سیدنا ابو موسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے اپنی دنیا سے محبت کی اس نے اپنی آخرت کو نقصان پہنچایا، اور جس نے اپنی آخرت سے محبت کی اس نے اپنی دنیا کو نقصان پہنچایا، پس تم باقی رہنے والی چیز (آخرت) کو اس چیز (دنیا) پر ترجیح دو جو فنا ہونے والی ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب الرقاق/حدیث: 8050]

سیدنا ابوسعید خدری رضی اللہ عنہ سے روایت ہے کہ ایک شخص نے عرض کی: یا رسول اللہ! ان بیماریوں کے بارے میں آپ کی کیا رائے ہے جو ہمیں لاحق ہوتی ہیں، ان کے بدلے ہمیں کیا ملے گا؟ آپ صلی اللہ علیہ وسلم نے فرمایا: ”یہ گناہوں کا کفارہ ہیں۔“ سیدنا ابی بن کعب رضی اللہ عنہ نے عرض کی: یا رسول اللہ! کیا اگرچہ وہ تھوڑی ہی کیوں نہ ہوں؟ آپ صلی اللہ علیہ وسلم نے فرمایا: ”خواہ کانٹا چبھنا ہو یا اس سے بڑھ کر۔“ (یہ سن کر) سیدنا ابی بن کعب رضی اللہ عنہ نے اپنے حق میں یہ دعا مانگی کہ انہیں موت تک بخار نہ چھوڑے بشرطیکہ وہ بخار انہیں حج، عمرہ، جہاد فی سبیل اللہ اور باجماعت فرض نماز سے نہ روکے، چنانچہ اس کے بعد (بخار کی شدت کی وجہ سے) جب بھی کوئی شخص ان کے بدن کو چھوتا تو اس کی تپش محسوس کرتا تھا، یہاں تک کہ ان کا انتقال ہو گیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب الرقاق/حدیث: 8051]

سیدنا عقبہ بن عامر جہنی رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”ہر دن کا عمل (شام کو) سربمہر کر دیا جاتا ہے، پس جب مومن بیمار ہوتا ہے تو فرشتے عرض کرتے ہیں: اے ہمارے رب! آپ نے اپنے فلاں بندے کو (بیماری کے ذریعے) روک لیا ہے، تو رب کریم فرماتا ہے: اس کے لیے ویسا ہی عمل لکھ کر مہر لگا دو جیسا وہ (تندرستی میں) کیا کرتا تھا یہاں تک کہ وہ صحت یاب ہو جائے یا وفات پا جائے۔“
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8052]

سیدنا زید بن ارقم رضی اللہ عنہ سے روایت ہے کہ ہم سیدنا ابوبکر صدیق رضی اللہ عنہ کے پاس بیٹھے تھے کہ انہوں نے پینے کے لیے کچھ منگوایا، ان کی خدمت میں شہد ملا ہوا پانی پیش کیا گیا، جب انہوں نے اسے اپنے منہ کے قریب کیا تو وہ اس قدر روئے کہ اپنے ساتھیوں کو بھی رلا دیا، پھر سب خاموش ہو گئے مگر ان کا رونا بند نہ ہوا، وہ دوبارہ اس قدر روئے کہ ساتھیوں کو گمان ہوا کہ شاید اب وہ ان سے کچھ پوچھ نہ سکیں گے، پھر انہوں نے اپنی آنکھیں پونچھیں، لوگوں نے عرض کی: اے خلیفہ رسول! آپ کس بات پر روئے؟ انہوں نے فرمایا: میں (ایک مرتبہ) رسول اللہ صلی اللہ علیہ وسلم کے ساتھ تھا تو میں نے دیکھا کہ آپ صلی اللہ علیہ وسلم اپنے سامنے سے کسی چیز کو ہٹا رہے ہیں حالانکہ آپ صلی اللہ علیہ وسلم کے پاس کوئی دوسرا موجود نہ تھا، میں نے عرض کی: یا رسول اللہ! آپ اپنے آپ سے کس چیز کو دور فرما رہے ہیں؟ آپ صلی اللہ علیہ وسلم نے فرمایا: ”یہ دنیا میرے سامنے ایک صورت بنا کر پیش کی گئی تھی تو میں نے اسے کہا: مجھ سے دور ہو جا، پھر وہ واپس پلٹی اور کہنے لگی: اگر آپ مجھ سے بچ نکلے ہیں تو آپ کے بعد آنے والے مجھ سے ہرگز نہیں بچ سکیں گے۔“
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8053]

