سیدنا انس بن مالک رضی اللہ عنہ بیان کرتے ہیں کہ سیدنا قیس بن سعد رضی اللہ عنہ کو نبی اکرم صلی اللہ علیہ وسلم کے ساتھ وہی نسبت حاصل تھی جو کوتوال کو گورنر کے ساتھ ہوتی ہے۔ [صحیح ابن حبان/كتاب السير/حدیث: 4508]

سیدنا ابو سعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم پیاز کے کھیت کے پاس سے گزرے، آپ صلی اللہ علیہ وسلم کے ساتھ آپ صلی اللہ علیہ وسلم کے اصحاب بھی تھے۔ لوگوں نے وہاں پڑاؤ کیا، کچھ لوگوں نے پیاز کو کھا لیا اور کچھ نے نہیں کھایا۔ جب ہم نبی اکرم صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے ان لوگوں کو بلوایا جنہوں نے پیاز نہیں کھایا تھا اور دوسرے لوگوں کو اس وقت تک پیچھے کر دیا جب تک ان کی بو ختم نہیں ہو گئی۔ [صحیح ابن حبان/كتاب السير/حدیث: 4509]

عاصم بن لقیط بن صبرہ اپنے والد (سیدنا لقیط بن صبرہ رضی اللہ عنہ) کا یہ بیان نقل کرتے ہیں: میں بنو منتفق کے وفد میں شامل تھا، ہم نبی اکرم صلی اللہ علیہ وسلم کے ساتھ بیٹھے ہوئے تھے، اسی دوران ایک چرواہا اپنی بکری کو اٹھا کر باڑے کی طرف لے گیا، وہ آوازیں نکال رہی تھی۔ نبی اکرم صلی اللہ علیہ وسلم نے دریافت کیا: ”اس نے کیا جنم دیا ہے؟“ چرواہے نے جواب دیا: بچے کو جنم دیا ہے۔ نبی اکرم صلی اللہ علیہ وسلم نے فرمایا: ”تم اس کی جگہ کوئی اور بکری ذبح کرو۔“ پھر نبی اکرم صلی اللہ علیہ وسلم نے ارشاد فرمایا: ”تم یہ گمان نہ کرنا کہ ہم نے تمہاری وجہ سے اسے ذبح کیا ہے“ (راوی بیان کرتے ہیں: یہاں نبی اکرم صلی اللہ علیہ وسلم نے لفظ پر زیر پڑھی تھی زبر نہیں پڑھی تھی)۔ (نبی اکرم صلی اللہ علیہ وسلم نے فرمایا:) ”ہمارے پاس ایک سو بکریاں ہیں، جب کوئی ایک بکری بچہ دیتی ہے، تو ہم اس کی جگہ ایک بکری کو ذبح کر دیتے ہیں۔“ راوی بیان کرتے ہیں: میں نے عرض کی: یا رسول اللہ صلی اللہ علیہ وسلم ! میری بیوی کی زبان میں کچھ خرابی ہے یعنی وہ بدزبانی کا مظاہرہ کرتی ہے۔ نبی اکرم صلی اللہ علیہ وسلم نے فرمایا: ”تم اسے طلاق دے دو۔“ انہوں نے عرض کی: اس کے ساتھ بڑا پرانا ساتھ ہے، پھر اس سے میری اولاد بھی ہے۔ نبی اکرم صلی اللہ علیہ وسلم نے فرمایا: ”تم اسے زبانی طور پر وعظ و نصیحت کر کے سمجھاؤ، ہو سکتا ہے اسے سمجھ آ جائے، تم اپنی بیوی کو اس طرح نہ مارو جس طرح تم اپنے اونٹ کو مارتے ہو۔“ راوی کہتے ہیں: میں نے عرض کی: یا رسول اللہ صلی اللہ علیہ وسلم ! آپ مجھے وضو کے بارے میں بتائیے۔ نبی اکرم صلی اللہ علیہ وسلم نے فرمایا: ”جب تم وضو کرو تو اچھی طرح وضو کرو اور اپنی انگلیوں کے درمیان خلال کرو اور اچھی طرح ناک میں پانی ڈالو، البتہ اگر تمہارا روزہ ہو (تو پھر مبالغہ نہ کرو)۔“ [صحیح ابن حبان/كتاب السير/حدیث: 4510]

