حضرت عمار بن یاسر رضی اللہ عنہ سے روایت ہے، انہوں نے فرمایا: ”حضرت عائشہ رضی اللہ عنہا کا ہار گر پڑا، وہ اس کی تلاش میں پیچھے رہ گئیں (اس وجہ سے قافلہ بھی رک گیا)۔ حضرت ابوبکر رضی اللہ عنہ حضرت عائشہ رضی اللہ عنہا کے پاس گئے اور لوگوں کے رکنے کے باعث بن جانے پر ان پر ناراضی کا اظہار فرمایا۔ (چونکہ اس مقام پر وضو کے لیے پانی موجود نہیں تھا) چنانچہ اللہ تعالیٰ نے تیمم کی اجازت نازل فرما دی۔ (صحابی فرماتے ہیں) اس دن ہم نے کندھوں تک مسح کیا۔ (اس کے بعد) حضرت ابوبکر رضی اللہ عنہ حضرت عائشہ رضی اللہ عنہا کے پاس گئے اور کہا: ”مجھے معلوم نہ تھا کہ تم اس قدر باعثِ برکت ہو۔““ [سنن ابن ماجه/أبواب التيمم/حدیث: 565]

حضرت عمار بن یاسر رضی اللہ عنہ سے روایت ہے، انہوں نے فرمایا: ”ہم نے رسول اللہ صلی اللہ علیہ وسلم کے ساتھ کندھوں تک تیمم کیا۔“ [سنن ابن ماجه/أبواب التيمم/حدیث: 566]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میرے لیے زمین مسجد اور پاکیزگی حاصل کرنے کا ذریعہ بنا دی گئی ہے۔“ [سنن ابن ماجه/أبواب التيمم/حدیث: 567]

حضرت عائشہ رضی اللہ عنہا سے روایت ہے کہ انہوں نے حضرت اسماء رضی اللہ عنہا سے ایک ہار عاریتاً لیا (سفر کے دوران میں ایک مقام پر) وہ گم ہو گیا۔ نبی صلی اللہ علیہ وسلم نے چند افراد اس کو تلاش کرنے کے لیے بھیجے۔ (اس دوران میں) نماز کا وقت ہو گیا تو ان افراد نے وضو کیے بغیر نماز پڑھ لی (کیوں کہ ان کے پاس پانی نہیں تھا)۔ جب وہ (ہار تلاش کر کے) نبی صلی اللہ علیہ وسلم کی خدمت میں حاضر ہوئے تو انہوں نے اس چیز کی شکایت کی۔ تب تیمم کی آیت نازل ہو گئی۔ حضرت اسید بن حضیر رضی اللہ عنہ نے فرمایا: ”اللہ تعالیٰ آپ کو جزائے خیر عطا فرمائے! آپ پر جب بھی کوئی مشکل آئی، اللہ تعالیٰ نے آپ کو تو اس (مشکل) سے نجات دے دی اور اس میں مسلمانوں کے لیے کوئی برکت عنایت فرما دی۔“ [سنن ابن ماجه/أبواب التيمم/حدیث: 568]

حضرت عبدالرحمن بن ابزیٰ رضی اللہ عنہ سے روایت ہے کہ ایک آدمی حضرت عمر بن خطاب رضی اللہ عنہ کی خدمت میں حاضر ہوا اور کہا: ”اگر مجھے جنابت کی حالت پیش آ جائے اور پانی نہ ملے (تو کیا کروں؟)“ حضرت عمر رضی اللہ عنہ نے فرمایا: ”نماز نہ پڑھ (جب پانی ملے گا تو غسل کر کے قضا نماز پڑھنا۔)“ حضرت عمار بن یاسر رضی اللہ عنہ نے کہا: ”امیر المؤمنین! کیا آپ کو یاد نہیں جب میں اور آپ دونوں ایک لشکر میں تھے؟ ہمیں غسل کی حاجت پیش آئی اور پانی نہ ملا (اس وقت بھی) آپ نے تو نماز نہیں پڑھی تھی، میں نے زمین پر لوٹ پوٹ ہو کر نماز پڑھ لی تھی۔ پھر جب میں نبی صلی اللہ علیہ وسلم کی خدمت میں حاضر ہوا تو یہ واقعہ عرض کیا، چنانچہ آپ صلی اللہ علیہ وسلم نے فرمایا: ”تجھے تو اتنا ہی کافی تھا۔“ اور (یہ کہہ کر) نبی صلی اللہ علیہ وسلم نے دونوں ہاتھ زمین پر مارے، پھر ان میں پھونک ماری اور چہرے اور دونوں ہتھیلیوں پر مسح کیا۔“ [سنن ابن ماجه/أبواب التيمم/حدیث: 569]

