حضرت ابوطفیل عامر بن واثلہ رضی اللہ عنہ سے روایت ہے، انہوں نے نبی صلی اللہ علیہ وسلم کو دیکھا کہ ”چھڑی کے ساتھ حجرِ اسود کا استلام کرتے اور چھڑی کو بوسہ دیتے تھے۔“ [سنن ابن ماجه/كتاب المناسك/حدیث: 2949]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم ”جب پہلی بار بیت اللہ کا طواف کرتے تو تین چکروں میں «الرَّمَلُ» ”رمل“ کرتے اور چار چکروں میں (عام رفتار سے) چلتے، حجر سے حجر تک۔“ (نافع نے فرمایا) ”حضرت عمر رضی اللہ عنہ بھی اسی طرح کرتے تھے۔“ [سنن ابن ماجه/كتاب المناسك/حدیث: 2950]

حضرت جابر رضی اللہ عنہ سے روایت ہے کہ نبی صلی اللہ علیہ وسلم نے ”تین چکروں میں حجر سے حجر تک رمل کیا اور چار چکروں میں (عام رفتار سے) چلے۔“ [سنن ابن ماجه/كتاب المناسك/حدیث: 2951]

حضرت عمر رضی اللہ عنہ سے روایت ہے، انہوں نے فرمایا: ”اب «الرَّمَلُ» (رمل) کا کیا فائدہ ہے جبکہ اللہ تعالیٰ نے اسلام کو مستحکم کر دیا ہے اور کفر و اہل کفر کو ملک (عرب) سے نکال دیا ہے؟ اور قسم ہے اس اللہ کی! ہم وہ کام نہیں چھوڑیں گے جو رسول اللہ صلی اللہ علیہ وسلم کے زمانے میں کیا کرتے تھے۔“ [سنن ابن ماجه/كتاب المناسك/حدیث: 2952]

حضرت عبداللہ بن عباس رضی اللہ عنہما سے روایت ہے کہ صلح حدیبیہ کے بعد جب عمرہ کے موقع پر صحابہ رضی اللہ عنہم نے مکہ مکرمہ میں داخل ہونے کا ارادہ کیا تو نبی صلی اللہ علیہ وسلم نے ان سے فرمایا: ”کل تمہاری قوم کے لوگ تمہیں دیکھیں گے، لہٰذا ضروری ہے کہ تم انھیں مضبوط نظر آؤ۔“ چنانچہ جب صحابہ کرام رضی اللہ عنہم مسجد حرام میں داخل ہوئے تو انہوں نے حجر اسود کو بوسہ دیا اور رمل کیا، نبی صلی اللہ علیہ وسلم بھی ان کے ساتھ تھے۔ جب وہ حضرات رکن یمانی پر پہنچے تو حجر اسود تک (عام چال سے) چل کر گئے۔ پھر رمل کیا حتیٰ کہ رکن یمانی تک پہنچ گئے۔ پھر حجر اسود تک چل کر گئے۔ نبی صلی اللہ علیہ وسلم نے بھی تین بار اسی طرح (رمل) کیا، پھر چار بار (دوڑے بغیر) چل کر طواف کیا۔ [سنن ابن ماجه/كتاب المناسك/حدیث: 2953]

حضرت یعلیٰ بن امیہ رضی اللہ عنہ سے روایت ہے کہ نبی صلی اللہ علیہ وسلم نے ”اضطباع کی حالت میں طواف کیا۔“ (راویِ حدیث) قبیصہ نے کہا: ”آپ صلی اللہ علیہ وسلم نے ایک چادر اوڑھی ہوئی تھی۔“ [سنن ابن ماجه/كتاب المناسك/حدیث: 2954]

حضرت عائشہ رضی اللہ عنہا سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے حجر (حطیم) کے بارے میں سوال کیا تو آپ صلی اللہ علیہ وسلم نے فرمایا: ”وہ بھی کعبہ میں شامل ہے۔“ میں نے کہا: ”پھر انہوں نے کس رکاوٹ کی وجہ سے اسے کعبہ (کی عمارت) میں شامل نہیں کیا؟“ آپ صلی اللہ علیہ وسلم نے فرمایا: ”ان کے پاس (حلال مال سے) خرچ ختم ہو گیا تھا۔“ میں نے کہا: ”اس کا دروازہ بلند کیوں ہے کہ سیڑھی کے بغیر چڑھا نہیں جا سکتا؟“ آپ صلی اللہ علیہ وسلم نے فرمایا: ”یہ تیری قوم کا کام ہے (ان کا مقصد تھا) کہ جسے چاہیں روک دیں۔ اگر تیری قوم کا کفر کا زمانہ قریب نہ ہوتا اور یہ خوف نہ ہوتا کہ ان کے دل متنفر ہو جائیں گے تو میں غور کرتا کہ آیا اسے تبدیل کر کے اس کا حصہ بھی اس میں شامل کر دوں جو کم کر دیا گیا ہے، اور میں اس کا دروازہ زمین پر (سطح کے برابر) بناتا۔““ [سنن ابن ماجه/كتاب المناسك/حدیث: 2955]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے یہ فرمان سنا: ”جو شخص بیت اللہ کا طواف کرے اور دو رکعت نماز پڑھے، (اس کا) یہ (عمل) ایک انسان آزاد کرنے کی طرح ہے۔“” [سنن ابن ماجه/كتاب المناسك/حدیث: 2956]