حسن بصری بیان کرتے ہیں: سیدنا عائذ بن عمرو رضی اللہ عنہ، جو نبی اکرم صلی اللہ علیہ وسلم کے صحابی ہیں، وہ عبیداللہ بن زیاد کے پاس تشریف لے گئے، انہوں نے فرمایا: اے میرے بیٹے! میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک سب سے برا حکمران ظالم حکمران ہوتا ہے۔“ تو تم اس بات سے بچنے کی کوشش کرو کہ تم ان میں شامل ہو جاؤ۔ عبیداللہ بن زیاد نے کہا: آپ تشریف رکھیں، آپ نبی اکرم صلی اللہ علیہ وسلم کے اصحاب کے برے افراد میں سے ایک ہیں، تو انہوں نے فرمایا: کیا ان اصحاب کے اندر خرابی ہوگی؟ خرابی تو ان کے بعد والے لوگوں میں اور ان کے علاوہ لوگوں میں ہے۔ [صحیح ابن حبان/كتاب السير/حدیث: 4511]

سیدہ خولہ بنت قیس رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بے شک دنیا میٹھی اور سرسبز ہے، جو شخص اس کے حق کے ہمراہ اسے حاصل کرتا ہے اس کے لیے اس میں برکت رکھی جاتی ہے اور بعض اوقات کوئی شخص اللہ اور اس کے رسول کے مال کو حاصل کرتا ہے اور قیامت کے دن اس کے لیے جہنم ہوگی۔“ [صحیح ابن حبان/كتاب السير/حدیث: 4512]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مجھے تمہارے بارے میں سب سے زیادہ اندیشہ اس چیز کا ہے جسے زمین پیدا کرے گی (راوی کو شک ہے شاید یہ الفاظ ہیں) دنیاوی زیب و زینت کا ہے۔“ ایک صاحب نے عرض کی: یا رسول اللہ صلی اللہ علیہ وسلم ! کیا بھلائی برائی کو لے کر آئے گی؟ راوی بیان کرتے ہیں: تو نبی اکرم صلی اللہ علیہ وسلم خاموش رہے یہاں تک کہ ہمیں اندازہ ہو گیا کہ آپ صلی اللہ علیہ وسلم پر وحی نازل ہو رہی ہے، آپ صلی اللہ علیہ وسلم کو پسینہ آ گیا اور آپ صلی اللہ علیہ وسلم کا سانس تیز ہو گیا، پھر جب آپ صلی اللہ علیہ وسلم کی یہ کیفیت ختم ہوئی تو آپ صلی اللہ علیہ وسلم نے دریافت فرمایا: ”سوال کرنے والا شخص کہاں ہے؟“ اس نے عرض کی: میں یہاں ہوں، میں نے اس سوال کے ذریعے صرف بھلائی کا ارادہ کیا تھا۔ نبی اکرم صلی اللہ علیہ وسلم نے ارشاد فرمایا: ”بھلائی صرف بھلائی کو لے کر آتی ہے، بہار کا موسم جو کچھ اگاتا ہے وہ کسی جانور کو ہلاک کر دیتا ہے یا تکلیف کے قریب کر دیتا ہے، سوائے سبزہ چرنے والے جانور کے کہ وہ کھاتا ہے یہاں تک کہ جب اس کی کوکھیں بھر جاتی ہیں تو وہ دھوپ میں آ جاتا ہے، وہاں وہ لید کرتا ہے اور پیشاب کرتا ہے، پھر واپس جا کر دوبارہ چرنے لگتا ہے، پھر آتا ہے اور لیٹ جاتا ہے؛ یہ مال میٹھا اور سرسبز ہے، جو شخص اسے اس کے حق کے ہمراہ حاصل کرتا ہے اس کے لیے اس میں برکت رکھی جاتی ہے اور جو شخص اسے ناحق طور پر حاصل کرتا ہے اس کے لیے اس میں برکت نہیں رکھی جاتی، اور اس شخص کی مثال ایسے شخص کی مانند ہوتی ہے جو کھانے کے باوجود سیر نہیں ہوتا، اور اوپر والا ہاتھ نیچے والے ہاتھ سے بہتر ہے۔“ حسین بن حسن نامی راوی نے یہ بات بیان کی ہے کہ سفیان یہ کہتے ہیں: اعمش نے چالیس سال پہلے ان سے اس حدیث کے بارے میں دریافت کیا تھا۔ [صحیح ابن حبان/كتاب السير/حدیث: 4513]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا کعب بن عجرہ رضی اللہ عنہ سے فرمایا: ”اے کعب بن عجرہ! اللہ تعالیٰ تمہیں بے وقوفوں کی حکمرانی «إِمَارَةِ السُّفَهَاءِ» سے اپنی پناہ میں رکھے۔“ لوگوں نے عرض کی: یا رسول اللہ صلی اللہ علیہ وسلم ! بے وقوفوں کی حکمرانی سے کیا مراد ہے؟ نبی اکرم صلی اللہ علیہ وسلم نے ارشاد فرمایا: ”میرے بعد کچھ ایسے حکمران آئیں گے جو ہدایت کی پیروی نہیں کریں گے اور نہ ہی میری سنت کی پیروی کریں گے، تو جو شخص ان کے جھوٹ کی تصدیق کرے گا اور ان کے ظلم میں ان کی مدد کرے گا تو ان لوگوں کا مجھ سے کوئی واسطہ نہیں ہوگا اور نہ ہی میرا ان سے کوئی واسطہ ہوگا اور وہ لوگ میرے حوض پر میرے پاس نہیں آ سکیں گے۔ اور جو شخص ان کے جھوٹ میں ان کی تصدیق نہیں کرے گا اور ان کے ظلم میں ان کی مدد نہیں کرے گا اس کا مجھ سے تعلق ہوگا اور میرا اس سے تعلق ہوگا اور وہ عنقریب میرے حوض پر میرے پاس آئے گا۔ اے کعب بن عجرہ! «الصَّوْمُ جُنَّةٌ» ”روزہ ڈھال ہے“، «وَالصَّدَقَةُ تُطْفِئُ الْخَطِيئَةَ» ”صدقہ گناہ کو ختم کر دیتا ہے“، «وَالصَّلَاةُ بُرْهَانٌ» ”نماز برہان ہے“ (راوی کو شک ہے شاید یہ الفاظ ہیں) «أَوْ قُرْبَانٌ» ”قربت کے حصول کا ذریعہ ہے“۔ اے کعب بن عجرہ! لوگ صبح کے وقت نکلتے ہیں اور اپنے آپ کا سودا کر لیتے ہیں، تو کوئی شخص اپنے آپ کو (اللہ کی اطاعت کر کے) آزاد کروا دیتا ہے اور کوئی اپنے آپ کو فروخت کر کے اسے غلام بنا دیتا ہے۔“ [صحیح ابن حبان/كتاب السير/حدیث: 4514]

