سیدنا سمرہ رضی اللہ عنہ سے روایت ہے کہ نبی کریم صلی اللہ علیہ وسلم نے منع فرمایا ہے کہ ”جانور کو جانور کے بدلے ادھار بیچا جائے۔“ [سنن ابي داود/كتاب البيوع /حدیث: 3356]

سیدنا عبداللہ بن عمرو رضی اللہ عنہما سے روایت ہے کہ ”رسول اللہ صلی اللہ علیہ وسلم نے انہیں حکم دیا کہ لشکر کی تیاری کریں مگر اونٹ ختم ہو گئے، تو آپ صلی اللہ علیہ وسلم نے ان کو حکم دیا کہ صدقہ کی اونٹنیاں آنے تک ادھار لے لیں۔ چنانچہ وہ صدقہ کے آنے تک دو دو اونٹوں کے بدلے ایک ایک اونٹ حاصل کر لیا کرتے تھے۔“ [سنن ابي داود/كتاب البيوع /حدیث: 3357]

سیدنا جابر رضی اللہ عنہ نے بیان کیا کہ نبی کریم صلی اللہ علیہ وسلم نے ”دو غلاموں کے بدلے ایک غلام خرید فرمایا۔“ [سنن ابي داود/كتاب البيوع /حدیث: 3358]

جناب زید ابوعیاش نے سیدنا سعد بن ابی وقاص رضی اللہ عنہ سے سوال کیا کہ ”سفید گندم کو «السُّلْت» (جَو کی ایک قسم) کے بدلے بیچنا کیسا ہے؟“ سیدنا سعد رضی اللہ عنہ نے پوچھا: ”ان میں سے افضل کون سا ہے؟“ انہوں نے کہا کہ ”سفید گندم۔“ تو انہوں نے اس سے منع کر دیا اور فرمایا: ”میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم سے پوچھا گیا کہ خشک کھجور کو تازہ کھجور کے بدلے بیچنا کیسا ہے؟ تو رسول اللہ صلی اللہ علیہ وسلم نے فرمایا: ”کیا بھلا تازہ کھجور خشک ہونے پر کم ہو جاتی ہے؟“ صحابہ نے کہا: ”ہاں۔“ تو رسول اللہ صلی اللہ علیہ وسلم نے اس سے منع فرما دیا۔“ امام ابوداؤد رحمہ اللہ فرماتے ہیں کہ ”اس حدیث کو اسماعیل بن امیہ نے مالک کی مانند روایت کیا۔“ [سنن ابي داود/كتاب البيوع /حدیث: 3359]

سیدنا سعد بن ابی وقاص رضی اللہ عنہ نے بیان کیا کہ ”رسول اللہ صلی اللہ علیہ وسلم نے تازہ کھجور خشک کھجور کے بدلے ادھار بیچنے سے منع فرمایا ہے۔“ امام ابوداؤد رحمہ اللہ فرماتے ہیں کہ ”اس روایت کو عمران بن ابی انس نے بنو مخزوم کے ایک مولیٰ کے واسطے سے سیدنا سعد رضی اللہ عنہ سے اور انہوں نے نبی کریم صلی اللہ علیہ وسلم سے اس کی مانند روایت کیا ہے۔“ [سنن ابي داود/كتاب البيوع /حدیث: 3360]

سیدنا ابن عمر رضی اللہ عنہما سے روایت ہے کہ نبی کریم صلی اللہ علیہ وسلم نے ”درخت پر لگے کھجور کے پھل کو (خشک) کھجور کے بدلے بیچنے سے منع فرمایا ہے جبکہ خشک کی مقدار معلوم ہو۔ اور اسی طرح انگوروں کو کشمش کے بدلے بیچنا جبکہ کشمش کی مقدار معلوم ہو، اور کھیتی کی بیع خشک گندم کے بدلے جبکہ اس کی مقدار معلوم ہو۔ (ممنوع ہے)۔“ [سنن ابي داود/كتاب البيوع /حدیث: 3361]

جناب خارجہ بن زید بن ثابت اپنے والد (زید بن ثابت رضی اللہ عنہ) سے روایت کرتے ہیں کہ ”نبی کریم صلی اللہ علیہ وسلم نے «العَرَايَا» ”عرایا“ کی رخصت عنایت فرمائی، یعنی انسان خشک کھجور کا تازہ سے تبادلہ کر لے۔“ [سنن ابي داود/كتاب البيوع /حدیث: 3362]

سیدنا سہل بن ابی حثمہ رضی اللہ عنہ سے روایت ہے کہ نبی کریم صلی اللہ علیہ وسلم نے ”تازہ کھجور کی خشک کھجور کے ساتھ بیع سے منع فرمایا ہے، لیکن «الْعَرَايَا» کی رخصت دی ہے کہ انسان تازہ کھجور کا اندازہ کر کے (خشک کے بدلے خرید لے) تاکہ وہ لوگ تازہ کھجور کھا سکیں“۔ [سنن ابي داود/كتاب البيوع /حدیث: 3363]

سیدنا ابوہریرہ رضی اللہ عنہ نے روایت کیا کہ رسول اللہ صلی اللہ علیہ وسلم نے ”بیعِ عرایا میں پانچ وسق سے کم یا پانچ وسق کی اجازت دی ہے۔“ یہ شک داؤد بن حصین کو ہوا ہے۔ امام ابوداؤد رحمہ اللہ فرماتے ہیں کہ سیدنا جابر رضی اللہ عنہ کی حدیث میں ”چار وسق تک“ کا بیان آیا ہے۔ [سنن ابي داود/كتاب البيوع /حدیث: 3364]

جناب عبدربہ بن سعید انصاری رحمہ اللہ نے بیان کیا کہ «الْعَرَايَا» ”یہ ہے کہ انسان کسی کو کھجور کا کوئی درخت دے دے یا باغ فروخت کرے تو اس میں سے ایک دو درخت مستثنیٰ کر لے تاکہ تازہ پھل کھا سکے، لیکن پھر اسے خشک کھجور کے بدلے بیچ دے۔“ [سنن ابي داود/كتاب البيوع /حدیث: 3365]