جناب حکم رحمہ اللہ اور سلمہ بن کہیل رحمہ اللہ سے روایت ہے کہ انہوں نے حضرت عبداللہ بن ابو اوفی رضی اللہ عنہ سے تیمم کا مسئلہ دریافت کیا، تو انہوں نے فرمایا: ”نبی صلی اللہ علیہ وسلم نے حضرت عمار رضی اللہ عنہ کو اس طرح کرنے کا حکم دیا تھا۔“ یہ کہہ کر انہوں نے اپنے دونوں ہاتھ زمین پر مارے، پھر انہیں جھاڑا اور انہیں اپنے چہرے پر پھیر لیا۔ [سنن ابن ماجه/أبواب التيمم/حدیث: 570]

حضرت عمار بن یاسر رضی اللہ عنہ سے روایت ہے کہ ”انہوں نے جب رسول اللہ صلی اللہ علیہ وسلم کے ہمراہ تیمم کیا تو آپ صلی اللہ علیہ وسلم نے مسلمانوں کو حکم دیا، تو انہوں نے مٹی پر ہاتھ مارے اور ہاتھ میں مٹی نہیں پکڑی، پھر ایک بار چہرے پر ہاتھ پھیر لیے، پھر دوبارہ زمین پر ہاتھ مارے اور ہاتھوں پر مسح کیا۔“ [سنن ابن ماجه/أبواب التيمم/حدیث: 571]

حضرت عبداللہ بن عباس رضی اللہ عنہ سے روایت ہے کہ رسول اللہ صلی اللہ علیہ وسلم کے زمانے میں ایک آدمی کا سر زخمی ہوگیا، اس کے بعد (ایک دن) اسے احتلام ہوگیا۔ (اس نے صحابہ کرام رضی اللہ عنہم سے مسئلہ پوچھا) تو اسے نہانے کا حکم دیا گیا۔ اس نے غسل کیا تو (سردی کی شدت کی وجہ سے) بیمار ہوگیا اور (اسی بیماری سے) فوت ہوگیا۔ نبی صلی اللہ علیہ وسلم کو اس واقعہ کی اطلاع ہوئی تو فرمایا: ”انہوں نے اسے قتل کر دیا، اللہ انہیں ہلاک کرے۔ کیا پوچھ لینا لاعلمی کا علاج نہیں؟“ حضرت عطاء رحمہ اللہ نے فرمایا: ہمیں روایت پہنچی ہے کہ رسول اللہ صلی اللہ علیہ وسلم نے فرمایا تھا: ”کاش وہ باقی جسم دھو لیتا اور سر کو رہنے دیتا جہاں اسے زخم تھا۔“ [سنن ابن ماجه/أبواب التيمم/حدیث: 572]

ام المومنین میمونہ رضی اللہ عنہا سے روایت ہے، انہوں نے فرمایا: ”میں نے نبی صلی اللہ علیہ وسلم کے لیے غسل کا پانی رکھا تو آپ نے غسل جنابت کیا، (پہلے) بائیں ہاتھ سے برتن کو جھکا کر دائیں ہاتھ پر پانی ڈالا اور تین بار اپنے دونوں ہاتھ دھوئے، پھر اپنی شرم گاہ پر پانی ڈالا (اور استنجا کیا)، پھر زمین پر ہاتھ رگڑا (اور صاف کر لیا)، پھر کلی کی اور ناک میں پانی ڈالا، تین بار چہرہٴ مبارک دھویا اور تین بار بازو دھوئے، پھر باقی جسم پر پانی بہا لیا، پھر ایک طرف ہو کر دونوں پاؤں دھو لیے۔“ [سنن ابن ماجه/أبواب التيمم/حدیث: 573]

حضرت جمیع بن عمیر تیمی رحمہ اللہ سے روایت ہے، انہوں نے فرمایا: ”میں اپنی پھوپھی جان اور خالہ جان کے ہمراہ گیا، ہم حضرت عائشہ رضی اللہ عنہا کی خدمت میں حاضر ہوئے اور ان سے پوچھا: ”رسول اللہ صلی اللہ علیہ وسلم غسلِ جنابت کے موقع پر کیا طریقہ اختیار کرتے تھے؟“ انہوں نے فرمایا: ”آپ صلی اللہ علیہ وسلم تین بار ہاتھوں پر پانی ڈالتے تھے، اس کے بعد پانی کے برتن میں ہاتھ ڈالتے، پھر تین بار اپنا سر مبارک دھوتے، پھر اپنے جسم مبارک پر پانی بہاتے۔ اس کے بعد نماز کے لیے تشریف لے جاتے۔ لیکن ہم بال گندھے ہوئے ہونے کی وجہ سے پانچ بار سر دھوتی ہیں۔““ [سنن ابن ماجه/أبواب التيمم/حدیث: 574]