سیدنا ابوحمید ساعدی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ابن لتبیہ کو زکوٰۃ وصول کرنے کا نگران مقرر کیا، جب وہ آیا تو نبی اکرم صلی اللہ علیہ وسلم نے اس سے حساب لیا، اس نے بتایا: یہ آپ کے لیے ہے اور یہ تحفہ ہے جو مجھے تحفے کے طور پر دیا گیا ہے۔ نبی اکرم صلی اللہ علیہ وسلم نے فرمایا: ”تم اپنے ماں باپ کے گھر میں کیوں نہیں بیٹھے رہے تاکہ تمہارا تحفہ وہاں تمہارے پاس آ جاتا؟“ پھر نبی اکرم صلی اللہ علیہ وسلم نے ظہر کی نماز ادا کی، پھر آپ صلی اللہ علیہ وسلم خطبہ دینے کے لیے کھڑے ہوئے، آپ صلی اللہ علیہ وسلم نے اللہ تعالیٰ کی حمد و ثناء بیان کرنے کے بعد ارشاد فرمایا: «أَمَّا بَعْدُ» ”بعد ازاں! لوگوں کو کیا ہو گیا ہے؟ اللہ تعالیٰ نے ہمیں جس چیز کا نگران بنایا ہے ہم اس میں سے کچھ کاموں کا نگران (کچھ) لوگوں کو بناتے ہیں اور اللہ تعالیٰ نے ہمیں جس چیز کا نگران بنایا ہے اس سلسلے میں کوئی کام لوگوں سے لیتے ہیں، پھر ان میں سے کوئی ایک شخص میرے پاس آ کر یہ کہتا ہے: یہ آپ کے لیے ہے اور یہ مجھے تحفے کے طور پر دیا گیا ہے، وہ شخص اپنے ماں باپ کے گھر میں کیوں نہیں بیٹھا رہتا کہ اس کا تحفہ خود ہی اس تک آ جائے۔ اس ذات کی قسم جس کے دستِ قدرت میں محمد صلی اللہ علیہ وسلم کی جان ہے! جو بھی شخص جس بھی چیز کو ناحق طور پر لے گا تو جب وہ قیامت کے دن آئے گا تو اس نے اپنی گردن پر اس چیز کو اٹھایا ہوا ہوگا، تو میں کسی ایسے شخص کو نہ پاؤں جس نے قیامت کے دن کسی اونٹ کو اپنی گردن پر اٹھایا ہوا ہو اور وہ آواز نکال رہا ہو یا گائے کو اٹھایا ہوا ہو وہ آواز نکال رہی ہو یا بکری کو اٹھایا ہوا ہو اور وہ منمنا رہی ہو۔“ پھر نبی اکرم صلی اللہ علیہ وسلم نے اپنا دستِ مبارک پھیلایا، یہاں تک کہ مجھے آپ صلی اللہ علیہ وسلم کی بغل کی سفیدی نظر آگئی، میں نے (یہ بات ارشاد فرماتے ہوئے نبی اکرم صلی اللہ علیہ وسلم کو) اپنی آنکھوں کے ذریعے دیکھا اور میرے کانوں نے اس بات کو سنا، پھر نبی اکرم صلی اللہ علیہ وسلم نے ارشاد فرمایا: ”خبردار! کیا میں نے تبلیغ کر دی ہے؟“ یہ بات آپ صلی اللہ علیہ وسلم نے تین مرتبہ ارشاد فرمائی۔ سیدنا ابوحمید ساعدی رضی اللہ عنہ فرماتے ہیں کہ اس بات کے گواہ سیدنا زید بن ثابت انصاری رضی اللہ عنہ ہیں، کیونکہ وہ اس وقت میرے کندھے سے کندھا ملا کر بیٹھے ہوئے تھے۔ [صحیح ابن حبان/كتاب السير/حدیث: 4515]

سیدنا ابوبکرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”وہ قوم کبھی کامیاب نہیں ہو سکتی جس کی حکمران کوئی عورت ہو۔“ [صحیح ابن حبان/كتاب السير/حدیث: 4516]

سیدنا انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”عنقریب اللہ تعالیٰ اس دین کی تائید ایسے لوگوں کے ذریعے کرے گا جن کا (آخرت میں) کوئی حصہ نہیں ہو گا۔“ [صحیح ابن حبان/كتاب السير/حدیث: 4517]