حضرت عبداللہ بن عمر رضی اللہ عنہما سے روایت ہے، انہوں نے فرمایا: ”جنگِ احد کے موقع پر مجھے رسول اللہ صلی اللہ علیہ وسلم کی خدمت میں حاضر کیا گیا تو میری عمر چودہ سال تھی۔ رسول اللہ صلی اللہ علیہ وسلم نے مجھے (جنگ میں شریک ہونے کی) اجازت نہ دی۔ اور غزوہ خندق کے موقع پر، جب میں پندرہ سال کا تھا، مجھے رسول اللہ صلی اللہ علیہ وسلم کی خدمت میں پیش کیا گیا تو آپ نے مجھے (جنگ میں شریک ہونے کی) اجازت دے دی۔“ حضرت نافع رحمہ اللہ بیان کرتے ہیں: میں نے حضرت عمر بن عبدالعزیز رحمہ اللہ کے دورِ خلافت میں انہیں یہ حدیث سنائی تو انہوں نے فرمایا: ”یہ (عمر) بچے اور بڑے کے درمیان حدِ فاصل ہے۔“ [سنن ابن ماجه/كتاب الحدود/حدیث: 2543]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی مسلمان کی پردہ پوشی کرے گا تو اللہ تعالیٰ دنیا اور آخرت میں اس کا پردہ رکھے گا۔“ [سنن ابن ماجه/كتاب الحدود/حدیث: 2544]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جہاں تک حد لگانے سے بچاؤ کی گنجائش ملے، حد رفع کرو۔“ [سنن ابن ماجه/كتاب الحدود/حدیث: 2545]

حضرت عبداللہ بن عباس رضی اللہ عنہما سے روایت ہے، نبی صلی اللہ علیہ وسلم نے فرمایا: ”جو شخص اپنے مسلمان بھائی کی برہنگی چھپائے گا تو اللہ تعالیٰ قیامت کے دن اس کی برہنگی چھپائے گا۔ اور جو شخص اپنے مسلمان بھائی کا پردہ فاش کرے گا تو اللہ تعالیٰ اس کا پردہ فاش کرے گا حتی کہ اسے اس کے گھر کے اندر رسوا کر دے گا۔“ [سنن ابن ماجه/كتاب الحدود/حدیث: 2546]

حضرت عائشہ رضی اللہ عنہا سے روایت ہے، انہوں نے فرمایا: ”قریش بنو مخزوم کی اس خاتون کے معاملے میں بہت فکر مند ہوئے جس نے چوری کی تھی۔ انہوں نے کہا: ”اس کے بارے میں رسول اللہ صلی اللہ علیہ وسلم سے کون عرض کر سکتا ہے؟“ (آخر) انہوں نے کہا: ”رسول اللہ صلی اللہ علیہ وسلم کے پیارے حضرت اسامہ بن زید رضی اللہ عنہما کے سوا اور کون یہ جرأت کر سکتا ہے؟“ چنانچہ حضرت اسامہ رضی اللہ عنہ نے رسول اللہ صلی اللہ علیہ وسلم سے بات کی تو رسول اللہ صلی اللہ علیہ وسلم نے فرمایا: ”کیا تو اللہ کی ایک حد کے بارے میں سفارش کرتا ہے؟“ پھر آپ صلی اللہ علیہ وسلم اٹھے اور خطبہ ارشاد فرمایا، (خطبے میں) نبی صلی اللہ علیہ وسلم نے فرمایا: ”لوگو! تم سے پہلے لوگ اسی وجہ سے تباہ ہوئے کہ ان میں جب کوئی معزز (امیر) آدمی چوری کرتا تو اسے چھوڑ دیتے تھے اور جب کوئی کمزور (غریب) آدمی چوری کرتا تو اسے حد لگا دیتے۔ قسم ہے اللہ کی! اگر محمد ( صلی اللہ علیہ وسلم ) کی بیٹی فاطمہ (رضی اللہ عنہا) بھی چوری کرتی تو میں اس کا بھی ہاتھ کاٹ دیتا۔““ راویِ حدیث محمد بن رمح نے کہا: ”میں نے امام لیث بن سعد رحمہ اللہ کو فرماتے ہوئے سنا، وہ بیان کر رہے تھے: ”اللہ تعالیٰ نے انہیں (حضرت فاطمہ رضی اللہ عنہا کو) چوری (جیسی نازیبا حرکت) سے محفوظ فرمایا تھا۔“ اور ہر مسلمان کو یہی کہنا چاہیے (کہ حضرت فاطمہ رضی اللہ عنہا سے اس قسم کی غلطی کا صدور ممکن نہیں لیکن قانون اعلیٰ اور ادنیٰ سب کے لیے برابر ہے۔)“ [سنن ابن ماجه/كتاب الحدود/حدیث: 2547]

