سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ کی خدمت میں عرض کی گئی کہ آپ کسی کو اپنا جانشین مقرر کیوں نہیں کرتے؟ انہوں نے فرمایا: اگر میں اس چیز کو ترک کرتا ہوں، تو اس ہستی نے اسے ترک کیا تھا جو مجھ سے بہتر ہے اور وہ نبی اکرم صلی اللہ علیہ وسلم تھے اور اگر میں کسی کو اپنا جانشین مقرر کر دیتا ہوں، تو اس شخصیت نے اپنا جانشین مقرر کیا تھا جو مجھ سے بہتر تھے اور وہ سیدنا ابوبکر رضی اللہ عنہ ہیں، پھر انہوں نے سیدنا ابوبکر رضی اللہ عنہ کی تعریف کی اور یہ بات ارشاد فرمائی: میری یہ خواہش ہے کہ میں اس معاملے سے خلاصی حاصل کر لوں کہ نہ میرے ذمے کچھ ہو اور نہ میرے حق میں کچھ ہو۔ [صحیح ابن حبان/كتاب السير/حدیث: 4478]

سیدنا عبدالرحمن بن سمرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے عبدالرحمن! تم حکومتی عہدے کو طلب نہ کرنا کیونکہ اگر تمہیں یہ مانگنے سے ملا تو تمہیں اس کے حوالے کر دیا جائے گا اور اگر یہ تمہیں مانگے بغیر ملا تو اس بارے میں تمہاری مدد کی جائے گی اور جب تم کوئی قسم اٹھا لو اور پھر اس کے علاوہ (دوسری) صورت حال کو بہتر سمجھو تو وہ کام کرو جو زیادہ بہتر ہو اور اپنی قسم کا کفارہ ادا کر دو۔“ [صحیح ابن حبان/كتاب السير/حدیث: 4479]

سیدنا عبدالرحمن بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ان سے فرمایا: ”اے عبدالرحمن! حکومتی عہدے کو نہ مانگنا، کیونکہ اگر تمہیں یہ مانگنے سے ملا تو تمہیں اس کے سپرد کر دیا جائے گا اور اگر تمہیں مانگے بغیر ملا تو اس بارے میں تمہاری مدد کی جائے گی اور جب تم کوئی قسم اٹھاؤ اور اس کے برخلاف صورت کو اس سے زیادہ بہتر سمجھو تو وہ کام کرو جو زیادہ بہتر ہے اور اپنی قسم کا کفارہ دے دو۔“ [صحیح ابن حبان/كتاب السير/حدیث: 4480]

سیدنا ابوموسیٰ اشعری رضی اللہ عنہ بیان کرتے ہیں کہ میں اور میرے دو چچازاد بھائی نبی اکرم صلی اللہ علیہ وسلم کی خدمت میں حاضر ہوئے، ان دو میں سے ایک نے عرض کی: "یا رسول اللہ صلی اللہ علیہ وسلم ! اللہ تعالیٰ نے آپ کو جو حکومت عطا کی ہے اس میں سے کسی معاملے کا ہمیں بھی اہلکار مقرر کر دیں"، دوسرے شخص نے بھی اس کی مانند بات کہی تو نبی اکرم صلی اللہ علیہ وسلم نے ارشاد فرمایا: "اللہ کی قسم! ہم اس کام کا نگران کسی ایسے شخص کو مقرر نہیں کریں گے جو اسے مانگتا ہے اور نہ ہی کسی ایسے شخص کو مقرر کریں گے جو اس کا لالچ کرتا ہے"۔ [صحیح ابن حبان/كتاب السير/حدیث: 4481]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”عنقریب تم حکومتی عہدوں کا لالچ کرو گے اور قیامت کے دن یہ چیز ندامت اور حسرت کا باعث ہو گی، تو دودھ پلانے والی اچھی شمار ہوتی ہے اور دودھ چھڑوانے والی بری شمار ہوتی ہے۔“ [صحیح ابن حبان/كتاب السير/حدیث: 4482]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سرکاری اہلکاروں کے لیے خرابی ہے، عنقریب کچھ لوگ اس بات کی آرزو کریں گے کہ انہیں ان کے بالوں کے ساتھ اوجِ ثریا پر لٹکا دیا جاتا، لیکن انہیں کسی (حکومتی عہدے) کا اہلکار مقرر نہ کیا جاتا۔“ [صحیح ابن حبان/كتاب السير/حدیث: 4483]

