سیدنا انس رضی اللہ عنہ سے روایت ہے، انہوں نے کہا کہ ”ہم رسول اللہ صلی اللہ علیہ وسلم کے ساتھ تھے کہ بارش ہونے لگی، تو رسول اللہ صلی اللہ علیہ وسلم نکلے اور اپنے جسم سے کپڑا ہٹا لیا حتیٰ کہ وہ آپ صلی اللہ علیہ وسلم کے جسم پر پڑنے لگی، ہم نے عرض کیا: ”اے اللہ کے رسول! آپ نے ایسے کیوں کیا ہے؟“ آپ صلی اللہ علیہ وسلم نے فرمایا: ”کیونکہ یہ ابھی ابھی اپنے رب کے پاس سے آئی ہے۔““ [سنن ابي داود/أبواب النوم /حدیث: 5100]

سیدنا زید بن خالد رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مرغ کو گالی مت دیا کرو، اس لیے کہ یہ نماز کے لیے جگاتا ہے۔“ [سنن ابي داود/أبواب النوم /حدیث: 5101]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب تم مرغ کی آواز سنو، تو اللہ تعالیٰ سے اس کے فضل کا سوال کرو، بیشک اس نے فرشتے کو دیکھا ہوتا ہے اور جب تم گدھے کی آواز سنو، تو شیطان سے اللہ کی پناہ طلب کرو، بیشک اس نے شیطان کو دیکھا ہوتا ہے۔“ [سنن ابي داود/أبواب النوم /حدیث: 5102]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب تم رات کو کتوں کا بھونکنا اور گدھوں کی آوازیں سنو، تو اللہ کی پناہ طلب کرو، بلاشبہ یہ وہ کچھ دیکھتے ہیں جو تم نہیں دیکھتے ہو۔“ [سنن ابي داود/أبواب النوم /حدیث: 5103]

سیدنا جابر بن عبداللہ رضی اللہ عنہ اور جناب علی بن عمر بن حسین بن علی رحمہ اللہ سے روایت ہے، انہوں نے بیان کیا کہ رسول اللہ صلی اللہ علیہ وسلم نے فرمایا: ”جب قدموں کی آوازیں آنا بند ہو جائیں تو بہت کم باہر نکلا کرو۔ بلاشبہ اللہ تعالیٰ کی مخلوق میں کچھ جانور ہیں جنہیں اللہ تعالیٰ پھیلا دیتا ہے۔“ ابراہیم بن مروان نے کہا: ”اس وقت میں مت نکلا کرو۔“ اور «فَإِنَّ لِلَّهِ تَعَالَىٰ دَوَابَّ» (کی بجائے) یہ الفاظ کہے «فَإِنَّ لِلَّهِ خَلْقًا» پھر کتوں کے بھونکنے اور گدھوں کی آوازوں کا ذکر کیا، جیسے مذکورہ بالا روایت میں ہوا ہے۔ یزید بن عبداللہ بن ہاد نے کہا کہ مجھے شرجیل حاجب نے سیدنا جابر بن عبداللہ رضی اللہ عنہ سے، انہوں نے رسول اللہ صلی اللہ علیہ وسلم سے اس حدیث کے مثل روایت کیا۔ [سنن ابي داود/أبواب النوم /حدیث: 5104]

جناب عبیداللہ بن ابورافع نے اپنے والد سے روایت کیا، وہ کہتے ہیں کہ ”جب سیدہ فاطمہ رضی اللہ عنہا نے سیدنا حسن بن علی رضی اللہ عنہ کو جنم دیا تو میں نے دیکھا کہ رسول اللہ صلی اللہ علیہ وسلم نے ان کے کان میں نماز والی اذان کہی تھی۔“ [سنن ابي داود/أبواب النوم /حدیث: 5105]

ام المؤمنین سیدہ عائشہ رضی اللہ عنہا نے بیان کیا کہ ”رسول اللہ صلی اللہ علیہ وسلم کے پاس چھوٹے بچوں کو لایا جاتا تھا تو آپ صلی اللہ علیہ وسلم ان کے لیے برکت کی دعا فرمایا کرتے تھے۔“ یوسف بن موسیٰ نے مزید کہا کہ ”آپ صلی اللہ علیہ وسلم انہیں گھٹی بھی دیا کرتے تھے، اور برکت کا ذکر نہیں کیا۔“ [سنن ابي داود/أبواب النوم /حدیث: 5106]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے مجھ سے فرمایا: ”کیا تم میں کوئی «مُغَرَّب» بھی پائے گئے ہیں؟“ میں نے عرض کیا: ” «مُغَرَّب» سے کیا مراد ہے؟“ آپ صلی اللہ علیہ وسلم نے فرمایا: ”وہ بچے جن میں جن شریک ہوں۔“ [سنن ابي داود/أبواب النوم /حدیث: 5107]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو تم سے اللہ کے نام پر پناہ طلب کرے اسے پناہ دو اور جو تم سے اللہ کے چہرے کے واسطے سے سوال کرے اس کو دو۔“ عبیداللہ کے الفاظ ہیں: «مَنْ سَأَلَكُمْ بِاللّٰهِ» ”جو تم سے اللہ کے واسطے سے سوال کرے۔“ [سنن ابي داود/أبواب النوم /حدیث: 5108]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو تم سے اللہ کے واسطے سے امان مانگے، اسے امان دو۔ اور جو تم سے اللہ کے واسطے سے سوال کرے، اس کو دو۔“ سہل اور عثمان نے کہا: ”اور جو تمہاری دعوت کرے، اسے قبول کرو۔“ اور پھر یہ سب راوی متفق ہیں: ”اور جو تمہارے ساتھ نیکی کرے، اس کو اس کا بدلہ دو۔“ مسدد اور عثمان نے کہا: ”اگر بدلہ نہ پاؤ تو اس کے لیے اللہ سے دعا کرو حتیٰ کہ تمہیں یقین ہو جائے کہ تم نے اس کا بدلہ دے دیا ہے۔“ [سنن ابي داود/أبواب النوم /حدیث: 5109]