حضرت مسعود ابن اسود رضی اللہ عنہ سے روایت ہے، انہوں نے فرمایا: ”جب اس عورت نے رسول اللہ صلی اللہ علیہ وسلم کے گھر سے کمبل چرا لیا تو ہم اس معاملے میں بہت فکرمند ہوئے۔ وہ قریش کی ایک عورت تھی۔ ہم بات کرنے کے لیے نبی صلی اللہ علیہ وسلم کی خدمت میں حاضر ہوئے اور ہم نے کہا: ”ہم اس کے جرمانے کے طور پر چالیس اوقیے (چاندی) دے دیں گے۔“ رسول اللہ صلی اللہ علیہ وسلم نے فرمایا: ”اس کے لیے یہی بہتر ہے کہ اسے (سزا دے کر گناہ سے) پاک کر دیا جائے۔“ ہم نے جب رسول اللہ صلی اللہ علیہ وسلم کی نرم گفتگو سنی تو ہم حضرت اسامہ رضی اللہ عنہ کے پاس گئے اور کہا: ”اللہ کے رسول صلی اللہ علیہ وسلم سے بات کرو۔“ رسول اللہ صلی اللہ علیہ وسلم نے جب یہ صورت حال دیکھی تو خطبہ دینے کھڑے ہو گئے اور فرمایا: ”تم اللہ کی ایک حد (کے نفاذ کو روکنے) کے لیے اصرار کیوں کر رہے ہو جو اللہ کی ایک بندی پر آ پڑی ہے؟ قسم ہے اس ذات کی جس کے ہاتھ میں محمد ( صلی اللہ علیہ وسلم ) کی جان ہے! اگر اللہ کے رسول ( صلی اللہ علیہ وسلم ) کی بیٹی بھی وہ غلطی کرتی جو اس عورت نے کی ہے تو محمد ( صلی اللہ علیہ وسلم ) اس کا بھی ہاتھ کاٹ دیتا۔““ [سنن ابن ماجه/كتاب الحدود/حدیث: 2548]

حضرت ابوہریرہ، حضرت زید بن خالد اور حضرت شبل رضی اللہ عنہم سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کی خدمت میں حاضر تھے کہ ایک آدمی حاضر خدمت ہوا اور کہا: ”میں آپ کو اللہ کی قسم دے کر کہتا ہوں کہ ہمارا فیصلہ اللہ کے قانون کے مطابق کیجئے۔“ اس کا مخالف (دوسرا آدمی) زیادہ سمجھ دار تھا اس نے کہا: ”(جی ہاں) ہمارا فیصلہ اللہ کی کتاب کے مطابق کر دیجئے اور مجھے بات کرنے کی اجازت دیجئے۔“ نبی صلی اللہ علیہ وسلم نے فرمایا: ”کہو۔“ اس نے کہا: ”میرا بیٹا اس شخص کے ہاں نوکر تھا، اس نے اس کی بیوی سے بدکاری کر لی۔ میں نے سو بکریاں اور ایک غلام اس کا فدیہ دے دیا۔ پھر میں نے اہل علم میں سے متعدد افراد سے (مسئلہ) پوچھا تو مجھے بتایا گیا کہ میرے بیٹے کی سزا سو کوڑے اور ایک سال کی جلا وطنی ہے، اور اس کی بیوی کی سزا رجم ہے۔“ اللہ کے رسول صلی اللہ علیہ وسلم نے فرمایا: ”قسم ہے اس ذات کی جس کے ہاتھ میں میری جان ہے! میں تمہارے درمیان اللہ کی کتاب کے مطابق ہی فیصلہ کروں گا۔ سو بکریاں اور غلام تم واپس لے لو۔ اور تیرے بیٹے کی سزا سو کوڑے اور ایک سال کی جلا وطنی ہے“، اور (دوسرے صحابی سے فرمایا:) ”اُنَیس! اس شخص کی عورت کے پاس جاؤ، اگر وہ (اپنے جرم کا) اعتراف کر لے تو اسے سنگسار کر دینا۔“ (امام ابن ماجہ کے استاد) حضرت ہشام بن عمار رحمہ اللہ نے فرمایا: ”حضرت اُنَیس رضی اللہ عنہ اس عورت کے پاس گئے (اور اس سے پوچھا) تو اس نے اعتراف کر لیا، چنانچہ انہوں نے اسے سنگسار کر دیا۔“ [سنن ابن ماجه/كتاب الحدود/حدیث: 2549]

حضرت عبادہ بن صامت رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ” «خُذُوا عَنِّي، خُذُوا عَنِّي» ”مجھ سے (اللہ کا حکم) حاصل کر لو، مجھ سے (اللہ کا حکم) حاصل کر لو“، اللہ تعالیٰ نے ان کے لیے ایک راستہ (اور قانون) مقرر کر دیا ہے۔ کنوارے لڑکے اور کنواری لڑکی کی سزا سو کوڑے مارنا اور ایک سال کے لیے جلاوطن کرنا ہے اور شادی شدہ مرد اور شادی شدہ عورت کی سزا سو کوڑے مارنا اور سنگسار کرنا ہے۔“ [سنن ابن ماجه/كتاب الحدود/حدیث: 2550]

حضرت حبیب بن سالم رحمہ اللہ سے روایت ہے، انہوں نے فرمایا: ”حضرت نعمان بن بشیر رضی اللہ عنہ کی خدمت میں ایک مرد پیش کیا گیا جس نے اپنی بیوی کی لونڈی سے مباشرت کی تھی۔ حضرت نعمان رضی اللہ عنہ نے فرمایا: ”میں اس کے بارے میں وہی فیصلہ کروں گا جو رسول اللہ صلی اللہ علیہ وسلم کا فیصلہ ہے۔“ پھر فرمایا: ”اگر عورت نے مرد کو لونڈی سے مباشرت کی اجازت دی تھی تو میں اس (مرد) کو سو کوڑے لگواؤں گا اور اگر اس نے اجازت نہیں دی تھی تو میں اسے سنگسار کروا دوں گا۔““ [سنن ابن ماجه/كتاب الحدود/حدیث: 2551]

حضرت سلمہ بن محبق رضی اللہ عنہ سے روایت ہے کہ رسول اللہ صلی اللہ علیہ وسلم کی خدمت میں ایک مرد پیش کیا گیا جس نے اپنی بیوی کی لونڈی سے مباشرت کی تھی، رسول اللہ صلی اللہ علیہ وسلم نے اسے حد نہیں لگائی۔ [سنن ابن ماجه/كتاب الحدود/حدیث: 2552]