سیدنا عبداللہ بن عمرو بن العاص رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”(دنیا میں) انصاف کرنے والے لوگ قیامت کے دن رحمان کے دائیں طرف نور کے منبروں پر ہوں گے، حالانکہ اس (رحمان) کے دونوں طرف دائیں ہیں، وہ لوگ جو اپنی بیویوں کے ساتھ، اپنی اولاد کے ساتھ اور جس معاملے کے وہ نگران بنتے ہیں اس کے ساتھ انصاف سے کام لیتے ہیں۔“ (امام ابن حبان رحمہ اللہ فرماتے ہیں:) اس روایت کے الفاظ لوگوں کے عام محاورے کے مطابق ہیں اور یہاں وہ لفظ استعمال ہوئے ہیں جو لوگ اپنے محاورے میں استعمال کرتے ہیں، اس کا حقیقی مفہوم مراد نہیں ہے کیونکہ اس کی مراد سے واقفیت حاصل نہیں کی جا سکتی، وہ واقفیت صرف انہی الفاظ میں حاصل کی جا سکتی ہے جو اس روایت میں ذکر ہوئے ہیں۔ لفظ «الْمُقْسِطُ» کا مطلب انصاف کرنا ہے اور لفظ «الْقَاسِطُ» کا مطلب راستے سے ہٹ جانے والا ہے۔ [صحیح ابن حبان/كتاب السير/حدیث: 4484]

سیدنا عبداللہ بن عمرو رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”انصاف کرنے والے لوگ رحمان کے دائیں طرف ہوں گے اور اس کے دونوں ہاتھ ہی دائیں ہیں، یہ وہ لوگ ہیں جو اپنے فیصلے کرنے میں، اپنے بیوی بچوں کے ساتھ تعلقات میں اور اپنی ذمہ داریوں میں انصاف سے کام لیتے ہیں۔“ [صحیح ابن حبان/كتاب السير/حدیث: 4485]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سات لوگ ایسے ہیں، جنہیں اللہ تعالیٰ اس دن اپنا سایہ نصیب کرے گا جس دن اس کے سائے کے علاوہ اور کوئی سایہ نہیں ہو گا: عادل حکمران، وہ نوجوان جس کی نشوونما اللہ تعالیٰ کی عبادت کرتے ہوئے ہوئی، وہ شخص جو تنہائی میں اللہ کا ذکر کر رہا ہو تو اس کی آنکھوں سے آنسو جاری ہو جائیں، وہ شخص جس کا دل مسجد کے ساتھ معلق رہتا ہو، وہ دو افراد جو اللہ تعالیٰ کے لیے ایک دوسرے سے محبت رکھتے ہیں، اسی وجہ سے وہ ملتے ہیں اور اسی وجہ سے جدا ہوتے ہیں، ایک وہ شخص جسے کوئی صاحبِ حیثیت اور خوب صورت عورت اپنی ذات کی طرف (گناہ کی) دعوت دیتی ہے اور وہ شخص یہ کہتا ہے: میں اللہ تعالیٰ سے ڈرتا ہوں، اور وہ شخص جو کوئی صدقہ کرتے ہوئے اسے اتنا پوشیدہ رکھتا ہے کہ بائیں ہاتھ کو یہ پتا نہیں چلتا کہ دائیں ہاتھ نے کیا خرچ کیا ہے۔“ [صحیح ابن حبان/كتاب السير/حدیث: 4486]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے سیدنا ابوجہم بن حذیفہ رضی اللہ عنہ کو زکاۃ وصول کرنے کے لیے بھیجا تو زکاۃ کی ادائیگی کرتے ہوئے ایک شخص کی ان کے ساتھ بحث ہو گئی۔ سیدنا ابوجہم رضی اللہ عنہ نے اسے مارا اور زخمی کر دیا۔ وہ لوگ نبی اکرم صلی اللہ علیہ وسلم کی خدمت میں حاضر ہوئے اور انہوں نے عرض کی: یا رسول اللہ صلی اللہ علیہ وسلم ! ہمیں قصاص دلوائیے۔ نبی اکرم صلی اللہ علیہ وسلم نے ارشاد فرمایا: ”تم یہ چیزیں لے لو (اور اس پر راضی ہو جاؤ)“، لیکن وہ لوگ اس پر راضی نہیں ہوئے۔ نبی اکرم صلی اللہ علیہ وسلم نے فرمایا: ”تم یہ، یہ چیزیں مزید لے لو“، وہ اس پر بھی راضی نہیں ہوئے۔ نبی اکرم صلی اللہ علیہ وسلم نے پھر فرمایا: ”تم یہ، یہ چیزیں مزید لے لو“، تو وہ اس بات پر راضی ہو گئے۔ نبی اکرم صلی اللہ علیہ وسلم نے دریافت فرمایا: ”کیا تم راضی ہو گئے ہو؟“ انہوں نے جواب دیا: جی ہاں۔ [صحیح ابن حبان/كتاب السير/حدیث: 4487]