سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جب عمر نے اسلام قبول کیا تو میرے پاس سیدنا جبریل امین علیہ السلام تشریف لائے اور بولے: عمر رضی اللہ عنہ کے اسلام لانے پر آسمان والوں نے بھی خوشیاں منائی ہیں۔ ٭٭ یہ حدیث صحیح ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4541]

سیدنا عبداللہ بن عمر رضی اللہ عنہما فرماتے ہیں: جب سیدنا عمر رضی اللہ عنہ اسلام لائے تو رسول اللہ صلی اللہ علیہ وسلم نے یہ دعا مانگتے ہوئے تین مرتبہ ان کے سینے پر ہاتھ مارا ” اے اللہ! عمر کے سینے میں جو میل کچیل ہے اس کو نکال دے اور اس کو ایمان میں بدل دے “ ٭٭ یہ حدیث صحیح ہے، مستقیم الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4542]

سیدنا عبداللہ بن عمر رضی اللہ عنہما فرماتے ہیں: سیدنا عمر رضی اللہ عنہ نے حرم مکہ میں مشرکوں سے لڑنا شروع کیا، آپ صبح سے مسلسل ان کے ساتھ لڑ رہے تھے حتی کہ سورج سر پر آ گیا، پھر آپ تھک کر بیٹھ گئے۔ تو ان کے پاس ایک خوبصورت آدمی آیا جس نے سرخ رنگ کی چادر اوڑھی ہوئی تھی اور قوسی قمیص پہنے ہوئے تھا۔ اس نے آخر لوگوں کو آپ سے ہٹایا اور کہنے لگا: تم لوگ اس شخص سے کیا چاہتے ہو؟ لوگوں نے کہا: اس نے اپنا دین بدل لیا ہے۔ اس نے کہا: یہ آدمی اچھا ہے کہ اس نے اپنے لئے ایک دین چنا ہے، تم اس کو اس کے حال پر چھوڑ دو، تمہارا کیا خیال ہے؟ بنو عدی سیدنا عمر رضی اللہ عنہ کے قتل پر راضی ہوں گے؟ نہیں خدا کی قسم! بنو عدی راضی نہیں ہوں گے۔ اس دن سیدنا عمر رضی اللہ عنہ نے کہا: اے اللہ کے دشمنو! خدا کی قسم! اگرہم تین سو تک پہنچ گئے تو ہم تمہیں یہاں سے نکال دیں گے۔ (سیدنا عبداللہ بن عمر رضی اللہ عنہما فرماتے ہیں) میں نے بعد میں والد صاحب سے پوچھا کہ اس دن جس آدمی نے آپ کا دفاع کیا تھا وہ کون تھا؟ تو آپ نے فرمایا: عمرو بن العاص کا والد عاص بن وائل۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4543]

سیدنا عبداللہ بن عباس رضی اللہ عنہما فرماتے ہیں: جب سیدنا عمر رضی اللہ عنہ مسلمان ہوئے تو مشرکین نے کہا: آج ہماری آدھی قوم جاتی رہی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4544]

سیدنا عقبہ بن عامر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر میرے بعد کوئی نبی ہوتا تو عمر بن خطاب رضی اللہ عنہ نبی ہوتے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4545]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: میں نے خواب میں دیکھا ہے کہ مجھے دودھ کا بھرا ہوا پیالہ دیا گیا۔ میں نے اس میں سے پیٹ بھر کر پیا۔ حتیٰ کہ میں نے اس کو جلد اور گوشت کے درمیان ایک رگ میں دیکھا پھر اس میں سے کچھ بچ گیا تو میں نے وہ عمر بن خطاب رضی اللہ عنہ کو دے دیا۔ صحابہ کرام رضی اللہ عنہم نے عرض کی: یا نبی اللہ صلی اللہ علیہ وسلم وہ علم تھا جو اللہ تعالیٰ نے آپ کو عطا فرمایا ہے۔ آپ اس سے بھرپور ہو گئے اور اس سے کچھ بچ گیا تو آپ نے وہ عمر بن خطاب رضی اللہ عنہ کو عطا فرما دیا۔ رسول اللہ صلی اللہ علیہ وسلم نے فرمایا: تم نے صحیح سمجھا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4546]

سیدنا عبداللہ رضی اللہ عنہ فرماتے ہیں: اگر سیدنا عمر رضی اللہ عنہ کا علم ترازو کے ایک پلڑے میں رکھا جائے اور دوسرے پلڑے میں تمام لوگوں کا علم رکھ دیا جائے تب بھی سیدنا عمر رضی اللہ عنہ کا پلڑا بھاری ہو گا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4547]

سیدنا عبداللہ بن مسعود رضی اللہ عنہ فرماتے ہیں: سیدنا عمر رضی اللہ عنہ ہم سب سے زیادہ خوف خدا والے اور سب سے زیادہ قرآن کی تلاوت کرنے والے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4548]

ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: سابقہ امتوں میں محدث ہوا کرتے تھے۔ میری امت میں اگر کوئی محدث ہو سکتا ہے تو وہ ” عمر بن خطاب رضی اللہ عنہ “ ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4549]

سیدنا ابوالدرداء فرماتے ہیں: رسول اللہ صلی اللہ علیہ وسلم نے مختصر خطبہ ارشاد فرمایا، جب آپ خطبہ سے فارغ ہوئے تو فرمایا: اے ابوبکر! اٹھو اور خطبہ دو۔ سیدنا ابوبکر رضی اللہ عنہ نے نبی اکرم صلی اللہ علیہ وسلم کے خطبہ سے بھی مختصر خطبہ دیا، جب سیدنا ابوبکر رضی اللہ عنہ خطبہ سے فارغ ہوئے تو حضور صلی اللہ علیہ وسلم نے فرمایا: اے عمر! اٹھو، خطبہ دو، سیدنا عمر رضی اللہ عنہ نے کھڑے ہو کر نبی اکرم صلی اللہ علیہ وسلم کے خطبہ اور سیدنا ابوبکر رضی اللہ عنہ کے خطبہ سے مختصر خطبہ دیا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4550]