ہشام بن زہرہ کے آزاد کردہ غلام حضرت ابو سائب رضی اللہ عنہ سے روایت ہے، انہوں نے حضرت ابو ہریرہ رضی اللہ عنہ سے سنا کہ اللہ کے رسول صلی اللہ علیہ وسلم نے فرمایا: ”جب کوئی شخص جنبی ہو تو ٹھہرے ہوئے پانی میں غسل نہ کرے۔“ ابو سائب رضی اللہ عنہ نے کہا: ”اے ابو ہریرہ! پھر وہ کیا کرے؟“ حضرت ابو ہریرہ رضی اللہ عنہ نے فرمایا: ”کسی چیز میں پانی لے کر غسل کر لے۔“ [سنن ابن ماجه/أبواب التيمم/حدیث: 605]

حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم ایک انصاری صحابی کے پاس گئے اور اسے بلوایا۔ وہ (گھر سے) نکلا تو اس کے سر سے پانی کے قطرے ٹپک رہے تھے۔ چنانچہ آپ صلی اللہ علیہ وسلم نے فرمایا: ”شاید ہم نے تجھے جلدی میں ڈال دیا؟“ اس نے کہا: ”جی ہاں، اے اللہ کے رسول!“ آپ نے فرمایا: ”جب تجھے (کسی وجہ سے) جلدی پڑ جائے (اور تجھے فارغ ہونے سے پہلے پیچھے ہٹنا پڑے) یا تجھے انزال نہ ہو تو تجھ پر غسل فرض نہیں، صرف وضو کرنا ضروری ہے۔“ [سنن ابن ماجه/أبواب التيمم/حدیث: 606]

حضرت ابو ایوب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: «الْمَاءُ مِنَ الْمَاءِ» ”پانی (کا استعمال) پانی (کے خروج) سے واجب ہوتا ہے۔“ [سنن ابن ماجه/أبواب التيمم/حدیث: 607]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے، انہوں نے فرمایا: ”جب (مرد اور عورت کے) ختنے (شرمگاہیں) باہم مل جائیں، تو غسل واجب ہو جاتا ہے۔ میں نے اور رسول اللہ صلی اللہ علیہ وسلم نے یہ عمل کیا تو ہم نے غسل کیا۔“ [سنن ابن ماجه/أبواب التيمم/حدیث: 608]

حضرت ابی بن کعب رضی اللہ عنہ سے روایت ہے، انہوں نے فرمایا: ”اسلام کے ابتدائی دور میں رخصت تھی (کہ جماع کی صورت میں جب تک انزال نہ ہو، غسل واجب نہیں ہوتا تھا۔) بعد میں ہمیں غسل کرنے کا حکم دے دیا گیا۔“ [سنن ابن ماجه/أبواب التيمم/حدیث: 609]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب مرد عورت کی چار شاخوں کے درمیان بیٹھے، پھر کوشش کرے تو غسل واجب ہو گیا۔“ [سنن ابن ماجه/أبواب التيمم/حدیث: 610]

حضرت عبداللہ بن عمرو رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب ختنے باہم مل جائیں اور سپاری چھپ جائے تو غسل واجب ہو جاتا ہے۔“ [سنن ابن ماجه/أبواب التيمم/حدیث: 611]

حضرت عائشہ رضی اللہ عنہا سے روایت ہے، نبی صلی اللہ علیہ وسلم نے فرمایا: ”جب کوئی شخص نیند سے بیدار ہو اور اسے (جسم یا کپڑوں پر) گیلا پن (مادہ منویہ) نظر آئے اور اسے خواب یاد نہ ہو، وہ غسل کرے اور اگر اسے محسوس ہو کہ اس نے خواب (میں غسل واجب کرنے والا عمل) دیکھا ہے اور (بیدار ہونے پر) گیلا پن نظر نہ آئے تو اس پر کوئی غسل نہیں ہے۔“ [سنن ابن ماجه/أبواب التيمم/حدیث: 612]

حضرت ابوسمح رضی اللہ عنہ سے روایت ہے، انہوں نے بیان کیا کہ میں نبی صلی اللہ علیہ وسلم کی خدمت کیا کرتا تھا۔ آپ صلی اللہ علیہ وسلم جب غسل کرنا چاہتے تو فرماتے: ”مجھ سے رخ پھیر لو۔“ میں آپ صلی اللہ علیہ وسلم کی طرف پیٹھ کر لیتا اور کپڑا پھیلا کر آپ صلی اللہ علیہ وسلم کا پردہ کر دیتا۔ [سنن ابن ماجه/أبواب التيمم/حدیث: 613]

جناب عبداللہ بن نوفل سے روایت ہے، انہوں نے کہا: ”میں نے (صحابہ کرام سے) سوال کیا کہ رسول اللہ صلی اللہ علیہ وسلم نے سفر میں نفل پڑھے ہیں؟ کوئی شخص مجھے (یہ مسئلہ) بتانے والا نہ ملا۔ آخر مجھے ام ہانی بنت ابو طالب رضی اللہ عنہا نے بتایا کہ رسول اللہ صلی اللہ علیہ وسلم فتح مکہ کے سال (مکہ مکرمہ) تشریف لائے۔ آپ صلی اللہ علیہ وسلم نے حکم دیا تو آپ صلی اللہ علیہ وسلم پر پردہ کیا گیا، چنانچہ آپ صلی اللہ علیہ وسلم نے غسل کیا پھر آٹھ رکعت نفل ادا کیے۔“ [سنن ابن ماجه/أبواب التيمم/حدیث: 614]