سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے منع فرمایا ہے کہ ”مشکیزے کے منہ سے منہ لگا کر پیا جائے اور گندگی کھانے والے جانور پر سواری کی جائے اور ایسا جانور کھایا جائے جس کو باندھ کر نشانہ مارا گیا ہو۔“ امام ابوداؤد رحمہ اللہ فرماتے ہیں: ” «الْجَلَّالَةُ» اس جانور کو کہتے ہیں جو پاخانہ کھاتا ہو۔ (یعنی جس کی یہ عادت ہو)۔“ [سنن ابي داود/كتاب الأشربة /حدیث: 3719]

سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے اس بات سے منع فرمایا ہے کہ ”مشکیزوں کا منہ الٹ کر ان سے پیا جائے۔“ [سنن ابي داود/كتاب الأشربة /حدیث: 3720]

عیسیٰ بن عبداللہ انصاری اپنے والد رضی اللہ عنہ سے روایت کرتے ہیں کہ اُحد کے دن نبی کریم صلی اللہ علیہ وسلم نے مشکیزہ منگوایا پھر فرمایا: ”اس کا منہ الٹاؤ۔“ پھر آپ صلی اللہ علیہ وسلم نے اس کے منہ سے (منہ لگا کر پانی) پیا۔ [سنن ابي داود/كتاب الأشربة /حدیث: 3721]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے منع فرمایا ہے کہ ”پیالے کی ٹوٹی ہوئی جگہ سے پیا جائے یا مشروب میں پھونک ماری جائے۔“ احمد بن حزم بیان کرتے ہیں کہ ہمیں ابوسعید بن اعرابی نے بیان کیا کہ ”مجھے امام ابوداؤد رحمہ اللہ سے قرۃ بن عبدالرحمٰن بن حیوئیل «كَاسِرُ الْمُدِّ» کی بابت یہ خبر پہنچی ہے کہ انہیں (کاسر المد) ”مد توڑنے والا“ اس لیے کہتے ہیں کہ ایک دفعہ انہوں نے بادشاہ کے دربار میں مد توڑ دیا تھا، تو اسی وجہ سے انہیں اسی نام سے پکارا جانے لگا۔“ [سنن ابي داود/كتاب الأشربة /حدیث: 3722]

جناب ابن ابی لیلیٰ نے بیان کیا کہ سیدنا حذیفہ رضی اللہ عنہ مدائن میں تھے، انہوں نے پانی طلب کیا تو ایک دہقان چاندی کے برتن میں پانی لے آیا، تو انہوں نے اسے پھینک مارا اور پھر کہا: ”میں نے اسے بلاوجہ نہیں پھینکا بلکہ میں اس کو اس سے پہلے منع کر چکا ہوں، مگر یہ باز نہیں آیا۔ اور تحقیق رسول اللہ صلی اللہ علیہ وسلم نے «الْحَرِيرِ» ”حریر“ اور «الدِّيبَاجِ» ”دیباج“ سے منع فرمایا ہے (حریر عام ریشم اور دیباج باریک ریشم کو کہتے ہیں) اور سونے چاندی کے برتنوں میں پینے سے روکا ہے اور فرمایا ہے: ”یہ چیزیں ان کے لیے دنیا میں ہیں اور تمہارے لیے آخرت میں۔“” [سنن ابي داود/كتاب الأشربة /حدیث: 3723]

سیدنا جابر بن عبداللہ رضی اللہ عنہ سے روایت ہے کہ نبی کریم صلی اللہ علیہ وسلم اپنے ایک صحابی کے ساتھ ایک انصاری کے ہاں تشریف لے گئے جب کہ وہ اپنے باغ میں پانی لگا رہا تھا۔ تو رسول اللہ صلی اللہ علیہ وسلم نے فرمایا: ”اگر تمہارے پاس ایسا پانی ہے جو رات بھر مشکیزے میں ہو (تو لے آؤ) ورنہ ہم کنوئیں کے حوض میں جمع شدہ پانی ہی منہ لگا کر پی لیتے ہیں۔“ اس نے کہا: ”ہاں، میرے پاس مشکیزے میں رات کا پانی موجود ہے۔“ [سنن ابي داود/كتاب الأشربة /حدیث: 3724]

سیدنا عبداللہ بن ابی اوفی رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”قوم کو پلانے والا سب سے آخر میں پیے۔“ [سنن ابي داود/كتاب الأشربة /حدیث: 3725]

سیدنا انس بن مالک رضی اللہ عنہ کا بیان ہے کہ نبی کریم صلی اللہ علیہ وسلم کو دودھ پیش کیا گیا جس میں پانی ملایا گیا تھا۔ اور آپ صلی اللہ علیہ وسلم کی دائیں جانب ایک دیہاتی تھا اور بائیں جانب ابوبکر رضی اللہ عنہ تھے۔ آپ صلی اللہ علیہ وسلم نے دودھ پیا، پھر اس دیہاتی کو دے دیا اور فرمایا: «الْأَيْمَنَ فَالْأَيْمَنَ» ”داہنے والا، پھر داہنے والا۔“ [سنن ابي داود/كتاب الأشربة /حدیث: 3726]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم جب پیتے تو تین سانس لیتے اور فرماتے: ”یہ (انداز) پیاس خوب بجھاتا ہے، ہضم کو قوت دیتا ہے اور تندرستی کا باعث ہے۔“ [سنن ابي داود/كتاب الأشربة /حدیث: 3727]

سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ”برتن میں سانس لینے یا اس میں پھونک مارنے سے منع فرمایا ہے۔“ [سنن ابي داود/كتاب الأشربة /حدیث: 3728]