حضرت حمید بن ابو سویہ رحمہ اللہ سے روایت ہے، انہوں نے کہا: ”میں نے ابن ہشام رحمہ اللہ کو سنا کہ وہ حضرت عطاء بن ابی رباح رحمہ اللہ سے رکن یمانی کے بارے میں سوال کر رہے تھے جبکہ وہ بیت اللہ کا طواف کر رہے تھے۔“ حضرت عطاء رحمہ اللہ نے کہا: ”مجھے حضرت ابو ہریرہ رضی اللہ عنہ نے حدیث سنائی کہ نبی صلی اللہ علیہ وسلم نے فرمایا: ”اس پر ستر فرشتے مقرر ہیں، جو شخص یہ دعا پڑھتا ہے فرشتے (اس کی دعا پر) آمین کہتے ہیں (دعا یہ ہے): «اللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي الدُّنْيَا وَالْآخِرَةِ» ”اے اللہ! میں تجھ سے دنیا اور آخرت میں معافی اور عافیت کا سوال کرتا ہوں۔“ ﴿رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ﴾ [سورة البقرة: 201] ”اے ہمارے رب! ہمیں دنیا میں بھلائی عطا فرما اور آخرت میں بھی بھلائی عطا فرما اور ہمیں آگ کے عذاب سے بچا۔“ جب آپ حجرِ اسود پر پہنچے تو (ابن ہشام رحمہ اللہ نے) کہا: ”اے ابو محمد! آپ کو اس حجرِ اسود کے بارے میں کیا حدیث پہنچی ہے؟“ عطاء رحمہ اللہ نے کہا: ”مجھے حضرت ابو ہریرہ رضی اللہ عنہ نے حدیث سنائی کہ انہوں نے رسول اللہ صلی اللہ علیہ وسلم سے یہ ارشاد سنا: ”جو شخص اس کی طرف متوجہ ہوتا ہے وہ رحمان کے ہاتھ کی طرف متوجہ ہوتا ہے۔“ ابن ہشام رحمہ اللہ نے کہا: ”اے ابو محمد! اور طواف؟“ عطاء رحمہ اللہ نے کہا: ”مجھے حضرت ابو ہریرہ رضی اللہ عنہ نے حدیث سنائی کہ انہوں نے نبی صلی اللہ علیہ وسلم سے سنا، آپ صلی اللہ علیہ وسلم نے فرمایا: ”جو شخص کعبہ کے سات چکر لگاتا ہے اور (اس دوران میں) صرف یہی کہتا ہے: «سُبْحَانَ اللَّهِ وَالْحَمْدُ لِلَّهِ وَلَا إِلَهَ إِلَّا اللَّهُ وَاللَّهُ أَكْبَرُ وَلَا حَوْلَ وَلَا قُوَّةَ إِلَّا بِاللَّهِ» ”اللہ پاک ہے، تمام تعریفیں اللہ کے لیے ہیں، اللہ کے سوا کوئی معبود نہیں، اللہ سب سے بڑا ہے، اللہ کی توفیق کے بغیر کوئی بچاؤ اور طاقت نہیں۔“ اس کے دس گناہ معاف ہو جاتے ہیں، اس کے لیے دس نیکیاں لکھی جاتی ہیں اور اس کی وجہ سے اس کے دس درجے بلند ہو جاتے ہیں، اور جو شخص طواف کرتا ہے اور اس حال میں بات چیت کرتا ہے، وہ رحمت میں اپنے قدم داخل کرتا ہے جیسے کوئی پایاب پانی میں پاؤں داخل کرے۔“ [سنن ابن ماجه/كتاب المناسك/حدیث: 2957]

حضرت مطلب بن ابی وداعہ سہمی رضی اللہ عنہ سے روایت ہے، انہوں نے فرمایا: ”میں نے اللہ کے رسول صلی اللہ علیہ وسلم کو دیکھا کہ آپ سات چکروں سے فارغ ہوئے تو تشریف لے آئے حتیٰ کہ حجر اسود کے برابر آگئے، پھر آپ صلی اللہ علیہ وسلم نے مطاف (طواف کی جگہ) کے کنارے پر دو رکعتیں پڑھیں جب کہ آپ صلی اللہ علیہ وسلم کے اور طواف کرنے والوں کے درمیان کوئی (سترہ) نہ تھا۔“ امام ابن ماجہ رحمہ اللہ نے فرمایا: ”یہ حکم (لوگوں کے نمازی کے آگے سے گزرتے رہنے کے باوجود نماز پڑھتے رہنا) صرف مکہ کے ساتھ خاص ہے (مسجد حرام میں یہ اجازت ہے اور کہیں نہیں)۔“ [سنن ابن ماجه/كتاب المناسك/حدیث: 2958]