حضرت ابو سعید رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے تکبر کی وجہ سے اپنا تہبند گھسیٹا، اللہ تعالیٰ قیامت کے دن اس کی طرف (رحمت کی) نظر نہیں کرے گا۔“ عطیہ رضی اللہ عنہ نے بیان کیا: ”بلاط کے مقام پر میں ابن عمر رضی اللہ عنہ سے ملا اور ان سے ابو سعید رضی اللہ عنہ کی اس حدیث کا ذکر کیا کہ وہ رسول اللہ صلی اللہ علیہ وسلم سے (یہ حدیث) بیان فرماتے ہیں۔ ابن عمر رضی اللہ عنہ نے اپنے کانوں کی طرف اشارہ کر کے فرمایا: ”(یہ صحیح ہے۔) میرے کانوں نے اسے (رسول اللہ صلی اللہ علیہ وسلم سے) سنا اور میرے دل نے یاد رکھا۔““ [سنن ابن ماجه/كتاب اللباس/حدیث: 3570]

حضرت ابوہریرہ رضی اللہ عنہ سے روایت ہے کہ ان کے پاس سے ایک قریشی نوجوان گزرا جو موٹے کپڑے کی چادر زمین پر گھسیٹ رہا تھا، انہوں نے فرمایا: ”بھتیجے! میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”جو شخص تکبر کی وجہ سے اپنا کپڑا گھسیٹ کر چلتا ہے، قیامت کے دن اللہ تعالیٰ اس کی طرف (رحمت کی) نظر نہیں فرمائے گا۔“” [سنن ابن ماجه/كتاب اللباس/حدیث: 3571]

حضرت حذیفہ رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے میری یا اپنی پنڈلی کے پٹھے کے نچلے حصے پر ہاتھ رکھا اور فرمایا: ”یہ تہبند کی جگہ ہے۔ اگر تو (یہاں تک رکھنا) نہ چاہے تو نیچے کر لے۔ اگر تو نہ چاہے تو (اور) نیچے کر لے۔ اگر تو (اتنا سا اونچا بھی رکھنا) نہ چاہے تو (معلوم ہونا چاہیے کہ) تہبند کا ٹخنوں میں کوئی حق نہیں۔“ [سنن ابن ماجه/كتاب اللباس/حدیث: 3572]

حضرت عبدالرحمن بن یعقوب جہنی حرقی رحمہ اللہ سے روایت ہے، انہوں نے کہا: میں نے حضرت ابوسعید رضی اللہ عنہ سے کہا: ”آپ نے رسول اللہ صلی اللہ علیہ وسلم سے تہبند کے بارے میں کوئی فرمان سنا ہے؟“ انہوں نے کہا: ”ہاں، میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”مومن کا تہبند (شلوار، پینٹ اور پائجامہ وغیرہ) اس کی پنڈلیوں کے نصف تک (بلند) ہوتا ہے، اس جگہ اور ٹخنوں کے درمیان رکھنے میں اس پر گناہ نہیں، اور جو ٹخنوں سے نیچے ہو وہ جہنم میں ہے۔““ نبی صلی اللہ علیہ وسلم نے یہ بات تین بار فرمائی: ”جو شخص تکبر کے ساتھ تہبند (زمین پر) گھسیٹے گا اللہ تعالیٰ اس کی طرف (رحمت کی نظر سے) نہیں دیکھے گا۔“ [سنن ابن ماجه/كتاب اللباس/حدیث: 3573]

حضرت مغیرہ بن شعبہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اے سفیان بن سہل! کپڑا (جائز حد سے زیادہ) نہ لٹکا، اللہ تعالیٰ کپڑا لٹکانے والوں کو پسند نہیں فرماتا۔“ [سنن ابن ماجه/كتاب اللباس/حدیث: 3574]

ام المؤمنین حضرت ام سلمہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم کو کوئی کپڑا قمیص سے زیادہ پسند نہیں تھا۔“ [سنن ابن ماجه/كتاب اللباس/حدیث: 3575]

حضرت عبداللہ بن عمر رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”(جائز حد سے زیادہ) لٹکانا تہبند میں بھی ہوتا ہے، قمیص میں بھی اور پگڑی میں، جو شخص تکبر کے طور پر کسی بھی چیز کو لٹکائے، قیامت کے دن اللہ تعالیٰ اس کی طرف (نظرِ رحمت سے) نہیں دیکھے گا۔“ (امام ابن ماجہ رحمہ اللہ کے استاد) ابوبکر بن ابی شیبہ رحمہ اللہ نے فرمایا: ”یہ کیسی نادر حدیث ہے!“ [سنن ابن ماجه/كتاب اللباس/حدیث: 3576]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”رسول اللہ صلی اللہ علیہ وسلم ایسی قمیص پہنتے تھے جس کی آستینیں بھی چھوٹی ہوتی تھیں اور لمبائی بھی کم ہوتی تھی۔“ [سنن ابن ماجه/كتاب اللباس/حدیث: 3577]

حضرت قرہ بن ایاس مزنی رضی اللہ عنہ سے روایت ہے، انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کی بیعت کی۔ اس وقت آپ صلی اللہ علیہ وسلم کا بٹن کھلا ہوا تھا۔“ حضرت قرہ بن عبداللہ رضی اللہ عنہ فرماتے ہیں: ”میں نے (حضرت قرہ رضی اللہ عنہ کے بیٹے) معاویہ بن قرہ رضی اللہ عنہ اور ان کے بیٹے کو سردیوں اور گرمیوں میں جب بھی دیکھا، ان کے بٹن کھلے ہوئے دیکھے۔“ [سنن ابن ماجه/كتاب اللباس/حدیث: 3578]