہو۔“ [سنن ابي داود/كتاب البيوع /حدیث: 3342]

سیدنا جابر رضی اللہ عنہ بیان کرتے ہیں کہ رسول اللہ صلی اللہ علیہ وسلم کسی ایسے آدمی کا جنازہ نہ پڑھایا کرتے تھے جس پر قرضہ باقی ہوتا، ایک میت کو لایا گیا تو آپ صلی اللہ علیہ وسلم نے پوچھا: ”کیا اس پر قرضہ ہے؟“ صحابہ نے کہا: ”ہاں، دو دینار ہے۔“ آپ صلی اللہ علیہ وسلم نے فرمایا: ”تم لوگ اپنے ساتھی کا جنازہ پڑھ لو۔“ پھر سیدنا ابوقتادہ انصاری رضی اللہ عنہ نے کہا: ”اے اللہ کے رسول! وہ میرے ذمے ہے“، تو رسول اللہ صلی اللہ علیہ وسلم نے اس کا جنازہ پڑھایا۔ پھر جب اللہ نے اپنے رسول کے لیے فتوحات کا دروازہ کھول دیا تو آپ صلی اللہ علیہ وسلم نے فرمایا: ”میں ہر مومن کے لیے اس کی جان سے قریب تر ہوں۔ سو جس نے کوئی قرضہ چھوڑا اس کی ادائیگی میرے ذمے ہے اور جس نے کوئی مال چھوڑا ہو تو وہ اس کے وارثوں کا ہے۔“ [سنن ابي داود/كتاب البيوع /حدیث: 3343]

سیدنا ابن عباس رضی اللہ عنہما نے نبی کریم صلی اللہ علیہ وسلم سے اس حدیث کی مثل روایت کیا۔ [سنن ابي داود/كتاب البيوع /حدیث: 3344]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”غنی آدمی کا قرضے کی ادائیگی کو ٹالنا ظلم ہے، اور جب تم میں سے کسی کو کسی غنی کے حوالے کیا جائے تو اسے چاہیے کہ وہ اس بات کو مان لے۔“ [سنن ابي داود/كتاب البيوع /حدیث: 3345]