سیدنا ابودرداء رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”کسی شے کی محبت تمہیں اندھا اور بہرا بنا دیتی ہے۔“ [سنن ابي داود/أبواب النوم /حدیث: 5130]

سیدنا ابوموسیٰ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میرے پاس (اپنے ساتھیوں کی) سفارشیں کیا کرو تاکہ ثواب پاؤ اور فیصلہ تو وہی ہو گا جو اللہ چاہے گا اور اپنے نبی کی زبان سے کرائے گا۔“ [سنن ابي داود/أبواب النوم /حدیث: 5131]

سیدنا امیر معاویہ رضی اللہ عنہ سے منقول ہے (انہوں نے اپنے احباب سے کہا) کہ ”سفارش کر دیا کرو، اجر پاؤ گے۔“ انہوں نے کہا: رسول اللہ صلی اللہ علیہ وسلم نے فرمایا ہے: ”سفارش کیا کرو تمہیں اجر ملے گا۔“ بلاشبہ (بعض اوقات) میں ایک کام کر دینا چاہتا ہوں مگر اسے (کسی قدر) ٹالتا رہتا ہوں تاکہ تم سفارش کرو اور ثواب پاؤ۔ یقیناً رسول اللہ صلی اللہ علیہ وسلم نے فرمایا ہے: ”سفارش کیا کرو اجر پاؤ گے۔“ [سنن ابي داود/أبواب النوم /حدیث: 5132]

جناب ابوبردہ، سیدنا ابوموسیٰ اشعری رضی اللہ عنہ سے، وہ نبی کریم صلی اللہ علیہ وسلم سے مذکورہ بالا حدیث کی مثل روایت کرتے ہیں۔ [سنن ابي داود/أبواب النوم /حدیث: 5133]

سیدنا علاء حضرمی رضی اللہ عنہ کے متعلق آتا ہے کہ وہ نبی کریم صلی اللہ علیہ وسلم کی طرف سے بحرین میں گورنر تھے۔ چنانچہ وہ جب نبی کریم صلی اللہ علیہ وسلم کی طرف خط لکھتے تو اپنے نام سے شروع کرتے تھے۔ [سنن ابي داود/أبواب النوم /حدیث: 5134]

جناب ابن سیرین رحمہ اللہ نے سیدنا علاء رضی اللہ عنہ کے بیٹے سے روایت کیا، انہوں نے (اپنے والد) سیدنا علاء بن حضرمی رضی اللہ عنہ کے متعلق بتایا کہ ”انہوں نے نبی کریم صلی اللہ علیہ وسلم کو خط لکھا، تو اپنے نام سے ابتدا کی۔“ [سنن ابي داود/أبواب النوم /حدیث: 5135]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے ہرقل کو خط لکھا، تو یوں لکھا: ”محمد رسول اللہ کی طرف سے رومیوں کے رئیس ہرقل کی طرف۔ سلامتی ہو اس پر جو راہِ ہدایت پر چلے۔“ ابن یحییٰ نے بیان کیا کہ ابن عباس رضی اللہ عنہما نے کہا کہ ابوسفیان رضی اللہ عنہ نے مجھے خبر دی کہ ہم ہرقل کے ہاں گئے تو اس نے ہمیں اپنے سامنے بٹھایا۔ پھر اس نے رسول اللہ صلی اللہ علیہ وسلم کا خط منگوایا، تو اس میں تھا: «بِسْمِ اللّٰهِ الرَّحْمٰنِ الرَّحِيْمِ» ”اللہ کے نام سے جو نہایت مہربان، ہمیشہ رحم فرمانے والا ہے“، اللہ کے رسول محمد کی طرف سے رومیوں کے سربراہ ہرقل کی طرف۔ سلامتی ہو اس پر جو راہِ ہدایت پر چلے، «أَمَّا بَعْدُ» ”حمد و ثنا کے بعد۔“ [سنن ابي داود/أبواب النوم /حدیث: 5136]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کوئی بیٹا اپنے باپ کے احسان کا بدلہ نہیں دے سکتا، سوائے اس کے کہ اسے (باپ کو) غلام پائے، تو اسے خریدے اور آزاد کر دے۔“ [سنن ابي داود/أبواب النوم /حدیث: 5137]

جناب حمزہ اپنے والد سیدنا عبداللہ بن عمر رضی اللہ عنہ سے روایت کرتے ہیں، انہوں نے کہا: ”میری زوجیت میں ایک عورت تھی اور مجھے اس سے محبت تھی۔ مگر حضرت عمر رضی اللہ عنہ اسے ناپسند کرتے تھے۔ تو انہوں نے مجھ سے فرمایا کہ اسے طلاق دے دو۔ میں نے انکار کیا، تو حضرت عمر رضی اللہ عنہ نبی صلی اللہ علیہ وسلم کی خدمت میں گئے اور اپنی بات ان سے کہی۔ تو نبی صلی اللہ علیہ وسلم نے (مجھ سے) فرمایا: ”اس عورت کو طلاق دے دو۔““ [سنن ابي داود/أبواب النوم /حدیث: 5138]

جناب بہز بن حکیم اپنے والد سے، وہ اپنے دادا (معاویہ بن حیدہ رضی اللہ عنہ) سے روایت کرتے ہیں، انہوں نے کہا: ”اے اللہ کے رسول! میں کس کے ساتھ حسن سلوک کروں؟“ آپ صلی اللہ علیہ وسلم نے فرمایا: ”اپنی ماں کے ساتھ، پھر اپنی ماں کے ساتھ، پھر اپنی ماں کے ساتھ، پھر اپنے باپ کے ساتھ، پھر جو قریبی رشتہ دار ہوں ان کے ساتھ، پھر جو اس کے بعد قریب ہوں۔“ پھر رسول اللہ صلی اللہ علیہ وسلم نے فرمایا: ”جو شخص اپنے غلام سے وہ مال مانگے، جو اس کی حاجت سے زیادہ ہو اور وہ اسے نہ دے تو قیامت کے دن اس کا وہ فاضل مال جس کے دینے سے اس نے انکار کیا ایک گنجے سانپ کی صورت میں اس کے سامنے لایا جائے گا۔“ امام ابوداؤد رحمہ اللہ کہتے ہیں: «أَقْرَعُ» سے وہ سانپ مراد ہے جس کے سر کے بال زہر کی تیزی کے سبب جھڑ گئے ہوں (اور وہ گنجا ہو گیا ہو)۔ [سنن ابي داود/أبواب النوم /حدیث: 5139]