سیدنا قتادہ بن نعمان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب اللہ تعالیٰ کسی بندے سے محبت فرماتا ہے تو اسے دنیا (کی لذتوں) سے اس طرح بچاتا ہے جیسے تم میں سے کوئی اپنے مریض کو پانی سے بچاتا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب الرقاق/حدیث: 8054]

سیدنا ابن عباس رضی اللہ عنہما سے روایت ہے کہ سیدنا عمر بن خطاب رضی اللہ عنہ نبی کریم صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم ایک چٹائی پر لیٹے ہوئے تھے جس کے نشانات آپ صلی اللہ علیہ وسلم کے پہلو مبارک پر نمایاں تھے، سیدنا عمر رضی اللہ عنہ نے عرض کی: یا رسول اللہ! کاش آپ اس سے زیادہ نرم بستر اختیار فرما لیتے، تو آپ صلی اللہ علیہ وسلم نے فرمایا: ”مجھے دنیا سے کیا لینا دینا، اور دنیا کو مجھ سے کیا سروکار! اس ذات کی قسم جس کے قبضۂ قدرت میں میری جان ہے! میری اور دنیا کی مثال تو اس سوار کی سی ہے جو گرمی کے دن میں سفر کر رہا ہو اور کسی درخت کے سائے تلے تھوڑی دیر آرام کے لیے رکے، پھر اسے چھوڑ کر آگے چل دے۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8055]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”میرا دنیا سے کیا تعلق، میری اور دنیا کی مثال تو اس سوار کی سی ہے جس نے گرمی کے دن میں کسی درخت کے سائے تلے قیلولہ (آرام) کیا، پھر وہاں سے چل دیا اور اسے وہیں چھوڑ دیا۔“ [المستدرك على الصحيحين/كتاب الرقاق/حدیث: 8056]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص اس ثواب کا طلبگار ہو جو اللہ کے پاس ہے تو آسمان اس کا سایہ اور زمین اس کا بستر بن جاتی ہے، وہ دنیا کے کسی معاملے کی فکر نہیں کرتا؛ وہ کھیتی نہیں اگاتا لیکن روٹی کھاتا ہے، وہ درخت نہیں لگاتا لیکن پھل کھاتا ہے، یہ سب اللہ تعالیٰ پر توکل اور اس کی رضا کی طلب کی بدولت ہے، چنانچہ اللہ تعالیٰ ساتوں آسمانوں اور ساتوں زمینوں کو اس کے رزق کا ضامن بنا دیتا ہے، پس وہ لوگ اس کے رزق کے لیے تگ و دو کرتے ہیں اور اسے حلال طریقے سے اس تک پہنچاتے ہیں، اور وہ اپنا رزق اللہ کے ہاں بغیر کسی حساب کے پورا پورا پاتا ہے یہاں تک کہ اسے موت آ جائے۔“
شامی راویوں کے حوالے سے یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8057]

سیدنا ابومالک اشعری رضی اللہ عنہ سے مروی ہے کہ جب ان کی وفات کا وقت قریب آیا تو انہوں نے کہا: اے اشعریوں کی جماعت! تم میں سے جو موجود ہے وہ یہ بات غائب لوگوں تک پہنچا دے کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”دنیا کی مٹھاس آخرت کی کڑواہٹ ہے، اور دنیا کی کڑواہٹ آخرت کی مٹھاس ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8058]

سیدنا ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس امت کو بلندی، رفعت، نصرت اور زمین میں غلبہ و اقتدار کی خوشخبری دے دو، اور (یاد رکھو کہ) ان میں سے جس شخص نے آخرت کا کوئی عمل دنیا (حاصل کرنے) کے لیے کیا تو آخرت میں اس کا کوئی حصہ نہیں ہوگا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الرقاق/حدیث: 8059]